An Pinakadakulang Tawo na Nabuhay Kasuarin Pa Man

Kapitulo 131: Ultimong mga Pagpaheling, Asin Pentecostes 33 C.E.

Sa sarong okasyon naggibo si Jesus nin mga areglo na makipaghelingan sa saiya an gabos niang 11 apostol sa sarong bukid sa Galilea. Malinaw na an ibang disipulo pinaisi manongod sa pagtiripon, asin may total na labing 500 na tawo an nagtiripon. Nagin nanggad maogmahon na kombension ini kan magtunga si Jesus asin nagpoon na tokdoan sinda!

Kabilang sa iba pang bagay, ipinaliwanag ni Jesus sa dakulang kadaklan na itinao nin Dios sa saiya an gabos na autoridad sa langit asin sa daga. “Kaya paduman kamo,” an sadol nia, “asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.”

Isip-isipa nanggad iyan! An mga lalaki, babae, asin aki gabos nag-ako kan iyo man sanang sugo na ini na makikabtang sa gibohon na paggibo nin mga disipulo. Hihingoahon nin mga paratumang na paontokon an saindang paghuhulit asin pagtotokdo, pero rinanga sinda ni Jesus: “Uya! ako danay na nasa saindo sagkod sa pagtatapos kan palakaw nin mga bagay.” Si Jesus nagdadanay na nasa saiyang mga parasunod paagi sa banal na espiritu, tanganing tabangan sindang otobon an saindang ministeryo.

Gabos-gabos, nagpaheling si Jesus na buhay sa saiyang mga disipulo sa peryodo nin 40 aldaw pagkabuhay nia liwat. Durante kan mga pagpaheling na ini tinokdoan nia sinda manongod sa Kahadean nin Dios, asin idinoon nia kun ano an saindang mga paninimbagan bilang saiyang mga disipulo. Sa sarong okasyon nagpaheling pa ngani sia sa saiyang tugang sa ina na si Santiago asin kinombensir an dating daing pagtubod na ini na Sia man nanggad an Cristo.

Mantang nasa Galilea pa an mga apostol, malinaw na pinagbotan sinda ni Jesus na bumalik sa Jerusalem. Kan nakikipag-olay sa sainda duman, sia nagsabi sa sainda: “Dai kamo magharale sa Jerusalem, kundi padagos nindong halaton an ipinanuga kan Ama, na saindong nadangog sa sakuya; huli ta, sa katotoohan, si Juan nagbautismo sa tubig, alagad kamo babautismohan sa banal na espiritu pirang aldaw na sana poon ngonyan.”

Kan huri nakipaghelingan giraray si Jesus sa saiyang mga apostol asin pinangenotan sinda paluwas sa siudad sagkod sa Betania, na yaon sa sirangan na bakilid kan Bukid nin mga Olibo. Makangangalas, apisar kan gabos na itinaram nia manongod sa saiyang madali nang paghale pasiring sa langit, naniniwala sinda sagkod ngonyan na an saiyang Kahadean patitindogon digdi sa daga. Kaya naghapot sinda: “Kagurangnan, ibabalik mo ngonyan an kahadean sa Israel?”

Imbes na hingoahon giraray na itanos an saindang salang mga pagsabot, nagsimbag sana si Jesus: “Mayo sa saindo an pakaaram kan mga aldaw o panahon na ibinugtak nin Ama sa saiyang sadiring kapangyarihan.” Dangan, idinodoon giraray an dapat nindang gibohon, sia nagsabi: “Kamo mag-aako nin kapangyarihan kun dumatong na saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi nin daga.”

Mantang nagheheling pa sinda, si Jesus nagpoon na umitaas palangit, dangan an sarong panganoron itinago sia sa saindang pagheling. Pakahubad kan saiyang hawak na laman, suminakat sia sa langit bilang espiritung persona. Mantang an 11 padagos na nagtatangad sa langit, 2 lalaking nakaputing gubing an nagtunga sa kataed ninda. An nagmateryalisar na mga anghel na ini naghapot: “Mga lalaking taga-Galilea, taano kamo ta nagtatangad sa langit? An Jesus na ini na inako gikan sa saindo pasiring sa langit madatong sa iyo man sanang paagi na naheling sia nindong nagsasakat sa langit.”

An paagi kan paghale pa sana ni Jesus sa daga mayo nin pag-eksibir sa publiko asin an saiya sanang maimbod na mga parasunod an nagmamasid. Kaya mabalik sia sa iyo man sanang paagi​—na mayo nin pag-eksibir sa publiko asin an saiya sanang maimbod na mga parasunod an nakakamansay na sia nagbalik na asin pinonan na nia an saiyang presensia na may kapangyarihan sa Kahadean.

An mga apostol naghilig ngonyan hale sa Bukid nin mga Olibo, nag-agi sa Kababan nin Cedron, asin luminaog giraray sa Jerusalem. Nagdanay sinda duman bilang pagkuyog sa pagboot ni Jesus. Pakalihis nin sampulong aldaw, sa Judiong Kapiestahan nin Pentecostes 33 C.E., mantang mga 120 disipulo an nagtitiripon sa sarong kuarto sa itaas sa Jerusalem, sarong ribok na siring sa hagobohob nin makosog na doros an biglang nakapano sa bilog na harong. May naheling na mga dila na garo kalayo, asin may saro na nagtogdon sa lambang saro kan mga yaon duman, asin an mga disipulo gabos nagpoon na magtaram nin manlaenlaen na tataramon. Ini an pagbubo kan banal na espiritu na ipinanuga ni Jesus! Mateo 28:​16-20; Lucas 24:​49-52; 1 Corinto 15:5-7; Gibo 1:​3-15; 2:​1-4.

▪ Kiisay si Jesus nagtao nin mga instruksion bago naghale sa sarong bukid sa Galilea, asin ano an mga instruksion na ini?

▪ Anong karangahan an itinao ni Jesus sa saiyang mga disipulo, asin paano sia magdadanay na nasa sainda?

▪ Gurano kahaloy pagkabuhay nia liwat na si Jesus nagpaheling sa saiyang mga disipulo, asin ano an itinokdo nia sa sainda?

▪ Siisay na tawo na malinaw na bako pang disipulo bago nagadan si Jesus an pinahelingan ni Jesus?

▪ Ano an duwang ultimong pakipagtipon ni Jesus sa saiyang mga apostol, asin ano an nangyari sa mga okasyon na ini?

▪ Paanong si Jesus mabalik sa paagi na kapareho kan paghale nia?

▪ Ano an nangyari kan Pentecostes 33 C.E.?