An Pinakadakulang Tawo na Nabuhay Kasuarin Pa Man

Kapitulo 132: Nasa Too nin Dios

An pagbubo kan banal na espiritu kan Pentecostes ebidensia na si Jesus nakabalik na sa langit. An bisyon na itinao sa disipulong si Esteban dai nahaloy pakatapos kaiyan nagpapatunay man na nag-abot na Sia duman. Bago sia gapoon huli sa saiyang maimbod na pagpatotoo, si Esteban nagkagsing: “Uya! Naheheling kong bukas an kalangitan asin an Aki nin tawo nagtitindog sa too nin Dios.”

Mantang nasa too nin Dios, hinahalat ni Jesus an pagboot gikan sa saiyang Ama: “Mandaog ka sa tahaw kan saimong mga kaiwal.” Pero mientras tanto, sagkod na sia humiro na tumang sa saiyang mga kaiwal, ano an ginigibo ni Jesus? Sia namamahala, o naghahade, sa saiyang linahidan na mga disipulo, na ginigiyahan sinda sa saindang aktibidad na paghuhulit asin inaandam sinda na magin, paagi sa pagbuhay liwat, saiyang kairibang hade sa Kahadean kan saiyang Ama.

Halimbawa, pinili ni Jesus si Saulo (na kan huri mas namidbid sa saiyang Romanong ngaran, an Pablo) na mangenot sa gibohon na paggibo nin mga disipulo sa ibang kadagaan. Si Saulo maigot sa Pagboot nin Dios, pero nalagalag sia kan Judiong mga namomoon sa relihion. Bilang resulta, bako sanang inaprobaran ni Saulo an paggadan ki Esteban kundi nagduman man sia sa Damasco na may darang autorisasyon hale sa halangkaw na saserdoteng si Caifas na arestadong ibalik sa Jerusalem an siisay man na lalaki asin babae na manompongan nia duman na nagsusunod ki Jesus. Alagad, mantang nasa dalan si Saulo, sarong makinang na liwanag an biglang nagkilyab sa palibot nia asin naholog sia sa daga.

“Saulo, Saulo, tadaw ta pinaglalamag mo ako?” an hapot nin sarong tingog hale sa dai naheheling na pinaggikanan. “Siisay ka, Kagurangnan?” an hapot ni Saulo.

“Ako si Jesus, na pinaglalamag mo,” an isinimbag.

Si Saulo, na nabuta kan milagrosong liwanag, sinabihan ni Jesus na lumaog sa Damasco asin maghalat nin mga instruksion. Dangan si Jesus nagpaheling sa sarong bisyon ki Ananias, na saro sa saiyang mga disipulo. Mapadapit ki Saulo, sinabihan ni Jesus si Ananias: “An tawong ini pinili kong kasangkapan na magdara kan sakong ngaran sa mga nasyon pati sa mga hade saka sa mga aki ni Israel.”

Tunay nanggad, paagi sa pagsuportar ni Jesus, si Saulo (na inaapod na ngonyan na Pablo) asin an iba pang mga ebanghelisador nagkaigwa nin dakulaon na kapangganahan sa saindang gibohon na paghuhulit asin pagtotokdo. Sa katunayan, mga 25 taon pakalihis kan pagpaheling saiya ni Jesus sa dalan pasiring sa Damasco, si Pablo nagsurat na an “maogmang bareta” “ikinahulit [na] sa gabos na linalang sa sirong nin langit.”

Pakaagi nin dakol pang taon, si Jesus nagtao nin mga serye nin bisyon sa saiyang namomotan na apostol, si Juan. Paagi sa mga bisyon na ini na ilinadawan ni Juan sa libro kan Biblia na Kapahayagan, sia garo man sana nabuhay tanganing maheling si Jesus na minabalik na may kapangyarihan sa Kahadean. Si Juan nagsabi na “paagi sa pasabong” sia dinara paabante sa “aldaw kan Kagurangnan.” Ano an “aldaw” na ini?

An maingat na pag-adal sa mga hula kan Biblia, kabale an hula mismo ni Jesus mapadapit sa huring mga aldaw, naghahayag na an “aldaw kan Kagurangnan” nagpoon sa makasaysayan na taon nin 1914, iyo, sa laog kan kapag-arakian na ini! Kaya kaidtong 1914 na si Jesus nagbalik na dai naheheling, na mayo nin pag-eksibir sa publiko asin an saiya sanang maimbod na mga lingkod an nakakaisi kan saiyang pagbalik. Kan taon na idto itinao ni Jehova ki Jesus an pagboot na mandaog sa tahaw kan saiyang mga kaiwal!

Sa pagkuyog sa pagboot kan saiyang Ama, pinalayas ni Jesus sa langit si Satanas asin an saiyang mga demonyo, na ihinolog sinda digdi sa daga. Pagkaheling kaini na nangyayari sa bisyon, si Juan nakadangog nin sarong tingog hale sa langit na nagpapahayag: “Nangyari na an kaligtasan asin an kapangyarihan asin an kahadean kan satong Dios asin an autoridad kan saiyang Cristo!” Iyo, kan 1914 nagpoon na si Jesus na mamahala bilang Hade!

Abaa kaogmang bareta ini para sa mga parasamba ki Jehova sa langit! Sinda dinagka: “Mag-ogma, kamo kalangitan asin kamo na nag-eerok dian!” Alagad ano an situwasyon kan mga nasa daga? “Herak man kan daga asin kan dagat,” an pagpadagos kan tingog hale sa langit, “huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.”

Yaon na kita mismo ngonyan sa halipot na panahon na iyan. An mga tawo pinagbubulagbulag na ngonyan magsalang tanganing lumaog sa bagong kinaban nin Dios o tanganing umagi sa kalaglagan. An totoo iyo na an saindo mismong kaaabtan dinedeterminaran na ngonyan basado sa saindong reaksion sa maogmang bareta kan Kahadean nin Dios na ihinuhulit sa bilog na daga sa irarom kan paggiya ni Cristo.

Kun matapos na an pagbubulagbulag sa mga tawo, si Jesu-Cristo magseserbi bilang Ahente nin Dios tanganing paraon sa daga an bilog na palakaw nin mga bagay ni Satanas asin an gabos na nagsusuportar dian. Gigibohon ni Jesus an paghaleng ini sa gabos na karatan sa ralaban na inaapod sa Biblia na Har–Magedon, o Armagedon. Pakatapos kaiyan, si Jesus, an pinakadakulang Persona sa uniberso ikaduwa ki Jehova Dios, dadakopon si Satanas asin an saiyang mga demonyo asin gagaposon sinda sa laog nin sangribong taon sa sarong “bungaw,” an boot sabihon, sarong kamugtakan nin garo gadan na pagkadaing maginibo. Gibo 7:​55-60; 8:​1-3; 9:​1-19; 16:​6-10; Salmo 110:​1, 2; Hebreo 10:​12, 13; 1 Pedro 3:22; Lucas 22:​28-30; Colosas 1:​13, 23; Kapahayagan 1:​1, 10; 12:​7-12; 16:​14-16; 20:​1-3; Mateo 24:14; 25:​31-33.

▪ Pagkasakat ni Jesus sa langit, saen sia namumugtak, asin ano an saiyang hinahalat?

▪ Sa kiisay namahala si Jesus pagkasakat sa langit, asin paano nahayag an saiyang pamamahala?

▪ Kasuarin nagpoon an “aldaw kan Kagurangnan,” asin ano an nangyari sa pagpoon kaiyan?

▪ Anong gibohon na pagbubulagbulag na nagpapadagos ngonyan an personal na nakakaapektar sa kada saro sa sato, asin basado sa ano ginigibo an pagbubulagbulag?

▪ Kun matapos na an pagbubulagbulag, anong mga pangyayari an masunod?