An Pinakadakulang Tawo na Nabuhay Kasuarin Pa Man

Kapitulo 133: Tataposon ni Jesus an Gabos na Hinahagad nin Dios

Kun an Guerrero-Hadeng si Jesu-Cristo haleon na si Satanas asin an saiyang maraot na kinaban, magkakaigwa nanggad nin dahelan na maggayagaya! Sa katapustapusi magpopoon na an matoninong na Sangribong Taon na Paghade ni Jesus!

Sa irarom kan paggiya ni Jesus asin kan saiyang kairibang hade, lilinigon kan mga makaliligtas sa Armagedon an mga kagabaan na nawalat kan matanos na ralaban na iyan. Posible na may panahon na an mga makaliligtas sa daga mangangaki man, asin an mga ini makikikabtang sa maogmang gibohon na pagkultibar sa daga na magin magayonon na garo parkeng tatamnan.

Pag-abot nin panahon paluluwason ni Jesus an dai mabilang na minilyon hale sa saindang mga lolobngan tanganing magkamit kan magayon na Paraisong ini. Gigibohon nia ini bilang kaotoban kan saiya mismong garantiya: “An oras maabot na an gabos na nasa mga lolobngan nin girumdoman . . . maruluwas.”

Kabilang sa mga bubuhayon liwat ni Jesus an dating paragibo nin maraot na nagadan kataed nia sa hariging pasakitan. Girumdomon na si Jesus nanuga sa saiya: “Sa katotoohan sinasabi ko saimo ngonyan, Ika makakaibahan ko sa Paraiso.” Dai, an tawong iyan dai dadarahon sa langit tanganing maghade kaiba ni Jesus, ni na si Jesus magigin giraray tawo asin maistar sa Paraisong daga kaiba nia. Imbes, si Jesus makakaibahan kan dating paragibo nin maraot sa sentido na bubuhayon Nia sia liwat sa Paraiso asin sisiertohon nia na an mga pangangaipo kaini, kapwa sa pisikal asin espirituwal, naaasikaso.

Isip-isipa nanggad iyan! Sa irarom kan mamomoton na pag-asikaso ni Jesus, an bilog na pamilya nin tawo​—an mga makaliligtas sa Armagedon, an saindang mga aki, asin an rinibong milyon na gadan na bubuhayon liwat na magkukuyog sa saiya—​maoswag pasiring sa pagkasangkap bilang tawo. Si Jehova, paagi sa saiyang hadeng Aki, si Jesu-Cristo, mag-eerok sa espirituwal na paagi sa kaibahan kan katawohan. “Asin,” arog kan sabi kan tingog hale sa langit na nadangog ni Juan, “papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.” Mayo nang tawo digdi sa daga na magsasakit o maghehelang.

Sa katapusan kan Sangribong Taon na Paghade ni Jesus, an situwasyon magigin arog nanggad kan orihinal na katuyohan nin Dios kan sabihan nia an enot na tawong mag-agom, si Adan asin Eva, na magpakadakol asin panoon an daga. Iyo, an daga mapapano nin matanos na rasa nin sangkap na mga tawo. Ini huli ta an mga pakinabang sa pantubos na atang ni Jesus iinaplikar na sa gabos. Mawawara na an kagadanan dahelan sa kasalan ni Adan!

Sa siring, natapos na ni Jesus an gabos na hinagad sa saiya ni Jehova. Kaya, sa katapusan kan sangribong taon, iientrega nia sa saiyang Ama an Kahadean asin an nasangkap nang pamilya nin tawo. Sa panahon na iyan bubutasan nin Dios si Satanas asin an saiyang mga demonyo hale sa bungaw nin garo gadan na pagkadaing maginibo. Sa anong katuyohan?

Bueno, sa katapusan kan sangribong taon, an kadaklan na nag-iistar sa Paraiso iyo an mga binuhay liwat na nungkang nabalo an saindang pagtubod. Bago nagadan, nungka nindang naaraman an mga panuga nin Dios asin sa siring dai nakapaheling nin pagtubod dian. Dangan, pakatapos na buhayon liwat asin tokdoan nin mga katotoohan sa Biblia, pasil para sa sainda sa Paraiso, na mayo nin ano man na pagtumang, na maglingkod sa Dios. Pero kun si Satanas tawan nin oportunidad na hingoahon na paontokon sinda sa padagos na paglilingkod sa Dios, mapatutunayan daw sindang maimbod sa irarom nin pagbalo? Tanganing resolberan an hapot na ini, bubutasan si Satanas.

An kapahayagan na itinao ki Juan naghahayag na pakatapos kan Sangribong Taon na Paghade ni Jesus, si Satanas magigin mapanggana na patalikodon sa paglilingkod sa Dios an dai dineterminaran na bilang nin mga tawo. Minsan siring, pagkatapos kan pangultimong pagbalo, si Satanas, an saiyang mga demonyo, asin an gabos na mapanggana niang nadaya lalaglagon sagkod lamang. Sa ibong na lado, an lubos na nabalo, maimbod na mga nakaligtas padagos na mabubuhay tanganing magkamit kan mga bendisyon kan saindang langitnon na Ama sa bilog na panahon na daing katapusan.

Malinaw nanggad, si Jesus nagkaigwa, asin padagos na magkakaigwa, nin mahalagang kabtang sa pag-otob kan mamuraway na mga katuyohan nin Dios. Kanigoan kamamuraway na ngapit an puede niatong kamtan bilang resulta kan gabos niang ginigibo bilang dakulang langitnon na Hade nin Dios. Pero, dai niato malilingawan an gabos na ginibo nia kan sia tawo pa.

Si Jesus boluntad na nagdigdi sa daga asin tinokdoan kita manongod sa saiyang Ama. Orog pa kaini ipinaheling nia sa halimbawa an mahalagang marhay na mga kualidad nin Dios. An satong puso napahihiro kun hinohorophorop niato an saiyang pambihirang kapusoan asin pagkalalaki, an saiyang dai mapantayan na kadonongan, an saiyang ekspertong marhay na abilidad bilang paratokdo, an saiyang daing takot na pangengenot, asin an saiyang mamomoton na pagkaherak asin pakikidamay. Kun satong ginigirumdom kun paano sia makuring nagsakit mantang itinatao nia an pantubos, na paagi sana kaiyan kita puedeng magkamit nin buhay, sierto nanggad na an satong puso napahihiro nin pagpahalaga sa saiya!

Tunay nanggad, kahangahangang tawo an satong naheling sa pag-adal na ini kan buhay ni Jesus! Risang marhay asin lubos an saiyang kadakulaan. Napahihiro kita na otrohon an mga tataramon kan Romanong gobernador na Poncio Pilato: “Uya! An tawo!” Iyo, tunay nanggad, “An tawo,” an pinakadakulang tawo na nabuhay kasuarin pa man!

Paagi sa pag-ako niato kan probisyon kan saiyang pantubos na atang, an pasan na kasalan asin kagadanan na minana ki Adan puedeng haleon sa sato, asin si Jesus puedeng magin satong “Amang Daing Sagkod.” An gabos na magkakamit nin buhay na daing katapusan dapat na magkua nin kaaraman bako sanang dapit sa Dios kundi siring man sa saiyang Aki, si Jesu-Cristo. An saindong pagbasa asin pag-adal sa librong ini makatabang logod saindo na kumua kan siring na nagtataong buhay na kaaraman! 1 Juan 2:​17; 1:7; Juan 5:​28, 29; 3:16; 17:3; 19:5; Lucas 23:43; Genesis 1:28; 1 Corinto 15:​24-28; Kapahayagan 20:​1-3, 6-10; 21:​3, 4; Isaias 9:6.

▪ Ano an magigin maogmang pribilehio kan mga makaliligtas sa Armagedon asin kan saindang mga aki?

▪ Sairisay pa an magkakamit nin Paraiso apuera sa mga makaliligtas sa Armagedon asin an saindang mga aki, asin sa anong sentido na si Jesus makakaibahan ninda?

▪ Ano an magigin situwasyon sa katapusan kan sangribong taon, asin ano an gigibohon ni Jesus sa panahon na iyan?

▪ Taano ta bubutasan si Satanas hale sa bungaw, asin sa katapustapusi ano an mangyayari sa saiya asin sa gabos na nagsusunod sa saiya?

▪ Paano si Jesus puedeng magin satong “Amang Daing Sagkod”?