An Piot na Dalan Pasiring sa Katalingkasan
KAKADIKIT na intelihenteng tawo an nakididiskutir na an uniberso may sinusunod na natural na mga ley. Kinokontrol kan mga ley na ini an gabos na bagay poon sa saraditon na atomo sagkod sa darakulaon na galaksia na may binilyon na bitoon. Kun mayo kaiyan, mayo nin pagplano asin mayo nin pakasabot; an buhay mismo dai puedeng mag-eksister. Paagi sa pagsabot sa natural na mga ley asin pakipagtabangan dian, an tawo nakahaman nin makangangalas na mga gibo, arog kan paglakaw sa bulan asin pagtransmiter nin de-kolor na mga retrato pasiring sa mga telebisyon sa satong harong hale sa arin man na lugar sa daga o dawa hale sa luwas kan atmospera kan daga.
Alagad kumusta an mga ley sa moral? An pagsunod daw dian kapakipakinabang asin mabunga man? Dakol an garo naghohona na mayo nin mga ley sa moral asin pinipili an mapagkonsinteng pilosopiya o relihion na nakapaninigo sa saindang sadiring mga kamawotan.
Minsan siring, may iba na laen man an pinipili, an ‘piot na dalan na pasiring sa buhay’ na nasusurat sa Biblia. Dai kita maninigong magngalas na minoriya sana an minapili kaini, ta si Jesus nagsabi dapit sa piot na dalan: “Diit an mga nakakukua kaiyan.” (Mateo 7:14) Taano ta diit sana?
Huli ta an piot na dana may restriksion kan mga ley asin prinsipyo nin Dios. Iyan makaaakit sana sa saro na sinserong nagmamawot na ioyon an saiyang buhay sa mga pamantayan nin Dios. Kabaliktaran na marhay sa halakbang na dalan, na garo may katalingkasan alagad sa katunayan nan-ooripon, an piot na dalan, na garo baga kadakol kan bawal, pinatatalingkas an saro sa lambang mahalagang bagay. An mga linderos kaiyan ibinugtak kan “sangkap na pagboot para sa katalingkasan.”—Santiago 1:25.
Kun Paano Nagpapatalingkas an Piot na Dalan
Totoo, bakong perming pasil na magdanay sa piot na dalan. An lambang nabubuhay na tawo bakong sangkap asin may minanang tendensia sa paggibo nin sala. Kaya an saro tibaad may tendensiang rumayo nin kadikit. Minsan siring, an mga pakinabang sa pagdanay sa ‘hayakpit na dalan’ bawi sa ano man na kinakaipuhan na pagdisiplina sa sadiri o mga pagliliwat, ta an Dios ‘nagtotokdo sa sato na pakinabangon an satong sadiri.’—Isaias 48:17; Roma 3:23.
Sa pag-ilustrar: An madonong na mga magurang nagpaplano nin ‘hayakpit na dalan’ nin dieta para sa saindang mga aki. Ini kun beses nangangahulogan nin pagigin estrikto sa mga oras nin pagkakan. Alagad kun magkaedad na an mga aki, aapresyaron ninda an mamomoton na pagdisiplina kan saindang mga magurang. Bilang mga adulto, nasisiraman na sinda sa masustansiang kakanon. Asin huli sa dakol na pagkakalaenlaen nin masustansiang kakanon nungka nindang mamamatean na sinda ineestriktohan.
Sa espirituwal na paagi, iyan man an ginigibo nin Dios sa mga nasa piot na dalan pasiring sa buhay. Pinatatalubo nia sa mga mahoyo an marahay na mga pagmawot na nagbubunga nin kaogmahan asin tunay na katalingkasan. Ini ginigibo nia paagi sa pagtao kan saiyang Tataramon, an Biblia. Dugang pa, inaagda nia kitang mamibi na logod tabangan kita kan saiyang espiritu, asin pinagbobotan nia kita na makiasosyar sa mga kapwa Kristiano, na puedeng magpakosog sa sato na magdanay sa piot na dana. (Hebreo 10:24, 25) Iyo, an Dios pagkamoot, asin napapasikad sa supremong kualidad na ini an saiyang mga katuyohan asin an gabos niang paagi.—1 Juan 4:8.
Kun nangingibabaw an pagkamoot, katoninongan, karahayan, pagpopogol sa sadiri, asin iba pang bunga kan espiritu nin Dios, an piot na dalan bakong garo baga kadakol kan bawal. Siring kan sabi kan teksto, “tumang sa mga siring dai nin pagboot.” (Galacia 5:22, 23) “Kun saen an espiritu ni Jehova, yaon an katalingkasan.” (2 Corinto 3:17) Minsan ngonyan, an tunay na mga Kristiano nakananamit na kan katalingkasan na ini. Talingkas sinda sa dakol na takot na ikinasasakit nin mga tawo ngonyan, arog baga kan pagkatakot dapit sa ngapit asin superstisyosong pagkatakot sa kagadanan. Nakaoogma nanggad na horophoropon an ngapit na “an daga mapapano nanggad kan kaaraman ni Jehova kun paanong an tubig nakatatahob sa mismong kadagatan”! (Isaias 11:9) Sa panahon na iyan, minsan an pagkatakot sa krimen mawawara na. Mawawara na sagkod lamang an mga barat asin rehas. An gabos makamamateng talingkas asin ligtas—aldaw asin banggi, sa laog nin harong asin sa luwas. Tunay nanggad na katalingkasan iyan!
Sinisierto sa Sato an Tabang nin Dios
Totoo, an pamumuhay kaoyon sa mga pamantayan nin Dios nagkakaipo nin paghihingoa, pero “an saiyang mga kapagbootan bakong magabat,” maski para sa bakong sangkap na mga tawo. (1 Juan 5:3) Mantang nakibabagay kita sa piot na dalan asin nakamamate kan mga pakinabang sa paglakaw dian, nakapatatalubo kita nin nag-oorog na pagkasurang sa mga hiro asin kaisipan kan mga nasa halakbang na dalan. (Salmo 97:10) An pagkuyog sa ley nin Dios nakaaakit sa mas marahay na naturalesa na nasa sato gabos. Imbes na “kakologan sa puso” asin “pagkalaglag kan espiritu” na yaon sa dakol, an Dios nanunuga: “Uya! An sakong mga lingkod magkukururahaw sa kagayagayahan huli sa marahay na kamugtakan kan puso.” Iyo, magayagaya asin talingkas an puso na sinanay ni Jehova.—Isaias 65:14.
Si Jesus nagadan tanganing gibohon na posible para sa sato an tunay na katalingkasan. An Biblia nagsasabi: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Ngonyan, bilang an Hade sa langitnon na Kahadean nin Dios, si Jesus an nananao kan mga pakinabang sa atang na iyan. Sa dai na mahahaloy, pakatapos kan “dakulang kahorasaan,” kun malaglag na an halakbang na dalan asin an mga yaon dian, mapasensia niang poponan na giyahan an makinuyog na katawohan sa natatada pang kabtang kan piot na dalan sagkod sa poro kaiyan, an pagkasangkap bilang tawo. (Kapahayagan 7:14-17; Mateo 24:21, 29-31) Sa katapustapusi maeeksperyensiahan niato an kaotoban kan dakulang panuga: “An linalang mismo bubutasan man hale sa kaoripnan nin kalapaan asin magkakaigwa kan mamuraway na katalingkasan kan mga aki nin Dios.” Daing maorog pa sa tao nin Dios na katalingkasan na ini. Pati an kagadanan hahaleon na.—Roma 8:21; Kapahayagan 21:3, 4.
Paagi sa malinaw na pakaheling asin pakasabot kun pasaen an piot na dalan, mas napipili nin saro an danang ini asin sia padagos na nakalalakaw dian. An mga hoben nangorognang natatabangan na dai magin halipot an pananaw asin dai mauyam sa ibinibilang nindang mga restriksion na itinatao kan mga pamantayan nin Dios. Nanonodan nindang helingon ini bilang prueba kan pagkamoot nin Dios asin bilang pansagang tumang sa mga kabikoan kan halakbang na dalan. (Hebreo 12:5, 6) Siempre, an saro kaipuhan na magin mapasensia, na ginigirumdom na nagkakaipo nin panahon na magpatalubo nin diosnon na mga kualidad asin kamawotan, kun paanong nagkakaipo nin panahon an sarong namumungang kahoy na magpaluwas nin marahay na bunga. Alagad an kahoy magbubunga kun iyan kinukultibar asin binabaribi.
Kaya pag-adalan an Tataramon nin Dios, makiasosyar sa iba pang mga Kristiano, asin “mamibi nin daing ontok” para sa banal na espiritu. (1 Tesalonica 5:17) Manarig sa Dios na tabangan kamong ‘itanos an saindong mga dana.’ (Talinhaga 3:5, 6) Alagad praktikal daw an gabos na ini? Talaga daw na nag-aaser iyan? Iyo, nag-aser iyan ki Tom siring man ki Mary, na nasambitan sa nakaaging artikulo.
Uminontok Sinda sa Paglakaw sa Halakbang na Dalan
Si Tom nagsurat: “Kan kabangaan kan mga taon nin 1970, nakaolay mi an Mga Saksi ni Jehova kan an saro sa sainda magsongko sa harong mi. An pag-orolay nagbunga nin pag-adal sa Biblia. Luway-luway na pinonan kong linigon an sakong buhay. Nabautismohan ako kan 1982 asin ngonyan naglilingkod ako sa lokal na kongregasyon. Bautisado na man ngonyan an samong aking lalaki. Nagpapasalamat ako sa agom ko huli sa pagkamatinios nia sa sako sa mga taon na idto bago ko nanodan an katotoohan. Asin orog sa gabos nagpapasalamat ako ki Jehova asin sa saiyang Aki, si Cristo Jesus, huli sa gabos nindang itinao sa samo asin huli sa paglaom na yaon sa samo ngonyan para sa ngapit.”
Asin kumusta man si Mary? Bueno, an pagmate nia nungka na siang patatawadon nin Dios, alagad boot niang makanood manongod sa saiya dahel sa saiyang mga aki. Kan mabaretaan nia na an Mga Saksi ni Jehova nagtotokdo nin Biblia sa saiyang kataed, nagpatabang man sia. Minsan siring, an saiyang nakatadom nang maraot na mga bisyo nagpadepisil sa pag-oswag. Atras-abante an pag-adal. Pero, pinakosog sia kan saiyang siete anyos na aking babae. “Sige sana, Ma. Kaya nindo iyan!” an sasabihon nia. Dangan orog na naghihingoa si Mary.
Kan magpuli an saiyang kasaroan, na saro man na nag-aabuso sa droga, uminiba man ini sa pag-adal. Sa katapustapusi nadaog kan duwa an maraot nindang mga bisyo. Dangan, pakatapos na legalisaron an saindang kasal asin magpabautismo, nakaeksperyensia sinda nin dakulang kaogmahan asin sa kaenot-enote nakamate na sinda tunay na pamilya. Makamomondo, sa kahurihurihi nagadan si Mary sa AIDS, alagad nagadan sia na an saiyang puso nakasentro sa panuga kan Biblia na pagkabuhay liwat asin buhay sa sarong paraisong daga, na nalinigan sa gabos na gira kan nakagagadan na halakbang na dalan.
Iyo, mahihimong humale sa halakbang asin mahiwas na dalan na pasiring sa kalaglagan. Si Cristo Jesus nagsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Kun siring, taano ta dai kamo magdesisyon na lumakaw sa piot na dana na pasiring sa buhay? Paagi sa pagsapuso asin pag-aplikar kan saindong nanonodan sa Tataramon nin Dios, puedeng personal na maeksperyensiahan nindo an nakaoogma sa pusong panuga kan Biblia: “Mamimidbid nindo an katotoohan, asin bubutasan kamo kan katotoohan.”—Juan 8:32.