Bareta kan mga Parabalangibog kan Kahadean

An Tunay na mga Kristiano Paglalamagon

POON pa kan kaaldawan ni Abel, dakol sa mga lingkod ni Jehova an nagtitios nin relihiosong paglamag. (Lucas 11:49-51) Asin bakong makangangalas, ta an Biblia nagpapatanid na “an gabos na nagmamawot na mamuhay na may diosnon na debosyon sa kaibahan ni Cristo Jesus paglalamagon man”! (2 Timoteo 3:12) Huli kaiyan, sa labing 25 nasyon ngonyan, an Mga Saksi ni Jehova prohibido asin nagtitios nin paglamag.

Sa sarong nasyon na an Mga Saksi ni Jehova bako sanang prohibido kundi pinaglalamag man nin mga relihionista, labing 12,000 na parahayag kan maogmang bareta an maigot na nagpapadagos sa gibohon, na pinag-aadalan an Biblia kaiba kan labing 15,000 na tawo. Siempre, an saindang paghuhulit ginigibo na may pag-iingat. Sa kadaklan, ginigibo ninda an saindang Kristianong mga pagtiripon sa pribadong mga harong, asin nagmamaan sinda kun nag-iimbitar nin interesadong mga tawo sa siring na mga pagtiripon.

Dai pa sana nahahaloy an gobyerno nagin mas maboot an tratamiento sa mga Saksi, na ngonyan an kadaklan na paghuhulit mayo nin agresibong pag-olang. Minsan siring, an manlaenlaen na relihiosong grupo ginagamit an saindang impluwensia na mag-agyat nin ribok.

Sa sarong siudad an sarong anggot na sururog nin mga 200 na panatiko sa relihion nagpasiring sa sarong harong na kun saen mga 50 Saksi ni Jehova an may pagtiripon sa kongregasyon. An iba sa sururog may dara-darang mga gapo asin nagkukurahaw nin relihiosong mga sarabihon. An saindang risang katuyohan atakehon an mga Saksi asin raoton an harong. Minalataw na an mga pagtiripon haloy-haloy nang pinagmamasdan kan relihiosong mga lider asin hinalat ninda an tamang oras na umatake. An sururog malaog na kutana sa harong kan may 15 pulis na uminabot asin pinagbotan an kadaklan na magharale. Ipinagngalas ini kan mga Saksi, huli ta mayo sa sainda an nagkaigwa man lamang nin panahon na apodon an mga pulis.

Minsan siring, sa iba pang pangyayari, an mga paratumang nagin mas mapanggana. Nagkapirang Saksi an binista asin sinentensiahan na mabilanggo. Sarong kaso sa korte an nagkapirang taon nang napependiente, asin minalataw na an mga piskal nawaran na nin interes dian. Minsan siring, sa sutsut kan lokal na klero, an isyu dinara giraray sa korte, asin an Saksi sinentensiahan na mabilanggo.

Sa saro pang lugar an sarong grupo nin mga Saksi nagtiripon sa sarong pribadong harong tanganing selebraron an Pamanggihan kan Kagurangnan. Kan huri kan bangging idto inarestar nin mga pulis an kagharong asin an magurang sa kongregasyon na nangenot sa pagtiripon. Sa presinto, sinda binugbog nin makuri. Sarong maringis na pag-usisa an luminawig nin nagkapirang oras. An saro sa mga Saksi nagtios man nin pasakit na ibuntog sa sarong bobon nin malipot na tubig.

Taano ta ginigibo kan mga pulis an siring na pag-atake? Sa giraray, sarong grupo nin mga panatiko sa relihion, sa tabang kan lokal na klero, an nasa likod kan ginigibo kan mga pulis. Kan huri ihinayag kan hepe de pulisiya na an mga pag-arestar ginibo na mayo kan saiyang permiso. Sarong paghagad nin despensa an ipinahayag, asin dinisiplina an mga indibiduwal na responsable sa pambubugbog.

Sa bilog na kinaban an Mga Saksi ni Jehova padagos na naghuhulit kan maogmang bareta kan Kahadean nin Dios, minsan sa atubangan nin madahas na pagtumang. Sinusunod ninda an sadol ni Jesus: “Uya! Isinusugo ko kamo siring sa mga karnero sa tahaw nin mga lobo; kun siring magin kamong maingat siring sa mga halas alagad mahoyo siring sa mga salampati.”​—Mateo 10:16.

[Retrato sa pahina 31]

Si Abel an enot na linamag