Kun “Minsan Magsaen an Doros”

“KUN dai aram nin sarong tawo kun anong duongan an padudumanan nia, minsan magsaen an doros.” An mga tataramon na ini, na iinaatribwir sa Romanong pilosopo kan enot na siglo na si Lucio Aneo Seneca, nagpapatunay sa haloy nang minimidbid na katotoohan: Tanganing magkaigwa nin direksion an buhay, mahalaga an mga pasohan.

Minsan siring, parate na an buhay daing direksion na pag-anod. An dakol naninigoan na sanang lumikay sa mga gapo asin ariporos nin pan-aroaldaw na buhay. Mayong permanenteng posisyon, sinda nagigin garo mga alon na “ipinapadpad nguna nin doros asin sunod iinaapwak pabalik.” (Santiago 1:​6, “Phillips”) Para sa siring na mga tawo, “minsan magsaen an doros.”

An Biblia nagtatao nin mga halimbawa kaidtong mga may pasohan na pinag-aaabot, sa siring nagseserbing modelo para sa mga Kristiano ngonyan. Si Moises “nakatorohok na gayo sa pagtao kan balos.” (Hebreo 11:26) Nagsurat si Pablo: “Pinupunta ko an pasohan tanganing kamtan an premyo.” Dinagka nia an mga kapagtubod na “magkaigwa kan iyo man sanang kaisipan na ini.”​—Filipos 3:​14, 15, “Today’s English Version.”

Nakatorohok an satong mga mata sa mga panuga kan Biblia, arogon logod niato an pagtubod kan siring na mga tawo na may pasohan na pinag-aaabot.​—Ikomparar an Hebreo 13:7.