An Katalingkasan sa Pagsamba Binabatayan kan Singapore

KAN banggi nin Pebrero 24, 1995, apat na harong sa siudad nin Singapore an sinakyada nin mga pulis. Inarestar an may total na 69 katawo.a Kabilang sa sainda an sarong 71 anyos na babae asin duwang 15 anyos na aking babae. Taano? Iyan daw huli sa kriminal o subersibong aktibidad? Bako. Mayo ni saro sa sainda an naggigibo nin ano man na minsan sa pinakasadit na sentido ikabibilang na peligroso, inmoral, o antisosyal. Dai ninda isinasapeligro an moral na mga pamantayan, kaligtasan, asin kapakanan kan saindang mga kapwa Singaporeano. Pero, pakaruskaya kan apat na harong, dinara kan mga pulis sa presinto an 69 katawo, na nagtiripon tanganing mag-adal sa Biblia asin magkaigwa nin sosyal na pagtiripontipon. Magdamlag sindang ibinilanggo, inusisa, kinuanan nin mga gira sa moro, asin rinetrato​—iyo, trinatar na garo ordinaryong mga kriminal! Durante kan panahon na ini​—sagkod sa 18 oras sa bakong marahay na mga kamugtakan—​dai sinda tinogotan na magkaigwa nin abogado asin binawalan pa ngani na mag-apod sa telepono tanganing sabihon sa mga kapamilya kun haen sinda. Maiimahinar nanggad nin saro kun paano an siring na biglang aksion nakaapektar sa mga siudadanong ini na matoninong, makinuyog sa ley!

An pangyayari nagpapagirumdom kan mga kamugtakan durante kan mamondong mga aldaw nin Nazi Alemania asin kan panahon nin Komunismo sa Unyon Sobyet asin Sirangan na Europa. An sarong temporaryong bisita sa Singapore bako iyan an lalaoman na maheling sa malinigon asin mayaman na modernong siudad-estadong iyan. An Singapore nakagibo nin reputasyon bilang sarong ngangalasan sa ika-20 siglo sa ekonomiko asin sosyal na pag-oswag. Iyan sarong deklaradong demokrasya na igwa nin konstitusyon na naggagarantiya sa mga siudadano kaiyan nin pundamental na mga diretso nin tawo, kabale an katalingkasan sa pagtaram, relihion, asin pagtiripon.

Pero, an mga inarestar kan Pebrero pinunteriya huli sana ta sinda Mga Saksi ni Jehova na nagtitiripon tanganing mag-adal sa Biblia asin magkaigwa nin Kristianong pag-aramigohan. An akusasyon tumang sa sainda “pag-atender sa pagtiripon nin sarong ilegal na sosyedad.”

Sa katunayan, an Mga Saksi ni Jehova habong tawan nin legal na pagmidbid sa Singapore poon kan 1972 kan an Kongregasyon nin Singapore haleon sa opisyal na rehistro asin ipagbawal an mga literatura, kabale an mga Biblia, na ipinublikar kan Watch Tower Bible and Tract Society. Mayong oportunidad na itinogot tanganing diskutiron an mga alegasyon na pinagbasaran kan aksion. Dai pa sana nahahaloy, an legalidad kan opisyal na diskriminasyon na ini kinustion sa mga korte nin Singapore sa kaso kan apat na Saksing nasentensiahan kan Pebrero 1994 sa kasalan na pagkaigwa nin prohibidong literatura sa Biblia. An apelasyon kontra sa mga sentensia sa sainda binista kan Agosto 1994 asin tolos-tolos na ipinahayag na daing saysay. Si Huwes Prinsipal Yong Pung How kan Korte Suprema nagpahayag kan saiyang opinyon kan sunod na bulan. Ipinahayag nia na mayo nin pagbalga sa relihiosong katalingkasan asin na makatanosan an mga sentensia sa rason na an Mga Saksi ni Jehova peligro sa nasyonal na seguridad huli ta an mga miembro habong magpartisipar sa serbisyo militar. Kan Pebrero 17, 1995, an apat na Saksi naghagad nin permiso na iapelar an bakong paborableng desisyon na ini sa Korte de Apelasyon kan Singapore. Dai inako an aplikasyon.

An huring desisyon na ini napabaretang marhay sa diaryo sa Singapore na kontrolado nin gobyerno. Daing duwa-duwa na an desisyon na ini kan korte asin an ibinungang publisidad nagparisa kan suminunod na mga pangyayari. Mayo pang sarong semana nangyari an pag-arestar sa 69 Saksi. An mga akusasyon tumang sa apat kaini​—na mga siudadano nin Britania, Pransia, asin Luxembourg—​kan huri ipinahayag na daing saysay. Minsan siring, maski sa mga ini, makatatakot an eksperyensia. An sarong lalaki dakol nang taon na nag-iistar asin nagtatrabaho sa Singapore kaiba kan saiyang agom. Nawaran sinda nin trabaho asin arkiladong harong patin napiritan na magpaaram sa dakol na dayupot na katood.

An natadang 63 na adulto inakusar na kabilang sa ibinabawal na sosyedad, asin an iba inakusar man nin pagkaigwa nin prohibidong literatura. Napaaatubang sinda sa pinakahalawig na tolong taon na pagkabilanggo o multang S$3,000 ($2,100, E.U.) o pareho. An duwang 15 anyos na daragita separadong uminatubang sa korte juvenil.

Bakong Peligro sa Nasyonal na Karakter Asin Pagkasararo

Sa bilog na kinaban, sa labing 200 na kadagaan na ineerokan ninda, an Mga Saksi ni Jehova midbid bilang mga tawong disente, sadiosan, asin makinuyog sa ley. Midbid sinda sa saindang marigon na pagsayumang magpartisipar sa ano man na klaseng subersibo, kontra sa gobyernong aktibidad​—bakong sa-Kristianong aksion na puedeng magresulta sa pagkatiwalag, o pagkaekskomulgar ninda. Tunay nanggad, an gobyerno nin Singapore mayo nin ano man na ikatatakot sa sainda. Sinda bako nanggad na peligro sa nasyonal na seguridad o sentido nin nasyonal na karakter asin pagkasararo kan Singapore. (Roma 13:​1-7) Ini malinaw na isinabi sa sarong surat na may petsang Marso 21, 1995, hale ki Milton G. Henschel, an presidente kan Watch Tower Bible and Tract Society, ki Primer Ministro Goh Chok Tong nin Singapore. Inimprenta liwat digdi an surat na ini para sa kapakinabangan kan satong mga parabasa.

An mamomoton sa libertad na mga tawo sa negosyo, gobyerno, asin pribadong sektor interesadong magmamasid tanganing helingon kun ano an mangyayari sa situwasyon na ini sa Singapore. Mahiro daw an gobyerno nin Singapore kaoyon sa pundamental na mga diretso asin katalingkasan nin tawo na suportado kan mismong konstitusyon kaiyan asin kan internasyonal na komunidad nin mga nasyon? Tunay nanggad, an Mga Saksi ni Jehova sa bilog na kinaban nahahadit na marhay manongod sa saindang mga kapwa parasamba sa Singapore. Saindang ginigirumdom sinda sa mga pamibi ninda asin isinasaisip an pag-asegurar na yaon sa Biblia: “Si Jehova mamomoton sa hustisya, asin dai nia pababayaan an saiyang mga maimbod.”​—Salmo 37:28.

[Nota sa Ibaba]

[Kahon sa pahina 30]

Marso 21, 1995

Goh Chok Tong

Primer Ministro

Istana Annexe

Singapore 0923

Republika nin Singapore

Lee Kuan Yew

Ministro Mayor

Opisina kan Primer Ministro

460 Alexandra Road

37-00 PSA Bldg

Singapore 0511

Republika nin Singapore

Namomotan na mga Ginoo:

An sarong dai pa sana nahahaloy na report kan Reuters hale sa Singapore na may petsang Pebrero 25, 1995, nakahahadit na marhay. Ibinareta kaiyan na an mga pagtiripon para sa pag-adal sa Biblia kan Mga Saksi ni Jehova pinapondo kan mga pulis asin 69 katawo an inarestar. Isinentro kan baretang ini an atension kan kinaban sa situwasyon kan Mga Saksi ni Jehova sa Singapore, kun saen labing 20 taon nang ibinabawal an saindang mga aktibidad asin literatura.

Depisil saboton kun taano an sarong relihiosong organisasyon na hayag na nagpupunsionar na may lubos na proteksion kan ley sa labing 200 na nasyon ta bawal sa Singapore, sarong nasyon na nagsusuportar sa mga prinsipyo nin demokrasya. Orog nang nakahahadit iyan kun kokonsideraron an garantiya kan konstitusyon nin Singapore sa katalingkasan sa pagsamba para sa mga siudadano kaiyan.

An Mga Saksi ni Jehova nungkang nagtao nin ano man na peligro sa nasyonal na seguridad minsan saen. Tunay nanggad, sa bilog na kinaban reputasyon ninda an pagigin matoninong, mahigos, matanos sa moral, asin makinuyog sa ley​—mga kualidad na sierto kong pinalalakop nindo sa saindong nasyon.

Totoo na sa saindang estriktong pagsunod sa mga pamantayan kan Biblia para sa mga Kristiano, an paninindogan kan Mga Saksi ni Jehova kun beses dai naiintindihan o namimisrepresentar. Alagad, bako daw na totoo iyan sa kagpundar kan Kristianismo na minisrepresentar man na tumang ki “Cesar,” an gobyerno kan saiyang kaaldawan? Sinusunod sana kan Mga Saksi ni Jehova an halimbawa ni Jesus asin kan enot na mga Kristiano. Saindang iginagalang an gobyerno kun saen sinda nag-iistar, binabayadan an mga buhis ninda, asin pinalalakop an marahay na moral. Sinda sadiosan asin matanos na mga siudadano. An Mga Saksi ni Jehova nungkang nagpartisipar sa ano man na klaseng subersibong aktibidad sa arin man na nasyon asin masisierto ko sa saindo na an saindang presensia sa Singapore dai nagsasapeligro kan nasyonal na intereses kan saindong nasyon.

Huli sa dai pa sana nahahaloy na mga bareta sa media, an mapan-aping mga aksion na ginibo kan saindong gobyerno tumang sa Mga Saksi ni Jehova sa Singapore aram na ngonyan nin kadaklan. Iyan orog nang ikinahahadit kan saindang 12 milyones na kairiba sa bilog na kinaban. Hinahagad ko sa saindo na gamiton an saindong halangkaw na katongdan na remedyohan an situwasyon asin tawan an Mga Saksi ni Jehova sa saindong nasyon kan katalingkasan sa pagsamba asin kan konsensia na ginagarantiyahan kan Konstitusyon.

Naniniwala ako na an prangkang pakipag-olay sa mga representante kan Mga Saksi ni Jehova matabang na mahale an ano man na salang mga pakasabot manongod sa samong organisasyon asin aktibidad asin maasegurar sa saindo na an gobyerno nin Singapore mayo nin ano man na dapat na ikatakot sa Mga Saksi ni Jehova. Maoogma akong iareglo an siring na miting.

Linalaoman ko an saindong simbag.

An minagalang,

Milton G. Henschel

Presidente

[Pasasalamat para sa pinagkuanan kan retrato sa pahina 31]

Nik Wheeler/H. Armstrong Roberts