Mga Hapot Hale sa mga Parabasa
Sa Filipos 2:9, si Pablo nagsabi manongod ki Jesus: “Ilinangkaw sia nin Dios sa superyor na kamugtakan asin may kabootan na itinao sa saiya an ngaran na halangkaw kisa sa lambang ibang ngaran.” Ano an bagong ngaran na ini? Asin kun si Jesus mas hababa ki Jehova, paanong an ngaran ni Jesus halangkaw kisa sa lambang ibang ngaran?
An Filipos 2:8, 9 nagsasabi: “Orog pa kaiyan, kan makua nia [ni Jesus] an saiyang sadiri na kabaing nin tawo, sia nagpakumbaba asin nagin makinuyog sagkod sa kagadanan, iyo, kagadanan sa hariging pasakitan. Sa rason man mismong ini ilinangkaw sia nin Dios sa superyor na kamugtakan asin may kabootan na itinao sa saiya an ngaran na halangkaw kisa sa lambang ibang ngaran.”
An tekstong ini dai nangangahulogan na mantang si Jehova sana an igwa nin ngaran na absolutong halangkaw kisa sa lambang ibang ngaran, si Jesus saka si Jehova siertong saro sanang persona. Siring sa ipinaheheling kan konteksto sa Filipos kapitulo 2, inako ni Jesus an saiyang ilinangkaw na ngaran pagkabuhay nia liwat. Bago kaiyan, mayo sia kaini. Sa ibong na kampi, si Jehova perming supremo, asin an saiyang kamugtakan dai noarin man naliwat. An bagay na si Jesus nag-ako nin ngaran na halangkaw kisa sa ngaran nia bago kan saiyang daganon na paglilingkod nagpapatunay na sia bakong si Jehova man sana. Kan sabihon ni Pablo na si Jesus tinawan nin ngaran na halangkaw kisa sa lambang ibang ngaran, boot niang sabihon na yaon na ki Jesus ngonyan an pinakahalangkaw na ngaran sa gabos na linalang nin Dios.
Ano an halangkaw na ngaran ni Jesus? Tinatabangan kita kan Isaias 9:6 sa pagsimbag. Sa paghula manongod sa madatong na Mesiyas, si Jesus, an bersikulong iyan nagsasabi: “An sa-prinsipeng pamamahala mamumugtak sa saiyang abaga. Asin an saiyang ngaran aapodon na Makangangalas na Parahatol, Makakamhan na Dios, Amang Daing Sagkod, Prinsipe nin Katoninongan.” Digdi an “ngaran” ni Jesus may koneksion sa saiyang halangkaw na katongdan asin autoridad, na iyo man an pagsabot niato sa “ngaran na halangkaw kisa sa lambang ibang ngaran” na nasambitan sa Filipos 2:9. An lambang tuhod pinagbobotan na lumuhod ki Jesus bilang pagmidbid sa saiyang halangkaw na katongdan na may autoridad na itinao sa saiya ni Jehova—sarong katongdan na may autoridad na mas halangkaw kisa sa itinao sa siisay man na ibang linalang. An terminong “iba” sa traduksion na ini dai direktang irinerepresentar sa pundamental na tekstong Griego, alagad ipinaririsa iyan kan kahulogan kan bersikulo. An “ngaran” ni Jesus bakong halangkaw kisa sa saiyang sadiring ngaran kundi halangkaw kisa sa ngaran nin lambang ibang linalang.
Naoogma nanggad kita na umiba sa gabos na maimbod na anghel asin tawo sa pagluhod bilang pagmidbid sa ngaran ni Jesus! Ginigibo niato ini paagi sa pagpasakop ki Jesus sa ilinangkaw asin makapangyarihan na katongdan na itinao sa saiya ni Jehova—“para sa kamurawayan nin Dios na Ama.”—Filipos 2:11; Mateo 28:18.