An Sentro nin Edukasyon kan Watchtower—Nagsusugo nin mga Misyonero

AN Paadalan sa Biblia kan Watchtower sa Gilead nagkondukta nin mga klase sa laen-laen na lugar. Sa pag-oltanan kan 1943 asin 1960, sa mga pasilidad sa South Lansing, Nueva York, E.U.A., 35 klase, na kompuesto nin mga estudyante hale sa 95 kadagaan, an nag-ako nin espesyal na pagsasanay. Dangan an paadalan buminalyo sa pankinaban na opisina prinsipal sa Brooklyn, Nueva York, kun saen iyan nagpunsionar sa laog nin haros 28 taon. Poon kan 1988 sagkod sa pagpoon kan 1995, an Paadalan sa Gilead nagkondukta nin mga klase sa Wallkill, Nueva York.

Durante kan mga taon na ini pinahiwas kan paadalan an pagpunsionar kaiyan. Sa pagdirehir kaiyan sampulong semanang kurso nin pagtotokdo an itinao sa tolong klase sa Mejico; lima sa siring na mga klase an ginibo sa Alemania; duwa sa India. Poon kan 1987 sarong katabang na paadalan na inaapod na Paadalan sa Ministeryal na Pagsasanay an nagkondukta nin mga klase sa 34 kadagaan, na nagtatao nin walong semanang espesyal na kurso nin pagsasanay sa mga hoben na lalaki na kualipikado. Minsan siring, 20 semanang kurso nin pagtotokdo an itinao sa ika-99 klase nin Gilead, sa bago pa sanang itogdok na Sentro nin Edukasyon kan Watchtower sa Patterson, Nueva York, pagtotokdo na may kaibang detalyadong pag-adal sa bilog na Biblia, pag-orolay sa modernong aldaw na kasaysayan asin organisasyon kan Mga Saksi ni Jehova, patin bastanteng hatol dapit sa paglilingkod bilang misyonero sa ibang nasyon.

Kan Setyembre 2, naggraduwar an ika-99 klase na iyan. An tolong oras na programa sa graduwasyon ginibo sa bagong auditoryum sa Sentro nin Edukasyon kan Watchtower. Napano iyan. An dugang pang mga nagdadangog na nasa mga pasilidad kan Bethel sa Patterson, Wallkill, asin Brooklyn ikinonektar sa elektronikong paagi. Idto nakaoogmang aldaw bako sanang sa naggraduwar na klase kaiba an saindang mga paryente asin dayupot na mga katood kundi siring man sa ginatos na nakikabtang bilang boluntaryo sa pagtogdok kan magayon na bagong mga pasilidad sa paadalan.

Sa saiyang pambukas na pahayag, si Carey Barber kan Namamahalang Grupo itinorohok an atension sa kahalagahan kan nangyayari. Sia nagsabi: “Ini an magigin sentro kan pinakadakulang aktibidad sa pagtotokdo nin Dios na ginibo kasuarin pa man digdi sa daga.” Ipinaliwanag nia na kita nagdadangadang sa kulminasyon kan paglalaban kan banhi kan babae asin kan banhi kan halas. (Genesis 3:15) Ipinaheling nia na an solamenteng mga makaliligtas sa makangingirhat na paghampangan durante kan maabot na dakulang kahorasaan iyo an mga igwa nin tamang kaaraman sa Tataramon nin Dios asin makinuyog dian.

“An satong presenteng programa sa pagtotokdo,” an ipinahayag nia, “sinadya na darahon an bilog na banwaan ni Jehova sa gabos na lugar pasiring sa marahay na kamugtakan nin pagkamaygurang na ilinadawan sa Talinhaga 1:​1-4​—an pakaaram nin kadonongan asin disiplina, pakamansay sa pakasabot, pag-ako kan disiplina na nagtatao nin pakarorop, katanosan, paghusgar, pagkamatanos, asin kakayahan sa pag-isip.” Proteksion nanggad an pagkaigwa kan siring na espirituwal na mga kayamanan!

Hatol sa Naggraduwar na Klase

An pambukas na mga komentong iyan sinundan nin serye nin limang haralipot na pahayag na ipinanongod sa naggraduwar na klase. Si Harold Jackson, na dating instruktor sa Gilead asin ngonyan miembro na kan tawohan sa opisina prinsipal sa Brooklyn, nagsadol sa klase, “Mangapot nin Marigon sa Saindong Diosnon na Pagkakontento.” Si Lloyd Barry, sarong haloy nang misyonero asin ngonyan miembro na kan Namamahalang Grupo, nagpahayag dapit sa “Paglilingkod ki Jehova na May Kapakumbabaan.” Saiyang ipinaliwanag na an kualidad na ini mahalaga sa mga naggraduwar sa pakikibagay ninda sa bagong mga situwasyon siring man sa saindang relasyon sa mga kapwa misyonero, sa mga kongregasyon na paglilingkodan ninda, asin sa mga tawo sa lokal.

Si Karl Adams, na sa presente naglilingkod bilang saro sa mga instruktor sa Gilead, kinaolay an klase manongod sa hapot na “An Pagtubod Gigiyahan Kamo na Gibohon an Ano?” Pinakosog nia sinda na dai magin arog kan mga Israelita na nagreklamo manongod sa mga kamugtakan sa kaawagan asin naghidaw na bumalik sa Egipto kundi, imbes, magin arog ki Abraham, na nagsarig sa Kahadean nin Dios imbes na sa pagbalik sa Ur kan mga Caldeo bilang solusyon sa mga problema. (Exodo 16:​2, 3; Hebreo 11:​10, 15, 16) Si Ulysses Glass, an rehistrador sa paadalan, ginamit an eksperyensia ni Asaf na nasusurat sa Salmo 73 sa pagsadol sa naggraduwar na klase, “Isaysay an Saindong mga Bendisyon.” Asin si Albert Schroeder, sarong miembro kan Komite sa Pagtotokdo kan Namamahalang Grupo, nagpahayag sa temang “Si Jehova Nagtatao nin Probisyon.” Bilang ebidensia kan siring na probisyon, itinokdo nia an mismong Paadalan sa Gilead asin an papel kaiyan sa paghaman kan dakulang gibohon na paghuhulit asin paggibo nin mga disipulo.

Kan huri an mga nagdadangog atentibong marhay kan si Milton Henschel, an presidente kan Watch Tower Society, nagpahayag dapit sa “Mga Kabtang na Para sa Lambang Saro.” Saiyang binasa asin kinomentohan nin marhay an Roma kapitulo 12. Kabilang sa iba pang bagay, sia nagsabi: “Kaipuhan niatong horophoropon na igwa kita nin dayupot na marhay na relasyon sa satong mga kapwa lingkod sa kongregasyon.” Idinagdag nia: “Marahay para sa sato na perming isipon an lambang saro bilang rogaring ni Jehova, asin imbes na magin mapagkritika, imbes na magparahanap nin sala, kita magin perming matinabang. Tinatabangan niato an satong sadiri kun pinapagdadanay niato an espirituwal na pagkasararo kan Kristianong kongregasyon.” Saiyang ipinaheling kun paano an siring na pagkamatinabang ikapaheheling sa pagluto sa mga erokan nin misyonero, na kinokonsiderar an katunayan na an gabos bakong parepareho an kinakakan. Dinagka man nia an pagkamatinabang imbes na pagkritika kun nakikikabtang sa paglilingkod sa langtad kaiba an mga kapwa Kristiano na nagtitios sa materyal. Kun kita tunay na matinabang, nakaparirigon, asin nakapakokosog sa lambang saro, idinoon ni Tugang na Henschel, “si Jehova mamomoot sa sato huli kaini.” Ekselente nanggad na sadol para sa mga misyonero na maglilingkod sa kadagaan na laen na gayo sa mga babayaan ninda!

Orog na Pakamidbid sa Klase

An 48 estudyante kan ika-99 klase, sa promedyo, 32 anyos an edad asin nakadusay na nin labing 11 taon sa pambilog na panahon na ministeryo.

An mga interbio na kabtang kan programa sa graduwasyon nagtao sa mga nagdadangog nin oportunidad na orog na mamidbid an nagkapira sa sainda. Si Nikki Liebl, na taga-Estados Unidos, asin si Simon Bolton, na taga-Inglaterra, nagsaysay nin mga pangyayari na nakabalo sa saindang pagtubod na itatao ni Jehova an saindang pisikal na mga pangangaipo. Naeksperyensiahan ninda an pag-ataman ni Jehova mantang padagos nindang ineenot an pambilog na panahon na ministeryo.

Si Isabelle Kazan, na an propiong lenguahe Pranses, nagsabi na sia nag-adal nin Arabe tanganing makapatotoo sa mga nagtataram nin Arabe sa saiyang nasyon. Kan sia magpoon kan 1987, an sarong sadit na grupo sa Paris kompuesto nin apat sanang tugang na lalaki na nagtataram nin Arabe, kaiba sia asin an saro pang tugang na babae na nag-aadal kan lenguahe. (Bako iyan na pasil. Walong oras sindang nag-aandam kan saindang leksion sa Torrengbantayan kada semana tanganing makapagkomento.) Bawi daw an paghihingoa? Bueno, ngonyan may mga Saksing nagtataram nin Arabe na inorganisar sa limang sirkito sa bilog na Pransia. An saro pang estudyante, si Miko Puro, nagsabi kun paano an Pranses na nanodan nia sa eskuelahan nagpangyari sa saiya na makapaghulit sa mga dulag na Aprikano duman sa saiyang pinaghalean na nasyon na Finlandia, asin iyan mapakikinabangan man sa saiyang destino sa pagmimisyonero sa Benin. Isinaysay ni Bonny Bowes an saiyang masakit na pag-adal na klarong makataram nin Pranses tanganing sia makapaglingkod nin epektibo sa Quebec, Canada. Asin si Bjarki Rasmussen, na taga-Denmark, nagsaysay kan mga naeksperyensiahan ninda mag-agom durante nin mga taon nin paglilingkod sa Faeroe Islands. Iyo, an bagong mga misyonerong ini eksperyensiadong pambilog na panahon na mga ministro.

An mga naggraduwar idinestino sa 19 kadagaan​—sa Aprika, Amerika Sentral asin del Sur, Sirangan na Europa, asin sa Oriente. An mga naggraduwar sa naenot na mga klase naglingkod na sa labing 200 na kadagaan. An dakol sa mga naggraduwar na idto sibot pa ngonyan sa saindang mga destino. An bagong mga misyonerong ini minaiba sa sainda ngonyan sa orog pang pagpahiwas kan pagpatotoo sa Kahadean sagkod sa kaporoporohi kan daga.​—Gibo 1:8.

[Mga retrato sa pahina 25]

Mga retrato sa kuartong adalan sa Sentro nin Edukasyon kan Watchtower

[Retrato sa pahina 26]

Ika-99 Naggraduwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Mga retrato sa pahina 27]

Nasa sainda pang mga destino: (sa wala) Si Charles Leathco kaiba an saiyang agom, si Fern, sa Brazil, naggraduwar sa enot asin ikaanom na klase nin Gilead; (sa ibaba) Si Martha Hess, sa Hapon, naggraduwar sa ikapitong klase nin Gilead