Pagpaogma sa Saindong Buhay Pampamilya
Kapitulo 14: Pagtogdok Bilang Sarong Pamilya Para sa Daing Sagkod na Ngapit
1. Sa pagpaoswag sa kaogmahan kan pamilya, taano ta marahay na isipon an ngapit?
1 An panahon perming paabante. Tibaad dakol kitang maogmang mga ginigirumdom sa nakaagi, alagad ta dai kita puedeng mabuhay sa nakaagi. Puede kitang makanood sa nakaagi, pati sa nakaaging mga sala, alagad ta sa presente sana kita puedeng mabuhay. Pero, minsan ngani an pamilya tibaad marahay an pag-ibaiba sa presente, kaipuhan na atubangon an katunayan na an presente temporaryo sana; an ngonyan madaling nagigin kasuodma, asin an presente bigla sanang nagigin nakaagi. Kaya, mahalaga sa ikaoogma kan pamilya na kita perming magtanaw sa ngapit, na nag-aandam para kaiyan, nagpaplano para kaiyan. An magigin kamugtakan kaiyan, para sa sato asin sa mga namomotan niato, dependeng gayo sa mga desisyon na ginigibo niato ngonyan.
2. (a) Taano ta dakol an habong isipon an ngapit? (b) Kun nagmamawot kita nin maogmang ngapit, siisay an maninigo niatong hinanyogon?
2 Ano an mga malalaoman? Para sa mayoriya nin katawohan, an mga kaisipan ninda para sa ngapit parate na sagkod sana sa pirang haralipot na taon. An dakol mas gusto na daing gayo magtanaw nin harayo sa ngapit ta an natatanaw sana ninda sarong makamomondong katapusan, na an pamilya nagkasuruhaysuhay huli sa kagadanan. Para sa dakol, an saindang mga panahon nin kaogmahan madaling natatahoban kan mga kahaditan sa buhay. Alagad paagi sa paghinanyog sa Saro na “pinagkakautangan nin ngaran kan lambang pamilya sa langit asin sa daga,” puedeng magkaigwa nin orog na kahulogan an buhay.—Efeso 3:14, 15.
3. (a) Anong mga paglaom an ibinugtak nin Dios sa atubangan kan enot na mga tawo? (b) Taano ta iba an nangyari?
3 Kan lalangon an enot na mag-agom na tawo, bakong katuyohan nin Dios na sinda o an magigin mga aki ninda mabuhay sana nin pirang maproblemang taon dangan magadan. Tinawan nia sinda nin erokan na paraiso asin ibinugtak sa atubangan ninda an paglaom sa buhay na daing katapusan. (Genesis 2:7-9, 15-17) Alagad iwinara ninda an paglaom na iyan para sa sainda man sana asin sa saindang aki paagi sa tuyong paglapas sa pagboot nin Dios, an Saro na sinasarigan kan saindang buhay. Arog kaini an esplikasyon kaiyan kan Biblia: “Paagi sa sarong tawo [si Adan] an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.”—Roma 5:12.
4. Anong areglo an ginibo ni Jehova Dios tanganing maotob an saiyang orihinal na katuyohan dapit sa katawohan?
4 Minsan siring, an Dios mamomoton na nagtao nin probisyon sa pagbalukat sa pamilya nin tawo. An saiya mismong Aki, si Jesu-Cristo, itinao an saiyang sangkap na tawong buhay para sa gabos na aki ni Adan. (1 Timoteo 2:5, 6) Sa siring tinubos o binalukat ni Jesus an iwinara ni Adan para sa sato, asin an dalan nabukasan para sa mga magibo nin pagtubod sa probisyon na ini na magkaigwa nin oportunidad sa buhay na kapareho kan ibinugtak nin Dios sa atubangan kan enot na mag-agom na tawo. Ngonyan, kun dai magkahelang nin grabe o maaksidente mantang hoben pa, an tawo puedeng mabuhay sa laog nin 70 o 80 taon, asin may pira na nabubuhay nin mas harohalawig. “Alagad an regalo na itinatao nin Dios buhay na daing katapusan paagi ki Cristo Jesus na satong Kagurangnan.”—Roma 6:23.
5-7. (a) Kun gigibohon niato ngonyan an kabotan nin Dios, ano an malalaoman niato sa ngapit? (b) Anong hapot an puede nindong palatawon dapit sa pagtabang sa saindong pamilya?
5 Ano an puedeng magin kahulogan kaini para sa saindong pamilya? Para sa mga tawo na naghihinanyog asin nagkukuyog sa mga togon nin Dios iyan puedeng mangahulogan nin daing sagkod na ngapit. (Juan 3:36) Sa saiyang Tataramon na dai nasusudya, ipinanunuga nin Dios na hahaleon nia an presenteng mapan-aping palakaw nin mga bagay asin papangyayarihon na an gabos na aktibidad nin katawohan pamahalaan nin sangkap asin matanos na gobyerno na sia mismo an matao. (Daniel 2:44) Sa pagpaheling kaini, an saiyang Tataramon nagsasabi sato na katuyohan niang “tiponon giraray an gabos dian ki Cristo, an mga bagay sa kalangitan asin an mga bagay sa daga.” (Efeso 1:10) Iyo, sa panahon na iyan magkakaigwa nin unibersal na pagkaoroyon, asin an pamilya nin tawo magkakasararo sa bilog na daga, na talingkas sa iriwal nin rasa, politikal na pagkabaranga, daing pusong krimen asin kadahasan nin guerra. An mga pamilya mag-eerok na tiwasay, “asin mayo nin siisay man na magpapatakig sa sainda.” (Salmo 37:29, 34; Miqueas 4:3, 4) Ini huli ta an gabos na nabubuhay sa panahon na iyan mga tawo na nagin “mga paraarog sa Dios, bilang namomotan na mga aki,” asin sinda magpapadagos na “maglakaw sa pagkamoot.”—Efeso 5:1, 2.
6 Sa irarom kan paggiya kan Kahadean nin Dios, an pamilya nin tawo sararong magtatrabaho sa panahon na iyan sa magayagayang proyekto na paggibo sa daga na magin paraiso sono sa katuyohan kan Kaglalang, sarong hardin na erokan na nagtatao nin abundang kakanon para sa bilog na katawohan. An kadakoldakol na manlaenlaen na gamgam, sira asin mga hayop sa daga mapapairarom sa maboot na pagsakop nin mga tawo asin maglilingkod para sa saindang ikaoogma, ta iyo ini an isinabing katuyohan nin Dios. (Genesis 2:9; 1:26-28) An helang, kolog, nakapaluluyang mga epekto nin paggurang, o takot sa kagadanan dai na makararaot sa paggayagaya kan pamilya nin tawo sa buhay. Minsan an mga “nasa mga lolobngan nin girumdoman” mabalik tanganing makihiras sa makangangalas na mga oportunidad na itatao nin buhay sa panahon na iyan.—Juan 5:28, 29; Kapahayagan 21:1-5.
7 Ano an magigibo nindo tanganing tabangan an saindong pamilya na makanamit kan kaotoban kan mga paglaom na ini?
Ano an Kaipuhan na Gibohon Niato?
8. Tanganing kamtan an pag-oyon nin Dios, ano an hinahagad sa sato?
8 Mayo sa sato nin maninigong masala sa paghona na sa pamumuhay sana niato sono sa ibinibilang niatong “marahay na pamumuhay” makabibilang na kita sa magkakamit nin buhay sa bagong palakaw nin mga bagay nin Dios. Mayo sa sato an pagdesisyon kun ano an mga kahagadan; tama sana na an Dios iyo an gumibo kaiyan. Sarong aldaw kan si Jesus nagtotokdo sa Judea, may lalaking naghapot: “Sa paggibo nin ano na ako magmamana kan buhay na daing katapusan?” An simbag: “‘Kamotan mo si Jehova na saimong Dios sa bilog mong puso asin sa bilog mong kalag asin sa bilog mong kosog patin sa bilog mong isip,’ asin, ‘an saimong kataed siring sa saimo man sana.’” (Lucas 10:25-28) Malinaw na labi pa an kaipuhan kisa sa pagsabi sana na kita nagtutubod sa Dios, o panapanahon na pag-atender sa pagtiripon na duman pinag-oolayan an Biblia, o paminsanminsan na paggibo nin kabootan sa pirang tawo. Imbes, an pagtubod na hinihingako niato maninigong makaimpluwensiang gayo sa satong mga kaisipan asin pagmawot patin paghiro aroaldaw, sa bilog na aldaw.
9. Anong mga prinsipyo sa Kasuratan an makatatabang sato na magin timbang sa satong pagheling sa ordinaryong mga aktibidad sa buhay?
9 An pagsaisip asin pagpahalaga sa satong relasyon sa Dios matabang sato na humirong may kadonongan asin magarantiya kan saiyang pag-oyon asin tabang. (Talinhaga 4:10) Paagi sa pagheling sa gabos na aktibidad sa buhay sono sa relasyon kaiyan sa saiya asin sa saiyang mga katuyohan, mapagdadanay niato an marahay na pagkatimbang sa satong paggamit kan satong buhay. Kaipuhan kitang magtrabaho tanganing mapangatamanan an satong pisikal na mga pangangaipo. Alagad ipinagigirumdom sato kan Aki nin Dios na an paghadit asin maigot na paghanap nin materyal na mga bagay dai makapalalawig sa satong buhay minsan kadikit; an paghanap nguna sa kahadean nin Dios asin sa saiyang katanosan mapalawig kaiyan nin daing sagkod. (Mateo 6:25-33; 1 Timoteo 6:7-12; Hebreo 13:5) Katuyohan nin Dios na kita lubos na maggayagaya sa satong buhay pampamilya. Alagad an pagdusay kan satong bilog na panahon sa pamilya sagkod na dai na kita nakapaheheling nin tunay na pagkamoot sa mga nasa luwas kan pamilya minasudya sa mismong katuyohan kaiyan, matao sa satong pamilya nin hayakpit na pagmansay sa buhay asin makahahale kan bendisyon nin Dios sa sato. An pag-oroogma asin pag-aling-aling kan pamilya nagtatao kan pinakadakulang kagayagayahan kun iyan nasa lugar, na dai tinotogotan na ipagilid kaiyan an pagkamoot sa Dios. (1 Corinto 7:29-31; 2 Timoteo 3:4, 5) Paagi sa paggibo kan gabos na bagay, bilang pamilya o bilang mga indibiduwal, kaoyon sa tamang mga prinsipyo kan Tataramon nin Dios, an satong buhay magigin nakakokontento nanggad, na may pakamate na kita may tunay na nagibo, asin magbubugtak kita nin marigon na pundasyon para sa daing sagkod na ngapit. Kaya, “ano man an saindong ginigibo, gibohon iyan nin bilog na kalag na siring baga kun para ki Jehova . . . huli ta aram nindo na hale ki Jehova mag-aako kamo kan tamang balos nin pamana.”—Colosas 3:18-24.
Pagtogdok Bilang Sarong Pamilya
10. Gurano kahalaga an regular na pag-orolay sa Biblia sa harong?
10 Tanganing an mga miembro nin sarong pamilya magpadagos na maghingoa para sa pararehong pasohan, an pag-orolay sa harong dapit sa Tataramon nin Dios mahalagang marhay, kaipuhan nanggad. An kada aldaw nagtatao nin dakol na oportunidad sa saro na ikonektar sa mga katuyohan kan Kaglalang an mga bagay na naheheling asin ginigibo. (Deuteronomio 6:4-9) Marahay na magtagama nin regular na mga oras tanganing an gabos makaayon sa iribang pagbasa asin pag-orolay sa Biblia, tibaad sa tabang nin mga publikasyon na nagpapaliwanag kan Biblia. An paggibo kaini nagpapangyaring magkasararo an pamilya. Sa siring an mga miembro kan pamilya makagagamit kan Tataramon nin Dios sa pagtatarabangan na mapangganahan an mga problema na tibaad lumataw. Kun an mga magurang nagtatao nin marahay na halimbawa, na dai itinotogot na an siring na mga oras nin pag-orolay sa Biblia kan pamilya pasil sanang maolang nin ibang mga bagay, idinodoon kaini sa mga aki an dakulang halaga nin hararom na paggalang asin pag-apresyar sa Tataramon nin Dios. An saiyang Aki nagsabi: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.”—Mateo 4:4.
11. Pag-abot sa espirituwal na pag-oswag, anong tendensia an maninigong likayan sa pamilya?
11 Sa sarong hawak, ‘dai maninigong magkaigwa nin pagkabaranga,’ kundi “magkaigwa nin pararehong pangataman sa lambang saro an mga kabtang kaiyan.” (1 Corinto 12:25) Iyan an maninigo sa hawak na pamilya. An saro sa mag-agom dai maninigong magin sibot-sibot sa sadiri niang espirituwal na pag-oswag sa kaaraman asin pakasabot na nagkukulang na sia sa pagpaheling nin odok na pagmakolog sa pag-oswag kan saiyang agom. Halimbawa, kun an lalaki dai nagtatao nin bastanteng atension sa espirituwal na mga pangangaipo kan saiyang agom, pag-abot nin panahon tibaad an mga pasohan kan babae laen na sa saiyang mga pasohan. Kun an mga magurang kulang nin personal na interes sa espirituwal na pagtalubo kan saindang mga aki, na tinatabangan sindang masabotan kun paano an mga prinsipyo kan Tataramon nin Dios minaaplikar asin makatatao kan pinakadakulang kaogmahan sa buhay, tibaad madiskobre ninda na an puso asin isip kan saindang mga aki irinarayo kan materyalistikong espiritu kan kinaban sa palibot ninda. Para sa daing katapusan na ikararahay kan saindong bilog na pamilya, papagdanayon na sarong regular, mahalagang kabtang kan saindong buhay bilang pamilya an pagkua nin kaaraman hale sa Tataramon nin Dios.
12. Siisay an maninigong dai niato lingawan na pakiibanan?
12 Kun talagang ‘an pagkamoot minapoon sa harong,’ dai iyan maninigong matapos dian. An Tataramon nin Dios naghula na an saiyang tunay na mga lingkod magigin panglobong pamilya nin magturugang na lalaki asin babae, minsan sa presenteng palakaw nin mga bagay. Sinasabihan nia kita na “mantang igwa kita nin panahon para kaiyan,” maninigong “gumibo kita nin marahay sa gabos, alagad orog na sa mga may relasyon sa sato sa pagtubod,” sa mga nasa “bilog na kasararoan nin [satong] mga tugang sa kinaban.” (Galacia 6:10; 1 Pedro 5:9) Bilang pamilya, an dayaday na pakipagtipon sa mga kabilang sa mas dakulang “pamilyang” iyan maninigong magin sarong kagayagayahan, na dai madaling isinasakripisyo para sa ibang bagay.—Hebreo 10:23-25; Lucas 21:34-36.
13. Ano an paninimbagan niato sa mga tawo na nasa luwas kan Kristianong kongregasyon?
13 Alagad an satong pagkamoot maninigo na bako sanang para sa mga dati nang nasa laog kan “harong nin Dios,” an saiyang kongregasyon. (1 Timoteo 3:15) Arog kan sabi kan Aki nin Dios, kun an namomotan sana niato iyo idtong mga namomoot sa sato, an sato sanang mga tugang, ‘anong pambihirang bagay an nagibo niato?’ Tanganing makaarog sa satong langitnon na Ama, kita kaipuhan na bilog na pusong mamoot sa gabos na tawo saka magpaheling nin kabootan asin pagtabang sa siisay man asin sa gabos, na perming naghihingoa na ihiras sa sainda an maogmang bareta kan kahadean nin Dios, na kita mismo an nagsasadiring boot. Kun kita nagpapahayag nin diosnon na pagkamoot sa paaging ini bilang pamilya, an satong buhay nagkakaigwa nin tunay na kahulogan asin katuyohan. Kita gabos, magurang asin aki, nakananamit kan kahulogan nin pagpaheling nin lubos na pagkamoot, sa paagi nin pagpaheling kaiyan nin Dios. (Mateo 5:43-48; 24:14) Nakananamit man kita kan lubos na kaogmahan na an makatatao sana iyo an siring na bilog na pusong pagtao.—Gibo 20:35.
14. An pag-aplikar nin anong hatol nagpapaoswag sa maogmang buhay pampamilya?
14 Makangangalas nanggad an mga paglaom na nasa enotan nin mga pamilya na nagpapaheling nin siring na pagkamoot! Nanodan ninda na an paagi na magin maogma an saindang buhay pampamilya iyo an pag-aplikar kan hatol kan Tataramon nin Dios. Sa ibong kan mga problema asin kadepisilan sa buhay na nakaaapektar sa gabos na tawo, an siring na mga pamilya nagkakamit nin dakol na marahay na resulta ngonyan mismo sa paggibo kaiyan. Alagad sinda nagtatanaw nin lihis sa presente, asin an nasa isip ninda bako sanang pirang taon nin buhay bago iyan taposon nin kagadanan. Huli sa pagkompiar sa pagkamasasarigan kan mga panuga nin Dios, an lambang miembro kan pamilya maogmang magtotogdok para sa daing sagkod na ngapit.
15. Anong mga hapot an puedeng ihapot nindo sa saindong sadiri dapit sa mga pakinabang sa Makakasuratan na mga susundan na yaon sa librong ini?
15 Ipinaheling kan librong ini hale sa Biblia na an katuyohan nin Dios sa paglalang sa daga iyo na iyan pag-istaran. Pinatindog nia an pamilya tanganing ini maotob. Si Jehova Dios nagtao man nin mga susundan para sa mga ama, ina asin aki, asin an mga ini ipinaliwanag. Ikinaaplikar na daw nindo an pira sa mga prinsipyong ini sa saindong pamilya? Nakatabang daw iyan sa saindo na magin orog na maogma an saindong buhay pampamilya? Linalaom niamo na iyo. Alagad ano an itinatagama kan ngapit para sa saindo asin sa saindong pamilya?
16-18. Anong magagayon na kamugtakan an katuyohan ni Jehova Dios para sa dagang ini?
16 Boot daw nindong tumabang sa pag-ataman sa daga, sa paggibo sa kaomahan kaiyan na mamunga nin dakol asin sa mga disyerto kaiyan na mamurak? Boot daw nindong maheling an mga tonok asin binit na nariribayan nin mga tatamnan nin prutas asin magagayon na kadlagan? Kamo daw asin an saindong pamilya maoogmang magsakop sa mga hayop, bakong paagi sa mga badil, latigo asin rehas na batbat, kundi paagi sa pagkamoot asin pagkompiar sa lambang saro?
17 Kun an saindong puso nagmamawot kan panahon na dadaragopdopon an mga minasbad na magin mga tarom nin arado asin an mga budyak na magin mga sanggot, na mayo na nin mga paragibo nin bomba o parapundar nin guerra, kun siring kamo maggagayagaya sa bagong palakaw nin mga bagay ni Jehova. An mapan-aping politikal na pamamahala, an kahanaban sa komersio asin pagsaginsagin nin relihion mapapara na. An lambang pamilya toninong na mag-eerok sa sirong kan sadiri kaiyan na poon nin ubas asin higuerra. Madadangog sa daga an maogmang kururahaw nin mga aking binuhay liwat asin an magagayon na pag-awit nin dakol na gamgam. Asin an aire magigin presko nanggad sa hamot nin mga burak imbes na dai na mahangos huli sa industriyal na polusyon.—Miqueas 4:1-4.
18 Kun odok sa puso nindong linalaoman na maheling an pilay na lumukso kapareho kan usa, madangog an dila kan pula na kumanta, maheling an mga mata kan buta na mabuklat, maaraman na an mga talinga kan bongog nagkaburukasan, mapagmasdan na an mga pag-agrangay asin paghibi nariribayan nin mga huyom, asin an mga luha asin pagtangis nariribayan nin pagngisi, asin an kolog asin kagadanan nariribayan nin mabagsik na salud asin buhay na daing sagkod, kun siring gibohon an bilog nindong makakaya na tabangan an saindong sadiri asin an saindong pamilya na gibohon an kinakaipuhan tanganing mabuhay sagkod lamang sa bagong palakaw ni Jehova na duman an siring na mga kamugtakan magdadanay sagkod lamang.—Kapahayagan 21:1-4.
19. Paano kamo asin an saindong pamilya makabibilang sa mga magkakamit kan mga bendisyon kan bagong palakaw nin Dios?
19 An saindo daw na pamilya makabibilang sa maogmang mga kadaklan na makapapano sa daga sa panahon na iyan? Iyan nasa saindo. Kuyogon an mga instruksion ni Jehova para sa buhay pampamilya ngonyan. Maghingoa kamo bilang pamilya na patunayan ngonyan na kamo makababagay sa paagi nin pamumuhay kan bagong palakaw na iyan. Pag-adalan nindo an Tataramon nin Dios, iaplikar iyan sa saindong buhay, ibareta sa iba an paglaom sa ngapit. Sa paggibo nin siring, kamo bilang pamilya makagigibo nin “marahay na ngaran” sa Dios. “An marahay na ngaran orog na pipilion kisa sa abundang kayamanan; an marahay na boot orog pa karahay kisa sa pirak asin bulawan.” An siring na ngaran dai lilingawan ni Jehova: “An pakagirumdom sa matanos may natatagamang bendisyon.” (Talinhaga 22:1, sa gilid; 10:7) Paagi sa dai na kutana maninigong kabootan ni Jehova kamo asin an saindong pamilya puedeng mabendisyonan nin daing sagkod na ngapit na igwa nin daing kaagid na kaogmahan.