Bareta kan mga Parabalangibog kan Kahadean
“Nagliliwanag Siring sa mga Ilaw sa Kinaban”
AN MGA SAKSI NI JEHOVA napapalaen asin sa parate nag-aako nin maraot na publisidad huli kan saindang pagsayuma sa pag-ineksion nin dugo. Minsan siring, an paninindogan na ini basado nanggad sa Biblia. Ipinaheheling kaiyan na kinokondenar nin Dios an salang paggamit nin dugo, mantang an dugo mahalaga sa saiyang mga mata. (Genesis 9:3, 4; Levitico 17:14) Bilang resulta nin pagsiyasat sa Kasuratan sa temang ini, an Mga Saksi ni Jehova nagkonklusyon na malinaw na kabale an modernong pag-ineksion nin dugo sa pagboot kan Biblia na ‘lumikay sa dugo.’—Gibo 15:19, 20, 28, 29.
Sa dai pa sana nahahaloy na mga taon an mga miembro kan medikal na komunidad, patin an mga husgado sa nagkapirang nasyon, sinuportaran an Mga Saksi ni Jehova sa isyung ini. Halimbawa, sa Denmark sarong hoben na ina na pamilyar sa punto-de-vista kan Biblia manongod sa dugo an nagadan bilang resulta nin sarong aksidente sa lunadan. Huli sa saiyang pagsayuma na magpaineksion nin dugo, an saiyang mga doktor inengganyar an nagsarong bulan na maisog na kampanya paagi sa media tumang sa Mga Saksi ni Jehova.
An mga magurang kan hoben na babae naghagad nin imbestigasyon, asin kan Abril 1994 an sarong desisyon iinanunsiar kan Komisyon nin mga Reklamo nin mga Pasyente sa Denmark. Ipinahayag kaiyan na an pasyente nagadan, bakong huli sa pagsayuma niang magpaineksion nin dugo, kundi huli sa medikal na kapabayaan. An desisyon basado sa imbestigasyon kan Konseho nin Medikal na Pagresolber sa mga Kaso asin kan mga autoridad sa salud. Sa sarong surat para sa gabos na pasilidad sa pag-ataman sa salud sa Denmark, an Konseho Nasyonal sa Salud nagpahayag na an mga doktor may paninimbagan na itao sa Mga Saksi ni Jehova an pinakamarahay na makukuang alternatibong pagbolong, na kinokonsiderar an saindang pagsayumang umako nin dugo.
An saro pang kaso kalabot si Dan, sarong 15 anyos na Saksi na nagadan huli sa leukemia. Sa kasong ini irinespeto kan mga doktor an mapusong desisyon ni Dan na sayumahan an pag-ineksion nin dugo. Ini nagresulta sa lakop na kampanya nin mga peryodista kun saen binasol kan media an mga doktor sa kagadanan ni Dan. Minsan siring, dakol an dai uminoyon sa negatibong propaganda.
Halimbawa, an prinsipal kan eskuelahan na ineskuelahan ni Dan presente sa Kingdom Hall para sa pahayag sa lobong. Sia nagpahayag nin pagkabigla manongod sa may kinikilingan na mga bareta manongod sa kagadanan ni Dan. Pakatapos na hapoton an sarong katrabahong Saksi manongod sa Mga Saksi ni Jehova, inako nia an sarong kopya kan video na Jehovah’s Witnesses—The Organization Behind the Name. Nagustohan niang marhay an video kaya iinareglo nia na iyan dalanon kan gabos na maestro sa saiyang eskuelahan. Sa huri, an video ipinadalan sa gabos na estudyante, sa kada klase.
An ministro sa salud sa Denmark dai man uminoyon sa maraot na publisidad na inako kan mga doktor ni Dan. Sia nagpahayag na ginibo kan mga doktor an tama sa paggalang sa maygurang na desisyon asin may marigon na pasisikadan na pagtubod ni Dan.
Igwa nin minilyon na parabalangibog kan Kahadean na nagkukuyog sa mga pagboot nin Dios. Huli sa saindang pagkuyog, sinda napapalaen, “nagliliwanag siring sa mga ilaw sa kinaban.”—Filipos 2:12, 15.