Sarong Mapangganang Kampanya nin Pagpatotoo sa Grecia
AN Mga Saksi ni Jehova haloy nang napaaatubang sa pagtumang sa Grecia. Linalamag an mga Saksi kan nagkapirang pulis, husgado, asin opisyal kan gobyerno, na sa parate huli sa pangigipit na gikan sa klero kan Griegong Ortodokso. Kun beses an sarahotan iyo an ley kan Grecia kontra sa pangongombertir, sa ibang panahon an basado sa Bibliang pagsayuma kan mga Saksi magsalang sa pakikiguerra o pagpaineksion nin dugo.—Isaias 2:2-5; Gibo 15:28, 29.
Sa paghihingoa na palakopon an orog pang pakasabot sa tahaw kan sadiosan an pusong mga autoridad sa Grecia, an mga 200 na Saksi na minimidbid kan gobyerno sa Grecia bilang mga ministro nin relihion, siring man an nagkapira na abogado, may ginibong kampanya dai pa sana nahahaloy sa bilog na nasyon. Iinalok ninda an espesyal na dinisenyong brochure, na may temang Jehovah’s Witnesses in Greece, siring man an librong Jehovah’s Witnesses—Proclaimers of God’s Kingdom. Nagtao man sinda nin sadit na pakete nin mga dokumento na nagpapaheling na mayo nin balidong legal na basihan sa paglamag sa Mga Saksi nin Jehova. Sinongko kan mga Saksi an mga hepe de pulisiya, alkalde, piskal kan publiko, asin iba pang opisyales.
An reaksion? Ginatos na maogmang eksperyensia. Konsiderara an nagkapirang halimbawa.
Inistimar kan komandante nin sarong presinto sa Solnopan na Macedonia an mga tugang asin nagsabi: “Haloy ko na kamong midbid, . . . asin hinahangaan ko an saindong katiwasayan. . . . Bako akong oyon sa ley sa pangongombertir, asin kun may autoridad sana ako, hahaleon ko iyan.”
An mga komandante nin manlaenlaen na presinto sa dakol na siudad nagkomento nin siring kaini: “Kinokomendaran ko kamo sa ginigibo nindong paglilingkod sa sosyedad.” “An saindong komunidad nungkang nagigin problema kan pulisiya; nakagigibo kamo nin sarong gibohon na pansosyedad.” “Talagang mayo kami nin problema sa saindo. Iginagalang asin hinahangaan niamo kamo.”
Sa Pireo an sarong halangkaw na opisyal sa pulisiyang panseguridad sinabihan an mga tugang, na may luha sa saiyang mga mata, na sia tataong mamibi na inaapod an ngaran ni Jehova Dios paagi ki Jesu-Cristo. Orog pa niang napangalas an mga Saksi kan sabihan nia sinda na aram nia na linalaoman ninda an paglamag bago an Armagedon, asin naglalaom sia na gagamiton sia nin Dios na tumabang sa sainda sa panahon na iyan! Inako nia an imbitasyon kan mga tugang na magkaigwa nin dugang pang pag-orolay.
Naghimate an mga Opisyal kan Gobyerno
An sarong alkalde sa Thessaly nagsabi mapadapit sa librong Proclaimers: “Angay iyan na magkaigwa nin lugar sa libreriya kan munisipyo—nin prominenteng lugar!” Pakatapos hinale nia an mga libro sa sarong estante asin ilinaag duman an librong Proclaimers tangani na maheling an tutob kaiyan.
Sa amihanan na Grecia mainit na tinaratara nin sarong alkalde an pagsongko kan mga tugang asin nagsabi: “Kamo an pinakamarahay na mga tawo na mamawoton ko sa sakong munisipyo.” An sarong maboot na alkalde sa amihanan na Eubea sinabihan an mga tugang: “Dati akong opisyal sa hukbo. Alagad kamo—hinahangaan ko kamong marhay.” Entusiastiko siang uminoyon sa mga puntong iinatubang kan mga Saksi. Kan ipaheling ninda an piling mga libro na ipinublikar kan Watch Tower Society, nagsabi sia: “Kun manuga akong basahon gabos iyan, itatao daw nindo iyan sa sako?” Nagsimbag sinda: “Siempre po—saindo na iyan!” Naogma sia asin habo nang pahaleon an mga tugang.
Sa sarong gilid-gilid sa Attica, maogmang inako nin sarong alkalde an babasahon na iinalok kan mga tugang asin hinagad nia sa sainda na padagos na darahan sia nin mga publikasyon kan Sosyedad. Mantang pahale na sinda, nagsabi sia sa sainda: “Nadidisganar na marhay an mga tawo sa mga politiko asin naghahanap kan tunay na katotoohan sa ibang lugar. Sierto ko na poon ngonyan magigin sibot-sibot kamo huli ta yaon sa saindo an katotoohan.”
Naghimate an mga Piskal kan Publiko
Nagirumdoman kan mga tugang na nagdalaw sa sarong deputadong piskal kan publiko sa amihanan na Grecia: “Hinangaan nia an satong mga publikasyon asin an pag-atubang, siring man an mga paghihingoa na ginigibo niato tangani na siertohon na an satong mga miembro bakong daing maginibo kun napaaatubang sa magabat na isyu manongod sa pag-ineksion nin dugo. Sa katapustapusi pinasalamatan nia kami asin mainit na kinomendaran kami huli sa pagsadiring boot na dalawon asin impormaran sia. Dai nahaloy, nadiskobre mi na kan apat na taon na an nakaagi inapod nia an mga pulis asin ipinagboot na arestaron an duwang tugang na naglilingkod sa langtad.”
An duwang abogadong Saksi na nagdalaw sa mga opisina kan piskal kan publiko sa Atenas nabigla na maheling na minadolok sa sainda an sarong bantog na marhay asin iginagalang nin dakol na gurang nang piskal kan publiko. Dinara nia sinda sa pribado asin sinabihan sinda na an ley tumang sa pangongombertir mayong basihan asin nagkacausa nin pagkaribaraw sa sistema kan husgado sa Grecia. Pinasalamatan nia sinda paagi sa sarong mapagpadangat na abrasa.
Sa amihanan na Grecia, an sarong piskal kan publiko makikatood na gayo asin nag-ako nin babasahon. Mantang binubuklat nia an mga pahina kan librong Questions Young People Ask—Answers That Work, napangalas sia na maheling an laen-laen na kapitulo sa lista nin mga laog. Nagkomento sia: “An kinokobrehan kan librong ini, dai ko pa lamang naheling sa bilog na Ortodoksia.”
An sarong piskal kan publiko sa Beotia nag-admitir na sia, kan nakaagi, nagpaluwas nin mga orden sa pag-ineksion nin dugo sa mga Saksi na tumang sa saindang kabotan. Alagad pakatapos na an mga tugang nakipagpaliwanagan sa saiya manongod sa bagay, nagpahayag sia: “Dai na ako noarin man magpapaluwas nin siring na orden sa ngapit!” Nagdesisyon sia na konsultahon an lokal na Hospital Liaison Committee para sa Mga Saksi ni Jehova tangani na masiyasat an gabos na pansalida sa dugo. Maogma niang inako an librong Young People Ask.
Naghimate an mga Laybraryan
Iinatubang man an materyal sa dakol na laybraryan. Sa sarong libreriya sa Atenas, an sarong magalang na laybraryan nag-ako nin babasahon asin nagkomento: “Marahayon na dinara nindo sa samo an saindong mga libro huli ta an kadaklan na libro sa samong libreriya tumang sa saindo. . . . An sarong padi naanggot na gayo na maheling an saindong mga libro sa libreriya. . . . Dai bale. An gabos na tingog maninigong dangogon.”
An sarong opisyal sa sarong libreriya sa munisipyo sa Creta, na namidbid an Mga Saksi ni Jehova sa sarong kampong militar, nagsabi sa mga tugang na naghanga sia kaidto pa sa pagsayuma kan mga Saksi na makikabtang sa guerra. Nagparahapot sia sa sadiri, ‘Taano an mga tawong ini ta maninigong magsakit?’ Nag-ako sia nin babasahon sa mga tugang asin nagsabi manongod sa saindang presenteng kampanya: “Ekselente an saindong ginibo asin kutana ginibo nindo ini kaidto pa. . . . Sa Grecia grabe an daing binabasaran na pagkaanggot.” Hinagad nia sa mga tugang na songkoon tolos sia liwat.
Durante kan espesyal na kampanyang ini, nakapasakamot an mga tugang nin labing 1,000 librong Proclaimers, 1,600 na brochure na Jehovah’s Witnesses in Greece, siring man nin ginatos na libro asin magasin. Mas epektibo pa, nakipag-olay sinda nin personal sa ginatos na Griegong opisyal. Ngonyan linalaoman kan fiel na mga lingkod ni Jehova sa Grecia asin sa bilog na kinaban na an sadiosan an puso na mga autoridad sa Grecia magkakaigwa nin orog pang daing kinakampihan na punto-de-vista sa Mga Saksi ni Jehova.