Hobenes na Ginigirumdom an Saindang Kaglalang

“Girumdoma, ngonyan, an saimong Kaharohalangkaweng Kaglalang sa mga aldaw kan saimong pagkabarobata.” ​—ECLESIASTES 12:1.

1. Anong mga kapahayagan nin sarong 11 anyos an naghahayag na an satong Kaglalang tunay para sa saiya?

ABAA karahay kun an mga hoben nagtataram asin minagawe sa paagi na nagpapaheling na ibinibilang ninda si Jehova Dios na tunay na persona na saindang hinahangaan asin gustong paogmahon! An sarong 11 anyos na aking lalaki nagsabi: “Kun ako nagsosolo asin minatanaw sa bintana, naheheling ko kun gurano kamakangangalas kan mga linalang ni Jehova. Dangan iniimahinar ko kun magigin gurano kagayon kan Paraiso sa ngapit asin kun paano ko makakapotan an mga hayop sa panahon na iyan.” (Isaias 11:​6-9) Idinugang nia: “Kun ako nagsosolo, namimibi ako ki Jehova. Aram ko na dai nia ako ikaaanggot huli sa perming pakikipag-olay sa saiya. Aram ko na permi siang yaon na nagbabantay sa sako.” An sato daw na Kaglalang tunay para sa saindo na arog kan pagigin tunay nia sa aking lalaking ini?

Gurano Katunay sa Saindo an Dios?

2. (a) Paano puedeng magin tunay para sa saindo an saindong Kaglalang? (b) Ano an puedeng magin kabtang nin mga magurang sa pagtabang sa saindang mga aki na maapresyar na an Dios tunay na persona?

² Tangani na magin tunay para sa saindo si Jehova asin an saiyang mga panuga, kaipuhan na kamo makanood nguna manongod sa saiya asin sa makangangalas na ngapit na iinoopresir nia sa saindo sa matanos na bagong kinaban na ilinaladawan kan Biblia. (Kapahayagan 21:​3, 4) Kun kamo tinokdoan kan saindong mga magurang manongod sa mga bagay na ini, may dahelan kamong magpasalamat ta pinapangyayari kamo kaini na himateon an ipinasabong na pagboot na: “Girumdoma, ngonyan, an saimong Kaharohalangkaweng Kaglalang.” (Eclesiastes 12:1) An sarong daragita nagsabi mapadapit sa pagpatood sa saiya kan saiyang mga magurang kan sia aki pa: “An gabos na bagay sa buhay perming may labot ki Jehova. Ini an liabe sa paggirumdom ko sa sakong Kaglalang.” An saro pang hoben na babae nagkomento: “Daing sagkod akong magpapasalamat sa sakong mga magurang sa pagtotokdo sa sako na si Jehova tunay na persona. Tinokdoan ninda ako kun paano sia kamomotan asin sinabihan ako manongod sa kagayagayahan nin bilog na panahon na paglilingkod sa saiya.”

3, 4. Ano an makatatabang sa saindo na isip-isipon si Jehova bilang tunay na persona?

³ Pero, dakol an nadedepisilan na imahinaron an Dios bilang tunay na persona na interesado sa sainda. Iyo man daw kamo? An sarong barobata natabangan na isip-isipon an Dios sa personal na paagi kan sinabing ini sa The Watchtower: “Kun gurano kadakula si Jehova Dios kun dapit sa saiyang hawak, dai niato aram.” Siempre, an kalangkawan nin Dios mayo sa saiyang kadakulaan o porma, arog kan sabi kan suminunod na frase sa Watchtower na idto: “An tunay na kadakulaan nia nasa kun anong klase siang Dios,” an totoo, fiel, maheherakon, mamomoton, asin mapagpatawad na Dios.a (Exodo 34:​6; Deuteronomio 32:​4; Salmo 86:​5; Santiago 5:11) Pinagheheling na daw nindo si Jehova na siring na persona, sarong pinagtitiwalaan na katood na puede kamong magkaigwa nin mahalagang marhay na relasyon?​—Isaias 41:​8; Santiago 2:23.

⁴ Tinabangan ni Jesus an enot niang mga parasunod na magkaigwa nin personal na relasyon sa Dios. Sa siring, kan si apostol Juan magsurat manongod sa saiyang hinahalat na pagkabuhay liwat sa langitnon na buhay, si Juan nagkomento: “Magigin kitang siring [sa Dios], huli ta sia maheheling niato siring sa katunayan nia.” (1 Juan 3:2; 1 Corinto 15:​44) An hobenes ngonyan matatabangan man na ibilang an Dios na tunay na persona, saro na puede nindang mamidbid na marhay dawa dai sia ninda personal na naheheling. An sarong barobata nagsabi: “Tinabangan ako kan sakong mga magurang na girumdomon si Jehova paagi sa dakol na hapot, arog kan, ‘Ano daw an sasabihon ni Jehova? Paano mo iyan ipaliliwanag sa sadiri mong tataramon? Ano an boot sabihon kaiyan?’” Bako daw na an mga hapot na arog kaini pinapag-iisip-isip kita manongod sa satong personal na relasyon sa Dios?

Kun Ano an Kahulogan kan Paggirumdom

5. Anong mga halimbawa sa Biblia an nagpapaheling na an paggirumdom sa saro bako sanang pagtanda sa saiyang ngaran?

⁵ An paghimate sa pagboot na, “Girumdoma, ngonyan, an saimong Kaharohalangkaweng Kaglalang,” bako sanang pag-isip-isip manongod ki Jehova an kahulogan. Iyan may kalabot na paghiro, paggibo kan ikinaoogma nia. Kan an kriminal makimaherak ki Jesus, “Girumdoma man ako kun ika yaon na sa saimong kahadean,” an gusto niang gibohon ni Jesus bako sanang tandaan an saiyang ngaran. Gusto nia na si Jesus humiro, buhayon sia liwat. (Lucas 23:42) Sa kaagid na paagi, an nabibilanggong si Jose naglaom na may gibohon na paghiro para sa saiya kan hagadon nia sa kopero ni Faraon na girumdomon sia ki Faraon. Asin kan si Job makimaherak sa Dios na “Girumdomon mo ako,” hinahagad ni Job na sa maabot na panahon, an Dios mahiro tanganing sia buhayon liwat.​—Job 14:​13; Genesis 40:​14, 23.

6. Paano an termino sa Hebreo para sa “girumdomon” nagpaparisa nin kapadangatan sa bagay o persona na ginigirumdom?

⁶ An sarong autoridad nagsasabi na an termino sa Hebreo na trinadusir na “girumdomon” sa parate ipinaririsa “an kapadangatan kan isip asin an paghiro na kaiba kan pakagirumdom.” An koneksion kan “kapadangatan” sa terminong “girumdomon” maheheling sa kagsing kan “kadaklan na saralak” sa kaawagan: “Gurano niamo kanagigirumdoman an sira na kinakakan niamo kaidto sa Egipto!” Kun paanong si Job naghagad na girumdomon nin Dios na may pag-oyon, si Ezequias, Nehemias, David, asin an sarong salmistang dai nginaranan nakimaherak man na girumdomon ni Jehova na may kapadangatan bilang pagmidbid sa saindang pagigin fiel.​—Bilang 11:​4, 5; 2 Hade 20:​3; Nehemias 5:​19; 13:​31; Salmo 25:​7; 106:4.

7. Kun ginigirumdom niato an Dios na may kapadangatan, paano ini makaaapektar sa satong gawe-gawe?

⁷ Sa siring puede niatong ihapot, ‘Ginigirumdom daw niato an satong Kaglalang na may kapadangatan asin linilikayan an paggibo nin ano man na ikararaot kan saiyang boot o makakokolog sa saiya?’ An sarong daragita nagkomento: “Tinabangan ako ni Nanay na mamidbid na si Jehova may mga pagmate, asin aki pa ako, aram ko na na an sakong mga hiro-hiro may epekto sa saiya.” (Salmo 78:​40-42) An saro pa nagpaliwanag: “Aram ko na an sakong mga hiro-hiro magsalang makatatabang o makaoolang sa pagsimbag sa angat ni Satanas ki Jehova. Gusto kong paogmahon an puso ni Jehova, kaya iyan nakatabang sa sako asin padagos na nakatatabang sa sako ngonyan.”​—Talinhaga 27:11.

8. (a) Anong okupasyon an magpaparisa na ginigirumdom niato si Jehova na may kapadangatan? (b) Anong mga hapot an madonong na hohorophoropon nin mga hoben?

⁸ Totoo, sa maraot na kinaban na ini, bakong perming pasil na girumdomon si Jehova paagi sa lubos na pakikikabtang sa aktibidad na ikinaoogma nia. Pero marahayon nanggad kun maaarog nindo an hoben na si Timoteo kan enot na siglo​—dai na baga sabihon an rinibong hobenes ngonyan na matatakton sa Dios—​paagi sa pagmamaigot na magibo an Kristianong paglilingkod nin bilog na panahon bilang ministrong payunir! (Gibo 16:​1-3; 1 Tesalonica 3:2) Minsan siring, puedeng ihapot, Kaya daw nindong sustentohan an saindong sadiri sa ministeryo bilang payunir? Asin kun kamo mag-agom, igwa daw kamo kan mga abilidad na sustentohan an mga nasa saindong pamilya? (1 Timoteo 5:8) Ini mahahalagang hapot, asin mahalagang marhay na an mga iyan seryoso nindong isip-isipon.

Edukasyon na May Katuyohan

9. Anong desisyon an napaaatubang sa hobenes mapadapit sa sekular na edukasyon?

⁹ Mantang nagigin mas komplikado an sosyedad nin tawo, tibaad kaipuhan an mas dakol na edukasyon tangani na makakua nin igong trabaho na masustentohan an saindong sadiri sa pagpapayunir. Tibaad narisa nindo na minsan an nagkapira na nag-adal sa unibersidad kinaipuhan na mag-eskuela liwat tangani na makanood nin bagong mga abilidad na pinahahalagahan nin mga among ngonyan. Kaya gurano kadakol na edukasyon an pagmamaigotan na kamtan nindo na mga hoben na gustong makapaogma sa Dios? An desisyon tama na gibohon na nasa isip an ipinasabong na pagboot na: “Girumdoma, ngonyan, an saimong Kaharohalangkaweng Kaglalang.”

10. Ano an pinakamarahay na edukasyon na maaako niato?

¹⁰ Siempre, bobooton nindo na pagmaigotan na kamtan an ibinibilang na pinakamarahay na edukasyon minsan nin dakol na sekular na autoridad​—an saro na nakakamtan gikan sa maingat na pag-adal kan Tataramon nin Dios. An parasurat na Aleman na si Johann Wolfgang von Goethe nagsabi: “Mientras na mas dakula an intelektuwal na pag-oswag nin [sarong banwaan], magigin mas lubos man na posible na gamiton an Biblia kapwa bilang an pundasyon asin an instrumento nin edukasyon.” Iyo, an pag-adal sa Biblia mas masangkap sa saindo para sa buhay kisa sa ano pa man na ibang edukasyon!​—Talinhaga 2:​6-​17; 2 Timoteo 3:​14-​17.

11. (a) Ano an pinakamahalagang gibohon na magigibo niato? (b) Taano ta pinili nin sarong daragita na kumua nin igong edukasyon?

¹¹ Mantang an kaaraman nin Dios nagtatao nin buhay, an pinakamahalagang gibohon na magigibo nindo ngonyan ihiras sa iba an kaaraman na iyan. (Talinhaga 3:​13-​18; Juan 4:​34; 17:3) Minsan siring, tangani na magibo ini nin epektibo, kaipuhan kamong maedukar sa pundamental na mga paagi. Kaipuhan na kamo nakapag-iisip nin malinaw, nakatataram sa lohikong paagi, asin matibay bumasa saka sumurat​—mga abilidad na itinotokdo sa eskuelahan. Kaya isapuso an mga leksion nindo sa eskuelahan, arog kan ginibo ni Tracy, sarong daragita sa Florida, E.U.A., na naggradwar sa haiskul na may anor. Ipinahayag nia an saiyang paglaom: “Dai naliliwat an pasohan ko na magin bilog na panahon na lingkod kan sakong Dios na si Jehova, asin naglalaom ako na an edukasyon ko makatatabang sa sako na maotob an pasohan na ini.”

12. Kun pinili an dagdag na sekular na edukasyon, anong katuyohan an tibaad matabangan kaiyan na maotob?

¹² Napag-isip-isip na daw nindo kun taano kamo ta nag-eeskuela? Iyan daw sa pangenot tanganing masangkapan kamo na magin epektibong ministro ni Jehova? Kun iyo, bobooton nindo na seryosong horophoropon kun gurano karahay na naootob kan saindong edukasyon an katuyohan na ini. Pakatapos na makipag-olay sa saindong mga magurang, tibaad mapagdesisyonan na maninigo kamong magpadagos na mag-eskuela nin labi sa minimum na hinahagad kan ley. An dagdag na edukasyon na iyan tibaad makatabang sa saindo na makakua nin trabaho na masustentohan an saindong sadiri asin igwa pa man giraray kamo kan panahon asin kosog na lubos na makikabtang sa aktibidad na pan-Kahadean.​—Mateo 6:33.

13. Paano ipinaheling nin duwang Kristianang taga-Rusya na ipinagpadagos an suplementaryong edukasyon an katuyohan ninda sa buhay?

¹³ An nagkapira na ipinagpapadagos an suplementaryong edukasyon nakikakabtang sa bilog na panahon na ministeryo dawa mantang nag-aako sinda nin dagdag na edukasyon. Helinga si Nadia asin Marina, duwang daragita sa Moscow, Rusya. Pareho sinda nabautismohan kan Abril 1994 asin nagpoon na maglingkod bilang auxiliary payunir na mga ministro. Dai nahaloy naggradwar sinda sa haiskul asin naglaog sa duwang-taon na kurso sa akaunting. Kan Mayo 1995 nagpoon sindang magregular payunir, pero napagdanay ninda an gradong A sa saindang mga klase sa akaunting. Dugang pa, nakapagkondukta sindang duwa nin sa promedyo 14 pag-adal sa Biblia kada semana mantang nag-eeskuela pa. Linalaom kan mga daragita na an edukasyon ninda sa akaunting magpapangyari sa sainda na makakua nin igong trabaho, tangani na masustentohan ninda an saindang sadiri sa bilog na panahon na ministeryo.

14. Gurano man na sekular na edukasyon an pilion niato, ano an maninigong magin pinakamahalagang bagay sa satong buhay?

¹⁴ Kun nagpapadagos kamo sa sekular na edukasyon na labi sa hinahagad kan ley, madonong na siyasaton an dahelan nindo sa paggibo kaiyan. Iyan daw tangani na kamo mabantog asin magkamit nin materyal na mga kayamanan? (Jeremias 45:​5; 1 Timoteo 6:17) O pasohan daw nindo na gamiton an suplementaryong edukasyon tangani na mas lubos na makapakikabtang sa paglilingkod ki Jehova? Si Lydia, sarong daragita na piniling magpadagos sa dagdag na edukasyon, nagpahayag nin marahay na pagkonsentrar sa espirituwal na mga bagay, na nagpapaliwanag: “An iba nagmamaigot na kamtan an mas halangkaw na edukasyon asin pinababayaan na olangon sinda nin materyalismo, asin liningawan ninda an Dios. Para sa sako an sakong relasyon sa Dios iyo an pinakamahalagang bagay sa sako.” Marahayon nanggad na aktitud para sa sato gabos!

15. Ano an laen-laen na kamugtakan kun dapit sa edukasyon sa tahaw kan mga Kristiano kan enot na siglo?

¹⁵ Makahulogan na marhay, an mga Kristiano kan enot na siglo laen-laen na marhay an kamugtakan kun dapit sa edukasyon. Halimbawa, si apostol Pedro asin Juan ibinilang na “daing inadalan asin ordinaryo” huli ta dai sinda nag-adal sa mga eskuelahan na rabiniko. (Gibo 4:13) Sa ibong na lado, si apostol Pablo nag-ako kan katimbang ngonyan nin edukasyon sa unibersidad. Pero, dai ginamit ni Pablo an edukasyon na iyan sa pag-apod nin atension sa saiyang sadiri; imbes, idto kapakipakinabang na bagay kan sia maghulit sa mga tawo na manlaenlaen an kamugtakan sa buhay. (Gibo 22:​3; 1 Corinto 9:​19-​23; Filipos 1:7) Kaagid kaiyan, si Manaen, na “inedukar kaiba ni Herodes na namamahala sa distrito,” kabilang sa mga nangengenot sa kongregasyon sa Antioquia.​—Gibo 13:1.

Taano ta Dapat na Madonong na Kapotan an Saindong Kuarta?

16. (a) Taano ta tibaad mas depisil na girumdomon an satong Kaglalang kun kita may utang? (b) Paano an saro sa mga ilustrasyon ni Jesus naghahayag kan halaga nin pag-isip-isip bago kita gumasto?

¹⁶ Kun dai nindo madonong na makakapotan an saindong kuarta, tibaad mas depisil na girumdomon an saindong Kaglalang paagi sa paggibo kan ikinaoogma nia. Huli ta kun kamo magkautang, masasabi na igwa na kamo nin ibang kagurangnan. An Biblia nagpapaliwanag: “Umutang ka nin kuarta asin ika oripon kan nagpautang.” (Talinhaga 22:​7, Today’s English Version) An saro sa mga ilustrasyon ni Jesus nagtatampok kan halaga nin pag-isip-isip bago kita gumasto. “Siisay sa saindo,” sabi ni Jesus, “na boot na magtogdok nin torre an dai nguna minatukaw asin kinukuenta an gastos, tanganing helingon kun igwa sia nin igo tanganing iyan matapos? Ta kun dai, tibaad ikabugtak nia an pundasyon kaiyan alagad dai iyan matapos, asin an gabos na nakaheling magturuya sa saiya.”​—Lucas 14:​28, 29.

17. Taano ta parateng depisil na kontrolon an paggasto?

¹⁷ Kun siring, madonong na pagmamaigotan nindo na mamuhay sono sa Makakasuratan na prinsipyo na “dai kamo magkautang sa kiisay man nin ano man, puera sana sa pagkaminorootmootan.” (Roma 13:8) Alagad ta depisil ining gibohon, nangorogna kun napapaatubang sa daing ontok na suplay nin bagong mga produkto na sinasabi nin mga nagpapaanunsio na talagang kaipuhan nindo. An sarong magurang, na nagmamaigot na tabangan an saiyang mga aki na magin mapagmansay, nagkomento: “Dakol na oras an ginagamit niamo sa pag-oolay kun ano an pangangaipo asin kun ano an gusto.” An mga eskuelahan sa pankagabsan dai ikinatotokdo an siring na mga bagay, na kakadikit kun igwa man an itinotokdo manongod sa kun paano kakapotan an kuarta sa responsableng paagi. “Minagradwar kita sa haiskul na mas dakol an aram manongod sa triangulong pantay an duwang lado kisa sa kun paano magtitipon,” sabi nin sarong nagtatrabaho sa serbisyo sosyal. Kun siring, ano an makatatabang sa saindo na gumasto sa madonong na paagi?

18. Ano an sarong liabe sa madonong na pagkapot nin kuarta, asin taano?

¹⁸ An paghimate sa sadol na, “Girumdoma, ngonyan, an saimong Kaharohalangkaweng Kaglalang,” sarong liabe sa madonong na pagkapot sa saindong kuarta. Ini huli ta kun kinukuyog nindo an pagboot na iyan, an ipinaoorog nindo iyo an pagpaogma ki Jehova, asin an saindong kapadangatan sa saiya nakaiimpluwensia sa kun paano nindo ginagasto an saindong kuarta. Huli kaiyan, pagmamaigotan nindo na dai togotan an personal na mga gusto na makaentremeter sa pagtao sa Dios nin bilog na kalag na debosyon. (Mateo 16:​24-26) Pagmamaigotan nindo na papagdanayon na “simple” an saindong mata, an boot sabihon, malinaw na nakatorohok sa Kahadean nin Dios asin sa paggibo kan saiyang boot. (Mateo 6:​22-24) Sa siring ibibilang nindong magayagayang pribilehio an konseho nin Dios na “tawan nin onra si Jehova paagi sa saimong mahahalagang bagay.”​—Talinhaga 3:9.

Hobenes na Maninigong Arogon

19. Paano ginirumdom nin hobenes kan nakaagi an saindang Kaglalang?

¹⁹ Makaoogma, dakol na hoben, kan nakaagi asin sa presente, an ginirumdom an saindang Kaglalang. An aki pang si Samuel nagdanay na marigon sa paglilingkod sa tabernakulo sa ibong kan inmoral na impluwensia kan mga kaiba nia sa paglilingkod. (1 Samuel 2:​12-​26) An nakapasasagad na tentadora, an agom ni Potifar, dai kayang enganyaron an hoben na si Jose na gumibo nin pakikisaro. (Genesis 39:​1-​12) Dawa “aki pa,” si Jeremias mapusong naghulit sa atubangan nin grabeng oposisyon. (Jeremias 1:​6-8) An sarong Israelitang aking babae daing takot na sinabihan an sarong makapangyarihan na kapitan nin hukbo sa Siria na humagad nin tabang sa Israel, na duman makanonood sia manongod ki Jehova. (2 Hade 5:​1-4) An hoben na si Daniel asin an saiyang kairiba nagdanay sa saindang pagtubod kan baloon sa mga ley nin Dios sa pagkakan. Asin an hobenes na si Sadrac, Mesac, asin Abednego ginusto pang iapon sa sarong naglalaad na horno kisa sa ikompromiso an saindang kaimbodan sa Dios paagi sa pagsamba sa atubangan nin sarong imahen.​—Daniel 1:​8, 17; 3:​16-18; Exodo 20:5.

20. Paano an dakol na hoben ginirumdom an saindang Kaglalang ngonyan?

²⁰ Ngonyan labing 2,000 na hobenes na 19 sagkod 25 anyos an edad an naglilingkod sa pankinaban na opisina prinsipal kan Mga Saksi ni Jehova sa Estado nin Nueva York, E.U.A. Sadit na kabtang sana sinda kan manampulong ribong mga hoben na ginigirumdom an saindang Kaglalang sa bilog na kinaban. Kapareho ni Jose kan suanoy, nagsayuma sindang ikompromiso an saindang kalinigan sa moral. Dakol an kinuyog an Dios imbes na an mga tawo kan pirit na papilion kun siisay an saindang paglilingkodan. (Gibo 5:29) Kan 1946 sa Polandia, an 15 anyos na si Henryka Zur pinadusahan kan sia magsayumang gumibo nin sarong akto nin relihiosong idolatriya. “Isipon mo sa boot mo an ano man na gusto mo,” an suhestion kan saro sa mga nagpapasakit sa saiya, “basta gibohon mo an Katolikong pangungurus.” Huli ta sia nagsayuma, ginudgod sia sa kadlagan asin binadil, na dai naano an saiyang seguradong paglaom sa buhay na daing sagkod!b

21. Anong pangagda an madonong na akoon, na may anong resulta?

²¹ Segurado na ogmahon an puso ni Jehova sa mga hoben na ginirumdom sia sa nakaaging mga siglo! Maghihimate daw kamo sa saiyang pangagda na, “Girumdoma, ngonyan, an saimong Kaharohalangkaweng Kaglalang”? Tunay na sia maninigo nindong girumdomon! Isip-isipa sa aroaldaw an gabos na ginibo nia para sa saindo asin gigibohon pa, asin akoa an saiyang pangagda na: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.”​—Talinhaga 27:11.

[Mga Nota sa Ibaba]

Nagigirumdoman daw Nindo?

◻ Paano matatabangan an hobenes na ibilang an Dios na tunay na persona?

◻ Ano an boot sabihon kan paggirumdom sa saindong Kaglalang?

◻ Ano an maninigong magin katuyohan kan satong edukasyon?

◻ Taano ta mahalagang marhay na madonong na kapotan an satong kuarta?

◻ Sairisay na hobenes an maninigo nindong arogon?

[Retrato sa pahina 17]

Napag-isip-isip na daw nindo kun taano kamo ta nag-eeskuela?

[Retrato sa pahina 18]

inag-aadalan daw nindo an madonong na pagkapot nin kuarta?