Ano an Kahagadan sa Sato nin Dios?
“Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakapagagabat.”—1 JUAN 5:3.
1, 2. Taano ta dai kaipuhan na ipagngalas na an Dios igwa nin mga kahagadan para sa mga gustong sumamba sa saiya sa paaging maaako?
“TAMA na sa sako an sakong relihion!” Bako daw na iyan an parateng sinasabi nin mga tawo? Pero, sa katunayan an hapot maninigo na, “An relihion ko daw nakapaoogma sa Dios?” Iyo, an Dios igwa nin mga kahagadan sa mga gustong sambahon sia sa paaging maaako. Maninigo daw niatong ipagngalas iyan? Dai man. Ipamugtak na kamo may sadiring magayon na harong, saro na hinirahay nindo dai pa sana nahahaloy na dakulaon an gastos. Totogotan daw nindo an dawa siisay na mag-istar dian? Siempre dai! An siisay man na potensial na paiistaron kaipuhan na aboton an saindong mga kahagadan.
2 Sa kaagid na paagi, itinao ni Jehova Dios an daganon na istaran na ini sa pamilya nin tawo. Sa irarom kan pamamahala kan saiyang Kahadean, an daga “hihirahayon” sa dai na mahahaloy—babagohon na magin sarong magayon na paraiso. Gigibohon ini ni Jehova. May dakulang pagsasakripisyo sa sadiri, itinao nia an saiyang bugtong na Aki tanganing iyan magin posible. Segurado nanggad na an Dios igwa nin mga kahagadan sa mga maistar dian!—Salmo 115:16; Mateo 6:9, 10; Juan 3:16.
3. Paano sinumaryo ni Salomon an linalaoman nin Dios sa sato?
3 Paano niato maaaraman kun ano an mga kahagadan nin Dios? Pinasabngan ni Jehova an madonong na si Hadeng Salomon na sumaryohon an linalaoman Nia sa sato. Pakatapos na horophoropon an gabos na pinag-aabot nia—kabale na an kayamanan, mga proyekto nin pagtotogdok, hilig sa musika, asin romantikong pagkamoot—si Salomon nakarealisar kaini: “An konklusyon kan bagay, mantang nadangog na an gabos, iyo ini: Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”—Eclesiastes 12:13.
“An Saiyang mga Togon Dai Nakapagagabat”
4-6. (a) Ano an literal na kahulogan kan Griegong termino na trinadusir na “nakapagagabat”? (b) Taano ta masasabi niato na an mga togon nin Dios dai nakapagagabat?
4 “Otobon mo an saiyang mga togon.” Sa pundamental, iyan an linalaoman nin Dios sa sato. Sobra daw an hinahagad niang iyan? Bako man. Si apostol Juan nagsasabi sa sato nin sarong bagay na nakapakokosog na marhay sa boot manongod sa mga togon, o kahagadan, nin Dios. Sia nagsurat: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakapagagabat.”—1 Juan 5:3.
5 An Griegong termino na trinadusir na “nakapagagabat” sa literal nangangahulogan “magabat.” Iyan puedeng nanonongod sa sarong bagay na masakit aboton o depisil otobon. Sa Mateo 23:4, iyan ginamit tanganing iladawan an “magabat na mga pasanon,” an mga reglamento asin tradisyon na gibo nin tawo, na ipinapapasan sa mga tawo kan mga eskriba asin Fariseo. Nasasabotan daw nindo an ikinokonklusyon kan maedad nang apostol na si Juan? An mga togon nin Dios bakong magabat na pasan, ni iyan sobra kadepisil na kuyogon niato. (Ikomparar an Deuteronomio 30:11.) Sa kabaliktaran, kun namomotan niato an Dios, an pag-abot sa saiyang mga kahagadan nakapaoogma sa sato. Iyan nagtatao sa sato nin mahalagang marhay na oportunidad na ipaheling an satong pagkamoot ki Jehova.
6 Tanganing ikapaheling an satong pagkamoot sa Dios, kaipuhan niatong maaraman nin espesipiko kun ano an linalaoman nia sa sato. Pag-olayan niato ngonyan an lima sa mga kahagadan nin Dios. Mantang pinag-oolayan niato iyan, isipon niato an isinurat ni Juan: ‘An mga togon nin Dios dai nakapagagabat.’
Kumua nin Kaaraman Manongod sa Dios
7. Nakadepende sa ano an satong kaligtasan?
7 An enot na kahagadan iyo an pagkua nin kaaraman manongod sa Dios. Estudyaran an mga tataramon ni Jesus na nakarekord sa Juan kapitulo 17. An eksena iyo an ultimong banggi sa buhay ni Jesus bilang tawo. Ginamit ni Jesus an dakol na oras kan bangging idto sa pag-andam kan saiyang mga apostol para sa saiyang paghale. Sia nahahadit manongod sa saindang ngapit, sa saindang daing katapusan na ngapit. Itinitingkalag an saiyang mga mata sa langit, ipinamibi nia sinda. Sa bersikulo 3, mababasa niato: “Ini nangangahulogan nin buhay na daing katapusan, an saindang pagkua nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” Iyo, an saindang kaligtasan depende sa saindang “pagkua nin kaaraman” manongod kapwa sa Dios asin ki Cristo. Iyan aplikado man sa sato. Tanganing kamtan an kaligtasan, kaipuhan niatong kumua nin siring na kaaraman.
8. Ano an boot sabihon kan “pagkua nin kaaraman” manongod sa Dios?
8 Ano an boot sabihon kan “pagkua nin kaaraman” manongod sa Dios? An Griegong termino na trinadusir digdi na “pagkua nin kaaraman” nangangahulogan “maaraman, mamidbid,” o “masabotan nin lubos.” Mangnohon man na an traduksion na “pagkua nin kaaraman” nagpaparisa na ini nagpapadagos na proseso. Sa siring an pagkua nin kaaraman manongod sa Dios nangangahulogan nin pakamidbid sa saiya na bakong hababaw sana kundi dayupot, na nagpapatalubo nin may pakasabot na pakikatood sa saiya. An nagpapadagos na relasyon sa Dios nagtatao nin kaaraman manongod sa saiya na padagos na nadudugangan. An prosesong ini puedeng magpadagos sagkod lamang, huli ta nungka niatong manonodan an gabos manongod ki Jehova.—Roma 11:33.
9. Ano an manonodan niato manongod ki Jehova sa libro nin paglalang?
9 Paano kita nagkukua nin kaaraman manongod sa Dios? Igwa nin duwang libro na makatatabang sa sato. An saro iyo an libro nin paglalang. An mga bagay na linalang ni Jehova—kapwa buhay asin daing buhay—nagtatao sa sato nin pakarorop sa kun anong klase siang persona. (Roma 1:20) Konsiderara an nagkapirang halimbawa. An rinagubrob nin magayonon na busay, an hagobohob kan nagsasabong alon kun may bagyo, an pagheling sa mabitoon na kalangitan sa maaliwalas na banggi—bako daw na an siring na mga bagay nagtotokdo sa sato na si Jehova sarong Dios na “makosog sa kapangyarihan”? (Isaias 40:26) An aking naghaharakhatak mantang minamasdan an sarong ido na linalapag an ikog kaiyan o an sarong kuting na nagkakawat nin bola nin awat na de lana—bako daw na iyan nagsusuherir na si Jehova, an “maogmang Dios,” igwa nin kualidad na magpangisi? (1 Timoteo 1:11) An namit nin masiram na pagkakan, an mahamot na parong nin mga burak sa kaawagan, an buhay na kolor nin magayon na kulagbaw, an awit nin mga gamgam sa panahon nin tigsoli, an mainit na kugos nin namomotan—dai ta daw namamansayan sa siring na mga bagay na an satong Kaglalang sarong Dios nin pagkamoot, na nagmamawot na kita magin maogma sa buhay?—1 Juan 4:8.
10, 11. (a) Anong mga bagay dapit ki Jehova asin sa saiyang mga katuyohan an dai niato manonodan sa libro nin paglalang? (b) An simbag sa anong mga hapot manonompongan sana sa Biblia?
10 Minsan siring, igwa nin limitasyon sa puede niatong manodan manongod ki Jehova sa libro nin paglalang. Sa pag-ilustrar: Ano an ngaran nin Dios? Taano ta linalang nia an daga asin ilinaag dian an katawohan? Taano ta tinotogotan nin Dios an karatan? Ano an satong kaaabtan sa ngapit? Para sa simbag sa siring na mga hapot, kaipuhan niatong konsultahon an saro pang libro na nagtatao nin kaaraman manongod sa Dios—an Biblia. Sa mga pahina kaiyan, ihinahayag ni Jehova an mga bagay manongod sa saiya, kabale na an saiyang ngaran, an saiyang personalidad, asin an saiyang mga katuyohan—impormasyon na dai niato makukua sa arin man na iba pang reperensia.—Exodo 34:6, 7; Salmo 83:18; Amos 3:7.
11 Sa Kasuratan, si Jehova nagtatao man nin kinakaipuhan na kaaraman manongod sa ibang persona na kaipuhan niatong mamidbid. Halimbawa, siisay si Jesu-Cristo, asin ano an saiyang kabtang sa paghaman kan mga katuyohan ni Jehova? (Gibo 4:12) Siisay si Satanas na Diablo? Sa anong mga paagi na sia nandadaya sa mga tawo? Paano niato malilikayan na dai nia madaya? (1 Pedro 5:8) An nagliligtas-buhay na simbag sa mga hapot na ini makukua sana sa Biblia.
12. Paano nindo ipaliliwanag kun taano ta bakong pagabat an pagkua nin kaaraman manongod sa Dios asin sa saiyang mga katuyohan?
12 Pagabat daw an pagkua nin siring na kaaraman manongod sa Dios asin sa saiyang mga katuyohan? Bako nanggad! Nagigirumdoman daw nindo kun ano an saindong pagmate kan enot nindong manodan na an ngaran nin Dios Jehova, na ibabalik kan saiyang Kahadean an Paraiso sa dagang ini, na itinao nia an saiyang namomotan na Aki bilang pantubos sa satong mga kasalan, siring man an iba pang mahalagang marhay na mga katotoohan? Bako daw na idto siring sa paghale nin tahob nin ignoransia asin pakaheling nin malinaw sa kaenot-enote? An pagkua nin kaaraman manongod sa Dios bakong pagabat. Iyan nakaoogma!—Salmo 1:1-3; 119:97.
Pag-abot sa mga Pamantayan nin Dios
13, 14. (a) Mantang kita nagkukua nin kaaraman manongod sa Dios, anong mga pagbabago an kaipuhan niatong gibohon sa satong buhay? (b) Hinahagad sa sato nin Dios na likayan an anong marigsok na mga gibo?
13 Mantang kita nagkukua nin kaaraman manongod sa Dios, narerealisar niato na kaipuhan niatong gumibo nin mga pagbabago sa satong buhay. Dinadara kita kaini sa ikaduwang kahagadan. Kaipuhan niatong aboton an mga pamantayan nin Dios para sa tamang paggawe asin akoon an saiyang katotoohan. Ano an katotoohan? Talaga daw na mahalaga sa Dios kun ano an satong tinutubod asin ginigibo? Dakol na tawo ngonyan an malinaw na dai naghohona nin siring. An sarong report na ipinublikar kan Iglesia nin Inglaterra kan 1995 nagsuherir na an pagsasaro na dai ikinasal maninigong dai ibilang na kasalan. “An fraseng ‘pagsasaro sa kasalan’ nakamamantsa asin dai nakatatabang,” an sinabi nin sarong obispo kan iglesia.
14 Kaya, kun siring, bako na daw kasalan an ‘pagsasaro sa kasalan’? Sinasabi ni Jehova sa sato nin malinaw na marhay kun ano an namamatean nia sa siring na gawe. An saiyang Tataramon, an Biblia, nagsasabi: “Magin logod kagalanggalang sa gabos an pag-aragoman, asin dai pagdigtaan an higdaan kan mag-agom, huli ta hohokoman nin Dios an mga parapakisaro asin parasambay.” (Hebreo 13:4) An seksuwal na pagdodorog bago ikasal tibaad bakong kasalan sa pagheling kan liberal na mga klerigo asin parasimba, alagad iyan magabat na kasalan sa mata nin Dios! Asin pati man an pagsambay, incesto, asin homoseksuwalidad. (Levitico 18:6; 1 Corinto 6:9, 10) Hinahagad sa sato nin Dios na likayan niato an siring na mga gibo, na minamansay niang marigsok.
15. Paano kalabot sa mga kahagadan nin Dios kapwa an pagtratar niato sa iba asin an satong tinutubod?
15 Minsan siring, bakong igo na likayan an mga gibo na minamansay nin Dios na kasalan. Kalabot man sa mga kahagadan nin Dios an paagi nin pagtratar niato sa iba. Sa laog nin pamilya, linalaoman nia an agom na lalaki asin babae na kamotan asin igalang an lambang saro. Hinahagad nin Dios sa mga magurang na asikasohon an materyal, espirituwal, asin emosyonal na mga pangangaipo kan saindang mga aki. Sinasabi nia sa mga aki na magin makinuyog sa saindang mga magurang. (Talinhaga 22:6; Colosas 3:18-21) Asin kumusta man an satong mga tinutubod? Gusto ni Jehova Dios na likayan niato an mga paniniwala asin kostumbre na hale sa falsong pagsamba o na tumang sa malinaw na katotoohan na itinotokdo sa Biblia.—Deuteronomio 18:9-13; 2 Corinto 6:14-17.
16. Ipaliwanag kun taano ta bakong pagabat na aboton an mga pamantayan nin Dios sa tamang paggawe asin akoon an saiyang katotoohan.
16 Pagabat daw para sa sato na aboton an mga pamantayan nin Dios para sa tamang paggawe asin akoon an saiyang katotoohan? Bako kun kokonsideraron niato an mga pakinabang—mga pag-agoman na kun saen an agom na lalaki asin babae namomoot asin nagtitiwala sa lambang saro imbes na mga pag-agoman na nagkasuruhay huli sa pagkabakong fiel; mga harong na an mga aki nakamamateng namomotan asin gusto kan saindang mga magurang imbes na mga pamilya na kun saen an mga aki nakamamate na dai namomotan, pinababayaan, asin hinahaboan; sarong malinig na konsensia asin marahay na salud imbes na mga pakamate nin pagkakasala asin hawak na rinaot nin AIDS o iba pang helang na ikinaoolakit paagi sa seksuwal na pagdodorog. Sierto nanggad, an mga kahagadan ni Jehova dai hinahale sa sato an ano man na bagay na kaipuhan niato tanganing magin maogma sa buhay!—Deuteronomio 10:12, 13.
Ipaheling an Paggalang sa Buhay Asin Dugo
17. Paano minamansay ni Jehova an buhay asin dugo?
17 Mantang iinooyon nindo an saindong buhay sa mga pamantayan nin Dios, naaapresyar nindo kun gurano talaga kahalaga an buhay. Pag-olayan niato ngonyan an ikatolong kahagadan nin Dios. Kaipuhan niatong ipaheling an paggalang sa buhay asin dugo. An buhay sagrado para ki Jehova. Iyan maninigo, huli ta sia an Burabod nin buhay. (Salmo 36:9) Tara, maski an buhay nin dai pa namumundag na aki sa laog kan ina kaiyan mahalagang marhay para ki Jehova! (Exodo 21:22, 23) An dugo nagrerepresentar sa buhay. Kun siring, an dugo sagrado man sa mga mata nin Dios. (Levitico 17:14) Kaya, dai maninigong ipagngalas na linalaoman kita nin Dios na mansayon an buhay asin dugo nin siring sa pagmansay nia dian.
18. Ano an hinahagad sa sato kan pagmansay ni Jehova sa buhay asin dugo?
18 Ano an hinahagad sa sato kan paggalang sa buhay asin dugo? Bilang mga Kristiano, dai niato basta isinasapeligro an satong buhay huli sana sa pagpagana sa boot. Kita mapag-isip sa pagigin ligtas sa peligro asin kun siring sineseguro niato na ligtas sa peligro an satong mga kotse asin harong. (Deuteronomio 22:8) Dai kita nagtatabako, nagmamama, o naggagamit nin nakaaadikto o nakararaot sa isip na mga droga para sa kaogmahan. (2 Corinto 7:1) Huli ta hinihinanyog niato an Dios kun sia nagsasabi na ‘lumikay sa dugo,’ dai niato itinotogot na iineksion an dugo sa satong hawak. (Gibo 15:28, 29) Minsan ngani namomotan ta an buhay, dai niato pagmamaigotan na iligtas an satong presenteng buhay paagi sa pagbalga sa ley nin Dios asin sa siring isapeligro an satong paglaom na buhay na daing katapusan!—Mateo 16:25.
19. Ipaliwanag kun paano kita nakikinabang sa paggalang sa buhay asin dugo.
19 Pagabat daw sa sato na ibilang na sagrado an buhay asin dugo? Bako nanggad! Horophoropon iyan. Pagabat daw na dai magkakanser sa pulmon huli sa pagtabako? Pagabat daw na makalikay sa mental asin pisikal na adiksion sa nakadadanyar na mga droga? Pagabat daw an pakalikay na magkahelang nin AIDS, hepatitis, o iba pang helang na gikan sa pag-ineksion nin dugo? Malinaw nanggad, an satong paglikay sa nakararaot na mga bisyo asin gibo para sa satong pinakaikararahay.—Isaias 48:17.
20. Paano nakinabang an sarong pamilya sa pagkaigwa kan pagmansay nin Dios sa buhay?
20 Pensara an eksperyensiang ini. Mga pirang taon na an nakaagi, an sarong babaeng Saksi na mga tolo may kabangang bulan nang bados nagpoon na awasan nin dugo sarong banggi asin idinalagan sa ospital. Pakatapos na sia eksaminon nin doktor, nadangog niang sinabihan kan doktor an saro sa mga nars na kaipuhan nindang pondohon an pagbabados. Nakaaaram sa pagmansay ni Jehova sa buhay kan dai pa namumundag, marigon niang sinayumahan an aborsion, na sinasabi sa doktor: “Kun iyan buhay, bayaan sana nindo iyan dian!” Sia nagpadagos na inaawasan nin dugo paminsanminsan, alagad pakalihis nin pirang bulan sia mayo pa sa panahon na nangaki nin sarong marahay an salud na aking lalaki na ngonyan 17 anyos na. Sia nagpaliwanag: “Iinestorya mi sa samong aking lalaki an gabos na ini, asin sia nagsabi na sia naoogma na dai sia iinapon sa basurahan. Aram nia na an paglilingkod niamo ki Jehova an solamenteng dahelan na sia buhay.” Segurado nanggad, an pagkaigwa kan pagmansay nin Dios sa buhay bakong pagabat sa pamilyang ini!
Naglilingkod Kaiba kan Organisadong Banwaan ni Jehova
21, 22. (a) Linalaoman ni Jehova na makiiba kita kiisay sa paglilingkod sa saiya? (b) Paano niato mamimidbid an organisadong banwaan nin Dios?
21 Kita dai nagsosolo sa paggibo kan mga pagbabago na kaipuhan tanganing ioyon an satong buhay sa mga pamantayan nin Dios. Si Jehova igwa nin banwaan digdi sa daga, asin linalaoman nia kita na maglingkod sa saiya kaiba ninda. Dinadara kita kaini sa ikaapat na kahagadan. Kaipuhan na kita maglingkod ki Jehova kaiba kan saiyang ginigiyahan nin espiritu na organisasyon.
22 Pero, paano mamimidbid an organisadong banwaan nin Dios? Kaoyon sa mga pamantayan na itinao sa Kasuratan, igwa sinda nin tunay na pagkamoot sa lambang saro, igwa sinda nin hararom na paggalang sa Biblia, tinatawan ninda nin onra an ngaran nin Dios, sinda naghuhulit manongod sa saiyang Kahadean, asin sinda bakong kabtang kan maraot na kinaban na ini. (Mateo 6:9; 24:14; Juan 13:34, 35; 17:16, 17) Saro sana an relihiosong organisasyon sa dagang ini na igwa kan gabos na tanda na ini kan tunay na Kristianismo—an Mga Saksi ni Jehova!
23, 24. Paano niato ikaiilustrar na bakong pagabat na maglingkod ki Jehova kaiba kan saiyang organisadong banwaan?
23 Pagabat daw na maglingkod ki Jehova kaiba kan saiyang organisadong banwaan? Bako nanggad! Sa kabaliktaran, sarong mahalagang marhay na pribilehio na magkaigwa kan pagkamoot asin pagsuportar nin sarong pambilog na kinaban na pamilya nin Kristianong mga tugang na lalaki asin babae. (1 Pedro 2:17) Imahinaron na kamo nakaligtas sa paglubog nin barko asin kamo nasa tubig, na nagmamaigot na magdanay na naglalataw. Kan mamatean nindo na dai na nindo kaya, may kamot na kuminapot sa saindo hale sa sarong lantsa-salbabida. Iyo, igwa nin iba pang nakaligtas! Sa lantsa-salbabida, kamo asin an iba pa nagsasarosaralida sa pagsagwan pasiring sa baybayon, na sinasapod an iba pang nakaligtas sa inaagihan.
24 Bako daw na kita nasa kaagid na situwasyon? Kita sinapod hale sa peligrosong “katubigan” kan maraot na kinaban na ini pasiring sa “lantsa-salbabida” kan daganon na organisasyon ni Jehova. Sa laog kaiyan, kita naglilingkod na iriba mantang kita pasiring sa “baybayon” nin sarong matanos na bagong kinaban. Kun an mga pangigipit sa buhay magcausa na kita manluya mantang nagbibiahe, nakapagpapasalamat nanggad kita sa tabang asin pagranga nin tunay na Kristianong kairiba!—Talinhaga 17:17.
25. (a) Ano an paninimbagan niato sa mga yaon pa sa “katubigan” kan maraot na kinaban na ini? (b) Anong kahagadan nin Dios an ipaliliwanag sa masunod na artikulo?
25 Kumusta an iba—mga tawong sadiosan an puso na yaon pa sa “katubigan”? Kita may obligasyon na tabangan sinda pasiring sa organisasyon ni Jehova, bako daw? (1 Timoteo 2:3, 4) Kaipuhan ninda an tabang na manodan an mga kahagadan nin Dios. Dinadara kita kaini sa ikalimang kahagadan nin Dios. Kita kaipuhan na magin maimbod na mga parabalangibog kan Kahadean nin Dios. Kun ano an kalabot digdi ipaliliwanag sa masunod na artikulo.
Nagigirumdoman daw Nindo?
◻ Taano ta dai nakapagagabat an mga togon nin Dios?
◻ Paano kita nagkukua nin kaaraman manongod sa Dios?
◻ Taano ta bakong pagabat na aboton an mga pamantayan nin Dios sa tamang paggawe asin akoon an saiyang katotoohan?
◻ Ano an hinahagad sa sato kan pagmansay nin Dios sa buhay asin dugo?
◻ Linalaoman nin Dios na makiiba kita kiisay sa paglilingkod sa saiya, asin paano sinda mamimidbid?
[Mga retrato sa pahina 18]
Kita nakanonood manongod ki Jehova sa libro nin paglalang asin sa Biblia
[Pasasalamat para sa pinagkuanan]
Buaya: Sa karahayan nin boot kan Australian International Public Relations; oso: Safari-Zoo sa Ramat-Gan, Tel Aviv