Arogon si Jehova—Gumibo nin Hustisya Asin Katanosan
“Ako si Jehova, an Saro na naggigibo nin mamomoton na kabootan, hustisya asin katanosan sa daga; huli ta ikinaoogma ko an mga bagay na ini.”—JEREMIAS 9:24.
1. Anong makangangalas na paglaom an itinao ni Jehova?
SI Jehova nanuga na maabot an aldaw na an gabos makamimidbid sa saiya. Paagi sa saiyang propeta na si Isaias, sia nagsabi: “Dai sinda magibo nin maraot o manraraot sa bilog kong banal na bukid; huli ta an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.” (Isaias 11:9) Kanigoan kamakangangalas na paglaom iyan!
2. Ano an kaiba sa pakamidbid ki Jehova? Taano?
2 Pero ano an boot sabihon kan pakamidbid ki Jehova? Ihinayag ni Jehova ki Jeremias an pinakamahalaga: “An pagkaigwa nin pakarorop asin an pagkaigwa nin kaaraman dapit sa sako, na ako si Jehova, an Saro na naggigibo nin mamomoton na kabootan, hustisya asin katanosan sa daga; huli ta ikinaoogma ko an mga bagay na ini.” (Jeremias 9:24) Sa siring, kaiba sa pakamidbid ki Jehova an pakaaram kan paagi nin paggibo nia nin hustisya asin katanosan. Dangan kun gigibohon ta an mga kualidad na iyan, ikaoogma nia kita. Paano niato iyan magigibo? Sa saiyang Tataramon, an Biblia, iningatan ni Jehova an rekord kan saiyang mga pagtratar sa bakong sangkap na mga tawo sa nag-aging mga panahon. Paagi sa pag-adal kaiyan, maaaraman niato an dalan nin hustisya asin katanosan ni Jehova asin sa siring maarog sia.—Roma 15:4.
Makatanosan Pero Madinamayon
3, 4. Taano ta may katanosan si Jehova sa paglaglag sa Sodoma asin Gomorra?
3 An paghokom nin Dios sa Sodoma asin Gomorra sarong ekselenteng halimbawa na nag-iilustrar kan nagkapirang aspekto kan hustisya ni Jehova. Bako sanang nagtao si Jehova nin kinakaipuhan na kastigo kundi nagtao man sia nin kaligtasan para sa mga maninigo. Talaga daw na may katanosan an paglaglag sa mga siudad na idto? Si Abraham, na minalataw na limitado an aram dapit sa karatan kan Sodoma, bakong arog kaiyan an saboot kan primero. Sinierto ni Jehova ki Abraham na kun may makukuang sampulo sanang matanos na tawo, dai na nia lalaglagon an siudad na iyan. Malinaw nanggad, an hustisya ni Jehova nungkang pabiglabigla o daing herak.—Genesis 18:20-32.
4 An pagsiyasat kan duwang anghel nagtao nin klarong patotoo kan pagraot sa moral kan Sodoma. Kan maaraman kan mga lalaki kan siudad, “magpoon sa aki sagkod sa gurang,” na may duwang lalaking nagdatong tanganing dumagos sa harong ni Lot, sinalakay ninda an saiyang harong na may intension na manlugos bilang gang nin mga homoseksuwal. Talagang nagin grabe an saindang kabikoan! Daing duwa-duwa, matanos an nagin paghokom ni Jehova sa siudad.—Genesis 19:1-5, 24, 25.
5. Paano ilinigtas nin Dios si Lot asin an saiyang pamilya sa Sodoma?
5 Pakasambita kan paglaglag sa Sodoma asin Gomorra bilang panalmingan, si apostol Pedro nagsurat: “Si Jehova tataong magligtas sa mga tawong may diosnon na debosyon hale sa pagbalo.” (2 Pedro 2:6-9) An hustisya dai kutana napanigoan kun an matanos na si Lot asin an saiyang pamilya napara kaiba kan maraot na mga taga Sodoma. Sa siring, pinatanidan si Lot kan mga anghel ni Jehova manongod sa nagdadangadang na paglaglag. Kan si Lot mag-atraso pa, an mga anghel “huli sa pakikidamay ni Jehova” kinabit sia, an saiyang agom, asin an saiyang mga aking babae asin dinara sinda sa luwas kan siudad. (Genesis 19:12-16) Makasisierto kita na mapaheling si Jehova nin kaparehong pagmakolog sa mga matanos sa nagdadangadang na kalaglagan kan maraot na palakaw na ini.
6. Taano ta maninigo na dai niato ikahadit nin labi-labi an nagdadangadang na kalaglagan kan maraot na palakaw nin mga bagay?
6 Minsan ngani an katapusan kan palakaw na ini magigin panahon nin “pagtao nin maninigong hustisya,” mayo nin dahelan na kita mahadit nin labi-labi. (Lucas 21:22) An paghokom na gigibohon nin Dios sa Armagedon mapatutunayan na “gabos matanos.” (Salmo 19:9) Siring kan nanodan ni Abraham, kitang mga tawo lubos na makatitiwala sa hustisya ni Jehova, na mas halangkaw na gayo kisa kan sa sato. Si Abraham naghapot: “Dai daw magibo kan tama an Hokom sa bilog na daga?” (Genesis 18:25; ikomparar an Job 34:10.) O siring kan angay na pagkasabi kaiyan ni Isaias, “siisay an nagtotokdo [ki Jehova] sa dalan nin hustisya?”—Isaias 40:14.
Sarong Matanos na Gibo Tanganing Iligtas an Katawohan
7. Ano an koneksion sa pag-oltanan kan hustisya nin Dios asin kan saiyang pagkaherak?
7 An hustisya nin Dios dai nahahayag sana sa paagi nin pagkastigo nia sa mga nagkakasala. Sinasabi ni Jehova na sia “sarong matanos na Dios asin Paraligtas.” (Isaias 45:21) Malinaw nanggad, igwa nin haraning koneksion sa pag-oltanan kan katanosan, o hustisya nin Dios, asin kan saiyang kamawotan na iligtas an katawohan sa mga epekto nin kasalan. Sa pagkomento sa tekstong ini, an The International Standard Bible Encyclopedia, Edisyon na 1982, nagsasabi na “an hustisya nin Dios naghahanap nin praktikal na mga paagi na ikapahayag an Saiyang pagkaherak asin magibo an Saiyang pagliligtas.” Dai boot sabihon na an hustisya nin Dios kaipuhan na timbangan nin pagkaherak kundi, imbes, na an pagkaherak sarong kapahayagan kan hustisya nin Dios. An probisyon nin Dios na pantubos para sa kaligtasan nin katawohan iyo an pinakalataw na halimbawa kan aspektong ini nin hustisya nin Dios.
8, 9. (a) Ano an kaiba sa sinasabing “sarong matanos na gibo”? Taano? (b) Ano an hinahagad ni Jehova sa sato bilang balos?
8 An halagang pantubos mismo—an mahal na marhay na buhay kan bugtong na Aki nin Dios, si Jesu-Cristo—halangkaw na halaga huli ta an mga pamantayan nin Dios aplikado sa gabos, asin sia mismo nagsusunod dian. (Mateo 20:28) Sangkap na buhay, buhay ni Adan, an nawara, kaya sangkap na buhay an kinaipuhan tanganing balukaton an buhay para sa mga gikan ni Adan. (Roma 5:19-21) Ilinaladawan ni apostol Pablo an dalan nin integridad ni Jesus, kabale an pagbayad kan pantubos, bilang “sarong matanos na gibo.” (Roma 5:18, nota sa ibaba) Taano man? Huli ta sa punto de vista ni Jehova, an pagtubos sa katawohan iyo an tama asin makatanosan na gibohon, dawa ngani kinaipuhan na gibohon iyan na may dakulang pagsasakripisyo para sa saiya mismo. An mga aki ni Adan garo “nalanog na gaho,” na habo nin Dios na ronoton, o garo “nagbabagang linong mitsa,” na habo niang parongon. (Mateo 12:20) Kompiado an Dios na dakol na fiel na lalaki asin babae an malataw sa mga gikan ni Adan.—Ikomparar an Mateo 25:34.
9 Ano an maninigo na magin reaksion niato sa kadarudakulaing gibong ini nin pagkamoot asin hustisya? An saro sa mga bagay na hinahagad ni Jehova sa sato bilang balos iyo na kita ‘gumibo nin hustisya.’ (Miqueas 6:8) Paano niato ini magigibo?
Hanapon an Hustisya, Sunodon an Katanosan
10. (a) Ano an sarong paagi na kita naggigibo nin hustisya? (b) Paano niato mahahanap nguna an katanosan nin Dios?
10 Enot sa gabos, kaipuhan kitang sumunod sa mga pamantayan nin Dios sa moral. Huling an mga pamantayan nin Dios makatanosan asin matanos, kita naggigibo nin hustisya kun kita namumuhay kaoyon kaiyan. Iyan an linalaoman ni Jehova sa saiyang banwaan. “Pag-adal kamong gumibo nin marahay; hanapa nindo an hustisya,” an sabi ni Jehova sa mga Israelita. (Isaias 1:17) Nagtao si Jesus nin kaagid na hatol sa mga nagdadangog sa saiya sa Sermon sa Bukid, kan pagbotan nia sinda na ‘hanapon nguna an kahadean asin an katanosan nin Dios.’ (Mateo 6:33) Inenkaminar ni Pablo si Timoteo na ‘sunodon an katanosan.’ (1 Timoteo 6:11) Kun kita namumuhay kaoyon sa mga pamantayan nin Dios sa paggawe asin nagsosolog kan bagong personalidad, sinusunod niato an tunay na hustisya asin katanosan. (Efeso 4:23, 24) Sa ibang pagtaram, hinahanap ta an hustisya paagi sa paggibo kan mga bagay kaoyon sa paagi nin Dios.
11. Taano asin paano niato maninigo na labanan an pagdominar nin kasalan?
11 Siring sa aram na marhay niato, bakong pirmeng pasil para sa bakong sangkap na mga tawo na gibohon an makatanosan asin tama. (Roma 7:14-20) Inenkaminar ni Pablo an mga Kristiano sa Roma na labanan an pagdominar nin kasalan, tanganing ikaatubang ninda an saindang idinusay na hawak sa Dios bilang “mga hamo nin katanosan,” na magagamit nin Dios sa paghaman kan saiyang katuyohan. (Roma 6:12-14) Kaagid kaiyan, paagi sa regular na pag-adal asin pag-aplikar kan Tataramon nin Dios, maaako niato an “pagtatanos nin isip ni Jehova” asin kita ‘madidisiplina sa katanosan.’—Efeso 6:4; 2 Timoteo 3:16, 17.
12. Ano an maninigo niatong likayan tanganing an pagtratar niato sa iba magin kapareho kan boot niatong magin pagtratar sa sato ni Jehova?
12 Ikaduwa, naggigibo kita nin hustisya kun an pagtratar niato sa iba kapareho kan boot niatong magin pagtratar sa sato ni Jehova. Pasil na magkaigwa nin dobleng pamantayan—saro na mapagkonsinte para sa satong sadiri alagad saro man na estrikto para sa iba. Madali kitang gumibo nin mga sarahotan para sa satong sadiring mga pagkukulang, pero marikas kita sa pagtatsar sa mga sala nin iba, na tibaad saradit na gayo kun ikokomparar sa sato. Si Jesus angay na naghapot: “Kun siring, taano ta naheheling mo an dagami sa mata kan saimong tugang, alagad dai mo hinohorophorop an pasagi na nasa sadiri mong mata?” (Mateo 7:1-3) Maninigo na nungka niatong lingawan na mayo sa sato na makatitindog kun si Jehova an masiyasat sa satong mga sala. (Salmo 130:3, 4) Kun an hustisya ni Jehova nagtotogot sa saiya na lingawan an mga kaluyahan kan satong mga tugang, siisay kita na mahusgar sa sainda sa bakong paborableng paagi?—Roma 14:4, 10.
13. Taano an matanos na tawo ta nakamamateng obligado na ihulit an maogmang bareta kan Kahadean?
13 Ikatolo, kita nagpapaheling nin diosnon na hustisya kun kita mahigos na nakikikabtang sa paghuhulit. “Dai ipanguri an marahay sa mga nanonongdan kaiyan, kun nasa kapangyarihan kan saimong kamot na gibohon iyan,” an hatol sa sato ni Jehova. (Talinhaga 3:27) Bakong tama na sadirihon an nagtataong buhay na kaaraman na bulaos na itinao sa sato nin Dios. Totoo, dakol na tawo an tibaad habo kan satong mensahe, alagad sagkod na padagos na nagpapaheling an Dios nin pagkaherak sa sainda, kita maninigong gikan sa boot na magpadagos sa pagtao sa sainda kan oportunidad na “makapagsolsol.” (2 Pedro 3:9) Asin arog ki Jesus, kita naoogma kun may natatabangan kita na dumolok sa hustisya asin katanosan. (Lucas 15:7) Ngonyan na an paborableng panahon na kita ‘magsabwag nin banhi sa katanosan.’—Oseas 10:12.
“Mga Prinsipe Para sa Hustisya Mismo”
14. Ano an kabtang kan kamagurangan mapadapit sa hustisya?
14 Kita gabos dapat na maglakaw sa dana nin katanosan, alagad an kamagurangan sa Kristianong kongregasyon may espesyal na paninimbagan sa bagay na ini. An sa-prinsipeng pamamahala ni Jesus ‘pinapagdadanay paagi sa hustisya asin katanosan.’ Huli kaiyan, an pamantayan para sa kamagurangan iyo an hustisya nin Dios. (Isaias 9:7) Ginigirumdom ninda an makahulang ilinadawan sa Isaias 32:1: “Uya! An sarong hade magsasakop para sa katanosan mismo; asin kun manongod sa mga prinsipe, mamamahala sinda bilang mga prinsipe para sa hustisya mismo.” Bilang nombrado kan espiritung mga paraataman, o ‘mga pinaniwalaan nin Dios,’ an kamagurangan maninigong gibohon an mga bagay kaoyon sa paagi nin Dios.—Tito 1:7.
15, 16. (a) Paano inaarog kan kamagurangan an fiel na pastor sa ilustrasyon ni Jesus? (b) Ano an namamatean kan kamagurangan manongod sa mga nawawara sa espirituwal?
15 Ipinaheling ni Jesus na an hustisya ni Jehova madinamayon, maheherakon, asin rasonable. Orog sa gabos, hiningoa niang tabangan an mga may problema asin ‘hanapon saka iligtas an nawara.’ (Lucas 19:10) Arog kan pastor sa ilustrasyon ni Jesus na daing kapagalan na naghanap sagkod na makua nia an nawarang karnero, hinahanap kan kamagurangan an mga nalagalag sa espirituwal asin pinagmamaigotan na giyahan sinda pabalik sa aripompon.—Mateo 18:12, 13.
16 Imbes na kondenaron an mga tibaad nagkasala nin magabat, hinihingoa kan kamagurangan na paomayan asin giyahan sinda sa pagsolsol kun iyan posible. Naggagayagaya sinda kun matatabangan ninda an saro na nalagalag. Minsan siring, namomondo sinda kun an sarong nagkasala dai magsolsol. Dangan an matanos na mga pamantayan nin Dios naghahagad sa sainda na itiwalag an dai nagsosolsol. Dawa siring, arog kan ama kan gastador na aki, naglalaom sinda na pag-abot nin panahon an nagkasala ‘makakapag-isip-isip.’ (Lucas 15:17, 18) Sa siring, an kamagurangan naggigibo nin inisyatiba na songkoon an nagkapirang tiwalag tanganing ipagirumdom sa sainda kun paano sinda makababalik sa organisasyon ni Jehova.a
17. Ano an pasohan kan kamagurangan kun nagkakapot nin kaso nin pagkakasala, asin anong kualidad an matabang sa sainda na makamit an pasohan na iyan?
17 Nangorognang kaipuhan na arogon kan kamagurangan an hustisya ni Jehova kun nagkakapot nin mga kaso nin pagkakasala. An mga parakasala “padagos na nagdodorolok” ki Jesus huli ta namamatean ninda na masasabotan asin tatabangan nia sinda. (Lucas 15:1; Mateo 9:12, 13) Siempre, dai kinonsinte ni Jesus an pagkakasala. An sarong beses na pagkakan sa kaibanan ni Jesus nagpahiro ki Zaqueo, sarong midbid na parakikil, na magsolsol asin magbayad para sa gabos na danyos na nagibo nia sa iba. (Lucas 19:8-10) Iyan man an pasohan kan kamagurangan ngonyan sa saindang hudisyal na mga pagdangog sa kaso—giyahan an nagkasala sa pagsolsol. Kun sinda madaling dolokon arog ki Jesus, an dakol na nagkasala mas mapapasilan na magpatabang sa sainda.
18. Ano an magpapangyari sa kamagurangan na magin arog sa “pailihan sa doros”?
18 An mapagrisang puso makatatabang sa kamagurangan sa pagpaotob kan hustisya nin Dios, na bakong maisog ni daing simpatiya. Interesante nanggad, inandam ni Esdras an saiyang puso, bako sanang an saiyang isip, tanganing ikatokdo sa mga Israelita an hustisya. (Esdras 7:10) An mapagsabot na puso magpapangyari sa kamagurangan na ikaaplikar an angay na mga prinsipyo sa Kasuratan asin makonsiderar an mga kamugtakan kan kada indibiduwal. Kan paomayan ni Jesus an babae na inaawasan nin dugo, ipinaheling nia na an hustisya ni Jehova nangangahulogan nin pagsabot sa katuyohan patin sa letra kan ley. (Lucas 8:43-48) An kamagurangan na nagpapaotob nin hustisya na may pakikidamay puedeng iagid sa sarong “pailihan sa doros” para duman sa mga ipinapadpad kan saindang sadiring mga kaluyahan o kan maraot na palakaw na ini na nabubuhayan niato.—Isaias 32:2.
19. Paano naghimate an sarong tugang na babae sa pag-aplikar kan hustisya nin Dios?
19 An sarong tugang na babae na nakakomiter nin magabat na kasalan direktang nasabotan an hustisya nin Dios. “An totoo, takot akong rumani sa kamagurangan,” an inadmitir nia. “Alagad trinatar ninda ako na may pakikidamay asin dignidad. An kamagurangan garo mga ama imbes na maisog na mga hokom. Tinabangan ninda ako na masabotan na si Jehova dai ako isisikwal kun desidido ako na itanos an sakong mga dalan. Direkta kong nanodan kun paano nia kita dinidisiplina bilang mamomoton na Ama. Ikinapahayag ko ki Jehova an laog kan sakong puso, na may kompiansa na dadangogon nia an sakong pagngayongayo. Sa pagsalingoy, sadiosan kong masasabi na an pakipag-olay na idto sa kamagurangan kaidtong pitong taon na an nakaagi sarong bendisyon hale ki Jehova. Poon kaidto, nagin mas makosog an sakong relasyon sa saiya.”
Papagdanayon an Hustisya Asin Gibohon an Matanos
20. Ano an mga pakinabang sa pakasabot asin paggibo nin hustisya asin katanosan?
20 Nakaoogma, an kahulogan kan hustisya nin Dios labi pa nanggad kisa sa pagtao sa kada tawo kan maninigo sa saiya. An hustisya ni Jehova pinahiro sia na tawan nin buhay na daing katapusan an mga naggigibo nin pagtubod. (Salmo 103:10; Roma 5:15, 18) Arog kaini an pagtratar sa sato nin Dios huli ta kinokonsiderar kan saiyang hustisya an satong mga kamugtakan, asin iyan naghihingoang magligtas imbes na magkondenar. Tunay nanggad, an orog na pakasabot sa sakop kan hustisya ni Jehova orog na irinarani kita sa saiya. Asin mantang kita nagmamaigot na arogon an aspektong ini kan saiyang personalidad, an buhay niato asin kan iba mayaman na bebendisyonan. An satong paghanap sa hustisya maririsa kan satong langitnon na Ama. Si Jehova nanunuga sa sato: “Susoga nindo nin fiel an hustisya, banwaan, asin giboha nindo an matanos. Huli ta an sakong pagliligtas harani nang dumatong, asin an sakong katanosan mahayag. Maogma an magagadanon na tawo na naggigibo kaini.”—Isaias 56:1, 2.
[Nota sa Ibaba]
a Helingon An Torrengbantayan, Mayo 1, 1991, pahina 16-17 (w91-E 4/15 p. 22-3).
Nagigirumdoman daw Nindo?
◻ Ano an itinotokdo sa sato kan paglaglag sa Sodoma asin Gomorra manongod sa hustisya ni Jehova?
◻ Taano an pantubos ta sarong pambihirang kapahayagan kan hustisya asin pagkamoot nin Dios?
◻ Ano an tolong paagi na kita makagigibo nin hustisya?
◻ Sa anong espesyal na paagi maaarog kan kamagurangan an hustisya nin Dios?
[Mga retrato sa pahina 15]
Paagi sa satong paghuhulit, ipinaheheling ta an diosnon na hustisya
[Retrato sa pahina 16]
Kun an kamagurangan nagpapaheling nin diosnon na hustisya, mas napapasilan an mga may problema na magpatabang sa sainda