An Pagsakat ni Cristo Asin an mga Pakinabang Kaiyan sa Sato
AN PINANGYARIHAN kan pagsakat ni Jesus iyo an Bukid nin mga Olibo (Gibo 1:9, 12), harani sa banwaan nin Betania (Lucas 24:50), an banwaan na nasa sirangan na kampi kan Bukid nin mga Olibo. An mga nakaheling sa pagsakat limitadong grupo, an saiyang fiel na mga apostol. (Gibo 1:2, 11-13) An rekord nagsasabi na “mantang sinda naghehereling, sia dinara paitaas asin itinago sia sa saindang mga mata nin sarong panganoron.” Sinda padagos pa kutanang nagtatarangad sa langit kun dai sinabihan kan mga anghel, na nag-impormar sa sainda: “An Jesus na ini na inako gikan sa saindo pasiring sa langit madatong sa iyo man sanang paagi na naheling sia nindong nagsasakat sa langit.”—Gibo 1:9-11.
Dapat mangnohon na sinambit kan mga anghel an “paagi” (sa Griego, troʹpos) bakong an porma (sa Griego, mor·pheʹ) kan paghale ni Jesus. Mantang itinatago sia kan panganoron, dai na sia naheling kan mga mata nin tawo. An pagkasaysay sa Gibo nagpapaheling na an saiyang pagsakat mayo nin pagpapasikat o eksibisyon, na namansayan nin pira sanang fiel na parasunod asin an enot sanang kabtang kan pagsakat. An paagi kan saiyang pagsakat nagpangyari sa saiyang mga apostol na makualipikar na makaheling mismo kan katunayan na iyan, siring kan pakaheling ninda sa pagkabuhay liwat ni Jesus. (Gibo 1:3) Sa siring, sia dai sana “nawara” sa sainda, siring sa nangyari bago kaini sa duwang disipulo sa Emaus, o kun paanong an anghel na nagpaheling ki Gedeon “nawara sa saiyang pagheling.” (Lucas 24:31; Hokom 6:21, 22) Sa sarong kabtang, an saiyang pagsakat mas kapareho kan sa anghel na nagpaheling ki Manoa asin sa saiyang agom. Pinaandam nia sinda nin atang, asin “mantang an kalayo nag-iitaas hale sa altar pasiring sa langit, dangan an anghel ni Jehova nag-itaas sa kalayo kan altar mantang nagheheling si Manoa asin an saiyang agom.”—Hokom 13:20.
Mantang ipinaheheling kan Gibo 1:3-9 na an pagsakat ni Jesus nangyari 40 aldaw poon sa panahon kan saiyang pagkabuhay liwat, may lagwat nin panahon sa pag-oltanan kan mga pangyayaring nakarekord sa Lucas 24:1-49 na nangyari sa aldaw kan pagkabuhay liwat ni Jesus asin kan pagsakat ni Jesus na ilinadawan sa bersikulo 51 kan kapitulong iyan. Maririsa man na an mga tataramon na “asin nagpoon na darahon pasakat sa langit,” na yaon sa bersikulong iyan, mayo sa nagkapirang suanoy na manuskrito asin kun siring hinale sa nagkapirang modernong traduksion (NE, AT). Minsan siring, iyan talagang yaon sa Bodmer Papyrus (P75), Alexandrine Manuscript, Vatican Manuscript No. 1209, asin iba pang suanoy na manuskrito.
Epekto sa mga Disipulo
Sagkod sa aldaw kan pagsakat ni Jesus minalataw na an nasa isip pa kan mga disipulo iyo an manongod sa daganon na kahadean na pamamahalaan nia, siring kan maheheling sa saindang mga tataramon sa Gibo 1:6. Paagi sa pagpoon kan saiyang pagsakat sa naheheling na paagi asin pagtogot sa saiyang mga disipulo na maheling an enot na kabtang kaiyan, sa siring ipinaheling nin malinaw sa sainda ni Jesus na an saiyang Kahadean langitnon asin na, laen ki David na “dai nagsakat sa kalangitan,” poon kaidto si Jesus mamumugtak sa “too nin Dios,” siring kan mapusong pinatunayan ni Pedro kan aldaw nin Pentecostes.—Gibo 2:32-36.
An aksion na iyan maninigo man na magpagirumdom sa sainda kan dakol na nakaaging tataramon ni Jesus na nagtotokdo sa siring na langitnon na kamugtakan asin makatabang sa saiyang mga disipulo na masabotan an mga ini. Nabigla nia an nagkapira paagi sa pagsabi: “Kun siring ano kun maheling nindo an Aki nin tawo na minasakat sa dati niang namumugtakan?” (Juan 6:62); asin sinabihan nia an mga Judio: “Kamo mga taga ibaba; ako taga itaas.” (Juan 8:23) Kan banggi kan saiyang ultimong pakipagtipon sa saiyang mga apostol, sinabi nia sa sainda na sia ‘maduman sa Ama tanganing mag-andam nin lugar para sa sainda’ (Juan 14:2, 28); mantang kaiba sinda kaidtong saiyang ultimong banggi nin buhay bilang tawo, ibinareta nia sa saiyang Ama na saiyang ‘hinaman an trabaho digdi sa daga’ na iinasignar sa saiya asin namibi sia, na sinasabi: “Pamurawaya ako sa kataed mo kan kamurawayan na dating yaon sa sako sa kataed mo bago an kinaban,” na sinasabi man, “ako madian saimo.” (Juan 17:4, 5, 11) Kan arestaron, iyan man an sinabi nia sa atubangan kan Sanhedrin. (Mateo 26:64) Pagkabuhay nia liwat sinabihan nia si Maria Magdalena: “Dai mo ako pagkugoson. Huli ta dai pa ako nasakat sa Ama. Alagad paduman ka sa sakong mga tugang asin sabihon mo sa sainda, ‘Ako masakat sa sakong Ama asin saindong Ama asin sa sakong Dios asin saindong Dios.’” (Juan 20:17) Pero, apisar kan gabos na ini, malinaw na an kahulogan kan mga tataramon na ini nasabotan kan mga disipulo sa panahon sana kan pagsakat. Kan huri, si Esteban tinawan nin bisyon dapit ki Jesus na yaon sa too nin Dios (Gibo 7:55, 56), asin naeksperyensiahan ni Pablo an epekto kan langitnon na kamurawayan ni Jesus.—Gibo 9:3-5.
An Pagtalaga nin ‘Bago Asin Buhay na Dalan’
Minsan ngani pinonan ni Jesus an saiyang pagsakat sa pisikal na porma, na sa siring naheheling kan nagmamasid na mga disipulo nia, mayo nin basehan na isipon na sia padagos na nagdanay sa materyal na porma pakatapos na sumaliot an panganoron. Si apostol Pedro nagsasabi na si Jesus nagadan sa laman alagad binuhay liwat “sa espiritu.” (1 Pedro 3:18) Ipinahayag ni Pablo an susundon na “an laman asin dugo dai makakapagmana kan kahadean nin Dios.” (1 Corinto 15:50; ikomparar man an tataramon ni Jesus na yaon sa Juan 12:23, 24 sa 1 Corinto 15:35-45.) Ibinaing ni Pablo an pagsakat ni Jesus sa presensia nin Dios sa kalangitan sa paglaog kan halangkaw na saserdote sa Kabanalbanaleng kuarto kan tabernakulo sa Aldaw nin Pagtubos asin sinabi nia nin espesipiko na sa okasyon na iyan an dara sana kan halangkaw na saserdote iyo an dugo (bakong an laman) kan mga iinaatang. (Hebreo 9:7, 11, 12, 24-26) Dangan ikinokomparar ni Pablo an lipod, na nagseparar kan enot na kuarto sa Kabanalbanaleng kuarto, sa laman ni Cristo. Sa pag-agi pasiring sa Kabanalbanale, sa makaladawan na presensia nin Dios, dai dinara kan halangkaw na saserdote an lipod kundi buminalyo sia sa olang na iyan asin luminampas pa, kaya nasa hudian nia iyan. Sa siring, sinasabi ni Pablo na “kita igwa nin kapusoan sa paglaog sa banal na lugar paagi sa dugo ni Jesus, na itinalaga nia para sa sato bilang bago asin buhay na dalan pasiring sa ibong kan lipod, na iyo, an saiyang laman.”—Hebreo 9:3, 24; 10:10, 19, 20; ikomparar an Juan 6:51; Hebreo 6:19, 20.
An pagsakat ni Jesus sa langit tanganing ipresentar ki Jehova an nakatutubos na halaga kan saiyang dugo nagtalaga nin “bago asin buhay na dalan” nin pagrani sa Dios sa pamibi. Na iyan nagbukas man kan dalan pasiring sa langitnon na buhay minaoyon sa tataramon mismo ni Jesus sa pagsabi na, bago kaiyan, “mayo nin tawo na nagsakat sa langit kundi idtong naghilig hale sa langit, an Aki nin tawo.” (Juan 3:13) Sa siring, bakong si Enoc ni si Elias an nagtalaga kan dalan na ini, minsan si David. (Genesis 5:24; 2 Hade 2:11; Gibo 2:34) Siring sa sinasabi ni Pablo: “Linilinaw kan banal na espiritu na an dalan pasiring sa banal na lugar dai pa ihinayag mantang nagtitindog pa an enot na tolda.”—Hebreo 9:8.
Kun Taano ta Kaipuhan
An pagsakat ni Jesus sa langitnon na rona kaipuhan para sa nagkapirang dahelan o katuyohan. Sinabi nia na kaipuhan na sia ‘magduman’ tanganing ikasugo nia an banal na espiritu nin Dios bilang katabang kan saiyang mga disipulo. (Juan 16:7-14) Para sa mga disipulo an pagbubo ni Jesus kan espiritung iyan kan aldaw nin Pentecostes malinaw na prueba kan katunayan na si Jesus nakaabot na sa presensia nin Dios asin na iprinesentar na nia sa Saiya an halaga kan saiyang pantubos na atang. (Gibo 2:33, 38) An pagpresentar na ini kan halaga kan saiyang dugo nagin dahelan man na magin mahalagang marhay an pagsakat na iyan, huli ta iyan dai gigibohon digdi sa daga, sa Kabanalbanale kan templo sa Jerusalem, kundi solamente sa “langit mismo . . . sa atubangan nin Dios.” (Hebreo 9:24) Kinaipuhan man iyan sa pagnombra asin pagpamuraway ki Jesus bilang an “dakulang halangkaw na saserdote na nakabalyo na sa kalangitan.” (Hebreo 4:14; 5:1-6) Ipinaliliwanag ni Pablo na “ngonyan, kun sia nasa daga, dai sia magigin saserdote,” kundi na, huling “nagtukaw sa too kan trono kan Kapangyarihan sa kalangitan,” si Jesus ngonyan “nagkamit nin orog karahay na paglilingkod sa publiko, kaya sia man an parapangoltanan sa orog karahay na tipan.” (Hebreo 8:1-6) Huli kaini, an mga Kristiano na nasa irarom kan minanang kasalan nararanga sa pakaaram na sinda ‘igwa nin parasorog sa Ama, si Jesu-Cristo, sarong matanos.’—1 Juan 2:1; Roma 8:34; Hebreo 7:25.
Sa katapustapusi, an pagsakat kaipuhan para sa pag-administrar ni Jesus sa Kahadean na sia an nagin paramana, na “an mga anghel asin mga autoridad patin mga kapangyarihan ipinasakop na sa saiya.” (1 Pedro 3:22; Filipos 2:6-11; 1 Corinto 15:25; Hebreo 10:12, 13; ikomparar an Daniel 7:14.) Huling ‘dinaog an kinaban’ (Juan 16:33), si Jesus nakikabtang sa pag-otob kan hula sa Salmo 68:18, na ‘nagsakat sa itaas asin nagdara nin mga bihag,’ na an kahulogan kaiyan ipinaliliwanag ni Pablo sa Efeso 4:8-12.