Kamtan an “Tunay na Buhay”

ITINAO ni Jehova Dios sa tawo an pakarisa kan panahon na daing sagkod. (Eclesiastes 3:11) Pinangyayari kaini an mga tawo na makamateng daing kakayahan sa atubangan nin kagadanan alagad, kadungan kaiyan, pinupukaw sa saindang boot an dai nahahaleng kamawotan na mabuhay.

An Banal na Biblia, an ipinasabong na Tataramon nin Dios, nagtatao sa sato nin dakulang paglaom. (2 Timoteo 3:16) Si Jehova, na iyo an pinakaubod nin pagkamoot, dai puedeng linalang an tawo na may abilidad na masabotan an ideya nin panahon na daing sagkod dangan kondenaron sia na mabuhay nin pipira sanang taon. An paglalang sa sato tangani sanang pagdusahon manongod sa satong situwasyon sarongat nanggad sa personalidad nin Dios. Dai kita linalang na siring sa “daing pag-isip na mga hayop na natural na namundag tanganing dakopon asin laglagon.”—2 Pedro 2:12.

Sa paglalang ki Adan asin Eva na may natural na pakaaram manongod sa panahon na daing sagkod, si Jehova Dios naggibo nin sarong bagay na “marahayon”; ginibo nia sinda na may potensial na mabuhay sagkod lamang. (Genesis 1:31) Alagad makamomondo, inabuso kan enot na mag-agom an saindang libreng kabotan, na nakisuway sa malinaw na pangangalad kan Kaglalang asin iwinara an saindang orihinal na pagkasangkap. Bilang resulta, sinda nagadan, na ipinamana an pagkabakong sangkap asin kagadanan sa saindang mga gikan.—Genesis 2:17; 3:1-24; Roma 5:12.

An Biblia dai pinalilibotan nin misteryo manongod sa katuyohan nin buhay asin sa kun ano an kahulogan nin kagadanan. Sinasabi kaiyan na sa kagadanan “mayo nin gibohon ni pagplano ni kaaraman” asin na an mga gadan ‘mayo man lamang nin pakaaram.’ (Eclesiastes 9:5, 10) Sa ibang pagtaram, an mga gadan gadan. An doktrina nin inmortal na kalag bakong oyon sa Biblia, kaya mayo nin hararom na misteryo na kaipuhan resolberan manongod sa kamugtakan kan mga gadan.—Genesis 3:19; Salmo 146:4; Eclesiastes 3:19, 20; Ezequiel 18:4.a

An Dios may katuyohan; dai nia linalang an daga na “dai nin kapakanan.” Hinaman nia iyan “tanganing pag-istaran” nin sangkap na mga tawo sa paraisong kamugtakan, asin dai binago nin Dios an saiyang katuyohan. (Isaias 45:18; Malaquias 3:6) Tanganing otobon iyan, isinugo nia an saiyang Aki digdi sa daga. Paagi sa pagdanay na fiel sagkod sa kagadanan, itinao ni Jesu-Cristo an paagi na matubos an katawohan sa kasalan asin kagadanan. Sa katunayan sinabi ni Jesus: “An Dios namoot na gayo sa kinaban na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.”—Juan 3:16.

Kaidto pa, ipinanuga nin Dios na sia malalang nin “bagong kalangitan asin sarong bagong daga.” (Isaias 65:17; 2 Pedro 3:13) Mangangaipo na sia magpili nin sarong limitadong grupo nin fiel na mga Kristiano na mabubuhay sa langit. Kaiba ni Jesu-Cristo, sinda minabilog kan pinakasentrong gobyerno. An Biblia inaapod ini na “an kahadean kan kalangitan,” o “kahadean nin Dios,” na pamamahalaan “an mga bagay sa daga.” (Mateo 4:17; 12:28; Efeso 1:10; Kapahayagan 5:9, 10; 14:1, 3) Pakalaglaga kan gabos na maraot sa satong globo asin pakaliniga kaiyan, pangyayarihon nin Dios an sarong matanos na bagong sosyedad nin tawo, o “bagong daga.” Mapapabilang digdi an mga tawo na poprotehiran nin Dios sa madali nang pagkalaglag kan maraot na palakaw na ini nin mga bagay. (Mateo 24:3, 7-14, 21; Kapahayagan 7:9, 13, 14) Iibanan sinda kan mga ibabalik sa buhay paagi sa ipinanugang pagkabuhay liwat.—Juan 5:28, 29; Gibo 24:15.

“An Tunay na Buhay” sa Katapustapusi

Pinatutunayan an nakapupukaw sa boot na paglaladawan kan buhay sa Paraisong daga sa ngapit, an Dios nagsasabi: “Uya! ginigibo kong bago an gabos na bagay.” (Kapahayagan 21:5) Imposibleng lubos na masabotan kan isip nin tawo an makangangalas na mga gigibohon nin Dios para sa katawohan. Lalalangon nin Dios an sarong pambilog na kinaban na paraiso, na inarog sa Eden. (Lucas 23:43) Kapareho kan Eden, an gayon asin pagigin nakagagayagaya nin kolor, tanog, asin namit magigin abunda. Mawawara na an kadukhaan asin mga kakulangan nin kakanon, huli ta mapadapit sa panahon na iyan an Biblia nagsasabi: “An enot na mga bagay nakalihis na.” (Kapahayagan 21:4; Salmo 72:16) Mayo nang magsasabi, “Naghehelang ako,” mantang hahaleon na an helang sagkod lamang. (Isaias 33:24) Iyo, an gabos na causa nin kolog mawawara na, sagkod an haloy nang kaiwal kan katawohan, an kagadanan. (1 Corinto 15:26) Sa sarong makangangalas na bisyon kan “bagong daga,” an bagong sosyedad nin tawo na sakop kan pamamahala ni Cristo, si apostol Juan nakadangog nin sarong tingog na nagsasabi: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.” Ano pa an puedeng magtao nin orog na karangahan asin kagayagayahan kisa kan kaotoban kan panuga na ini nin Dios?

Sa paglaladawan kan buhay sa ngapit, partikularmenteng idinodoon kan Biblia an mga kamugtakan na mapanigo sa moral asin espirituwal na mga kamawotan nin tawo. An gabos na makatanosan na pasohan na basang sanang pinaglalapigotan nin katawohan sagkod ngonyan biyo nang makakamtan. (Mateo 6:10) Kabilang digdi an kamawotan para sa hustisya, na dai pa nakakamtan huli ta an tawo parateng pinagsasakit nin makuri kan maringis na mga nan-aapi na dinodominar an mga maluya. (Eclesiastes 8:9) An salmista makahulang nagsurat dapit sa mga kamugtakan sa pamamahala ni Cristo: “Sa saiyang kaaldawan maoswag an pagigin tanos, asin an katoninongan abunda.”—Salmo 72:7, The New Jerusalem Bible.

An pagkapantaypantay saro pang kamawotan na para dian nagsakripisyo an dakol. Sa “paglalang liwat,” hahaleon nin Dios an diskriminasyon. (Mateo 19:28) An gabos magkakamit nin pararehong dignidad. Bako ining pagkapantaypantay na ipapaotob nin maringis na rehimen nin gobyerno. Al kontraryo, hahaleon an mga causa nin diskriminasyon, kabale na an kahanaban asin kapaabhawan na nagmomotibar sa mga tawo na maghingoang dominaron an iba o magtipon nin kadakoldakol na rogaring. Ihinula ni Isaias: “Sinda siertong magtotogdok nin mga harong asin mag-oontok sinda dian; asin siertong magtatanom sinda nin mga ubasan asin kakakanon ninda an bunga kaiyan. Dai sinda magtotogdok asin iba an mag-oontok; dai sinda matanom asin iba an makakan.”—Isaias 65:21, 22.

Kanigoan kan pagdusa nin tawo huli sa pagpabolos nin dugo kapwa sa personal asin grupo-grupong pakikilaban! Ini nagpadagos poon sa tinutuyong paggadan ki Abel sagkod sa mga guerra sa presenteng panahon. Haloy-haloy na nanggad na naglalaom asin naghahalat an mga tawo, na garo basang sana, na maestablisar an katoninongan! Sa ibinalik na Paraiso, an gabos na tawo magigin toninong asin mahoyo; “manonompongan nanggad ninda an saindang nangongorog na dakulang kaogmahan sa nagsosopay na katoninongan.”—Salmo 37:11.

An Isaias 11:9 nagsasabi: “An daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.” Huli sa minanang pagkabakong sangkap, kabilang sa iba pang bagay, bakong posible na masabotan ta nin biyo ngonyan an lubos na kahulogan kan mga tataramon na iyan. Kun paano kita pagsasararoon kan sangkap na kaaraman nin Dios dian sa saiya asin kun paano iyan maresulta sa lubos na kagayagayahan, tibaad kaipuhan ta pang manodan. Alagad mantang pinaaaram sa sato kan Kasuratan na si Jehova Dios na makangangalas sa kapangyarihan, kadonongan, hustisya, asin pagkamoot, makasisierto kita na dadangogon nia an gabos na pamibi na ipapahayag kan mga nag-eerok sa “bagong daga.”

“An Tunay na Buhay” Sarong Kasiertohan—Pogolan na Marhay Nindo Iyan!

Para sa dakol, an buhay na daing sagkod sa mas marahay na kinaban pangarap o imahinasyon sana. Minsan siring, sa mga talagang may pagtubod sa panuga kan Biblia, an panugang ini sarong kasiertohan. Iyan garo angkla sa saindang buhay. (Hebreo 6:19) Kun paanong an angkla tinitindihan an sarong barko na pumirme asin pinopogolan iyan na dai magparahiro, an paglaom na buhay na daing sagkod pinaririgon saka ginigibong kompiado an mga tawo asin pinangyayaring maatubang ninda an magabat na mga problema sa buhay asin mapangganahan pa ngani an mga iyan.

Masesegurado niato na ootobon nin Dios an saiyang mga panuga. Nagtao pa ngani sia nin garantiya paagi sa panunumpa, sarong dai marerebokar na kapanugaan. Si apostol Pablo nagsurat: “An Dios, kan mawot niang ipahayag nin orog sa mga paramana kan panuga an dai pagkaliwat kan saiyang kahatolan, nanumpa, tanganing, paagi sa duwang dai nagliliwat na bagay na dian dai mangyayaring magputik an Dios, kita . . . magkaigwa nin makosog na pagparigon sa boot na mangapot sa paglaom na ibinugtak sa atubangan niato.” (Hebreo 6:17, 18) An “duwang dai nagliliwat na bagay” na nungkang makakanselar nin Dios iyo an saiyang panuga asin an saiyang sumpa, na dian niato ibinabasar an satong mga paglaom.

An pagtubod sa mga panuga nin Dios nagtatao nin dakulang karangahan asin espirituwal na kosog. Si Josue, sarong namomoon kan banwaan nin Israel, may pagtubod na siring kaiyan. Kan sambiton ni Josue an saiyang pamamaaram sa mga Israelita, sia gurang na asin nakaaaram na madali na siang magadan. Pero sia nagpaheling nin kakosogan asin kaimbodan na dai napanluluya, na bunga kan bulaos na tiwala sa mga panuga nin Dios. Pakasabiha na sia pasiring “sa dalan kan bilog na daga,” an dalan na naggigiya sa bilog na katawohan pasiring sa kagadanan, sinabi ni Josue: “Aram nindong gayo sa bilog nindong puso asin sa bilog nindong kalag na ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.” Iyo, inotro ni Josue nin tolong beses na pirmeng inootob nin Dios an gabos niang panuga.—Josue 23:14.

Kamo man puedeng magkaigwa kan kaparehong pagtubod sa panuga nin Dios na bagong kinaban na maeestablisar sa dai na mahahaloy. Paagi sa maigot na pag-adal sa Biblia, masasabotan nindo kun siisay si Jehova asin kun taano sia ta maninigo sa saindong lubos na pagtitiwala. (Kapahayagan 4:11) Si Abraham, Sara, Isaac, Jacob, asin iba pang mga fiel kan suanoy igwa nin pagtubod na dai napanluluya, na nakabasar sa saindang personal na kaaraman dapit sa tunay na Dios, si Jehova. Nagdanay na makosog an saindang paglaom, sa ibong kan bagay na “dai ninda nakamtan an kaotoban kan mga panuga” kan sinda nabubuhay pa. Pero “an mga iyan natanaw ninda sa harayo asin galagang inako an mga iyan.”—Hebreo 11:13.

Paagi sa pakasabot sa mga hula sa Biblia, naheheling na niato ngonyan an pagdangadang “kan dakulang aldaw nin Dios na Makakamhan sa gabos,” na durante kaiyan an daga lilinigon sa gabos na karatan. (Kapahayagan 16:14, 16) Arog kan fiel na mga lalaki kan suanoy, kita kaipuhan na magdanay na may kompiansang naghahalat kan mga pangyayari sa ngapit, na minomotibar kan pagtubod saka kan pagkamoot sa Dios asin sa “tunay na buhay.” An kaharanihan kan bagong kinaban nagtatao nin makosog na pan-enganyar sa mga naggigibo nin pagtubod ki Jehova asin namomoot sa saiya. An siring na pagtubod asin pagkamoot kaipuhan na kultibaron tanganing kamtan an pabor asin proteksion nin Dios durante kan saiyang dakulang aldaw, na harani na.—Sofonias 2:3; 2 Tesalonica 1:3; Hebreo 10:37-39.

Kaya, namomotan daw nindo an buhay? Asin orog pa daw nindong minamawot an “tunay na buhay”—buhay bilang aprobadong lingkod nin Dios, na may esperansang magkaigwa nin maogmang ngapit, iyo, na may tinatanaw na buhay na daing sagkod? Kun iyan an saindong hinihimuyawot, himatea an sadol ni apostol Pablo, na nagsurat na maninigo niatong ‘ibugtak an satong paglaom, bakong sa kayamanan na bakong segurado, kundi sa Dios.’ Si Pablo nagpadagos: “Magin mayaman sa marahay na mga gibo,” na nagtatao nin onra sa Dios, tangani na “makapangapot nin marigon sa tunay na buhay.”—1 Timoteo 6:17-19.

Paagi sa pag-ako sa iinaalok na pag-adal sa Biblia kaiba kan Mga Saksi ni Jehova, puede kamong magkaigwa nin kaaraman na “nangangahulogan nin buhay na daing katapusan.” (Juan 17:3) May pagkamoot, irenikord sa Biblia an garo sa ama na pangagda sa gabos: “Aki ko, dai mo paglingawan an sakong ley, asin kuyogon logod kan saimong puso an sakong mga togon, huli ta idadagdag sa saimo an lawig nin mga aldaw asin mga taon nin buhay patin katoninongan.”—Talinhaga 3:1, 2.

[Nota sa Ibaba]