Bareta kan mga Parabalangibog kan Kahadean
Pakamidbid sa Mamomoton na Dios
SA EDAD na 16, an sarong taga Brazil na an ngaran Antonio, desganado na sa buhay. An mga pakamate nin kadaihan nin pakinabang nagdara sa saiya sa pagdodroga asin alkoholismo. Parate siang nag-isip na maghugot. Sa mga panahon na ini na nagirumdoman nia an sinabi sa saiya kan saiyang ina: “An Dios pagkamoot.” (1 Juan 4:8) Alagad haen an mamomoton na Dios na ini?
Sa pagprobar na maomayan sa saiyang pag-abuso sa droga asin alkohol, si Antonio nagpatabang sa padi kan lokal na parokya. Minsan ngani si Antonio nagin aktibong marhay sa Iglesia Katolika, dakol pa giraray siang hapot. Halimbawa, an mga tataramon ni Jesus, na “Mamimidbid nindo an katotoohan, asin an katotoohan mapatalingkas sa saindo” masakit saboton para sa saiya. (Juan 8:32) Anong klaseng katalingkasan an ipinanuga ni Jesus? An iglesia dai makatao nin ano man na nakakokontentong simbag sa mga hapot nia. Sa kahurihurihi, si Antonio naparayo asin nagbalik sa saiyang dating ugale. Sa katunayan, an saiyang mga pagkaadikto lalong naggrabe.
Kan panahon na ini, an agom ni Antonio, si Maria, nagpoon na makipag-adal sa Biblia sa mga Saksi ni Jehova. Minsan ngani dai kinokontra an pag-adal kaini, habo ni Antonio sa mga Saksi ta para sa saiya sinda “sarong relihion hale sa Amerika na nagtatabang sa intereses kan imperyalismong Amerikano.”
Dai nadesganar, si Maria nagwawalat sa harong nin mga kopya kan magasin na Torrengbantayan asin Awake! na nagtatampok nin mga artikulo na inisip nia na puedeng makapukaw sa interes ni Antonio. Huli ta gustong-gusto ni Antonio an pagbasa, kun minsan hineheling nia an mga magasin kun mayo an saiyang agom. Sa kaenot-enote sa saiyang buhay, nanompongan nia an simbag sa saiyang mga hapot sa Biblia. “Nagpoon man na mariparo ko an pagkamoot asin kabootan na ipinaheheling sa sako kan sakong agom asin kan mga Saksi,” an nagigirumdoman nia.
Kaidtong kabangaan kan 1992, si Antonio nagdesisyon na gusto na man niang makipag-adal sa Biblia sa mga Saksi ni Jehova. Minsan siring, nagpadagos sia sa pagdodroga asin makosog na pag-inom. Sarong matangang banggi mantang sia asin an sarong katood papuli na hale sa sarong lugar nin mga barong-barong, pinapondo sinda kan mga pulis. Kan makuanan nin cocaina kan mga pulis si Antonio, pinonan nindang bugbogon sia. An sarong pulis ibinadag sia sa lapok asin tinutokan sia nin de-sabog sa saiyang lalauogon. “Taposon mo na iyan!” an ikinurahaw kan saro pang pulis.
Mantang si Antonio nakalakma sa lapok, nagirumdoman nia an saiyang buhay. An solamenteng marahay na mga bagay na natatandaan nia iyo an saiyang pamilya asin si Jehova. Namibi sia nin halipot, na naghahagad nin tabang ki Jehova. Sa dai maaraman na dahelan, binayaan sia kan mga pulis. Nagpuli sia, kombensido na prinotehiran sia ni Jehova.
Si Antonio nagpoon na mag-adal sa Biblia na may bagong bagsik. Sa padikitdikit, naggibo sia nin mga pagbabago tanganing mapaogma si Jehova. (Efeso 4:22-24) Paagi sa pagkultibar sa pagpopogol sa sadiri, pinonan niang atubangon an saiyang mga problema sa droga. Dawa siring, kinaipuhan nia an medikal na tabang. An duwang bulan sa klinika sa rehabilitasyon nagtao sa saiya kan oportunidad na basahon an nagkapirang publikasyon sa Biblia, kabale an librong Kaaraman na Minagiya Pasiring sa Buhay na Daing Katapusan. Dangan ihiniras ni Antonio sa iba pang pasyente an saiyang nanodan sa mga librong ini.
Pagkahale ni Antonio sa klinika, ipinadagos nia an saiyang pakipag-adal sa Biblia sa mga Saksi. Ngonyan, si Antonio, Maria, asin an saindang duwang aking babae, asin an ina ni Antonio iribahan na naglilingkod ki Jehova bilang maogma asin sararong pamilya. Sabi ni Antonio: “Naiintindihan ko na ngonyan an tunay na kahulogan kan mga tataramon na ‘an Dios pagkamoot.’”
[Ritrato sa pahina 8]
Paghuhulit sa Rio de Janeiro