Sarong Kinaban na Mayo nin mga Parahabon

MADALION an pangyayari. An sarong posturadong lalaki tinutokan nin badil an payo ni Antônioa sa atubangan kan saiyang harong sa São Paulo, Brazil, hinagad an liyabe asin mga papeles kan saiyang kotse, asin naghihidaleng naghale dara an kotse.

Sa Rio de Janeiro, sa atubangan kan saiyang dies anyos na aking babae, ginumol nin apat na armadong lalaki an sarong lalaki na an ngaran Paulo. Dangan, pakapagmaneho pasiring sa saiyang harong, an mga parahabon naglaog asin hinabon an gusto ninda, na pinano an duwang kotse ni Paulo. Hinuhumang gadanon an agom ni Paulo, sia asin an sarong empleyado iiniba ninda bilang mga bihag pasiring sa tindahan ni Paulo nin alahas sa sentro, na kinuanan ninda kan gabos na may halaga. Pero, sa dai linalaoman, an mga parahabon nagtelepono pagkatapos, na sinasabi kun saen ninda iwinalat an mga kotse.

Nakapanluluya nanggad sa boot na mahabonan nin kuwarta asin mga gamit na pinagpagalan na gayo nin saro! Minsan ngani dai iyan ginibo ni Antônio o Paulo, an iba ibinubugtak an ley sa saindang kamot. Tibaad papagbayadon ninda nin mahal an parahabon, o tibaad mawaran sinda kan sadiri nindang buhay. Halimbawa, kan agawon nin sarong hoben an saiyang relo, an sarong anggot na babae sa Brazil hinulbot an badil sa saiyang bag asin binadil an parahabon, na ikinagadan nia. An resulta? An O Estado de S. Paulo nagbabareta: “An mga tawong nakaheling kan pangyayari inomaw an iginawe kan dai midbid na babae, asin mayo nin gustong tumabang sa pulis na mamidbid an babae.” Minsan sinda nagmamawot nin kinaban na mayo nin mga parahabon, an mga Kristiano dai minabalos arog kan ginibo kan babaeng idto. Mantang an pagbalos sa Dios, kinukuyog ninda an mga tataramon sa Talinhaga 24:​19, 20: “Dai ka maanggot sa mga paragibo nin maraot. Dai ka mauri sa mga maraot. Huli ta mayo nin kaaabtan an siisay man na maraot.”

Alagad kun sinalakay, ano an magigibo nindo? An sarong pangyayari sa Rio de Janeiro nagpapaheling kun gurano kahalaga na magdanay na kalmado. An sarong Kristiana, si Heloísa, nakasakay sa awto pasiring sa pangengenot sa pag-adal sa Biblia. An duwang lalaki nagpoon na habonan an mga pasahero. Kan makaabot sa pondohan nin awto na bababaan nia, sinabi sainda ni Heloísa na saro sia sa mga Saksi ni Jehova asin na sia mangangadal sa Biblia. Ipinaheling nia an saiyang Biblia asin pantabang sa pag-adal. Dai sia hinabonan, tinogotan sia kan mga parahabon na humilig. Pero an saro pang pasahero dai tinogotan na humale. Sinabi kan drayber pagkatapos na dai pa sia nakaheling nin arog kaidto.

Nagdanay man na kalmado si Regina kan pagbotan sia nin duwang armadong lalaki na sumakay sa saiyang kotse. Ipinaheheling an saiyang personal na kopya kan magasin na Awake!, nagpatotoo si Regina. Mantang nininerbiyos an mga parahabon, pinakiolayan nia sindang buksan an glove compartment na sinasarayan nia nin pirang dulse. Alagad ta kan maheling an mga cassette tape na Kingdom Melodies, pinagdangog ninda an musikang iyan. Mantang mas makikatood na an kamugtakan, nagdesisyon an mga parahabon na bayaan sa tinampo si Regina na dai naaano, na sinisierto saiya na makanonompong sia nin tawong maboot na matabang saiya. Pakalakaw nin dies minutos, nakakua sia nin harong, pero dai makapaniwala an kagharong sa estorya nia, na an sabi: “Garo dai ka hinabonan; kalmado kang marhay.”

Minsan dai naano sa pisikal an sarong biktima, puwedeng gikanan nin seryosong mga bunga an siring na nakaninerbiyos na eksperyensia. ‘An biktima tibaad mawaran nin katiwasayan, maongis sa mga kapamilya o sa mga naghihingoang tumabang saiya, dai na makapagtiwala sa iba, mataranta sa pag-organisar sa mga detalye, maghona na an kinaban bakong makatanosan,’ an bareta kan O Estado de S. Paulo. Kabaliktaran, an biktima na nagsasarig ki Jehova Dios mas posibleng dai maano kan eksperyensia sa pisikal asin emosyonal. Minsan siring, dai daw kamo maoyon na magigin bendisyon kun mayo na nin krimen o ano man na nagtatao nin takot?

“An Parahabon Dai Na Maghabon”

Minsan ngani dakol an ginugusto an saindang paslong pamumuhay, an Tataramon nin Dios nakatabang sa mga parahabon na bakleon an saindang mga kamawotan asin an saindang personalidad. (Efeso 4:23) Mantang igwa nin tunay, basado sa Biblia na katuyohan sa buhay, isinasapuso ninda an mga tataramon na: “Orog karahay an kadikit na may katanosan kisa abundang bunga na mayo nin hustisya.” (Talinhaga 16:8) Si Cláudio nag-eestorya: “Haros gabos na miembro kan sakong pamilya Saksi, pero nungka akong naghinanyog sa sinasabi ninda manongod ki Jehova asin sa saiyang mga katuyohan. Sa pagpuli sa biyahe na haros 2,000 kilometros lunad sa hinabon na pikap, nag-agi ako sa kadakol na checkpoint nin pulis. Kaidto narealisar ko na kaipuhan nang bakleon ko an sakong buhay. Prinobaran ko nang gibohon iyan kaidto pero daing nangyari. Ngonyan hinorophorop ko an mga paryentes ko na mga Saksi ni Jehova asin kun gurano sinda kanapapalaen, na may kagayagayahan, kaogmahan, asin katoninongan.” Bilang resulta, si Cláudio nagpoon na mag-adal sa Tataramon nin Dios, binayaan an droga asin an dati niang mga katood, asin nagin ministrong Kristiano.

An iba nagkukuyog naman ngonyan sa mga tataramon na: “Dai kamo manarig sa pandadaya, ni magin mapalangkaw sa paghabon.” (Salmo 62:10) Pakatapos nin pagkabilanggo huli sa intension na gumadan sa panahon nin paghabon, si José, sarong paradroga asin negosyante sa droga, nakinabang sa pag-adal kan Biblia kaiba kan saiyang bayaw. Tinalikodan nia an droga asin ngonyan saro nang mahigos na Saksi.

Minsan siring, an bagong personalidad dai nangyayari nin bigla o milagroso. Si Oscar, na napalabot na marhay sa droga asin paghabon, nagsasaysay: “Namibi ako nin maigoton ki Jehova na sa parate an salog nagigin garo sadit na danaw huli sa kadakol kong luha.” Iyo, apuwera sa maigot na pag-adal sa Tataramon nin Dios, kaipuhan an daing ontok, odok sa pusong pamibi. Mangnoha an kadonongan sa mapagngayongayong punto-de-vistang ini: “Dai mo ako pagtawan nin kadukhaan ni kayamanan. Ipakakan mo sa sakuya an kakanon na maninigo sa sako, ta nama ako mabasog asin nigaran taka patin magsabi: ‘Siisay man si Jehova?’ asin dai ako magin dukha asin maghabon ako patin magduhagi ako sa ngaran kan sakuyang Dios.”​—Talinhaga 30:​8, 9.

An pagmakolog sa pansadiring bentaha kaipuhan na salidahan nin tunay na pagkamoot: “An parahabon dai na maghabon, kundi marahay pa na sia magpagal, na maggibo nin marahay kan saiyang mga kamot, tanganing may ikatao sia sa nangangaipo.” (Efeso 4:28) Kapareho kan nagkapirang Kristiano kan enot na siglo na dati ‘mga parahabon o paslo,’ maheherakon na pinatatawad ni Jehova, paagi sa pantubos ni Jesu-Cristo, an mga nagsosolsol. (1 Corinto 6:​9-11) Nakararanga nanggad na ano man an satuyang nakaagi, puwede niatong bakleon an satong pamumuhay asin kamtan an pag-oyon nin Dios!​—Juan 3:16.

Katiwasayan sa Bagong Kinaban nin Dios

Imahinara an sarong daga na mayo nin mga parahabon. Dai na nindo kaipuhan an magastos na sistema nin mga huwes, abogado, pulis, asin bilanggoan sa pagpaotob sa ley! Iyan magigin abundang kinaban na dian an kada saro igagalang an iba asin an saindang rogaring! Iyan daw garo masakit na paniwalaan? Talaga daw na an Dios makikilabot sa mga gibo-gibo nin tawo asin tatapuson an katampalasanan? Dinadagka mi kamo na siyasaton an ebidensia na an Biblia iyo an Tataramon nin Dios asin na masasarigan an mga hula kaiyan. Makanonompong kamo nin marigon na pasisikadan sa pagsarig na may maabot na pagkaliwat. Mayo nin makaoolang sa Dios sa pagtao kan kaginhawahan na ipinanuga sa gabos na namomoot sa katanosan: “Dai ka magpaheling na ika naaanggot sa mga paragibo nin maraot. Dai ka mauri sa mga naggigibo nin karatan. Huli ta siring sa doot sinda tolos-tolos na maluluyos, asin siring sa berdeng doot sinda mapapara.” (Salmo 37:​1, 2) An mga tataramon na iyan na haloyon nang isinurat madali nang biyong maootob.

Tatapuson kan Kahadean nin Dios an kasakitan asin karatan, na causa nin makuring kadaihan nin paglaom asin kasegurohan. Mayo nin magigin dukha, na napipiritan na maghabon. Sinisierto sa sato sa hula: “Magkakaigwa nin kadakoldakol na tipasi sa ibabaw kan daga; magkakaigwa nin abundansia sa alitoktok kan kabukidan. An saiyang bunga magigin siring kan sa [suanoy na] Libano, asin an mga hale sa siudad mamumurak na siring kan pananom sa daga.” (Salmo 72:16) Tunay na sa ibinalik na Paraiso, mayo nin manriribok sa katoninongan nin mga tawo na nakamimidbid asin nagsasamba sa tunay na Dios.​—Isaias 32:18.

Iyan magigin dakulaon na balos huli sa pakapanlaban sa mga gawe kan paslong kinaban na ini! An Talinhaga 11:​19 nagsasabi: “An saro na marigon na naninindogan para sa katanosan nalilinya para sa buhay, alagad an saro na naglalapag sa maraot nalilinya para sa saiyang sadiring kagadanan.” Iyo, pakapohoa sa mga maraot, mayo na nin may dahelan na matakot para sa saiyang buhay o sa saiyang rogaring. An Salmo 37:​11 nanunuga sato kaini: “An mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.”

[Nota sa Ibaba]

[Kahon sa pahina 5]

Pag-atubang sa Paghabon

SA HARONG​—Mantang puwedeng lumaog an mga parahabon baga man kamo yaon o mayo sa harong, perming sirrahan asin baratan an mga pinto. Irinirekomendar nin mga eksperto na magkaigwa nin alarma o bantay na ayam. Paaramon an masasarigan na kataed kun kamo mahale sa pagbakasyon. Magdanay na kalmado​—an mga parahabon marikas humiro, dai mo linalaoman, asin nababago tolos an mga plano kun sinda nininerbiyos. Kun saro kamo sa mga Saksi ni Jehova, magpamidbid asin probaran na magpatotoo. Tibaad makua nindo an pakikikatood o simpatiya. Dai manlaban apuwera sana kun pisikal na sinasalakay.

SA PUBLIKO​—Mag-alistong mangnohon kun may nagsusunod saindo. Maglakaw sa tahaw kan dalan-dalan. Likayan an mga kalyeng madiklom asin mayong tawo. Sarayon an saindong pitaka o mahahalagang bagay. Maglakaw nin marikas na garo kamo may dudumanan. Likayan an pagsulot nin mamahalon na mga gubing o makintab na mga alahas. Mamakal na may kaiba kun iyan hinahagad kan mga kamugtakan. Darahon sana an kuwartang kaipuhan nindo, ibugtak sa laen-laen na bulsa o lugar.

SA KOTSE​—Kun uso na sa saindong lugar an paghabon nin kotse, dai kamo magdanay sa saindong kotseng napaparada. Liwaton an saindong inaagihan pasiring asin hale sa trabaho. Umagi sa mas seguradong dalan, dawa kun iyan medyo mas harayo. Bago pumarada, mangalagkalag kun baga may nakakadudang bagay. Likayan an pagbukas kan estribo sa lugar na mayong tawo. Dai iwalat na naheheling sa laog kan kotse an mahahalagang bagay. Tibaad madisganar nin naheheling na barat na kadena o iba pang panlaban sa paghabon an kaswal na mga parahabon.

[Kahon sa pahina 6]

“Ontok na kamo sa pagtipon nin mga kayamanan sa daga, na digdi an polilya asin takla nakararaot, asin igwa nin mga parahabon na nananalakat asin naghahabon. Kundi, magtipon kamo nin mga kayamanan sa langit, na duman an polilya ni takla dai nakararaot, asin an mga parahabon dai nagsasalakat asin dai naghahabon.”​—Mateo 6:​19, 20