An Maogmang Bareta nin Katoninongan Nakaabot sa mga Kalangkawan nin Chiapas
“Sa pinakamaraot na lagdoan na pangadan na nagigirumdoman nin siisay man sa estado nin Chiapas, 45 daing kalabanlaban na paraoma, kaiba an 13 omboy, an inasesinar nin sarong grupo nin armadong mga lalaki.” Iyan an ibinareta kan peryodikong “El Universal” sa nangyari sa Acteal, Estado nin Chiapas, kan Disyembre 22, 1997.
AN CHIAPAS iyo an pinakatimog na estado nin Mejico, sa linderos nin Guatemala. May halawig nang kasaysayan nin kadukhaan asin kadaihon, an sarong grupo nin propiong mga Indian na Maya guminibo nin armadong rebelyon kan Enero 1994, sa ngaran kan Ejército Zapatista de Liberación Nacional (EZLN, Liberasyon Nasyonal kan Zapatistang Militar). An mga negosiasyon para sa matoninong na solusyon naghaloy. An mga pananakyada asin pananalakay, kapwa kan mga rebelde asin soldados nin gobyerno, nagresulta sa pagpabolos nin dugo asin kagadanan. An grabeng kariribokan an dahelan kaya dakol sa mga paraoma sa lugar na iyan an duminulag pasiring sa lugar na harayo sa peligro.
Sa tahaw kan dai maseguradong mga kamugtakan na iyan, igwa nin sarong grupo nin mga mamomoton sa katoninongan na nagdanay na neutral kun dapit sa politikal na ralaban. Maigot na dinadara ninda an atension sa Kahadean nin Dios bilang an solamenteng paglaom sa pagresolber sa mga problema na inaatubang nin mga tawo, kapwa sa lokal asin sa bilog na globo. (Daniel 2:44) Sairisay sinda? An Mga Saksi ni Jehova. Bilang pagkuyog sa pagboot ni Jesus, sinda naghihingoang darahon an maogmang bareta kan Kahadean nin Dios sa pinakapuerang mga lugar kan mga kalangkawan nin Chiapas. (Mateo 24:14) Kumusta an paghuhulit sa siring na mga kamugtakan, asin ano an mga resulta?
“Saro Ako sa Mga Saksi ni Jehova”
Si Adolfo, sarong hoben na lalaki na kasuarin pa sanang nagin parahayag kan Kahadean, sarong aldaw nagtatrabaho sa estasyon nin radyo sa Ocosingo. Bigla na sana, may makosog na tuktok sa pinto. Sarong grupo nin mga lalaking natatakopan an payo asin lalauogon an biglang nagralaog asin itinutok an saindang mga badil sa saiyang payo. Bigla nindang linaog an transmission booth, kinompiskar an mga kasangkapan, asin iinanunsiar sa radyo na sinda nagdeklarar nin guerra tumang sa gobyerno.
Binalingan si Adolfo, pinagbotan sia kan armadong kalalakihan na makiayon sa saindang mobimiento. “Saro ako sa Mga Saksi ni Jehova,” an simbag ni Adolfo, dawa ngani dai pa sia bautisado. Ipinaliwanag nia na an Kahadean nin Dios an solamenteng paglaom para sa katoninongan, asin marigon na sinayumahan nia an uniporme asin badil na itinatao ninda sa saiya. Naheheling an saiyang determinadong paninindogan, pinahale ninda sia. Ginigirumdom an nangyari, si Adolfo nagsabi: “An pangyayaring iyan totoong nagpakosog sa sakong pagtubod.”
Sa kahurihurihi an situwasyon suminarig, alagad an lugar yaon pa sa kontrol kan militar. Sa ibong kaiyan, maogmang inako ni Adolfo an pangagda kan kamagurangan sa lokal na kongregasyon na maglingkod kaiba nin sarong napapasuway na grupo nin mga Kristiano sa lugar na iyan. Sa mga lugar nin inspeksion na kaipuhan niang agihan, an mga soldados nagpapaheling nin paggalang sa saiya kun nagpapamidbid sia na saro sa Mga Saksi ni Jehova. Paghaloyhaloy nabautismohan sia asin nagkaigwa kan satispaksion na matabangan an napapasuway na grupong iyan na magin sarong kongregasyon nin Mga Saksi ni Jehova. “Ngonyan na ako bautisado na,” an sabi ni Adolfo, “puede ko nang sabihon nin may lubos na kombiksion na saro ako sa Mga Saksi ni Jehova!”
“Pinakosog Kami ni Jehova”
Dai nahaloy pagkatapos na an EZLN nagdeklarar nin guerra sa radyo tumang sa gobyerno, an mga namamanwaan nagdurulag. Si Francisco, sarong bilog na panahon na ministro, o payunir, nagpaliwanag kun paano sindang mag-agom pinakosog ni Jehova sa kinaipuhan nindang agihan.
“Nagdesisyon kami na magpaili sa sarong lugar na tolong oras an rayo kun lalakawon. Igwa nin sarong kongregasyon duman, kaya makakaibanan mi an mga tugang. Dai na mahahaloy panahon na para sa samong pansirkitong asamblea na gigibohon sa Palenque. Habo ming mag-agom na mapaltahan an espesyal na miting para sa mga payunir, alagad naaraman mi na an dalan pasiring sa asamblea binagatan kan mga EZLN. Nagdesisyon kaming umagi sa kadlagan, na nagibo mi nin siyam na oras. Nag-abot kaming tama sana sa oras tanganing mag-atender sa miting nin mga payunir, na ikinaogma ming marhay, siring man an bilog na programa sa asamblea.
“Sa samong pag-uli, nanompongan mi na an samong harong sinolo asin an samong mga hayop hinarabon. An natada sana iyo an sadit na bag nin mga gubing. Namondo kami huli sa nawara sa samo, alagad an mga tugang sa Ocosingo maboot na pinaistar kami sa saindang harong. Tinokdoan man ninda kaming magtrabaho sa mga bagay na nungka mi na nagibo kaidto bilang paraoma. Tinokdoan ako kan sarong tugang na lalaki sa potograpiya, an saro pa sa paghirahay nin mga sapatos. Iyan an ginigibo ming mag-agom tanganing suportaran an samong sadiri sagkod ngonyan, na dai kinaipuhan na pumondo sa pagpapayunir. Pinepensar an nangyari, naheling mi na minsan ngani bakong pasil para sa samo an magtagal, pinakosog kami ni Jehova.”
Mga Bunga kan Gibohon na Paghuhulit
Dai tinogotan kan mga Saksi sa Estado nin Chiapas na an kasakitan asin peligro padesganaron sinda sa pakikikabtang sa espesyal na paghihingoa tanganing ipaabot an maogmang bareta sa mga tawo sa lugar na iyan. Halimbawa, kaidtong Abril asin Mayo 1995, nakiiba sinda sa mga kapwa ninda Kristiano sa pambilog na kinaban na kampanya sa pagdistribwir kan Kingdom News Num. 34, na may angay na gayong titulo na Taano ta Pano-pano nin Problema an Buhay?
Durante kan kampanya—sa sarong lugar na inaapod Pueblo Nuevo—nanompongan ni Ciro, sarong regular payunir, an sarong pamilya na nagpaheling nin interes. Sa pagdalaw liwat pakalihis nin tolong aldaw, naponan nia an sarong pag-adal sa Biblia sa sainda. Alagad kan magbuelta si Ciro asin an saiyang kaibahan tanganing ipadagos an pag-adal sa pamilya, mayo an lalaki sa harong. Imbes, sarong grupo nin mga lalaking natatakopan an payo asin lalauogon an naghahalat sa saiya tanganing gibohan sia nin maraot. Hinapot ninda si Ciro asin an saiyang kaibahan kun ano an hinahanap ninda asin hinuma sindang gadanon. Pakatapos na mamibi nin silensio ki Jehova, an duwang Kristiano makosog an boot na nagpaliwanag na sinda duminuman tanganing tokdoan sa Biblia an pamilya. Pagkatapos tinogotan na sinda kan mga lalaking natatakopan an payo asin lalauogon na humale. Sa dai maaraman na dahelan, an lalaki sa harong dai nag-uli kan aldaw na iyan.
Sarong aldaw pakalihis nin haros tolong taon, nasorpresa si Ciro kan an lalaki nag-abot sa saiyang pinto. Naogmang marhay si Ciro na maaraman na an bilog na pamilya nabautismohan na asin nakaasosyar na sinda ngonyan sa sarong kongregasyon sa Guatemala! An saro sa mga aking babae naglilingkod ngani bilang regular payunir.
Pag-apresyar sa Espirituwal na Kakanon
Sa ibong kan padagos na kasakitan sa Chiapas, an sarong paraataman sa distrito nagbareta na an mga Saksi sa lugar na iyan talagang inaapresyar an importansia kan pagtorotiripon. (Hebreo 10:24, 25) Isinasaysay nia an nangyari sa nakaagi pa sanang espesyal na aldaw nin asamblea, na nakaiskedyul na pumoon nin amay na aga tanganing an maaratender makakauli nin ligtas mantang maliwanag pa an aldaw. Dawa ngani an kadaklan sa sainda kinaipuhan na lumakaw nin labing tolong oras sa kadlagan tanganing makaabot sa lugar nin asamblea, an gabos nakatukaw na pag-abot nin alas 7:00 n.a. Kaiba sa mga nagdadangog an anom na miembro kan grupong EZLN, na naghihinanyog asin nag-uupak, na minalataw na naoogma sa programa. Sinda naglakaw man nin tolong oras sa pag-atender sa asamblea. Duwang polo man sa sainda an nag-atender sa Memorial kan kagadanan ni Cristo, na ginibo sa lokal na Kingdom Hall.
Saro pang hoben na lalaki na kaiba sa mobimientong gerilya an inasignar kan saiyang mga superyor sa pagpatrolya sa sarong kadlagan. Pag-abot sa komunidad na iyan, nanompongan nia na an gabos na nag-iistar, na an mayoriya mga Saksi ni Jehova, nagdurulag na. Kaya nagpahingalo sia sa saro kan inabandonar na mga harong. Huling mayo man gayong gigibohon, pinurot nia an pirang libro na nakua nia sa harong asin pinonan na magbasa. An mga ini palan publikasyon kan Watch Tower na nawalat kan mga Saksi. Sa saiyang pagsosolosolo, an hoben na lalaki may panahon tanganing horophoropon an mga nababasa nia. Nagdesisyon sia na kaipuhan niang bagohon an saiyang buhay asin isuko an saiyang armas. Sa pinakamadaling panahon na nahimo nia, nanompongan nia an mga Saksi asin nagpoon na mag-adal sa Biblia. Sa laog nin anom na bulan, sinasabi na nia sa iba an maogmang bareta. Sia asin an tolo pang miembro kan saiyang pamilya na dating nagsisimpatiya sa mobimientong gerilya ngonyan bautisado nang mga Kristiano.
Naheheling an Positibong Lado
Minsan ngani nangangahulogan iyan nin grabeng kasakitan, an guerra sa katunayan may positibong impluwensia sa aktitud kan mga tawo sa gibohon na paghuhulit. An sarong magurang sa kongregasyon sa mismong siudad na pinonan kan ralaban nagsaysay: “Mga limang aldaw pagkatapos na pumutok an labanan, inorganisar mi an paghuhulit kapwa sa laog asin luwas kan siudad. An mga tawo interesadong marhay na maghinanyog samo. Nakapasakamot kami nin dakol na babasahon sa Biblia asin nakapoon nin nagkapirang pag-adal sa Biblia. Sa sarong lugar, dakol an dating nagkokontra sa katotoohan, alagad huli sa paglalaban, naghihinanyog na sinda ngonyan, nag-aadal sa Biblia, asin nag-aatender sa mga pagtiripon asin asamblea.”
Naoogma an mga tugang na ikinapadagos ninda an saindang teokratikong mga aktibidad sa ibong kan dai nanggad nin kasegurohan na mga kamugtakan. Naaaraman kan mga puersa nin gobyerno sagkod kan EZLN, nagpapadagos sindang magkaigwa kan saindang mga asamblea, na nagpapakosog sa sainda sa espirituwal. An mga pagdalaw kan nagbibiaheng mga paraataman nagin mapuersa man na pan-engganyar na magpadagos sa gibohon na paghuhulit. Interesante nanggad, an pagparigon sa boot minagikan dawa sa mga kalabot sa enkuentro, na sa parate sinasadol an mga Saksi na magpadagos sa saindang paghuhulit.
Minsan ngani an mga pagbalo asin kasakitan na kinaipuhan na tagalan kan mga tawo sa Chiapas medyo nainaan na sa paglihis nin panahon, dai pa iyan tapos. Maski pa, sarong bagay an segurado—an Mga Saksi ni Jehova determinadong magpadagos na mayong ontok sa saindang paghihingoang ipaabot sa mga tawo an maogmang bareta nin katoninongan gikan sa Tataramon nin Dios, an Biblia. (Gibo 10:34-36; Efeso 6:15) Rinerekonoser ninda, siring sa sinabi ni propeta Jeremias, na “bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” (Jeremias 10:23) Solamenteng an Kahadean nin Dios sa pamamahala kan saiyang Aki, si Jesu-Cristo, an puedeng magtao nin solusyon sa inhustisya asin kadukhaan sa kinaban.—Mateo 6:10.
[Mapa sa pahina 9]
(Para sa aktuwal na format, hilingon an publikasyon)
Golpo nin Mejico
CHIAPAS
GUATEMALA
Dagat Pasipiko
[Credit Line]
Mountain High Maps® Copyright © 1997 Digital Wisdom, Inc.
[Ritrato sa pahina 9]
Mga Saksi na paduman sa ministeryo sa mga kalangkawan nin Chiapas