Sarong Libro na Dai Pinagkakainteresan kan Kadaklan na Hoben
“PAANO ko maaaraman kun baga an Biblia talagang Tataramon nin Dios? Bilang sarong libro, dai ako interesado kaiyan,” sabi nin sarong hoben na babae na an ngaran Beate.
Sa Alemania, na iniistaran ni Beate, kadaklan sa mga hoben kapareho nia man an saboot; huli kaini, bakong importante sa sainda an pagbasa nin Biblia. Ihinayag nin sarong dai pa sana nahahaloy na surbey duman na, poko mas o menos, 1 porsiento kan mga hoben an parateng gayo na nagbabasa nin Biblia, 2 porsiento an parate, 19 porsiento an bihira, asin harani sa 80 porsiento an nungka talaga. An kabilangan posibleng magin kapareho man sa ibang mga nasyon, tibaad iyo man sa iniistaran nindo. Malinaw nanggad, an Biblia sarong libro na dai pinagkakainteresan kan kadaklan na hoben.
Kun siring, bakong makangangalas na an kadaklan sa mas hoben na kapag-arakian kakadikit an aram sa Biblia! Sa kapinonan kan taon 2000, an peryodikong Lausitzer Rundschau nagbareta dapit sa sarong surbey na naghahayag kun gurano kadakol na tawo an pamilyar sa Sampulong Togon asin ginagamit iyan bilang giya sa buhay. Sa mga tawong an edad labing 60 anyos, 67 porsiento an nakaaaram kan mga togon asin ginigiyahan kaiyan; para sa mga tawong mayo pang 30 anyos, an kabilangan 28 porsiento sana. Iyo, an dakol na hoben bakong pamilyar sa Tataramon nin Dios.
An Nagkapira May Laen na Punto de Vista
Sa ibong na lado, sa bilog na kinaban, nanompongan kan minilyon na hoben na labi-labi kahalaga kan Tataramon nin Dios. Halimbawa, si Alexander 19 anyos na asin binabasa an Biblia kada aga bago maglaog sa trabaho. “Mayo na akong maisip pang mas marahay na paagi na ponan an aldaw,” sabi nia. Kinatodan na ni Sandra an pagbasa nin sarong kabtang kan Biblia kada banggi. “Nagin kabtang iyan kan sakong pan-aroaldaw na rutina,” an paliwanag nia. Asin si Julia, na 13 anyos, kinaugalean na an pagbasa nin kisuerra sarong kapitulo kan Biblia bago magtorog sa banggi. “Talagang ikinaoogma ko iyan, asin gusto kong ipagpadagos an kinaugalean na iyan sagkod sa maabot na panahon.”
Arin na punto de vista an tama asin madonong? Talaga daw na may pakinabang an pagbasa sa Biblia? Iyan daw talagang mahalaga asin importante para sa mas hoben na kapag-arakian? Ano sa paghona nindo?