Ingatan an Saindong Konsensia

MAKATATAKOT isipon an pagsakay sa sarong eroplano na an komputer sala an pagkaprograma. Imbes, imahinara na rinaot nin sarong tawo an sistema nin giya kan eroplano o tuyong pinalsipikar an mga impormasyon kaiyan! Bueno, sa piguratibong sentido, igwa nin saro na iyan mismo an pinagmamaigotan na gibohon sa saindong konsensia. Determinado siang isabotahe an saindong sistema nin moral na giya. Obheto nia na giyahan kamo sa pakibanggaan sa Dios!​—Job 2:2-5; Juan 8:44.

Siisay an madahas na parasabotaheng ini? Sa Biblia, inaapod siang “an enot na halas, an inaapod Diablo asin Satanas, na ilinalagalag an bilog na ineerokan na daga.” (Kapahayagan 12:9) Naheling an saiyang paghiro sa tatamnan nin Eden kan, paagi sa paggamit nin nakadadayang pangangatanosan, kinombensir nia si Eva na ignorohon an aram niang tama asin magrebelde sa Dios. (Genesis 3:1-6, 16-19) Poon kaidto, si Satanas an pinakautak kan paglataw kan enterong mga institusyon nin panloloko tanganing dayaon an mga tawo sa pankagabsan sa pakikienemigo sa Dios. An pinakakulpable sa mga institusyon na ini iyo an falsong relihion.​—2 Corinto 11:​14, 15.

Rinaraot kan Falsong Relihion an Konsensia

Sa libro sa Biblia na Kapahayagan, maheheling an falsong relihion bilang sarong simbolikong patotot na inaapod na Dakulang Babilonya. Rinaot kan saiyang mga katokdoan an moral na pagkasensitibo kan dakol na tawo asin pinangyari sinda na maongis patin gumawe ngani nin madahas sa mga laen an paniniwala. Sa katunayan, oyon sa Kapahayagan, pangenot na pinapanimbag nin Dios an falsong relihion sa dugo “kan gabos na ginadan sa daga,” kaiba an mga parasamba mismo sa Dios.​—Kapahayagan 17:1-6; 18:​3, 24.

Pinatanidan ni Jesus an saiyang mga disipulo kun sagkod saen raraoton kan falsong relihion an moral na kompas kan nagkapira kan sia nagsabi: “Maabot an oras na an lambang gumadan sa saindo maghohona na nakagibo sia nin sagradong paglilingkod sa Dios.” Kanigoan kabuta sa moral an siring kadahas na mga indibiduwal! Si Jesus nagsabi: “Dai ninda namidbid an Ama o ako.” (Juan 16:​2, 3) Dai nahaloy pakatapos na sabihon ni Jesus an mga tataramon na iyan, sia mismo ginadan sa pagboot nin nagkapirang namomoon sa relihion, na nakayang ipaako sa saindang konsensia an saindang krimen. (Juan 11:47-50) Sa kabaliktaran, sinabi ni Jesus na an tunay na mga parasunod nia mamimidbid paagi sa pagkaminorootmootan ninda. Alagad an saindang pagkamoot mas mahiwas sagkod ngonyan, huli ta iyan ipinaaabot dawa sa saindang mga enemigo.​—Mateo 5:44-48; Juan 13:35.

An saro pang paagi na sinabotahe kan falsong relihion an konsensia nin dakol iyo an pagpanigo sa ano man na moralidad, o kadaihan kaiyan, na nanongod na popular. Ihinuhula ini, si apostol Pablo nagsabi: “Madatong an panahon na dai na sinda matagal sa ikararahay na katokdoan, kundi, oyon sa saindang sadiring mga mawot, matipon sinda nin mga paratokdo tanganing pagirokon an saindang mga talinga.”​—2 Timoteo 4:3.

Ngonyan na mga aldaw, pinagigirok kan mga namomoon sa relihion an talinga kan mga tawo paagi sa pagsabi na an seksuwal na pakikidorog sa bakong agom tibaad akseptable sa Dios. An iba pa kinokonsinte an homoseksuwal na mga gawe. Sa katunayan, an nagkapirang klerigo mismo aktibong homoseksuwal. Nagsabi an sarong artikulo sa peryodiko sa Britania na The Times na “treseng klero na midbid na mga binabae” an inelehir sa Pankagabsan na Sinodo kan Iglesia nin Inglaterra. Kun tinatalikdan kan mga namomoon sa iglesia an moralidad sa Biblia asin daing ginigibo manongod dian an saindang iglesia, anong mga pamantayan an aarogon kan mga miembro kan parokya? Bakong makangangalas na minilyon an biyong nariribaraw.

Mas marahay nanggad na giyahan kan garo naggigiyang senyal nin moral asin espirituwal na mga katotoohan na itinotokdo sa Biblia! (Salmo 43:3; Juan 17:17) Halimbawa, itinotokdo kan Biblia na an mga parapakisaro ni an mga parasambay dai “magmamana kan kahadean nin Dios.” (1 Corinto 6:​9, 10) Sinasabi kaiyan sa sato na an mga lalaki asin babae na riniribayan “an natural nindang kagamitan nin bakong natural na kagamitan” “naggigibo nin bastos” sa mata nin Dios. (Roma 1:​26, 27, 32) An moral na mga katotoohan na ini dai inimbento nin bakong sangkap na mga tawo; iyan an ipinasabong na mga pamantayan nin Dios, na nungka niang rinebokar. (Galacia 1:8; 2 Timoteo 3:16) Alagad may iba pang mga paagi si Satanas tanganing isabotahe an konsensia.

Magin Mapamili sa Aling-alingan

Madali sanang puersahon an saro na magkomiter nin maraot na gibo, alagad iba nang orolay an hingoahon na papangyarihon sia na magin gustong magkomiter kan siring na gibo. Ini an kamawotan kan “namamahala sa kinaban,” si Satanas. Tanganing itadom an saiyang marigsok na kaisipan sa isip asin puso kan mga mangmang o daing pag-aram-aram​​—espesyalmente an mas madaling maimpluwensiahan, an mga hoben​​—ginagamit nia an mga paagi na arog kan kuestionableng mga babasahon, pelikula, musika, kawat sa komputer, asin site sa Internet para sa pornograpiya.​—Juan 14:30; Efeso 2:2.

“An mga hoben [sa Estados Unidos] nagdadalan nin kinakalkulong 10 000 na akto nin kadahasan kada taon,” sabi kan sarong report sa magasin na Pediatrics, “na an pinakamadahas iyo an mga programa para sa mga aki.” Ihinayag man kan report na “kada taon, an mga tinedyer nagdadalan nin haros 15 000 na seksuwal na pagkasambit, pasentido, asin suba.” Dawa an mga oras na may pinakadakol na nagdadalan sa telebisyon, sabi kaiyan, “igwa nin labing 8 seksuwal na insidente kada oras, labi sa apat na beses an kalabihan kisa kan 1976.” Bakong makangangalas, naaraman man kan pagsiyasat na “an malaswang mga pananaram bigla asin risang marhay na nagdadakol man.” Pero, an Biblia sagkod an balakid na sientipikong pagsiyasat nagpapatanid na an nakaugalean nang paglaog sa isip kan siring na mga materyal binabago an mga tawo sa ikararaot. Kaya kun talagang gusto nindong paogmahon an Dios asin pakinabangon an saindong sadiri, himateon an Talinhaga 4:​23, na nagsasabi: “Ingatan mo an saimong puso, huli ta gikan dian an mga burabod nin buhay.”​—Isaias 48:17.

Rinaraot man kan dakol na popular na musika an konsensia. An sarong parakanta na an mga kanta suminikat na marhay sa lista nin mga kanta sa dakol na nasyon sa Solnopan naggigibo nin “espesyal na paghihingoa tanganing magpakubhan,” an patanid nin sarong report sa peryodiko sa Australia na The Sunday Mail. An artikulo nagsasabi na “pinamumuraway kan saiyang mga kanta an droga, incesto asin panlulugos” asin na “kinakanta [nia] an manongod sa paggadan sa saiyang agom na babae patin pag-apon kan hawak kaiyan sa sarong danaw.” An iba pang mga lirikong nasambitan marigsok na marhay para otrohon digdi. Pero, nag-ako an saiyang musika nin prestihiosong premyo. Gusto daw nindong laogan an saindong isip asin puso kan siring na nakahihilong mga kaisipan na arog kan nasambitan sa enotan, dawa kun iyan gibohon na sagin marahay paagi sa musika? Logod na dai, ta an mga minagawe sa siring na paagi rinaramogan an saindang konsensia asin sa katapustapusi nagbubunga sa laog mismo ninda nin “maraot na puso,” na ginigibo sindang mga enemigo nin Dios.​—Hebreo 3:12; Mateo 12:33-35.

Kaya magin madonong sa saindong pagpili nin aling-alingan. Sinasadol kita kan Biblia: “Ano man na totoo, ano man na seryosong bagay, ano man na matanos, ano man na malinig, ano man na madaling kamotan, ano man na marahay an dangog, ano man na birtud asin ano man na inoomaw, padagos na horophoropon an mga bagay na ini.”​—Filipos 4:8.

An mga Pag-iriba Nakaaapekto sa Saindong Konsensia

Kan mga aki pa, ikinaogma ni Neil asin Franz an nakapakokosog na pakiibaiba sa sinserong mga Kristiano.a Alagad, pag-abot nin panahon, sabi ni Neil, “nagpoon akong makiasosyar sa maraot na mga pag-iriba.” An pangultimong resulta, na pinagbasolan niang marhay, krimen asin pagkabilanggo. Kaagid man an estorya ni Franz. “An paghona ko kaya kong makiibaiba sa mga hoben kan kinaban na dai ninda maaapektaran,” an agrangay nia. “Alagad arog kan sinasabi kan Galacia 6:​7, ‘An Dios dai maoolog-olog. Huli ta ano man an itinatanom nin tawo, ini man an saiyang aanihon.’ Naaraman ko sa masakit na paagi na sala ako asin tama si Jehova. Nasentensiahan ako nin bilog na buhay na pagkabilanggo sa kasalan na ginibo ko.”

Sa parate an mga arog ni Neil asin Franz bako man na bigla na sanang magibo nin krimen; sa primero, mapapaiktad sinda pagnaisip ninda iyan. An pagkadarusdos puedeng mangyari nin tangga-tangga, na sa parate an enot iyo an maraot na pag-iriba. (1 Corinto 15:33) Sa parate tibaad minasunod an pagdodroga asin pag-abuso sa inomon na de alkohol. An konsensia, sa katunayan, angay na ilinaladawan bilang an “kabtang kan personalidad na natutunaw sa alkohol.” Hale dian, kadikit na sanang lakdang pasiring sa krimen o inmoralidad.

Kun siring, taano daw ta poponan pa an enot na tanggang iyan? Imbes, makiasosyar sa mga madonong na tunay na namomoot sa Dios. Tatabangan ninda kamo na pasarigon an saindong konsensia tanganing giyahan kamo kaiyan nin tama, na pinalilibre kamo sa dakol na kakologan. (Talinhaga 13:20) Minsan ngani nakabilanggo pa man giraray, ibinibilang ngonyan ni Neil asin Franz an saindang konsensia na sarong regalo nin Dios na maninigong sanayon nin tama asin, iyo, pakamahalon. Apuera kaini, nagmamaigot sindang pataluboon an marahay na relasyon sa saindang Dios, si Jehova. Magin madonong, asin makanood sa saindang mga sala.​—Talinhaga 22:3.

Protehiran an Saindong Konsensia

Ipinaheheling niato na gusto niatong protehiran an satong konsensia kun nagpapatalubo kita nin pagkamoot asin pagtubod sa Dios, kaiba an nakararahay na pagkatakot sa saiya. (Talinhaga 8:13; 1 Juan 5:3) Ihinahayag kan Biblia na an konsensia na mayo kan mga impluwensiang ini sa parate mayo nin moral na karigonan. Halimbawa, an Salmo 14:1 nagtataram dapit sa mga nagsasabi sa saindang puso: “Mayong Jehova.” Paano naaapektaran kan kadaihan nin pagtubod na ini an saindang gawe-gawe? An bersikulo nagpapadagos: “Sinda guminawe sa kapahapahamak na paagi, sinda guminawe nin makauuyam nin makuri sa saindang mga gibo.”

An mga tawo na mayo nin tunay na pagtubod sa Dios mayo man nin marigon na paglaom para sa sarong mas marahay na ngapit. Huli kaini, may tendensia sindang mabuhay para sa presente, na nagpapadara sa mga mawot kan saindang laman. An saindang pilosopiya iyo an: “Magkarakan asin mag-irinom kita, huli ta sa aga magagadan kita.” (1 Corinto 15:32) Sa ibong na lado, an mga an mata nakatorohok sa premyo na buhay na daing sagkod dai napadadara sa mga kasingawan sa kinaban na madaling mawara. Arog kan eksaktong komputer sa pagnabigar, an saindang sinanay na konsensia pinapagdadanay sinda sa mismong dalan nin maimbod na pagkuyog sa Dios.​—Filipos 3:8.

Tanganing mapagdanay kan saindong konsensia an kakayahan asin pagkaeksakto kaiyan, kaipuhan kaiyan an regular na paggiya hale sa Tataramon nin Dios. Sinasabihan kita kan Biblia na an siring na paggiya makukua kan, sa naglaladawan na pananaram, iyan magsabi: “An saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian,’ enkaso kamo pumatoo o enkaso kamo pumawala.” (Isaias 30:21) Kaya magtao nin oras para sa aroaldaw na pagbasa sa Biblia. Pakokosogon asin paririgonon kamo kaini kun kamo naghihingoang gibohon an tama o kun mabagsak na sa saindo an dagom nin kahaditan. Makasisierto kamo na gigiyahan kamo ni Jehova sa moral asin espirituwal kun itatao nindo sa saiya an lubos na pagtitiwala nindo. Iyo, arogon an salmista na nagsurat: “Danay kong ibinubugtak si Jehova sa atubangan ko. Huli ta sia yaon sa sakong too, dai ako matatanyog.”​—Salmo 16:8; 55:22.

[Nota sa Ibaba]

[Mga ritrato sa pahina 5]

An falsong relihion, na ilinaladawan sa Biblia bilang “Dakulang Babilonya,” iyo an responsable sa pagpangurol kan konsensia nin dakol

[Credit Line]

Padi na nagbebendisyon sa mga soldados: Retrato kan Armi kan E.U.

[Mga ritrato sa pahina 6]

Raraoton kan pagdalan nin kadahasan asin inmoralidad an saindong konsensia

[Ritrato sa pahina 7]

An regular na paggiya hale sa Tataramon nin Dios an maingat sa saindong konsensia