Pagpapahalaga sa Espirituwal na mga Bagay—Pasaen Na Iyan?
“Kinseng magkailusyon an nag-atender sa [Katolikong] banggi nin pag-orolay para sa pagtao nin sadol sa mga nagpaplanong magpakasal. Sa 30 presente, 3 sana an naghihingako na may pagtubod.”—La Croix, diaryong Katoliko sa Pransia.
NASA kritikal na kamugtakan an pagpapahalaga sa relihiosong mga bagay. Sa tutob kan isyu kaiyan kan Hulyo 12, 1999, an internasyonal na edisyon kan Newsweek naghapot: “An Dios daw Gadan?” Para sa solnopan na Europa, an simbag sa magasin iyo na garo baga iyan an kamugtakan. Nagbabareta manongod sa sinodo kan Iglesia Katolika na ginibo sa Roma kan Oktubre kan taon man sanang iyan, an peryodiko sa Pransia na Le Monde nagsabi: “An Iglesia mas nadedepisilan kisa kasuarin man na ipaabot an mensahe kaiyan sa sarong kultura na ‘habo’ na kaiyan. . . . Sa Italia, an mga Katoliko dai na nagkakasararo sa mga doktrina asin gibo. . . . Sa Alemania, an pagdiriskutiran manongod sa mga lugar para sa pagkonsulta manongod sa pagpakua sa aki nagpapadakula kan siwang sa pag-oltanan kan papa asin kan demokrasya na dai na makatios sa mga dikta. An pangahas na paninindogan [kan Netherlands] sa moral asin eutanasia iinaatribwir na kan mga nagmamasid sa biglang pagkabako nang Kristiano kaiyan.”
Arog man na gayo kaiyan an situwasyon sa ibang lugar. Kan 1999 an Arsobispo kan Canterbury, si George Carey, nagpatanid na an Iglesia nin Inglaterra “saro na sanang henerasyon asin mawawara na iyan.” Sa sarong artikulo na may titulong “An Katapusan kan Kristianong Europa,” an peryodiko sa Pransia na Le Figaro nagsabi: “An iyo man sanang dalagan naheheling sa gabos na lugar. . . . Sistematikong kinukuestion kan mga tawo an mga punto de vista sa etika asin doktrina.”
Nagdidikit an Partisipasyon sa Relihion
Sa Europa, nagdidikit na marhay an nagsisimba. Dai pang 10 porsiento kan mga Katolikong Pranses an nagsisimba kada Domingo, mantang poon 3 sagkod 4 na porsiento sana kan mga Katolikong taga Paris an regular na nagsisimba. Kapareho kaiyan o mas dikit pa ngani an naobserbaran na nagsisimba sa United Kingdom, Alemania, asin sa mga nasyon sa Escandinavia.
Ikinahahadit na marhay kan mga autoridad sa relihion an kakulangan nin mga kandidato sa pagkapadi. Sa laog nin mayo pang sarong siglo, an kabilangan nin mga padi sa Pransia biglang duminikit, poon sa 14 padi para sa kada 10,000 na habitante sagkod sa kulang pang 1 sa kada 10,000 ngonyan. Sa bilog na Europa, an promedyong edad kan mga padi naglalangkaw, asin an kakulangan naheheling dawa sa mga nasyon na arog kan Irlandia asin Belhika. Kadungan kaiyan, an kabilangan nin mga aking nagpalista sa mga klase sa katesismo nagdidikit, na nagpapalataw nin seryosong mga pagduda sa abilidad kan Iglesia Katolika na seguradohon an pagdakol giraray kaiyan.
Kun mapadapit sa relihion, an kompiansa garo baga nawara na. Anom na porsiento sana kan mga Pranses an naniniwala na “an katotoohan manonompongan sa saro sanang relihion,” kun ikokomparar sa 15 porsiento kan 1981 asin 50 porsiento kan 1952. An relihiosong pagkaindiperente naglalakop. Naglangkaw poon sa 26 porsiento kan 1980 sagkod sa 42 porsiento kan 2000 an proporsion nin mga tawong nagsasabi na mayo sindang relihion.—Les valeurs des Français—Évolutions de 1980 à 2000 (Pamantayan kan mga Pranses sa Kun Ano an Mahalaga—An Nangyari Poon kan 1980 Sagkod 2000).
Dakulang Pagbago sa Pagpapahalaga sa Moral na mga Bagay
An pagigin nasa kritikal na kamugtakan kan pamantayan sa kun ano an mahalaga risang-risa man kun manongod sa moral. Siring kan nasambitan sa enotan, habong akoon nin dakol na parasimba an moral na mga dekreto kan saindang iglesia. Dai sinda minaoyon sa ideya na may deretsong gumibo nin mga pamantayan nin paggawe an mga namomoon sa relihion. An iyo man sanang grupo na nag-oomaw sa paninindogan kan papa manongod sa mga deretso nin tawo nagsasayumang sumunod sa saiya kun an saiyang sinasabi nakakaapektar na sa saindang pribadong mga buhay. Halimbawa, dakol an dai nag-iintindi sa paninindogan nia manongod sa pangontra sa pagbabados, pati an dakol na Katolikong mag-agom.
An aktitud na ini parehong nakaaapektar sa mga tawong relihioso asin bakong relihioso, sa gabos na grado nin sosyedad. Itinotogot an mga gibo na malinaw na kinokondenar sa Banal na Kasuratan. Kaidtong beinteng taon na an nakaagi, an homoseksuwalidad dai inooyonan kan 45 porsiento sa mga siudadanong Pranses. Ngonyan, 80 porsiento an kinokonsiderar iyan na puede. Minsan ngani an dakulang mayoriya apabor sa pagigin fiel sa agom, 36 porsiento sana an nagkokondenar sa pakipagrelasyon sa iba apuera sa agom bilang nungkang makatanosan.—Roma 1:26, 27; 1 Corinto 6:9, 10; Hebreo 13:4.
Sarong Relihiosong Pagsaralak
Sa sosyedad sa Solnopan, nagtatalubo an relihion na sadiring mukna na dian an lambang saro inaasumir an deretsong kumua asin pumili kan saiyang mga paniniwala. Inaako an nagkapirang opisyal na doktrina, mantang hinahaboan an iba. May mga nagsasabing Kristiano sinda mantang nagtutubod sa reenkarnasyon, asin an iba pa dai nag-aalangan na sumunod sa nagkapirang relihion nin durungan. (Eclesiastes 9:5, 10; Ezequiel 18:4, 20; Mateo 7:21; Efeso 4:5, 6) Deretso sa punto na ipinaheling kan librong Les valeurs des Français na dakol na may pagtubod ngonyan an talagang minarayo na sa dalan na inestablisar kan iglesia.
Minsan siring, an tendensiang ini pasiring sa mas orog na indibiduwalismo sa relihion bakong daing peligro. Si Jean Delumeau, historyador sa relihion asin miembro kan Institut de France, marigon na naniniwala na imposible para sa sarong tawo na gumibo nin sadiri niang relihion na suway sa arin man na establisadong sistema. “An pagtubod dai magdadanay kun iyan dai nakabasar sa karigonan nin sarong organisadong relihion.” An marahay na pagpapahalaga sa espirituwal na mga bagay asin relihiosong gibo dapat na kakoordinar kan relihion nin saro. Saen manonompongan an siring na koordinasyon sa sarong sosyedad na makuring pinasasakitan nin pagbabago?
Sa gabos na pahina kaiyan, ipinagigirumdom sa sato kan Biblia na an Dios an nag-eestablisar nin inaakong mga pamantayan sa gawe-gawe asin moralidad, minsan ngani tinatawan nia nin katalingkasan an mga tawo na sunodon iyan o dai. Rinerekonoser nin minilyon sa bilog na kinaban na an haloy nang pinahahalagahan na librong ini may praktikal na halaga ngonyan asin na iyan ‘ilawan sa saindang bitis asin liwanag sa saindang dalan.’ (Salmo 119:105) Paano sinda nakapagkonklusyon nin arog kaiyan? Ini an totokaron sa masunod na artikulo.