An Kulog na Dara nin Kagadanan

Bakong magayon pag-ulayan an kagadanan. Dakul na tawo an habo nganing madangog iyan. Pero maabot an panahon, mangyayari iyan sa sato. Asin grabeng kulog an dara kaiyan.

Mayo nin makakatabang sa sato na magin lubos na handa sa kagadanan nin sarong magurang, agom, o aki. An trahedya puwedeng mangyari nin bigla o sa laog nin halawig na panahon. Sa ano man na paagi, dai malilikayan an kulog na dara nin kagadanan, asin puwedeng grabe an magin epekto kaiyan.

Ini an sinabi ni Antonio na an ama nagadan sa sarong aksidente sa tinampo: “Garo man sana may nagkandado sa harong mo tapos kinua su liyabe kaiyan. Dai ka makalaog, dawa madali sana. Mababalikan mo na sana iyan sa isip mo. Iyo na ini an realidad. Habo mo man akuon iyan—ta garo baga bako iyan makatanusan—pero mayo kang magigibo.”

Si Dorothy, na nagin balo sa edad na 47, desididong makahanap nin simbag. Bilang paratukdo sa sarong Sunday school, dai niya nuarin man inisip na sa kagadanan natatapos an gabos. Pero dai niya talaga aram an simbag. “Ano an nangyayari sa sato pag nagadan kita?” an hapot niya sa saindang ministrong Anglicano. “Wara talagang nakakaaram,” an simbag kaini. “Maghalat na sana kita.”

Mayo na daw kitang magigibo kundi “maghalat na sana”? May paagi daw para maaraman ta kun baga an kagadanan an katapusan kan gabos?