Iskedyul Para sa Teokratikong Paadalan sa Pagmiministro sa 1988
1 Kaiba kan luwas na ini kan An Satong Ministeryo sa Kahadean ipinadara mi an Theocratic Ministry School Schedule for 1988. Paagi kaini an mga paraataman sa paadalan magigin pamilyar sa mga instruksion asin amay pang makagigibo nin mga asignasyon. An gabos maninigong magin pamilyar sa mga instruksion tanganing maandam asin ikaatubang nin tama an mga asignasyon.
2 May nagkapirang pagliliwat sa iskedyul sa taon na ini na boot ming iapod sa saindong atension. Tabi mangnohon ini sa saindong pagsiyasat sa bagong iskedyul.
DUNGAN NA ISKEDYUL
3 Sa dakol nang taon, an satong Teokratikong Paadalan sa Pagmiministro nahuhuri nin sarong taon sa iskedyul sa Estados Unidos asin iba pang nasyon. Ini huli ta dai niato nareresibi nin amay pa an materyal tanganing maimprenta asin ikawaras nin tama sa panahon. Alagad ngonyan ikinaoogma niamong ipaisi na, poon sa iskedyul sa 1988, pagaadalan niato an kapareho sa ibang nasyon. Siyempre ini nangangahulogan na may malilipasan kitang nagkapirang libro sa Biblia sa satong iskedyul, kaya maririsa nindo na sa Enero poponan niato an pagbasa sa Biblia sa Isaias 14-17. An mga boot puwedeng basahon sa pribado an nalipasan na kabtang magpoon sa Salmo 70 sagkod Isaias 13.
4 An saro pang pagkaliwat manongod sa petsa kan iskedyul. Maririsa nindo na an enot na semana Enero 4-10. Ini poon Lunes sagkod Domingo, imbes na poon Domingo sagkod Sabado arog kan dati niatong ginigibo. Ini mangangahulogan na sa Enero 3, an mga ginigibo an saindang Teokratikong Paadalan sa Pagmiministro sa Domingo mayo nin iskedyul huli sa pagkaliwat na ini. Alagad mantang kita gabos may kombension sa panahon na ini, talagang kaipuhan na paltahan nindo an sarong semana huli sa pag-atender sa mga kombension kaya dai kamo maninigong magkaproblema sa pagkaliwat na ini.
MGA PAHAYAG HALE SA LIBRONG REASONING
5 Maririsa nindo na an librong Reasoning ginagamit na gayo sa bagong iskedyul na ini. Pero, tabi mangnohon na an numero kan pahina na itinao para sa mga asignasyon sa edisyon na Ingles. An numero kan pahina bakong parareho sa edisyon na Cebuano, Iloko asin Tagalog. Kaya pinadarahan niamo an kada kongregasyon nin duwang kopya kan lista na nagpapaheling kan katimbang na mga pahina kan mga asignasyon sa Cebuano, Iloko asin Tagalog. Kun nagtatao nin asignasyon, maninigo na ibugtak kan paraataman sa paadalan an numero kan pahina pareho sa Ingles asin sa lokal na tataramon tanganing magin kombenyente sa mga estudyante. Puwedeng ibugtak sa information board an sarong kopya kan listang ini tanganing maheling nin gabos.
6 Linalaom mi na an gabos makikinabang nin dakula sa bagong iskedyul na ini sa paadalan asin sinasadol mi an gabos na regular na makikabtang tanganing magtalubo sa espirituwal.