Paggibo kan mga Bagay na Kinakaipuhan Tanganing Makapaogma sa Dios
1 An pagpaogma sa satong Kaglalang may pangenot na halaga sa sato, huli ta “ikinaoogma ni Jehova an mga natatakot sa saiya.” (Sal. 147:11) Tanganing magibo ini, may kinakaipuhan na mga bagay na dapat niatong gibohon. Kaiba digdi an ‘paglikay sa dugo,’ kaoyon sa banal na pagboot sa Gibo 15: 28, 29. Siring sa magigirumdoman nindo, ini bago pa sanang pag-olayan sa satong pandistritong kombension.
2 An paglaog sa ospital puwedeng magbunga nin mga kamugtakan na makababalo nanggad sa satong pagtubod asin integridad. Kaipuhan na patienot na gibohon an pag-andam tanganing mainaan an mga kasakitan. Halimbawa, napakahalaga na permi kamong magdara nin napapanahon na medical card na llenenaran asin pinirmahan nin tama. An saro pang paagi iyo an pagsierto na patienot na paaramon an saindong doktor, kun mapupuwede, manongod sa saindong dai magliliwat na paninindogan sa dugo.
KAOLAYON AN SAINDONG DOKTOR
3 Ipinaheheling nin mga report na an iba nagin pabaya sa patienot na pakikipag-olay sa saindang doktor, bago lumataw an emerhensia. Minsan ngani sinabi ninda sa saindang doktor na sinda mga Saksi ni Jehova, dai ninda ikinapaliwanag nin malinaw an paninindogan ninda sa paggamit sa dugo, asin dai ninda inaram kun baga igagalang nia an saindang kagustohan. Kun dai pa nindo ini nagigibo sa saindong doktor, irinirekomendar na gibohon nindo iyan sa pinakamadaling panahon na kombenyente.
4 Sa “Manarig ki Jehova” na kombension, may itinaong praktikal na mga suhestion manongod sa mga bagay na maninigong ipakipag-olay sa saindong doktor, saka sa paagi na ini maninigong gibohon. Idinoon an pangangaipo na magpaheling nin paggalang sa katongdan nin mga doktor, na dai nagigin parakontra o nagpapaheling nin garo superyor na paggawe. Kun ikokomparar sa satong doktor, tibaad kita eksperto sa Tataramon nin Dios, pero maninigo niato siang tawan nin tamang paggalang bilang eksperto sa medikal na mga bagay. (1 Ped. 2:17) Tabi dai ipakipag-olay sa doktor an nutrisyonal o iba pang bakong medikal na pagbolong kun ipinakikipag-olay an satong paninindogan sa dugo. An saindong indibiduwal na mga opinyon sa siring na mga bagay tibaad magin dahelan na dai ninda masabotan an bagay na an saindong paninindogan sa dugo sa pangenot Makakasuratan na paninindogan.
AN MANINIGONG SABIHON
5 Sa sunod nindong pagduman sa saindong doktor, sabihon saiya na igwa kamo nin halipot alagad mahalagang bagay na ipakikipag-olay sa saiya bago nindo ipaliwanag an medikal na dahelan kan saindong pagduman. Dangan ipaliwanag an minasunod na walong punto na isinabi sa “Manarig ki Jehova” na kombension: (1) Inaapresyar nindo an saiyang abilidad asin an saindong marahay na relasyon sa saiya bilang doktor nindo. (2) Igwa kamo nin pundamental na paniniwala na kaipuhan na maaraman nia. (3) Huli sa relihiyosong mga dahelan dai nanggad kamo makapagpapasalin nin dugo, minsan sa panahon nin emerhensia. (4) Aram nindo na puwede ining makakomplikar sa mga bagay, alagad ta dai nindo maliliwat an paninindogan na ini. Linalaom nindo na itatao nia an pinakamarahay niang pagbolong sa laog kan limitasyon na ini, arog kan ginigibo nin dakol na ibang doktor. (5) Ini aplikado man sa siisay man na ibang doktor na tibaad iareglo nia na mag-asikaso sa saindo. (6) Aakoon nindo an ano man na dagdag na peligro asin mapirma kamo sa mga porma para sa paghale kan paninimbagan sa saiya, asin hinahagad nindo na an saindong paninindogan isurat sa mga rekord kan ospital. (7) Tawan sia nin kopya kan artikulo na inimprenta liwat hale sa sarong medikal na publikasyon sa Awake!, Hunyo 22, 1982, pahina 25-7. (Ipadadara ini sa kada kongregasyon arog kan ipinaliliwanag sa surat mi na may petsang Enero 1, 1988.) (8) Inaapresyar nindo an oportunidad na ikapaliwanag an paninindogan na ini, na napakahalaga sa saindo ngonyan asin sa maabot. An walong puntong ini maninigong iatubang sa halipot, sa paaging dai nakikipagdiskutiran, seryoso, asin may pag-apresyar.
6 Ipinaheheling nin eksperyensia na an siring na patienot na paghihingoa na isabi nin malinaw sa doktor an saindong paninindogan nakatatabang na gayo kun minalataw an emerhensia. An pagkuyog niato sa mga pagboot ni Jehova ikaoogma Nia asin magbubunga kan Saiyang padagos na bendisyon.