Suportaran an Espesyal na Aktibidad sa Abril
1 Sa Roma 12:11 si apostol Pablo nagsasadol: “Dai kamo maghinugak sa saindong gibohon. Magin malaad sa espiritu. Maglingkod ki Jehova.” Minsan ngani an hatol na ini minaaplikar sa gabos na panahon, sa mga bulan na ini nin tig-initan iyan may espesyal na aplikasyon mantang kita gabos naghihingoa na gibohon an kabotan nin Dios “nin lubos pa.”—1 Tes. 4:1.
ESPESYAL NA MGA OKASYON
2 An Abril minapoon sa pagselebrar kan Pamanggihan kan Kagurangnan, an pinakamahalagang okasyon kan taon. Dangan, sa Abril 10, an espesyal na pahayag-publiko itatao sa temang “Taano ta Dapat Mamuhay Sono sa mga Pamantayan kan Biblia?” Magin alisto kita gabos na imbitaran an mga interesado sa espesyal na mga okasyon na ini dangan pasundan paagi sa pag-alok nin pag-adal sa Biblia sa mga nag-atender.
100-PORSIENTONG PAKIKIKABTANG
3 Isinusuherir na sa enot asin ikaduwang Sabado asin Domingo nin Abril an gabos maghingoa na makikabtang sa ministeryo sa langtad. An enot na Domingo sa Abril 3 kaya an bilog na mga pamilya puwedeng dagkahon na makikabtang sa aldaw na iyan. Sa katapusan kan ikaduwang semana, sa Abril 10, isinusuherir mi na ireport nin gabos na parahayag an saindang nagibo sa enot na 10 aldaw nin Abril. Paagi kaini maaaraman kan kamagurangan kun siisay an dai pa nakaluluwas tanganing matawan sinda nin listong tabang bago matapos an Abril. An mga payunir maninigong lubos na makikooperar sa kamagurangan paagi sa pagtao nin personal na tabang sa mga iregular sa bulan na ini.
4 Dugang pa, tibaad dakol an makuwalipikar na agdahon sa ministeryo sa espesyal na bulan na ini, asin sinasadol mi an gabos na sunodon an marahay na mga suhestion sa artikulo na nasa pahina 3 kan An Satong Ministeryo sa Kahadean na ini na “Pagtabang sa Bagong mga Parahayag.”
5 Daing duwa-duwa na paagi sa lubos na pakikikabtang kan gabos, maaabot niato an bagong peak nin parahayag sa Abril, na nalalabihan an bilang kan nakaaging Abril na 101,735.
SUPORTARAN AN PAGPAPAYUNIR
6 An saro pang paagi na masusuportaran niato an aktibidad sa Abril iyo an lubos na pakikikabtang bilang payunir kun mapupuwede. Kan Abril, 1987 35,424 gabos an payunir, asin 21,567 digdi an auxiliary payunir. Bako daw na marahay kun maaabot niato an 40,000 na payunir o labi pa ngonyan na Abril? Ini magigin mga 40% kan kagabsan na parahayag sa nasyon!
7 An Abril bakasyon para sa mga nag-eeskuwela kaya iyan marahay na oportunidad na makikabtang sa pagpapayunir. Asin para sa mga may bilog na panahon na trabaho, an Abril may limang Sabado, na nagtatao sa dakol nin dugang na oportunidad na makikabtang. Saro pa, igwa man nin kapiyestahan an kinaban sa kapinonan nin Abril na magtatao nin bakasyon sa trabaho. Sa natatadang mga aldaw nin Marso, sinasadol an kamagurangan na ipaisi sa kongregasyon kun pira na an nagpalista bilang auxiliary payunir.
8 Bendisyonan logod ni Jehova an sararo niatong paghihingoa na otobon an saiyang kabotan “nin lubos pa” sa Abril tanganing makatao nin orog na kaomawan sa saiyang dakulang ngaran.