Pagtabang sa Iba na Gibohon an Hustisya
1 “An Gapo, sangkap an saiyang gibo, huli ta an gabos niang dalan hustisya.” (Deut. 32:4) An mga tataramon na ini nin sarong suanoy na awit nagtatampok kan saro sa pangenot na mga atributo ni Jehova, an hustisya. Mantang ginibo kita sa saiyang ladawan asin kaagid, tama sana na linalaoman kita ni Jehova na ‘gumibo nin hustisya sa paglakaw sa kaibanan kan satong Dios.’—Miq. 6:8; Gen. 1:26.
2 An mga paghihingoa niato na arogon si Jehova malinaw na mahahayag sa “Banal na Hustisya” na Pandistritong mga Kombension na nakaiskedyul para sa Pilipinas. (Efe. 5:1) Rinibo sa satong mga tugang an galaga nanggad na hinahalat an “Banal na Hustisya” na kombension na ini. Nakagibo na daw kamo nin depinidong mga areglo na magin presente sa gabos na sesyon?
AN NAGKAPIRANG PAMBIHIRANG MGA KABTANG
3 Poon Huwebes sagkod Domingo, an abundang espirituwal na kakanon na nagtatampok kan pangangaipo na suportaran an banal na hustisya itatao paagi sa mga pahayag sa Biblia, demonstrasyon, interbio, asin drama. Dugang pa, kaiba man sa programa an mga eksperyensia asin impormasyon manongod sa aktibidad nin mga tugang na naglilingkod bilang misyonero. An iba sa mga misyonerong ini tibaad umatender sa saindong kombension asin tibaad kaiba sa programa. An halimbawa ninda sa paninindogan nin marigon para sa banal na hustisya, parate sa tahaw nin masakit nanggad na mga kamugtakan, puwedeng makamotibar sato na mamuhay asin gumawe kaoyon sa banal na hustisya sa gabos niatong gibo.
PAGTABANG SA IBA
4 Inimbitaran daw nindo nin personal an mga inaadalan nindo sa Biblia na umatender sa kombension? Personal nindang maoobserbaran an kaogmahan kan banwaan ni Jehova asin makokombensir sinda sa kakayahan ni Jehova na tapuson an gabos na inhustisya. An kombension na ini puwedeng magbunga nin pagkaliwat sa saindang buhay, na pinahihiro sindang manindogan para sa Dios nin hustisya.
5 Minsan pa kita maatender sa kombension asin tibaad magbakasyon sa laog kan bulan, bobooton niato na papagdanayon an marahay na iskedyul para sa paglilingkod sa langtad, asin siertohon na ireport an satong nagibo sa langtad sa satong kongregasyon. Humanap nin mga oportunidad na kaolayon an iba manongod sa paglaom sa Kahadean sa angay na mga okasyon.
6 Biyo logod niatong idusay an satong sadiri sa teokratikong aktibidad mantang kita nagtitiripon sa “Banal na Hustisya” na Pandistritong mga Kombension asin mantang kita nakikikabtang sa ministeryo sa langtad.