Pagtabang sa Iba na Maglingkod ki Jehova nin Bilog na Kalag
1 Si Jehova tama sanang nag-oobligar na an lambang saro sa sato maglingkod sa saiya nin bilog na kalag. (Mar. 12:30; Col. 3:23) An lambang saro sa sato nagmamawot na gibohon an satong pinakamakakaya sa paglilingkod sa saiya.—Mat. 13:23.
KUN PAANO MAKATATABANG
2 May nagkapira na regular na nag-aatender sa gabos na pagtiripon kan kongregasyon. An iba kuwalipikado na ngani na pumoon na makikabtang sa paglilingkod sa langtad. Minsan siring, bakong gabos nagdedesisyon na magdusay asin magpabautismo. Matatabangan daw niato sinda sa bagay na ini? Kita daw personal nang nakipag-olay sa sainda nin odok sa puso? Tibaad makatabang an prangka, maboot na pagrepaso sa artikulong “Ano an Nakaoolang Sako na Mabautismohan?” sa pahina 18-22 kan Setyembre 1, 1982 na An Torrengbantayan (Watchtower, Pebrero 15, 1982, pahina 27-31).
3 An iba tibaad regular na mga parahayag na sa panapanahon nag-o-auxiliary payunir. Puwede daw sindang gumibo nin kinakaipuhan na mga pagliliwat tanganing magin regular na mga auxiliary payunir? Tibaad puwede sindang magin regular payunir? Kun beses, an pagsadol nin magurang, saro sa kamagurangan kan kongregasyon, o payunir nagpapahiro sa mga siring na maglingkod sa pinakalubos na itinotogot kan saindang kakayahan asin kamugtakan.—2 Tim. 4:2.
TUMAO NIN PAGPAKOSOG
4 An iba tibaad makuwalipikar na nombrahan bilang ministeryal na mga lingkod o magurang. (1 Tim. 3:1) Paagi sa pag-aprobetsar sa praktikal na tabang na itinatao paagi sa Teokratikong Paadalan sa Pagmiministro, an nagkapira puwedeng magin epektibong mga paradiskurso. May naiisip pa daw kamong ibang pribilehiyo na dian puwedeng makuwalipikar an iba sa saindong pamilya o kongregasyon kun sinda maako nin tabang?
5 Maninigong itao niato ki Jehova an pinakamarahay na paglilingkod na kaya niatong itao sa saiya. (Kap. 4:11) Boot niatong gibohon an saiyang kabotan nin bilog na kalag asin tabangan an iba na gumibo man nin siring. (Efe. 6:6) An mga nagdadangog sa tabang asin pagpakosog na maglingkod ki Jehova nin bilog na kalag makasisierto na itatao ni Jehova an “tamang balos.”—Col. 3:24.