‘Ano daw an Magigibo Ko?’
1 ‘Ano daw an magigibo ko?’ Daing duwa-duwa na an hapot na iyan nasa isip kan mga miembro kan sadit na grupo nin pag-adal sa Biblia na inorganisar ni Charles Taze Russell kaidtong mga taon nin 1870. Mantang sinda nag-ooswag sa saindang pakasabot kan kabotan nin Dios, an enot na mga estudyanteng idto sa Biblia siertong nag-isip-isip kun ano an magigibo ninda tangani na matabangan an iba na manodan an dapit sa katuyohan nin Dios. An pagpaabot sa enterong kinaban kan kaaraman dapit sa Biblia na nakukua ninda tunay nanggad na sarong dakulaon na gibohon.
2 Marahay sana ta para sa sato, napangganahan ninda an angat na iyan. Paano? Ginibo nin balang indibiduwal an saiyang garo baga sadit na kabtang, kaya ngonyan, an Mga Saksi ni Jehova midbid na sa bilog na kinaban—sarong organisasyon na igwa nin haros anom na milyon na parabalangibog kan Kahadean na naglilingkod sa mga 90,000 na kongregasyon sa 234 kadagaan asin isla kan dagat!—Isa. 60:22.
3 Itao an Saindong Lubos na Suporta: Mahalagang marhay sa balang saro sa sato na magkaigwa nin kabtang sa dakulaon na gibohon na ihinula ni Jesus na gigibohon sa huring mga aldaw na ini. (Mar. 13:10) Tunay nanggad na an gibohon na ini dai puedeng ipabaya na sana sa limitadong bilang nin kamagurangan; ni na an mga payunir sana an magsaabaga kan paghuhulit. An totoo, an lambang nagdusay na Kristiano may importanteng kabtang na gigibohon. Kita gabos makapakikikabtang sa sarong klase nin paghuhulit. (1 Tim. 1:12) Kun sagkod saen man niato ini ginigibo, nakikinabang kita mismo asin an iba.—1 Tim. 4:16.
4 An balang saro makatatao man nin lubos na pagsuportar sa satong Kristianong kasararoan nin magturugang sa ibang mahalagang paagi. Masusuportaran niato an mga pagtiripon kan kongregasyon paagi sa regular na pag-atender asin paagi sa entusiastikong pagpartisipar. (Sal. 122:1, 8, 9) Magigibo niato an satong kabtang sa pagpadanay sa kongregasyon na malinig sa moral. Makapagtatao kita nin pinansial na suporta para sa pankinaban na gibohon, segun sa satong kabuhayan. Makapakikikabtang kita sa paglinig kan Kingdom Hall. An gabos makapalalakop nin maogmang espiritu nin pagkamoot asin pagkasararo sa kongregasyon paagi sa pagtabang sa mga bagohan, hoben, asin siring man may edad na.—Col. 3:12, 14.
5 Kaya tibaad ihapot nindo, ‘Ano daw an magigibo ko?’ Minsan ngani an indibiduwal nindong mga paghihingoa tibaad garo baga sadit, paagi sa paggibo kan saindong kabtang, kamo nakakokontribwir sa makosog, aktibo, asin marigon na kongregasyon. Sa siring kita gabos may mahalagang marhay na kabtang sa pagtaong onra sa ngaran ni Jehova!