Pag-apresyar sa mga Probisyon ni Jehova
1 Nagtatao si Jehova nin probisyon tangani na mapanigoan an satong espirituwal na mga pangangaipo paagi sa fiel na “oripon.” (Mat. 24:45-47) Kaiba sa dakol na probisyon na ini an mga libro, Biblia, tomo, video, audiocassette, asin computer disc para sa pagsiyasat sa Biblia. Totoong masasabi niato na abunda kitang sinusuplayan kan pangangaipo niato sa espirituwal na paagi!
2 An gabos na probisyon na ini pinoprodusir na dakulaon an gastos sa pinansial. An mga gastos na ini sustentado kan pambilog na kinaban na kasararoan nin magturugang. Nangorognang totoo ini pakatapos na ponan an areglong donasyon kaidtong taon 2000, huling ngonyan an pagtapar sa mga gastos na ini biyong minadepende sa gikan sa boot na mga kontribusyon. An siring na mamomoton na areglo nagpapangyari sa gabos na tugang na magkaigwa kan kaipuhan ninda para sa mga pagtiripon asin paglilingkod sa langtad dawa ngani an nagkapira tibaad limitadong marhay an kaya sa materyal.
3 Kun Paano Kita Makakatabang: Puede niatong himateon an hatol ni Pablo na ihiras sa iba an “sono sa saindang mga pangangaipo.” (Roma 12:13) Kun kita nagkokontribwir sa pambilog na kinaban na gibohon, direkta niatong ihinihiras sa mga tugang sa bilog na kinaban kun ano an igwa kita. Iniisip ini, an dakol nagdesisyon na “magtagama” nin ikokontribwir kada semana o kada bulan, siring kan ginigibo ninda para sa mga gastos kan Kingdom Hall. (1 Cor. 16:2) Sa paggibo kaini, ipinaheheling ninda na rinerekonoser ninda na an mga pondong ini bako sanang ginagamit sa pagprodusir nin mga babasahon kundi sa gabos na aspekto kan pambilog na kinaban na gibohon. Kaya an satong mga kontribusyon dai maninigong mansayon na bayad sana sa mga babasahon, kundi bilang kontribusyon niato sa pambilog na kinaban na gibohon.
4 Magin ‘Buka an Palad sa Saindong Pagkontribwir’: Ipinaheheling kan mga tataramon na ini sa 2 Corinto 9:13 an tamang espiritu na dapat yaon sa sato. An mga igwa nin dakol andam na magtao nin mas dakol kisa sa iba tanganing matabangan an mga may kadikit sana, sa siring pinangyayari an “pagpantaypantay.” (2 Cor. 8:14, 15) Kun an gabos, baga man dukha o may kaya, magkokontribwir kan makakaya ninda sa pambilog na kinaban na gibohon, nanunuga si Jehova na ibububo an “bendisyon sagkod na mayo na nin kulang.” (Mal. 3:10) Logod na an lambang saro sa sato magin angay sa siring na bendisyon paagi sa indibiduwal na pagpaheling kan satong pag-apresyar sa gabos na abundang probisyon ni Jehova!