Pagpanigo sa Pangangaipo nin mga Kingdom Hall
1 Sa 2002 Yearbook of Jehovah’s Witnesses, pahina 17-20, may ibinareta manongod sa bagong programa kan Sosyedad na “pagtogdok nin Kingdom Hall para sa kadagaan na limitado an kuarta.” Napag-isip-isip daw nindo kun paano gigibohon an programang ini digdi sa Pilipinas? Paagi sa suplementong ini iimpormaran niamo kamo nin mas lubos manongod sa bagong areglong iyan.
2 An bagong programa nagpupunsionar sa bilog na kinaban, na sa presente inaasikaso an mga pangangaipo kan satong mga tugang sa 92 na nasyon na totogdokan nin rinibong Kingdom Hall. Tanganing mapanigoan an pangangaipong ini asin madonong na magamit an idinusay na pondo, iinareglo kan Namamahalang Grupo na an gibohon na ini giyahan kan Departamento sa Disenyo/Pagtogdok sa Brooklyn. Limang Rehional na Opisina Para sa Kingdom Hall an inorganisar sa pagtao nin organisasyonal na tabang. An Sangang Opisina sa Pilipinas nagpupunsionar sakop kan opisina na yaon sa Sangang Opisina sa Australia.
3 Nag-organisar nin Opisina sa Pagtogdok nin Kingdom Hall sa kada sangang opisina sa pagkoordinar kan pagtogdok. Tinatabangan kan opisinang ini an mga kongregasyon sa panahon kan pagpili nin solar asin naggibo iyan nin modelong mga plano basado sa lokal na materyales asin mga paagi nin pagtogdok. An obheto kan programa iyo na magtogdok nin simple, may dignidad, asin sadit an gastos na mga Kingdom Hall.
4 Kaipuhan daw digdi sa Pilipinas an programang ini? Sierto nanggad na makasisimbag kita nin Iyo. Kan 2001 an gabos na paraataman sa sirkito nagllenar sa mga porma nin surbey manongod sa kamugtakan nin mga Kingdom Hall sa saindang mga sirkito. Kan kuanon an total kan mga report, labing 1,300 na bago o kadakol an hihirahayon na Kingdom Hall an kaipuhan. Mantang halawig na panahon an kaipuhan sa pagtogdok nin kadakol na Kingdom Hall, nagkakaipo nin pasensia, huling an gabos na ini dai magigibo nin durungan. Siring man, kaipuhan mientras tanto na papagdanayon an satong presenteng mga Kingdom Hall na nasa marahay na kamugtakan.—Sant. 5:7, 8.
Katuyohan kan Opisina sa Pagtogdok nin Kingdom Hall
5 An Opisina sa Pagtogdok nin Kingdom Hall direktamenteng nagpupunsionar sa irarom kan pagdirehir kan Komite kan Sanga asin nakikikooperar sa Departamento sa Paglilingkod. Paagi kaini natatawan nin prioridad an mga kongregasyon na nangangaipo nanggad nin bagong Kingdom Hall sa lugar na may nagtatrabahong Grupo sa Pagtogdok nin Kingdom Hall.
6 Igwa nin modelong mga plano nin Kingdom Hall para sa simple sanang mga edipisyo. Naiinaan kan mga disenyong iyan an detalyadong marhay na trabaho alagad naggagamit pa man giraray nin lokal na materyales asin mga paagi nin pagtogdok. Mangnohon tabi an duwang retrato na yaon sa suplementong ini. An saro nagpapaheling kan mayor na estrukturang batbat na ginagamit na sulay kan edipisyo. Ini ginibo nin sarong lokal na kompanya alagad itinogdok kan satong mga tugang sa laog nin duwa sanang aldaw. Ipinaheheling kan saro pang retrato an tapos nang Kingdom Hall na itinogdok sa irarom kan bagong programa. An edipisyong ini natapos sa laog nin duwa sanang bulan.
7 Paninimbagan kan Opisina sa Pagtogdok nin Kingdom Hall na direhiran an gabos na aspekto kan proyektong Kingdom Hall. Kaiba digdi an enot na pakipagmiting sa Grupo nin Kamagurangan, an pagpili kan disenyo asin sokol nin Kingdom Hall, an pagkua asin tamang pagparehistro kan solar para sa edipisyo, saka an aktuwal na pagtogdok kan edipisyo. Bago bayaan an proyekto, nagtatao man nin pagsasanay sa mantension tanganing mapagdanay an Kingdom Hall na nasa marahay na kamugtakan sa laog nin dakol na taon na paggamit.
Grupo sa Pagtogdok nin Kingdom Hall
8 Paano itotogdok an Kingdom Hall? Inaprobaran kan Namamahalang Grupo an pag-organisar nin mga Grupo sa Pagtogdok nin Kingdom Hall. An mga grupong iyan an matabang sa kamagurangan sa kongregasyon sa pag-andam asin pagtogdok nin Kingdom Hall saka sa pagsubaybay kan gastos. An mga grupong ini kompuesto nin mga lingkod asin boluntaryo sa pagtogdok nin Kingdom Hall. Sa ibaba itatao niamo an halipot na deskripsion kan mga trabahador na ini asin kun paano sinda nakakokontribwir sa kapangganahan kan proyektong pagtogdok.
9 Mga lingkod sa pagtogdok nin Kingdom Hall: Prinsipalmente ini espirituwal na mga lalaki na may kaaraman sa pagtogdok. An nagkapira sa agom ninda nagtatrabaho man bilang kabtang kan mga grupo sa pagtogdok. Sarong lingkod sa pagtogdok nin Kingdom Hall an magseserbing paraataman kaiba an saro pang kualipikadong tugang na lalaki na ninombrahan bilang katabang nia. Sinda an nag-iiskedyul, nag-aandam, asin nagsusubaybay kan kada proyekto. An mga kahagadan sa pormang ini nin paglilingkod: kisuerra sarong taon nang bautisado, puede sa panhaloyan na paglilingkod, an edad nasa pag-oltanan nin 19 sagkod 55, marahay an salud, may kakayahan na magtrabaho nin magabat, mas marahay kun naglilingkod na nin bilog na panahon bilang payunir, asin naglingkod na nin kisuerra duwang bulan bilang boluntaryo sa pagtogdok nin Kingdom Hall. An mga lingkod sa pagtogdok nin Kingdom Hall tatawan nin pag-asikaso na kapareho kan iba pang bilog na panahon na espesyal na mga lingkod siring baga kan mga Bethelite, nagbibiaheng paraataman, asin espesyal payunir.
10 Mga boluntaryo sa pagtogdok nin Kingdom Hall: Kan Nobyembre 2001 inimpormaran an gabos na kongregasyon manongod sa gibohon na ini asin nakaresibi nin pirang porma nin aplikasyon (A-25) na lellenaran nin mga indibiduwal na interesado sa gibohon na ini. Sa ngonyan naresibi na niamo an labing 400 sa mga aplikasyon na ini asin inaapresyar na marhay niamo an interes na ipinaheling sa paglilingkod na ini kan mga tugang na lalaki asin babae digdi sa Pilipinas. An mga kahagadan para sa mga boluntaryo sa pagtogdok nin Kingdom Hall pareho kan sa mga lingkod sa pagtogdok nin Kingdom Hall. An pagkakalaen iyo na an mga boluntaryo sa pagtogdok temporaryo, na naglilingkod sana sa limitadong lawig nin panahon. Kun posible kukuanon sinda sa lugar mismo kan proyekto tanganing mainaan an halangkaw na gastos sa mga istaran asin transportasyon.
An Pagtogdok nin Kingdom Hall Sarong Proyekto kan Kongregasyon
11 An pagtogdok nin Kingdom Hall proyekto nanggad nin sarong kongregasyon. Sa pagpoon pa sana kalabot na an kamagurangan sa pagpatalubo nin entusiasmo para sa bagong Kingdom Hall. Nagpipili nin sokol kan edipisyo asin inaaram kan kamagurangan kun anong suporta an ikatatao kan kongregasyon sa pinansial sagkod paagi sa boluntaryong pagtabang.
12 An gabos sa kongregasyon ineenkaminar na lubos na suportaran an sainda mismong proyektong Kingdom Hall. An nagkapira tibaad kayang magboluntaryo aroaldaw sagkod na matapos an proyekto. An iba tibaad kayang gibohon iyan sa laog nin saro o duwa sanang aldaw kada semana. Ano an gigibohon ninda? Makakatabang sinda sa pagluto nin kakanon, paglaba para sa mga trabahador, pagpapadanay na areglado an lugar kan edipisyo, pagbantay dian sa banggi, asin pagtabang sa aktuwal na pagtogdok. An mga indibiduwal na boluntaryo matrabaho sa irarom kan pagdirehir nin responsableng mga tugang na lalaki sa Grupo sa Pagtogdok nin Kingdom Hall. Dai nin aplikasyon na kaipuhan na llenaran kan mga boluntaryo sa kongregasyon alagad sinda maninigong mga parahayag na marahay an kamugtakan, kisuerra 17 anyos, asin aprobado kan komite sa paglilingkod kan kongregasyon.
Mga Lakdang sa Pagtogdok nin Bagong Kingdom Hall
13 Anong mga lakdang an gigibohon nin sarong kongregasyon kun gusto nindang magkaigwa nin bagong Kingdom Hall? Enot ginigibo ini paagi sa pagsurat nin kahagadan sa sangang opisina. Huling sinabi kan Namamahalang Grupo na puede sanang magtogdok nin mga Kingdom Hall para sa mga kongregasyon na may 30 o labi pang parahayag, sa nagkapirang situwasyon tibaad kaipuhan na aramon kun posibleng umayon sa saro pang kongregasyon para sa pinag-iribang proyekto. Kun magagamit nin nagkapirang kongregasyon an mga Kingdom Hall, ini sierto nanggad na madonong na paggamit kan satong limitadong kuarta. Tatawan nin prioridad an mga proyekto na pinakadakol na parahayag an makikinabang. Kun posible an siring na pinag-iribang areglo, maninigo ining sambiton sa enot na surat nin kahagadan asin an mga komite sa paglilingkod nin kada kongregasyon na kalabot maninigong pumirma sa surat nin kahagadan.
14 Oras na iasignar sa saindong lugar an sarong Grupo sa Pagtogdok nin Kingdom Hall, iaareglo kan Opisina sa Pagtogdok nin Kingdom Hall na makipagmiting sa lokal na grupo nin kamagurangan, paraataman sa sirkito kun posible, asin sa karaning mga grupo nin kamagurangan kun labi sa sarong kongregasyon an makikinabang sa proyekto. An mga representanteng ini puedeng hale magsalang sa sangang opisina o lokal na mga tugang siring baga nin sarong paraataman sa Grupo sa Pagtogdok nin Kingdom Hall na sinanay sa pagtabang sa mga grupo nin kamagurangan na determinaran an saindang pangangaipo nin bagong Kingdom Hall saka masabotan an pundamental na mga prinsipyo sa Biblia na naggigiya sa gibohon na ini.
15 Mahalagang marhay man na maaraman kun may makukuang pondo para sa proyekto. Nagsabi si Jesus sa Lucas 14:28: “Siisay sa saindo na boot na magtogdok nin torre an dai nguna minatukaw asin kinukuenta an gastos, tanganing helingon kun igwa sia nin igo tanganing iyan matapos?” An opisina sa Pagtogdok nin Kingdom Hall nagtatrabaho oyon sa kaparehong prinsipyong ini. Tanganing maaraman kun ano an kayang idonar kan kongregasyon sa proyektong Kingdom Hall, magibo nin surbey an kamagurangan. An mga pamilya asin indibiduwal kaipuhan na magin realistiko sa pag-estudyar kun ano an kaya nindang itao. An kantidad na sinabi maninigong magin kabtang kan regular na badyet kan pamilya.
16 Paano itatao sa kongregasyon an donasyon kan kada saro? An 1 Corinto 16:1 asin 2 nagsasabi: “Ngonyan mapadapit sa arambagan na manongod sa mga banal . . . Sa kada enot na aldaw kan semana an lambang saro sa saindo sa saiyang sadiring harong magtagama na sono sa saiyang nakukua, tanganing pag-abot ko dai na mangyari an mga pangongolekta sa panahon na iyan.” Kaoyon kaini, an gabos na kongregasyon na boot na magkaigwa nin bagong mga Kingdom Hall maninigong magkaigwa nin kahon sa kontribusyon para sa pondo nin pagtogdok. Sa pagtaong halimbawa kan kamagurangan asin ministeryal na mga lingkod, segurado niamo na susuportaran kan kongregasyon an proyekto.
17 Kun pumoon nang magpunsionar an Grupo sa Pagtogdok nin Kingdom Hall sa saindong lugar asin posible nang panigoan an pangangaipo nindo nin Kingdom Hall, matao nin dugang pang mga instruksion sa panahon na iyan.
Pambihirang mga Resulta kan Bagong Programa
18 Sa presente may anom na Grupo sa Pagtogdok nin Kingdom Hall na nagpupunsionar sa Pilipinas. Sagkod kan Abril 2003, 13 bagong edipisyo an ikinatogdok na. Ini marahayon na pagpoon asin linalaoman niatong maheling an 24 pang matatapos sa katapusan kan taon. Sa ibong kaiyan, huli sa labing 1,300 na kaipuhan na Kingdom Hall, pinagigirumdom giraray kita na an gabos kaipuhan nin pasensia mantang pinagmamaigotan niato na resolberan an satong pangangaipo nin dakol pang Kingdom Hall.
19 Kan ponan kan Nobyembre 1999 an programa sa pagtogdok nin Kingdom Hall sa kadagaan na limitado an kuarta, 5,542 na bagong Kingdom Hall an ikinatogdok na sa 88 nasyon. An mamomoton na donasyon nin satong mga tugang sa bilog na kinaban an nagpapagin posible sa “pagpantaypantay” na ini, kaya an “[kongregasyon] na igwa nin dakol dai nagsobra, asin an [kongregasyon] na may kadikit dai nagkulang.” (2 Cor. 8:14, 15) Kadakol pa an gibohon asin pinoponan pa sana iyan digdi sa Pilipinas. Kun gurano karikas an pagprogreso kan programang ini madependeng marhay sa makukuang pinansial na tabang asin kualipikadong pangangataman. Inaantisipar niato na maheling kun paano binebendisyonan ni Jehova an programang ini digdi sa Pilipinas.
[Ritrato sa pahina 4]
Estruktura nin Kingdom Hall
[Ritrato sa pahina 5]
Tapos nang Kingdom Hall, Angat, Bulacan