Hapot
◼ Paano niato maninigong asikasohon an mga asignasyon sa kongregasyon?
An aregladong pagpunsionar nin sarong kongregasyon kan banwaan ni Jehova bunga nin nagkakasararong paghihingoa. (1 Cor. 14:33, 40) Isip-isipa kun ano an kalabot sa saro sanang pagtiripon kan kongregasyon. Apuera sa mismong programa, dakol an aktibidad bago asin pakatapos kan pagtiripon mantang inaasikaso kan mga tugang na lalaki asin babae an manlaenlaen na asignasyon. Mahalaga man an ibang asignasyon na inaasikaso minsan dai naheheling nin iba. Paano makakakontribwir an lambang saro sa sato sa areglong ini?
Magin andam na gamiton. An mga may espiritu nin pagigin gikan sa boot makakanompong nin dakol na gigibohon. (Sal. 110:3) Magpaheling nin pagmalasakit sa mga may helang asin may edad na. Tumabang sa paglinig kan Kingdom Hall. Puede kitang gumibo nin dakol na kapakipakinabang na gibo na dai na kaipuhan pang espesyal na imbitaran. An kaipuhan sana niato pagmawot na tumabang.
Maglingkod na may kababaan an boot. An mga tawo na hababa an boot maogmang naglilingkod sa iba. (Luc. 9:48) An kababaan nin boot an maolang sa sato na umako nin dakol na paninimbagan na dai man talaga niato kayang asikasohon. Dugang pa, an kababaan nin boot an maolang sa sato na sumobra sa mga limitasyon kan satong autoridad.—Tal. 11:2.
Magin mapagtitiwalaan. Naparigon an boot ni Moises na pumili nin “mga lalaking mapagtitiwalaan” na mangengenot sa mga katongdan nin paninimbagan sa suanoy na Israel. (Ex. 18:21) An kualidad man sanang ini an kaipuhan ngonyan. Asikasohon sa maatom na paagi an kada asignasyon na inaako nindo. (Luc. 16:10) Kun dai nindo mahihimong asikasohon an asignasyon, seguradohon na gumibo nin angay na mga areglo na may ibang mag-asikaso kaiyan kun mayo kamo.
Gibohon an pinakamakakaya nindo. Sinasadol an mga Kristiano na gumibo nin bilog na kalag dawa sa sekular na mga bagay. (Col. 3:22-24) Igwa nin mas dakulang dahelan na gibohon iyan kun naggigibo tangani na paoswagon an tunay na pagsamba. Dawa kun garo baga sadit an ipinapagibo, makikinabang dian an kongregasyon kun iyan ginibo nin toltol.
An kada asignasyon nagtatao sa sato nin oportunidad na ipaheling an satong pagkamoot ki Jehova asin sa satong mga tugang. (Mat. 22:37-39) Logod na may kaimbodan niatong asikasohon an ano man na asignasyon na ipinagkatiwala sa sato.