Kun Taano ta Kaipuhan Niyato an Pantubos

1-2. Sa anong sitwasyon kaipuhan na may magsalbar sa sato, asin taano? (Roma 7:​22-24) (Hilingon man an ritrato.)

IMAHINARA an eksena. Buminagsak an sarong building, asin may tawong nalaom diyan. Buhay siya, pero dai niya kayang isalbar an sadiri niya kun sa sadiri niya sanang kakayahan. An magigibo niya lang magkurahaw para sa tabang asin maglaom na may masukuro sa saiya.

² Nasa kaagid na sitwasyon man an lambang saro sa sato. Sa anong paagi? Kan magrebelde si Adan sa saiyang Kaglalang, nagin siyang makasalan. Pag-abot nin panahon, naipamana niya sa saiyang mga aki an saiyang makasalan na kamugtakan. Bilang resulta, arog kan tawong nalaom sa nagabang building, an bilog na katawuhan dai man kayang isalbar an sadiri ninda sa mga epekto kan minanang kasalan. Sa surat niya sa mga taga Roma, magayon an pagkapaliwanag ni Pablo manungod sa satong makasalan na kamugtakan. (Basahon an Roma 7:​22-24.) Nakimahirak siyang iligtas “sa hawak na nag-aagi kan kagadanan na ini.” Pagmati ni Pablo nalaom siya, o bihag, kan minanang kasalan, na nagreresulta sa kagadanan na dai malilikayan. (Roma 6:23) Nasa arog man kita kaiyan na miserableng kamugtakan. Kaipuhan nanggad niyatong may magsalbar sa sato!

3. Sa anong mga paagi kita maisasalbar kan pantubos?

³ Pagkatapos na iladawan ni Pablo an manungod sa kasalan, nagtao man siya nin paglaom. Pagkatapos niyang maghapot: “Siisay an masalbar sa sako sa hawak na nag-aagi kan kagadanan na ini?” sinabi niya: “Salamat sa Diyos paagi ki Jesu-Cristo na satuyang Kagurangnan!” (Roma 7:25) An pinapanungdan ni Pablo iyo an atang na pantubos ni Jesus.a Maisasalbar kita kan pantubos paagi sa pagpagin posible na (1) mapatawad an satong mga kasalan, (2) maumayan kita sa satong makasalan na kamugtakan, asin (3) makipag-ulian kita sa satong Kaglalang. Mantang pinag-uulayan niyato an mga puntong ini, lalo niyatong mamumutan si Jehova, “an Diyos na nagtatao nin paglaom.” (Roma 15:13) Magigin mas mapagpasalamat man kita ki Jesus—“na huli sa sarong iyan napatalingkas kita paagi sa pantubos.”​—Col. 1:14.

PAAGI SA PANTUBOS NAPAPATAWAD AN SATONG MGA KASALAN

4-5. Taano ta kaipuhan niyato gabos an pantubos? (Eclesiastes 7:20)

⁴ Kaipuhan ta an pantubos para mapatawad an satong mga kasalan. An gabos na bakong perpektong tawo nagkakasala, iyan man sa tataramon o sa gibo. (Basahon an Eclesiastes 7:20.) May mga kasalan na mas magabat kisa sa iba. Halimbawa, sa irarom kan Katugunan ni Moises, kagadanan an padusa sa pagsambay asin paggadan. (Lev. 20:10; Bil. 35:​30, 31) Siyempre, dakul na kasalan an bako man kasinggabat kaiyan, pero mga kasalan pa man giraray iyan. Halimbawa, sinabi ni salmista David: “Babantayan ko an sakong lakad tanganing dai ako makagibo nin kasalan paagi kan sakong dila.” (Sal. 39:1) Iyo, puwede pa ngani kitang magkasala kun minsan sa satong pagtaram.​—Sant. 3:2.

⁵ Pag-isipan an mga sinabi asin ginibo mo kaidto. May mga nasabi ka daw na kutana dai mo na lang sinabi? May mga salang nagibo ka daw na pinagbabasulan mo? Siguradong igwa. Sinasabi kan Bibliya: “Kun sasabihon ta, ‘Mayo kitang kasalan,’ dinadaya ta an satong sadiri asin an katotoohan mayo sa sato.”​—1 Juan 1:8.

6-7. Ano an nagtatao nin basehan para patawadon ni Jehova an satong mga kasalan? (Hilingon man an ritrato.)

⁶ An pantubos nagtatao nin masarig na basehan para patawadon ni Jehova an satong mga kasalan. (Efe. 1:7) Pero, dai buot sabihon na pinapalampas na sana ni Jehova an mga pagkakasala ta, na garo baga mayo lang iyan sa saiya. Seryosong bagay ki Jehova an kasalan. (Isa. 59:2) Huling perpekto an saiyang hustisya, kaipuhan nanggad na igwa nin basehan an saiyang pagpapatawad.

⁷ Kahagadan kan Katugunan ni Moises na mag-atang an mga Israelita nin mga hayop bilang bayad sa saindang mga kasalan. (Lev. 4:​27-31; 17:11) An mga atang na idto naglaladawan sa mas nakakalabing atang ni Jesus asin sa mga bendisyon na dara kaiyan. An saiyang atang matao nin legal na basehan para patawadon ni Jehova an mga kasalan ta. Nasabutan ni Pablo an halaga kan kagadanan ni Jesus bilang atang, arog kan mahihiling sa isinurat niya para sa mga Kristiyano sa Corinto. Pagkatapos na isurat an maraot na mga gibo-gibo ninda kaidto, sinabi niya sa sainda: “Hinugasan na kamo asin lininig; pinabanal na kamo; ipinahayag na kamong matanos sa ngaran kan Kagurangnan na Jesu-Cristo asin paagi sa espiritu kan satuyang Diyos.”​—1 Cor. 6:​9-11.

8. Ano an puwede mong isip-isipon sa mga semana bago an Memoryal sa taon na ini?

⁸ Sa mga semana bago an Memoryal sa taon na ini, tawan nin panahon na isip-isipon kun paano nakakatabang sa saimo an pagpapatawad ni Jehova. Halimbawa, huli sa pantubos, dai mo na kaipuhan na makamati nin labi-labing pagkakonsiyensiya dahil sa mga kasalan mo kaidto na pinagsulsulan mo na. Paano kun nasasakitan kang maniwala na pinatawad ka na ni Jehova? Tibaad iniisip mo, ‘Nasasabutan kong kaya akong patawadon ni Jehova, pero dai ko kayang patawadon an sadiri ko.’ Kun arog kaiyan an namamatian mo, tandaan ini: Si Jehova an nagpapatawad, asin tinawan niya an saiyang Aki nin awtoridad na maghukom. Dai ni Jehova itinao sa saimo o sa siisay pa man na tawo an pagdedesisyon kun siisay an papahilingan o dai niya papahilingan nin pagkahirak. Sinasabi kan Bibliya: “Kun naglalakaw kita sa liwanag kun paanong [si Jehova] mismo nasa liwanag, . . . linilinig kita kan dugo ni Jesus na saiyang Aki sa gabos na kasalan.” (1 Juan 1:​6, 7) Makakapagtiwala kitang totoo iyan arog kan pagtitiwala ta na totoo an iba pang mga katukduan sa Bibliya. An pantubos nagtao ki Jehova kan legal na basehan para pahilingan kita nin pagkahirak, asin sinasabi kan saiyang Tataramon na “andam [siyang] magpatawad.”​—Sal. 86:5.

PAAGI SA PANTUBOS MAPAPAUMAYAN KITA

9. Apuwera sa salang mga gibo, sa ano pa nanunungod an kasalan? (Salmo 51:5 asin nota sa ibaba)

⁹ Sa Bibliya, an tataramon na “kasalan” nanunungod bako lang sa sarong gibo kundi pati man sa sarong kamugtakan na minana ta puon pa kan ipangidam kita. (Basahon an Salmo 51:5 asin nota sa ibaba.) An kamugtakan na ini dai lang nagpapangyari na magin tendensiya tang gumibo nin sala kundi nagkakawsa man iyan na magkahilang kita, maggurang, asin magadan. Iyan an dahilan kaya an mga umboy—na mayo pa man nin nagigibong ano man na kasalan—puwedeng magkahilang asin magadan pa ngani. Iyan man an dahilan kaya an gabos na tawo, marahay man o maraot, nagsasakit saka nagagadan. An gabos na bakong perpektong gikan ni Adan nagmana nin makasalan na kamugtakan.

10. Paano naapektaran si Adan asin Eva kan saindang makasalan na kamugtakan?

¹⁰ Pag-isipan kun paano naapektaran kan makasalan na kamugtakan an inot na tawong mag-agom. Nagpuon na sindang makamati nin negatibong mga emosyon. Pagkatapos nindang magrebelde, naeksperyensiyahan tulos ni Adan asin Eva an mga konsekwensiya kan pagbalga ninda sa katugunan nin Diyos, na sarong katugunan na “nakasurat sa saindang puso.” (Roma 2:15) Narisa ninda na may nagbago sa sadiri ninda—sarong bakong marahay na pagbabago. Namatian nindang dapat nindang tahuban an pirang parte kan hawak ninda asin magtago sa saindang Kaglalang arog sa mga kriminal. (Gen. 3:​7, 8) Sa kainot-inuting pagkakataon, nakamati si Adan asin Eva nin pagkakonsiyensiya, pagkapurisaw, takot, kulog, asin pagkasupog. Asin mamamatian ninda an mga iyan sagkod sa saindang kagadanan.​—Gen. 3:​16-19.

11. Ano an epekto sa sato kan satong makasalan na kamugtakan?

¹¹ May kapareho man na epekto sa sato an makasalan na kamugtakan arog kan naeksperyensiyahan kan inot na mag-agom. Iyan an pinakakawsa kan namamatian tang grabeng pagsakit sa pisikal asin sa emosyon. Ano man na paghihinguwa an gibuhon ta para magrahay an satong sitwasyon, limitado sana an magigibo ta. Taano? Huling arog kan sinasabi kan Bibliya, “ipinasairarom [kita] sa kawaran nin saysay.” (Roma 8:20) Totoo ini bako lang sa sato bilang mga indibidwal kundi sa gabos na tawo. Halimbawa, pag-isipan an mga paghihinguwa kan mga tawo na atamanon an kapalibutan, halion an krimen, tapuson an pagtios, asin magkaigwa nin katuninungan sa pag-ultanan kan mga nasyon. Totoo na maski paano may mga nagigibo man sindang pag-uswag, pero dai man ninda lubos na nareresolberan an mga problemang iyan. Paano kita maisasalbar kan pantubos sa satong makasalan na kamugtakan?

12. Anong paglaom an itinatao kan pantubos?

¹² An pantubos nagtatao nin paglaom na “an mga linalang mismo mapapatalingkas . . . sa pagkauripon sa kalapaan.” (Roma 8:21) Pag mag-abot na an bagong kinaban nin Diyos, na diyan lubos nang maiaaplikar an mga pakinabang kan pantubos, dai na kita magkakaigwa nin mga hilang sa pisikal, sa isip, o sa emosyon; dai na man kita makakamati nin nakakapangluyang mga emosyon arog kan pagkakonsiyensiya, pagkapurisaw, takot, kulog, asin pagkasupog. Apuwera kaiyan, dai na magigin sayang an mga paghihinguwa tang atamanon an daga asin mamuhay nin may katuninungan dahil magigin mapanggana iyan sa irarom kan pamamahala kan saro na nagtubos sa sato, an “Prinsipe nin Katuninungan,” si Jesu-Cristo.​—Isa. 9:​6, 7.

13. Ano pa an puwede mong isip-isipon sa mga semana bago an Memoryal sa taon na ini?

¹³ Isip-isipa kun gurano karahay kan magigin buhay mo pag lubos ka nang naisalbar sa makasalan na kamugtakan. Mamata ka sa kada aga na marahay an pagmati asin dai na lamang mahahadit na ika o an mga mahal mo sa buhay tibaad magutom, magkahilang, o magadan. Dawa ngunyan, makakamati ka nin katuninungan mantang “[pinapangaptan mo] nin higot an paglaom . . . bilang angkla para sa kalag, sigurado asin marigon.” (Heb. 6:​18, 19) Kun paanong an angkla makakatabang para dai maanod parayo an bangka, mapaparigon man kan Kristiyanong paglaom an saimong pagtubod asin matatabangan ka kaiyan na matagalan an ano man na pagbalong napapaatubang sa saimo ngunyan. Iyo, makakapagtiwala ka na si Jehova magigin “paratao nin balos sa mga udok na naghahanap sa saiya.” (Heb. 11:6) An karangahan na inaako mo ngunyan asin an paglaom na igwa ka para sa maabot nagin posible sana huli sa pantubos.

PAAGI SA PANTUBOS NAGIGIN POSIBLE AN PAKIPAG-ULIAN SA DIYOS

14. Paano naapektaran kan kasalan an relasyon ta sa satong Kaglalang, asin taano?

¹⁴ Puon kan magkasala si Adan asin Eva, an katawuhan nagin nang siblag, o suway, sa Diyos. Sinasabi pa ngani kan Bibliya na an bilog na katawuhan kaiwal kan Kaglalang. (Roma 8:​7, 8; Col. 1:21) Taano? Huling dai tutugutan ni Jehova, na may perpektong mga pamantayan, na kunsintihon an kasalan. Sinasabi kan Bibliya manungod sa saiya: “Dalisay na marhay an saimong mga mata para maghiling sa maraot, asin dai mo magigibong kunsintihon an karatan.” (Hab. 1:13) Kaya huli sa kasalan, garo baga nagkaigwa nin dakulaon na siwang sa pag-ultanan kan Diyos asin kan katawuhan. Mayo nin siisay man sa sato an puwedeng magkaigwa nin relasyon ki Jehova sagkod na dai nareremedyuhan an siwang na iyan asin makipag-ulian kita sa saiya. Dahil sa pantubos, nagigin posible an pakipag-ulian na iyan.

15. Sa anong paagi nagin pampagian nin buot an pantubos, asin ano an resulta kaiyan?

¹⁵ Sinasabi kan Bibliya na si Jesus “sarong pampagian nin buot na atang para sa satong mga kasalan.” (1 Juan 2:2) Sa anong paagi napagian kan pantubos an buot ni Jehova? Dai man buot sabihon na nakatao sa Saiya nin karangahan an kagadanan kan Saiyang Aki. Imbes, napaniguan kan pantubos an Saiyang pamantayan nin hustisya. Huli kaiyan, igwa na siya nin basehan para ibalik an relasyon sa pag-ultanan niya saka kan mga tawo. (Roma 3:​23-26) Puwede niya pa nganing ibilang na matanos an mga tawong maimbod na nagsamba sa saiya bago an kagadanan ni Cristo. (Gen. 15:​1, 6) Paano? Basado sa maabot na pantubos. Siguradong-sigurado si Jehova na itatao kan saiyang Aking si Jesus an pantubos. (Isa. 46:1) Paagi sa pantubos, nagin posible para sa mga tawo na makipag-ulian sa Diyos.

16. Ano pa an puwede mong isip-isipon sa mga semana bago an Memoryal sa taon na ini? (Hilingon man an ritrato.)

¹⁶ Pag-isipan kun paano ka ngunyan nakikinabang sa pakipag-ulian sa Diyos. Halimbawa, tibaad inaapod mong saimong “Ama” si Jehova arog kan itinukdo ni Jesus. (Mat. 6:9) Tibaad kun minsan inaapod mo pa ngani Siyang saimong “Amigo.” Pag inaapod tang “Ama” o “Amigo” si Jehova, dapat na gibuhon ta iyan nin may dakulang paggalang asin kapakumbabaan. Taano? Huling kun sa sadiri ta sana, imposible nanggad na magkaigwa kita nin dayupot na relasyon ki Jehova dahil sa satong makasalan na kamugtakan. Solamenteng dahil sa pantubos kaya nagin posible dawa an pagkaigwa lang niyato nin relasyon sa Saiya. Paagi ki Jesus, pinagin posible ni Jehova “an pakipag-ulian sa Saiya kan gabos na iba pang bagay. . . . An pakipagkatuninungan na iyan sa Diyos nagin posible paagi sa dugo na pinabulos [ni Jesus] sa hariging pasakitan.” (Col. 1:​19, 20) Iyan an dahilan kaya puwede kitang magkaigwa nin marahay na relasyon ki Jehova—dawa ngunyan na bako pa kitang perpekto.

AN PANTUBOS PATUNAY NA MAHIHIRAKON SI JEHOVA

17. Paano idinuduon kan pantubos na mahihirakon si Jehova? (Efeso 2:​4, 5)

¹⁷ Idinuduon kan pantubos na “abunda [si Jehova] sa pagkahirak.” “Binuhay niya kita . . . kan kita gadan pa huli kan satong mga pagkakasala.” (Basahon an Efeso 2:​4, 5.) An mga tawong “igwang pusong nasa tamang kamugtakan para sa buhay na daing katapusan” nagkukurahaw para sa tabang huling aram nindang nalaom, o bihag, sinda kan minanang kasalan asin kaipuhan nindang may magsalbar sa sainda. (Gibo 13:48) Sinisimbag ni Jehova an paghagad ninda nin tabang paagi sa mensahe kan Kahadian, para mamidbid ninda siya saka an Aki niyang si Jesus. (Juan 17:3) Kun inisip man ni Satanas na mapapapundo kan pagkakasala ni Adan asin Eva na mautob an katuyuhan nin Diyos, sala nanggad siya.

18. Mantang hinuhurop-hurop niyato an pantubos, anong isyu an kaipuhan tang isaisip?

¹⁸ Mantang hinuhurop-hurop ta an mga pakinabang sa sato na nagigin posible huli sa pantubos, kaipuhan tang isaisip an mas dakulang isyu. Imbes na mansayon an pantubos bilang probisyon na para sana sa satong kapakinabangan, dapat tang tandaan na iyan an ginagamit ni Jehova para simbagon an akusasyon ni Satanas sa Saiya kaidto sa hardin nin Eden. (Gen. 3:​1-5, 15) Paagi kan pantubos, pinapakangbanal ni Jehova an pangaran niya, an buot sabihon, pinapatunayan niyang bakong totoo an gabos na katuyawan manungod diyan. Isinasalbar niya man kita sa kasalan asin kagadanan, na nagpapatunay na Diyos siya nin pagkamuot. Asin dahil sa saiyang daing kapantay na kabuutan, tinatawan kita ni Jehova kan oportunidad na tumabang sa pagsimbag sa akusasyon ni Satanas sa ibong kan satong makasalan na kamugtakan. (Tal. 27:11) Paano ta maipapahiling na nagpapasalamat kita sa pantubos? Sisimbagon ta iyan sa sunod na artikulo.