An Dapat na Maaraman kan mga Magurang Manungod sa Day Care

May nagtatrabahong mga magurang na nagdedesisyon na ilaog sa day-care center an saindang mga aki—sarong pasilidad na garo man sana classroom. Makakatabang daw ’yan sa saimong aki?

• Mga dapat mong ihapot

• An magigibo mo

Mga dapat mong ihapot

Maaapektaran daw an relasyon ko sa aki ko kun ilalaog ko siya sa day care? Puwede. Sa inot na mga taon nin sarong aki, an hutok niya marikas na nagde-develop, asin an mga pagbabagong iyan igwa nin epekto sa relasyon niya sa iba. Kaya sagkod na posible, hinguwahon na makaibanan pirmi an saimong aki sa panahon na iyan.—Deuteronomio 6:6, 7.

• Kun pinag-iisipan kan mga magurang na ilaog sa day care an saindang aki, dapat nindang konsideraron kun paano sinda magdadanay na dayupot sa saiya.

Mapapaluya daw kan day care an impluwensiya mo sa saimong aki? Puwede. “Mantang mas parating nagkakairibanan an mga aki, mas nagkukusog an impluwensiya ninda sa lambang saro,” an sabi kan librong Hold On to Your Kids.

• Kun pinag-iisipan kan mga magurang na ilaog sa day care an saindang aki, dapat nindang konsideraron kun baga mapapagdanay nindang sinda an may panginot na impluwensiya sa buhay kan saindang aki.

Makakatabang daw an day care na magin marahay sa klase an aki mo pag nagpuon na siyang mag-eskuwela? May mga nagsasabing iyo. An iba nagsasabi na mayo iyan nin epekto sa kakayahan kan aki na makanuod, asin kun igwa man, dikit lang. Arin man diyan, an sikologo nin aki na si Penelope Leach nagsabi: “Dai maniwala na an ‘edukasyon’ an liyabe para magkaigwa nin marahay na buhay an aki mo asin na mas marahay kun mas dakul siya kaiyan saka mas amay siyang nagpuon diyan. Kun papaniwalaan mo kaya iyan, dai mo na gayong mapapahalagahan an ‘edukasyon’ na itinatao mo sa saimong aki puon kan ipangaki mo siya.”

• Kun pinag-iisipan kan mga magurang na ilaog sa day care an saindang aki, dapat nindang konsideraron kun baga kapaki-pakinabang iyan o kaipuhan pa ngani.

Posible daw sa saimo o sa saimong agom na dai na magtrabaho asin magpirmi lang sa harong para makaibanan an saindong aki? Sa nagkapirang sitwasyon, parehong nagtatrabaho an mga magurang para lang magkaigwa nin mas dakul na materyal na bagay an saindang pamilya. Pero sulit daw an mga pakinabang kumpara sa mga isinasakripisyo ninda?

• Kun pinag-iisipan kan mga magurang na ilaog sa day care an saindang aki, dapat nindang konsideraron kun baga puwede nindang bawasan an saindang gastos tanganing makapirmi sa harong an saro sa sainda.

An desisyon kun baga ilalaog sa day care an saindong aki o dai dapat na gibuhon kun maingat na nindong naturutimbang an mga bentaha asin disbentaha. Pagkatapos nindong gibuhon iyan, paano kun sa hiling nindo marahay na ilaog sa day care an saindong aki?

An puwede mong gibuhon

Sinasabi kan Bibliya na “an saro na alisto an isip pinag-iisipan an lambang lakad.” (Talinhaga 14:15) Mantang kinokonsiderar an prinsipyong iyan, pag-isipan ngunang marhay bago magpili nin ano man na klase nin day care.

Aramon an manungod sa saimong mga opsiyon

• May mga magurang na pinipili an child-care home—nasa harong ini na igwa nin saro o pipira sanang caregiver asin nin sadit na grupo nin mga aki.

• An ibang mga magurang igwang kaparyente, caregiver na nagdadagos sa harong ninda, o babysitter na pigpapaasikaso ninda sa saindang aki.

An gabos na opsiyon may mga bentaha saka disbentaha. Makipag-ulay sa ibang mga magurang na nakapurbar na nin sarong klase nin day care. Sinasabi kan Bibliya: “May kadunungan sa mga naghahagad nin sadol.”—Talinhaga 13:10.

Paano kun pilion nindong ilaog sa sarong day-care center an saindong aki? Kun arog kaiyan, . . .

Aramon an manungod sa pasilidad

• Lisensiyado daw iyan asin nagsusunod sa ano man na hinahagad kan ley? Ano an mga napatunayan na kaiyan, o an reputasyon kaiyan?

• Malinig daw saka ligtas an pasilidad?

• Anong mga aktibidad an itinatao kaiyan?a

Aramon an manungod sa mga caregiver

• Anong mga pagsasanay an inako ninda? Kaiba diyan an pagsasanay manungod sa pagtao nin edukasyon sa inot na mga taon nin sarong aki, first aid, asin CPR.

• Magigibo mo daw na ma-background check sinda para maaraman kun baga igwa sinda nin ano man na criminal record?

• Parati daw nagkakaigwa nin mga pagbabago sa staff? Kun iyo kaya, mangangahulugan iyan na kakaipuhanon pirmi kan saimong aki na mag-adjust sa bagong mga caregiver.

• Pirang aki an inaasikaso nin sarong caregiver? Ta kun dakul kayang aki an inaasikaso nin sarong caregiver, tibaad dai na niya gayong matawan an saimong aki kan kinakaipuhan kaining atensiyon. Siyempre, nakadepende sa edad saka kakayahan kan saimong aki kun guranong atensiyon an kaipuhan niya.

• Andam daw an mga caregiver na makikomunikar sa saimo manungod sa mga isyu mo—o ninda—sa saimong aki?