HAPOT KAN MGA HOBEN

Dapat Daw Akong Magpabawtismo?—Part 3: Ano an Nakakapugol sa Sako?

Nakakamati ka daw nin takot pag iniisip mo an manungod sa pagdusay mo ki Jehova asin pagpabawtismo? Kun iyo, matatabangan ka kan artikulong ini na mapangganahan an saimong takot.

Sa artikulong ini

Paano kun makagibo ako nin magabat na kasalan pag bawtisado na ako?

Kun taano ta iniisip mo iyan: Tibaad may bisto kang nakagibo nin magabat na kasalan asin kinaipuhan na halion sa kongregasyon. (1 Corinto 5:11-13) Tibaad nahahadit ka na mangyayari man iyan sa saimo.

“Kan inot kong inisip-isip an manungod sa pagpabawtismo, natakot ako na ’baad makagibo ako nin magabat na kasalan pag bawtisado na ako. Siguradong maaapektaran na marhay ka’yan an mga magurang ko.”—Rebekah.

Tekstong makakatabang: “Bayaan kan maraot na tawo an saiyang dalan . . . Magbalik siya ki Jehova, na mahihirak sa saiya, sa satuyang Diyos, huling bulaos siyang magpapatawad.”—Isaias 55:7.

Pag-isipan: Dawa ngani hinahali sa kongregasyon an mga dai nagsusulsol na nagkasala, pinapahilingan ni Jehova nin pagkahirak an mga mapakumbabang nagsusulsol asin nag-aako nin pagtatanos.—Salmo 103:13, 14; 2 Corinto 7:11.

Apuwera kaiyan, an totoo iyo na dawa ngani bako kang perpekto, kaya mong labanan an sugot sa tabang ni Jehova. (1 Corinto 10:13) Tutal, siisay baya an nagdedesisyon kun ano an gigibuhon mo, ika o an iba?

“Natatakot ako na ’baad makagibo ako nin magabat na kasalan pagkatapos kong mabawtismuhan, pero narealisar ko na sala man kun dai ako mapabawtismo. Narealisar ko na dai ko dapat tugutan an mga ikinakatakot kong mangyari sa maabot na makapugol ngunyan sa sako.”—Karen.

Tandaan: Kun gugustuhon mo, kaya mong malikayan na makagibo nin magabat na mga kasalan—arog kan kadaklan sa mga lingkod ni Jehova.—Filipos 2:12.

Gusto mo nin dagdag na tabang? Hilingon an “Paano Ko Malalabanan an Sugot?”

Paano kun nahahadit ako na dai ko magibo an mga paninimbagan bilang sarong bawtisado?

Kun taano ta iniisip mo iyan: Halimbawa, tibaad may mga kabisto kang hoben na nagbalyo sa sarong lugar na harayo sa saindang pamilya asin mga amigo tanganing mas makapaglingkod pa sinda ki Jehova. Nahahadit ka na iyan man an aasahan sa saimo kan mga tawo.

“Dakul na pribelihiyo an bukas para sa sarong bawtisadong Kristiyano, pero may mga indibidwal na dai pa lang talaga andam para diyan o kaya dai itinutugot kan saindang kamugtakan na gibuhon iyan.”—Marie.

Tekstong makakatabang: “Siyasaton kan lambang saro an sadiri niyang mga ginigibo, dangan magkakaigwa siya nin dahilan para mag-ugma basado sa sadiri niya sana, asin bako sa pagkumparar kan sadiri niya sa iba.”—Galacia 6:4.

Pag-isipan: Imbes na ikumparar an saimong sadiri sa iba, magpokus sa sinasabi kan Marcos 12:30: “Kamutan mo si Jehova na saimong Diyos sa bilog mong puso.”

Mangnuhon na dapat mong paglingkudan si Jehova sa bilog mong puso—bakong sa puso nin iba. Kun tunay mong namumutan si Jehova, mahanap ka nin mga paagi na paglingkudan siya sa bilog mong makakaya.

“An pagpabawtismo seryosong bagay, pero bako iyan pagabat. Kun mahanap ka nin marahay na mga amigo, tatabangan ka ninda. An totoo ngani, mantang luway-luway na nadadagdagan an isinasaabaga mong paninimbagan, lalo ka man na nagigin maugma. Kun dai ka mapabawtismo, dinadanyaran mo an sadiri mo.”—Julia.

Tandaan: Hinguwahon na magin mas mapagpasalamat sa pagkamuot na ipinapahiling sa saimo ni Jehova. Makakamotibar iyan sa saimo na gibuhon an saimong pinakamakakaya para sa saiya.—1 Juan 4:19.

Gusto mo nin dagdag na tabang? Hilingon an “Gaano Ako Karesponsable?”

Paano kun namamatian kong bako akong angay na maglingkod ki Jehova?

Kun taano ta iniisip mo iyan: Si Jehova an Soberano kan bilog na uniberso mantang kitang mga tawo mayo lamang kumpara sa Saiya! Kaya tibaad maisip mo kun baga aram lamang daw ni Jehova na nag-eeksister ka.

“Huling mga Saksi ni Jehova an mga magurang ko, nahadit ako kaidto na ’baad namana ko lang sa sainda, sabi ngani, an pakikiamigo ko ki Jehova asin na dai man talaga ako personal na irinani ni Jehova sa Saiya.”—Natalie.

Tekstong makakatabang: “Mayo nin tawong makakadulok sa sako apuwera na sana kun irani siya kan Ama na nagsugo sa sako.”—Juan 6:44.

Pag-isipan: Kun pinag-iisipan mong magpabawtismo, posibleng indikasyon iyan na irinarani ka ni Jehova sa saiya tanganing magin mas dayupot pa kamong mag-amigo. Bako daw na tama sanang akuon an imbitasyon na iyan?

Girumdumon man na si Jehova—bako ika o an siisay man—an nagtatao nin pamantayan para sa mga gusto Niyang irani sa Saiya. Asin sinisigurado sa saimo kan Saiyang Tataramon na kun “rumani [ka] sa Diyos, . . . marani siya sa [saimo].”—Santiago 4:8.

“Namidbid mo na si Jehova saka irinani ka na niya sa saiya. Ebidensiya iyan na namumutan ka niya. Kaya kun naiisip mong dai ka angay na maglingkod sa saiya, ipagirumdom mo sa sadiri mo na dai siya uyon sa naiisip mong iyan. Saka si Jehova pirming tama.”—Selina.

Tandaan: Kun naabot mo na an mga kahagadan sa Bibliya para sa bawtismo, kuwalipikado ka nang magsamba ki Jehova. Asin tandaan na maninigo si Jehova sa saimong pagsamba.—Kapahayagan 4:11.

Gusto mo nin dagdag na tabang? Hilingon an “Taano ta Dapat Akong Mamibi?”