May Sinasabi Daw an Bibliya Manungod sa Pag-aguman nin Magkasekso?

An simbag kan Bibliya

An satong Kaglalang haloy nang nagbugtak nin mga susundon may koneksiyon sa pag-aguman bago pa man maggibo nin reglamento an mga gobyerno nin tawo sa institusyon na iyan. Sinasabi sa sato kan inot na libro sa Bibliya: “Babayaan kan lalaki an saiyang ama saka an saiyang ina asin magdadanay siyang kaibanan kan saiyang agom, asin sinda magigin sarong laman.” (Genesis 2:24) Sa tekstong ini, an Hebreong tataramon para sa “agom,” uyon sa Vine’s Expository Dictionary of Biblical Words, “nangangahulugan na sarong babayi.” Kinumpirmar mismo ni Jesus na an pinagsaro nin Diyos na magin mag-agom dapat na “lalaki asin babayi.”—Mateo 19:4.

Kaya, gusto nin Diyos na an pag-aguman magin permanente asin dayupot na relasyon nin sarong lalaki asin sarong babayi. An mga lalaki asin babayi dinisenyo na magin kakomplemento kan kada saro tanganing maitao ninda an emosyonal asin seksuwal na mga pangangaipo kan lambang saro asin para magkaigwa nin mga aki.