Ano an Sinasabi kan Bibliya Manungod sa Paggamit nin Makeup Asin Alahas?
An simbag kan Bibliya
Mayo nin detalyadong sinasabi an Bibliya manungod sa paggamit nin makeup, alahas, o iba pang pampagayon, pero dai man sinasabi diyan na sala an paggamit kan mga iyan. Alagad, imbes na magpokus sa pangluwas na itsura, mas pinapahalagahan kan Bibliya an ‘dai napapara na darang kagayunan kan pagigin tuninong asin mahuyo.’—1 Pedro 3:3, 4.
An paggamit nin pampagayon bako man sala
May maimbod na mga babayi na sinambit sa Bibliya na naggamit nin mga pampagayon. Si Rebeca, na nagin agom kan aki ni Abraham na si Isaac, nagsulot nin bulawan na hikaw sa dungo, bulawan na mga pulseras, saka iba pang mamahalon na alahas na irinegalo saiya kan magigin niyang panugangan na lalaki. (Genesis 24:22, 30, 53) Siring man, nag-ako si Esther nin manlain-lain na proseso nin “pagpapagayon” para maiandam siya sa posibilidad na magin reyna kan Imperyo nin Persia. (Esther 2:7, 9, 12) Minalataw na kaiba sa mga prosesong ini an paggamit nin mga “kosmetik,” o “manlain-lain na klase nin makeup.”—New International Version; Easy-to-Read Version.
Sa mga ilustrasyon sa Bibliya, iinagid sa positibong mga bagay an mga alahas. Halimbawa, an saro na nagtatao nin marahay na sadol iinagid sa “sarong hikaw na gibo sa bulawan . . . para sa talingang naghihimati.” (Talinhaga 25:12) Siring man, an pagtratar nin Diyos sa nasyon nin Israel iinagid Niya mismo sa sarong agom na lalaki na sinasamnuhan an nobya kaini nin mga pulseras, kulintas, saka mga hikaw. Dahil diyan, nagin “magayunon na marhay” an nasyon.—Ezekiel 16:11-13.
Salang mga paghuna manungod sa makeup saka alahas
Salang paghuna: Sinasabi sa 1 Pedro 3:3 na sala “an pagsalapid nin buhok asin an pagsulot nin mga alahas na bulawan.”
An totoo: Ipinapahiling kan konteksto na idinuduon kan Bibliya na mas mahalaga an panglaog na kagayunan kisa sa magayon na itsura o pagpagayon. (1 Pedro 3:3-6) An pagkumparar na iyan mahihiling man sa iba pang mga teksto sa Bibliya.—1 Samuel 16:7; Talinhaga 11:22; 31:30; 1 Timoteo 2:9, 10.
Salang paghuna: An maraot na reyna na si Jezebel nagbugtak nin “kulorete sa saiyang mga mata,” kaya patunay iyan na sala an paggamit nin makeup.—2 Hadi 9:30.
An totoo: Hinukuman si Jezebel bako dahil sa saiyang itsura, kundi dahil sa saiyang maraot na mga gibo arog nin pangkukulam saka paggadan.—2 Hadi 9:7, 22, 36, 37.