Taano ta Kadakol kan Nagigin Saksi ni Jehova?

SA DAKOL na kadagaan iyan an ginigibo nin mga tawo. Halimbawa, sa Bologna, Italia, an mga autoridad kan iglesya, na aprobado kan papa, nagkaigwa nin kongreso tanganing pag-adalan kun paano lalabanan an kapangganahan kan mga Saksi ni Jehova. An Iglesya Katolika ‘nagkurahaw sa takot,’ sono sa La Repubblica, huli ta taon-taon sampulong ribong Katoliko an nagigin Saksi ni Jehova.

An Jesuitang si Giusseppe De Rosa nagsabi na “sa relihiyosong punto-de-vista an pinakapeligroso iyo an mga Saksi ni Jehova. Sinda biyong natokdoan; permi sindang may kapot na Biblia.”

Sa sarong editoryal na espisipikong manongod sa mga Saksi ni Jehova, an magasin na Jesuita na La Civiltá Cattolica kan Pebrero 18, 1984, nagsurat:

“An enot na dahelan kan paglakop kan mobimiento nasa mga paagi nin propaganda [an boot sabihon, nasa paghuhulit]. Sa sarong lado an trabaho nagkakaipo nin dakulang pagmamaan, na ginigibo sa harong-harong nin mga tawo na estriktong tinokdoan sa gibohon na ini asin kombensido nanggad . . .

“An ikaduwang dahelan kan kapangganahan kan mga JW nasa nakaaakit na puwersa kan mensaheng jehovista, sa pagigin nakapagpapanigo sa mga pangangaipo, kahagadan, asin paglaom nin mga tawo sa satong panahon. Enot sa gabos, napaninigoan kaiyan an pangangaipo nin mga kasiertohan, bagay na inaapresyar na gayo sa panahon na an gabos bakong segurado asin bakong marigon. . . . Orog sa gabos, iyan segurado nanggad na kapahayagan manongod sa ngapit, kaya an gabos na minaako kaiyan nakatatalingkas sa gabos na pagkatakot asin paghadit asin maaatubang an ngapit na may kagayagayahan, na may kasegurohan na maligtas sa panlaglag kan grabeng aldaw nin paghohokom nin Dios sa maraot na kinaban asin mabuhay sa daing sagkod na kaogmahan digdi sa daga. Ikaduwa, an mensaheng jehovista nakatatabang sa paghale sa kahaditan kan indibiduwal sa atubang kan mga kasakitan kan kinaban na ini, na ipinaiisi na an pagbagsak kan dai na matios na situwasyon ngonyan harani na, asin na sa dai na mahahaloy, magkakaigwa nin bagong panahon, mamumundag an bagong kinaban na dian hahaleon an gabos na maraot na ngonyan mapanggana. . . .

“An ikatolong dahelan kan kapangganahan nin mga JW iyo na an mobimiento nagtatao sa mga miembro kaiyan nin eksakto asin makosog na pagmidbid sa indibiduwal, asin iyan sarong lugar para sa sainda na dian sinda inaako na may init asin pagmate nin pagkamagturugang asin pagkasararo.”

An dokumento kan Batikano siniyasat an mga pangangaipo nin mga tawo sa presenteng panahon, asin an kinotar sa enotan sa magasin na Jesuita na La Civiltá Cattolica nagpaheling na an mensahe kan mga Saksi ni Jehova an nakatatao kan mga pangangaipong iyan. Ini pinatunayan pa kan Katolikong parasurat na si Vittorio Messori sa saiyang bago pa sanang librong Scommessa sulla morte (Sarong Pusta sa Kagadanan), na dian isinurat nia:

“Pinapag-iisip ka kun narerealisar mo na an saro sa apokaliptikong mga sektang ini—an mga Saksi ni Jehova—iyo an pinakamarikas an pagtalubong pagtubod, o relihiyon, sa kinaban. Iyan kabilang sa pinakainootob na relihiyon sa dakol na kadagaan . . . asin seguro iyan an primero pag-abot sa init, igot, aktibismo, abilidad na gumibo nin mga proselito.

“An sainda man na mas risang presensia bakong limitado sana sa mga kadagaan na may Kristianong tradisyon, kundi iyan lakop sa bilog na kinaban na dian, sa ngaran ni Jehova, asin sa halipot sanang panahon, may nakakamtan na mga resulta na parateng superyor sa nagibo nin mga misyonerong Katoliko, protestante, asin ortodokso sa laog nin ginatos na taon na pagtrabaho.

“An kahangahangang puwersang ini nin paglakop dai sana masasabotan kan saro na habong admitiron na . . . an paagi kan mga Saksi ni Jehova sa pagbasa sa Biblia maliwanag na nagpapanigo sa tunay na mga pangangaipo na dai na napaninigoan nin ibang teolohiya.

“Dai puwedeng likayan an isyu paagi sa pagpasentido na an mga Saksi nagigin mapanggana huli ta ginagamit ninda an takot. Kabaliktaran ngani: Bakong arog kan ‘opisyal’ na mga iglesya, nininigaran ninda an pag-eksister nin impierno, na an ihinuhulit pagkapara kan mga maraot asin daing pagtubod, depinidong pagkawara pagkagadan. Tibaad ini bakong maogmang paglaom; pero tunay na bakong arog kamakatatakot kan mga uma nin teribleng mga kolog sagkod lamang.”

Iyo, an Dios kan mga Saksi ni Jehova mamomoton na Dios, bakong saro na nagpapatakot sa mga tawo.

An minasunod na kotasyon hale sa magasin na Katoliko na Mondo erre kan Marso 1986: “Kaipuhan na sabihon na an mga Saksi ni Jehova iyo an enot na namumuhay sono sa pagtubod na ihinuhulit ninda: Dai sinda naaanggot, dai sinda nagsisigarilyo, dai sinda nagpapayaman, dai sinda nakikilabot sa politikal na mga orolay, . . . nagbabayad sinda nin buhis, nagsusunod sinda sa marahay asin sadiosan na pamumuhay, sinda maogma asin makonsiderasyon. Huli kan gabos na ini sinda nagugustohan nin dakol.”

Ininterbio an mga Dating Katoliko

Interesanteng aramon an nagkapirang direktang pagsaysay na nagpaparisa kan mga dahelan kun taano ta pinili nin duwang dating Katoliko an ibang relihiyon.

Si Rosanna C., hoben pang may agom na nag-iistar sa probinsia nin Parma (parteng amihanan nin Italia), nagsasabi:

“Matoninong an pagkaaki ko. Nag-ako ako nin dakulang pagkamoot sa sakong mga magurang asin nagkaigwa nin normal na Katolikong edukasyon. Kan nagtitin-edyer na ako, tinubuan ako nin pagmawot na uso sa dakol na hobenes: boot kong gibohon an sakong sadiri na kapakipakinabang sa Dios asin maglingkod sa saiya. An pagmawot na ini pinakosog kan pagbasa nin sarong kopya kan Ebanghelyo na binakal ko sa sarong tindahan nin libro. Dai ko pa iyan noarin man nabasa kaidto. Huli sa sakong nabasa namotan ko si Jesus. Narealisar ko na igwa sia nin mensahe nin paglaom para sa katawohan, minsan ngani dai ko nasabotan an kahulogan kaiyan. Narealisar ko man na an saiyang mga disipulo kaipuhan na magpaheling nin hararom na pagkamoot sa Dios asin sa saindang kapwa.”

Magmata!: Kontento ka daw kaidto sa ginigibo mo sa saimong relihiyon?

Rosanna: Dai. Kan 17 anyos ako, nagtokdo ako nin katesismo sa mga aki na magpoon 10 sagkod 12 an edad. Bilang miembro nin sarong panhobenes na grupong Aksion Katoliko, nakikabtang ako sa mga miting asin espirituwal na paghorophorop. Okupado akong marhay, sa relihiyosong pagtaram. Pero may duwang bagay na dai ko nagustohan. An Biblia, an libro na iginagalang kong gayo, noarin man dai siniyasat, asin sa grupong naaayonan ko, mayo nin tunay na daing kapasloan na pagkamoot o pagkasararo. Asin bako sana iyan. Nahahadit man ako sa bagay na an sarong sodomita asin sarong linalaki inako asin iginagalang na gayo kan grupo. Sarong hapon dai na ako nakatios asin naghibi ako.

Magmata!: Nagin pasil daw sa saimo na magin saro sa mga Saksi ni Jehova?

Rosanna: Bako nanggad! Kan an sakong mga magurang enot na magpasongko sa mga Saksi ni Jehova, mayo ako nin kamawotan na umayon sa orolay. Pero, kan huri, huling napahanga sa marahay na ugale kan mga Saksi, nagdesisyon ako na midbidon sinda asin umayon sa pakikipag-olay sa sainda sa Biblia. Ini an nagdesisyon para sa sako. An pinakahinangaan ko iyo an bagay na sa kada pagtumang ko, tinawan ninda ako nin malinaw na simbag hale sa Biblia.

Magmata!: Naghagad ka daw nin hatol sa padi pakatapos kan orolay na ini?

Rosanna: Iyo, sa nagkapira, asin sa sarong madre. Dai sindang gayo nagmamakolog na tabangan an sarong ‘nawarang karnero.’ Pakatapos nin tamang pag-adal sa Biblia, kan 1977 sinimbolisaran ko an sakong pagdusay ki Jehova Dios paagi sa bautismo sa tubig.

Si Claudio, C., 30, na taga-Isérnia (sa sentral na Italia), nagsabi:

“Kan ako dies anyos an edad, sa sadiri kong boot naglaog ako sa seminaryo na an namamahala mga prayleng Capuchin. An kamawotan ko maglingkod sa Dios bilang misyonero. An buhay sa seminaryo nagkaigwa nin mga problema huli sa mga situwasyon na yaon duman; pero an talagang nakaribok sa isip ko iyo an pagsayuma kan sakong mga superyor na tawan ako nin kopya kan Biblia, libro na gusto kong gayong basahon. Orog akong nahadit kan sabihan kami nin sarong padi na an ginikanan nin tawo paagi sa ebolusyon. Narealisar ko na dai ko maootob an pasohan kong maglingkod sa Dios sa seminaryo, kaya nagluwas ako sa edad na 15.”

Magmata!: Paano mo nanompongan an mga Saksi ni Jehova?

Claudio: Nagduman sinda sa harong ko. Nagigirumdoman ko na hinapot ko sinda nin direktang mga hapot, asin tinawan ninda ako nin direkta asin eksaktong mga simbag. Winalatan ninda ako nin duwang libro, an Did Man Get Here by Evolution or by Creation? asin Is the Bible Really the Word of God? Pakabasaha ko kaiyan, narealisar ko na an teoriya nin ebolusyon daing basihan asin na an Kasuratan ipinasabong nin Dios. An tugang ko nag-iba na sako sa paghanap kan katotoohan, asin inisip mi kun baga an mga Saksi an talagang mga representante nin tunay na Kristianismo. Kaipuhan ming siyasaton nin mas lubos pa an saindang mga doktrina.

Magmata!: Kun siring ano an ginibo nindo?

Claudio: Nakipag-olay kami sa tolong padi asin sa mga ministro nin nagkapirang denominasyon na Protestante. Pakalihis nin lubos na pag-imbestigar, nakombensir kami na an mga Saksi ni Jehova an talagang nakatatabang sa mga tawo na masabotan an Biblia. Nagpabautismo kami bilang mga Saksi ni Jehova, asin sa katapustapusi naotob ko an pasohan ko kan aki pa ako na maglingkod sa Dios.

Andam daw kamong ikomparar an saindong relihiyosong mga opinyon sa Tataramon nin Dios na Biblia? Igwa daw kamo kan kapusoan na gibohon iyan na may bukas na isip?

[Blurb sa pahina 5]

“Permi sindang may kapot na Biblia.”—Jesuita Giuseppe De Rosa

[Blurb sa pahina 6]

“An mga Saksi ni Jehova iyo an enot na namumuhay sono sa pagtubod na ihinuhulit ninda.”—An magasin na Katoliko na Mondo erre

[Ritrato sa pahina 6]

“Tinawan ninda ako nin malinaw na simbag hale sa Biblia”

[Ritrato sa pahina 7]

“Sa katapustapusi naotob ko an pasohan ko kan aki pa ako na maglingkod sa Dios”