Mga Hapot Hale sa mga Parabasa

◼ Ano an maninigong gibohon nin sarong pamilyang Kristiano kun an saindang aki kaipuhan na mag-entra sa eskuwelahan na obligatoryo an relihiyosong pagtotokdo?

An mga magurang na Kristiano dai interesado na an saindang mga aki madoktrinahan nin falsong relihiyon. Pero tibaad may mga situwasyon na an mga aki dai makasasayuma na umatender sa klase na dian itinotokdo an relihiyon, minsan ngani dai sinda makikakabtang sa falsong relihiyosong mga akto o seremonya.

An katood nin Dios na si Abraham nagtao nin marahay na arogan kun dapit sa relihiyosong pagtotokdo sa mga aki. Pinadakula nia an saiyang aki sa Canaan, na duman napalilibotan sinda nin relihiyosong mga sala asin makababaldeng “sagradong” mga gibo. (Ikomparar an Exodo 34:​11-15; Levitico 18:​21-30; Deuteronomio 7:​1-5, 25, 26; 18:​9-14.) Pero, sia an ginigikanan nin relihiyosong pagtotokdo para sa saiyang pamilya. Kompiado an Dios na si Abraham ‘totokdoan an saiyang mga aki asin an saiyang harong na masunod sa saiya tangani na sinda magdanay sa dalan ni Jehova na gumibo nin katanosan.’​—Genesis 18:19.

Bilang hoben, si Jesus nakinabang man sa pampamilya asin pankongregasyon na pagtotokdo sa tunay na pagsamba. Kaya, sia “nagpadagos na umoswag sa kadonongan asin kosog patin sa pakapagpaoyon sa Dios asin sa mga tawo.”​—Lucas 2:52.

Sa kadaklan na lugar sa daga, an mga hobenes na Kristiano nag-aako nin sekular na edukasyon sa pampublikong mga eskuwelahan. Bakong gabos na itinotokdo lubos na kaoyon kan katotoohan sa Biblia asin establisadong katotoohan. Halimbawa, dakol na henerasyon nin Kristianong mga hobenes an naglaog sa mga klase nin siensia o biolohiya bilang kabtang kan saindang normal na kurikulum. Kaya an kadaklan sa sainda nakadangog nin lakop na mga teoriya nin ebolusyon asin kaibang mga opinyon manongod sa “natural” na mga ginikanan nin buhay sa daga.

Pero an pakadangog na ini dai binago an Kristianong mga hobenes na maniwala sa daing dios na ebolusyon. Taano? Huli ta sa harong asin sa mga pagtiripon na Kristiano, nag-ako na sinda nin tamang impormasyon basado sa ipinasabong na Tataramon nin Dios, na nakatabang na patoodon ‘an saindang kakayahan nin pagmansay na mamidbid kun ano an tama asin sala.’ (Hebreo 5:14) Dakol na magurang an nakipag-adal sa saindang mga aki kan timbang na paliwanag nin ebolusyon sa nakapakokosog nin pagtubod na librong Life​—How Did It Get Here? By Evolution or by Creation?a Mantang nasangkapan, dai naniwala an mga eskuwelang ini sa itinotokdo sa klase manongod sa ebolusyon. Pero ikinapaheling ninda sa mga simbag ninda sa klase asin sa mga eksaminasyon na sinda nagdadangog asin kayang manodan an itinotokdong mga detalye. An iba nagkaigwa pa ngani nin oportunidad na tumao nin ibang paliwanag kaoyon sa mga katunayan na itinatao sa Biblia kan Kaglalang nin tawo.​—1 Pedro 3:15.

Pero, ano man an mga klase na idinudusay sa pagtotokdo manongod sa dominanteng lokal na relihiyon o sa relihiyon bilang pankagabsan?

Harayo sa posibilidad na an siring na pagtotokdo itao nin neutral, bilang impormasyon sana. Tibaad iyan pa an relihiyon kan maestro asin kun siring pagmaigotan niang impluwensiahan an isip asin puso kan mga estudyante. Kaya mas gusto nin mga Saksi ni Jehova na an saindang mga aki palibrehon sa mga klase nin relihiyosong pagtotokdo. Tibaad magpangyari ini sa saindang mga aki na gamiton sa mas kapakipakinabang na paagi an oras sa eskuwelahan para sa pagtapos nin mga asignasyon sa ibang klase o pag-adal sa librariya.

Alagad ta sa ibang lugar dai itinao an siring na mga kahagadan; tibaad hagadon pa ngani kan eskuwelahan o kan mga autoridad sa publiko na an mga aki umatender sa asin makatapos nin sarong kurso sa relihiyon tanganing makagraduwar. An kada pamilya kaipuhan na magdesisyon nin personal kun ano an gigibohon sa kasong iyan.

An ibang lingkod nin Dios kan mga nakaagi bakong sa sadiring kabotan na namugtak sa mga situwasyon na sinda kinaipuhan na magtagal sa pakadangog nin relihiyosong mga katokdoan o gibo mantang nagdadanay na maimbod sa tunay na Dios. Posible na iyan an nagin kamugtakan ni Moises. Pinadakula sia bilang makoapo kan Faraon nin Egipto, asin sia “tinokdoan kan gabos na kadonongan nin mga Egipcio.” (Gibo 7:​20-22) Posible na kaiba dian an mga pagtubod asin relihiyosong mga gibo na uso sa Egipto. Alagad ta si Moises naingatan kan superyor na pagtotokdo na malinaw na inako nia gikan sa saiyang pamilya asin tibaad sa ibang Hebreo.​—Exodo 2:​6-15; Hebreo 11:​23-26.

Horophoropa man an halimbawa kan tolong hoben na Hebreo, kairiba ni Daniel, na tinawan nin espesyal na pagtotokdo sa Babilonya asin ginibong mga trabahador sa gobyerno. (Daniel 1:​6, 7) Sinda mayo nin libertad na gibohon o magsayumang gibohon an ano man na gusto ninda. Sarong beses ipinagboot ni Hadeng Nabucodonosor na sinda makipagtipon sa iba pang opisyales sa atubangan kan ladawan na bulawan na tinindog nia sa kaplanodohan nin Dura, na duman gigibohon an mga akto nin nasyonalistikong debosyon. Ano an ginibo kan tolong Hebreo? Masisierto niato na mas gusto nindang dai umatender, alagad ta dai idto mapupuwede.b Pero sinda nagdanay na maimbod sa saindang mga pagtubod asin sa Makakamhan sa gabos na Dios. An saindang diosnon na konsensia nagtogot sainda na magin presente mantang determinadong nagsasayuma na magpartisipar sa, o personal na gumibo nin, ano man na akto nin falsong relihiyon.​—Daniel 3:​1-18.

Kun obligado an gabos na estudyante na magin presente sa klase nin relihiyon asin makanood sagkod na kaya nindang makapasar sa eksaminasyon, an mga aki nin mga pamilya nin tunay na mga Kristiano puwedeng magin presente, arog kan tolo huli sa pagboot ni Nabucodonosor. Pero eenoton an Dios nin mga hobenes na Kristiano. Dai kaipuhan na angaton ninda an kada salang kapahayagan o kada bakong makakasuratan na gibo kan iba, kun paanong an tolong Hebreo dai naghingoang makiaram kan an iba dumuko sa ladawan na bulawan. Pero, an mga hobenes na Kristiano mismo dai makikakabtang sa mga akto nin pagsamba, makiaayon sa mga pamibi, relihiyosong mga pagkanta, asin iba pa.

An mga hobenes na ini kaipuhan na maghingoa sa ibang panahon na umako nin nakapakokosog na kaaraman sa ‘banal na mga kasuratan na nakakapagpadonong sainda para sa kaligtasan paagi sa pagtubod mapadapit ki Cristo Jesus.’ (2 Timoteo 3:15) Paagi sa pakikikomunikar sa saindang mga aki, maninigo na perming aramon kan mga magurang an itinotokdo sa klase. Ini makatatabang sa gurang na mga Kristiano na maaraman kun ano an kaipuhan na itanos o linawon gikan sa Biblia tanganing dai maribong o madaya an saindang mga aki.

[Mga Nota sa Ibaba]