Aagawon daw Kamo Pasiring sa Langit?
DAKOL na tawo an naniniwala na sinda mapalangit pagkagadan ninda. Pero an iba naghohona na sinda aagawon pasiring sa langit sa inaapod na rapture. Iyan daw an saindong linalaoman?
An rapture iyo “an biglang pagkawara nin minilyon na tawo na mayo man lamang nin gira kun napasaen sinda!” Iyan an sabi nin sarong Protestanteng ebanghelista. Sono sa Evangelical Dictionary of Theology, an terminong “rapture” “pagkasaro kan iglesya ki Cristo sa ikaduwa niang pagdatong.”
An iba nariribok sa pag-isip-isip na bayaan an mga katood asin kapamilya sa pagsabat ki Jesu-Cristo. Pero, dakol an naniniwala na dapat na mangyari an rapture. Iyan daw mangyayari? Kun iyo, noarin?
Manlaenlaen na Opinyon Manongod sa Rapture
Ipinaheheling kan Biblia na bago pumoon an ipinanugang Sangribong Taon na Paghade ni Cristo, magkakaigwa nin panahon na inaapod “dakulang kahorasaan.” Sabi ni Jesus: “Sa panahon na iyan magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, ni mangyayari pa giraray.” (Mateo 24:21; Kapahayagan 20:6) An iba sinasabi na an rapture maeenot sa dakulang kahorasaan. An iba man linalaoman iyan sa panahon na iyan. An iba pa naghohona na an rapture masunod sa daing kaagid na kasakitan na iyan.
An opinyon na pakalihis kan kahorasaan nangibabaw sagkod kaidtong pagpopoon kan ika-19 siglo. Dangan, sa Inglaterra nagkaigwa nin mobimiento na pinangenotan nin sarong dating klerigo sa Iglesya nin Irlandia, si John Nelson Darby. Sia asin an kapareho sa kaisipan na mga Anglicano inapod na Brethren. Hale sa saiyang pinakabase sa Plymouth, nagbiyahe si Darby tanganing maghulit sa Switzerland asin sa iba pang lugar sa Europa. Sia nag-insister na an pagbuwelta ni Cristo mangyayari sa duwang peryodo. Iyan mapoon sa hilom na rapture, na dian aagawon an “mga santo” bago an daga laglagon nin pitong taon na kahorasaan. Dangan si Cristo mapaheling, kaiba an “mga santong” ini, asin iriba sindang maghahade sa daga sa laog nin sangribong taon.
Idinoon ni Darby an pangangaipo na magin siblag sa kinaban, asin an mga kapareho nia an opinyon sa huri inapod na Exclusive Brethren. Pinangenotan ni B. W. Newton an laen man na grupo na naniwala sa rapture pero bako sa saro na bago an kahorasaan. An parasuportar sa pakalihis nin kahorasaan na si Alexander Reese nangatanosan na “an mga teoriya nin Hilom na Rapture sarong peligro sa paglaom sa Pagdatong ni Cristo.”
An mga nagsusuportar sa bago an kahorasaan naniniwala na an pagkakalaen na ini sa opinyon seryoso nin igo tanganing makaapektar sa “klase kan [saindang] paglaom may koneksion sa pagdatong ni Cristo.” An iba nagsasarig sa “teoriya nin parsial na rapture,” na naniniwala na an pinakamaimbod ki Cristo iyo an enot na makananamit nin rapture asin an mga mas kinabanon kukuanon sa huri.
An dakol na grupong ebangheliko nagbabalangibog nin nagdadangadang nang rapture nin maimbod na mga Kristiano. Pero, huli sa magkakalaen na mga opinyon, an sarong pulyetong ipinublikar kan Elim Pentecostal Church sa Britania nagsasabi: “Minsan ngani kita naniniwala sa mahiwas na pagkasunodsunod nin mga pangyayari na konektado sa pagbuwelta kan Kagurangnan na Jesus . . . , may itinataong libertad sa pag-interpretar sa hula sono sa paniniwala kan indibiduwal. An dakol inaako an paninindogan na bakong dogmatiko, na mapasensiang hinahalat na an mga pangyayari na mismo an maghayag kan makahulang programa.”
An ipinasabong na Tataramon nin Dios, an Biblia, iyo an maninigong gamiton niatong pansokol sa pagigin totoo nin gabos na paniniwala. (2 Timoteo 1:13; 3:16, 17) Kun siring, ano an sinasabi kaiyan manongod sa rapture?