Maggayagaya sa Haranihon Nang Malinig na Daga!
MAKAPAG-OOGMA nanggad kita na si Jehova, na Dios nin kahusayan asin kalinigan, ootobon an saiyang orihinal na katuyohan na gibohon na panglobong paraiso an daga! (Isaias 11:6-9) Sia nanunuga: “An sakong tataramon na magluwas sa sakong ngoso . . . dai iyan mabalik sako na daing laog, kundi gigibohon kaiyan an sakong boot.” “Dai mangyayaring magputik an Dios,” kaya ini bakong basang sanang mga tataramon.—Isaias 55:11; Hebreo 6:18.
Makapasasalamat kita na si Jehova mamomoton na mangugunlabot bago an mga tawo makaabot sa punto na dai na malilikayan an biyong pagkaraot kan ekolohiya!—Kapahayagan 11:18.
Hahaleon ni Jehova an daing pagsolsol, daing pakundangan na mga pararamog asin an mga tawong rebeldeng nagpapalimanliman sa saiyang mga prinsipyo nin kahusayan asin kalinigan. Daing siisay man na totogotan na isapeligro an ibinalik na Paraiso.—Talinhaga 2:20-22.
Sa pamamahala kan Kahadean nin Dios, sa paggiya ni Cristo Jesus, an mga tawo totokdoan na haleon an ano pa man na natatadang causa nin pisikal na polusyon. Sa panahon na iyan—asin bakong ngonyan—na obligado an gabos na lingkod nin Dios na aktibong makilabot sa personal asin pankagabsan na mga pamamaagi na makakokontribuwir sa daing kaagid na panglobong paglinig.—Ikomparar an Ezequiel 39:8-16.
An mga makaliligtas sa katapusan kan presenteng maraot na palakaw nin mga bagay masuportar sa programang ini nin pisikal na paglinig na may kaimbodan asin entusiasmo na kapareho kan pakikakabtang ninda sa kampanya nin espirituwal na paglinig ngonyan.—Salmo 110:3.
Seguradong maabot an nalinigan nang daga, na pangengenotan kan pinakadakulang kampanya nin paglinig kasuarin man, na gigibohon kan Kahadean nin Dios. Hahaleon an gabos na gira nin polusyon. Mayo na nin mga surat-surat minsan saen. Mayo na nin basiyong mga bote, lata, bag na plastik, patos nin mga tsiklet asin dulse, diaryo, asin magasin na nakararamog sa arin man na baybayon o magayon na lugar.
Maggayagaya sa haranihon nang malinig na daga!
[Ritrato sa pahina 7]
Makikakabtang daw kamo sa nagdadangadang na panglobong paglinig?