Paghale kan Polusyon—Sa Puso Asin Isip

DAI tinawan ni Jehova nin pagmawot sa ati o warak an mga tawo. An planetang erokan ninda dinisenyo na magin paraiso na may kalinigan, kahusayan, asin kagayonan. Bakong katuyohan nin Dios na iyan magin makanos na basurahan.​—Genesis 2:​8, 9.

Minsan siring, pakasikwalan kan mga tawo sa banal na paggiya, nagpoon sindang magtogdok kan sadiri nindang areglo sa kinaban. Mantang daing banal na kadonongan asin kulang nin kabatidan, napiritan sindang makanood paagi sa pagpatibasang. Sinusuportaran nin sekular na kasaysayan an katotoohan sa Biblia na dai kaya nin tawo na pamahalaan an sadiri; sa laog nin rinibong taon “an tawo nagsakop sa tawo sa saiyang ikararaot.” (Eclesiastes 8:​9; Jeremias 10:23) An modernong problema nin polusyon, sa gabos na porma kaiyan, resulta nin salang pamamahala nin tawo.

Pag-arog sa Punto-de-Vista nin Dios

An mga tawong boot na makapaogma sa Dios naghihingoang makaotob sa mga pamantayan kan Kaglalang sa kalinigan. Kaya, an mga Saksi ni Jehova napaatubang sa problema kan an sarong internasyonal na kombension nakaiskedyul sa Prague, Czechoslovakia, kan kabangaan nin 1991.a Mga 75,000 katawo an maatender, na tamang-tama sa Istadyum nin Strahov. Alagad ta limang taon nang dai nagagamit an istadyum. Iyan raraot na, na makanos na biktima kan panahon. Mga 1,500 na Saksi ni Jehova an inubos an labing 65,000 na oras sa paghirahay asin pagpintura liwat kaiyan. Pag-abot kan panahon kan kombension an paglinig na ini nagibo na an istadyum na angay na lugar sa pagsamba sa tunay na Dios, si Jehova.

Ano an nagmomotibar sa mga Saksi ni Jehova na mapalaen, mantang an kinaban sa pankagabsan kakadikit an ipinaheheling na apresasyon sa kalinigan asin kahusayan? An pag-apresyar sa hatol kan Biblia na an mga Kristiano maninigong haleon an negatibong mga ugale, arog baga kan kapasloan, kadaihan nin konsiderasyon, kahanaban, asin kadaihan nin pagkamoot. “Halea nindo an daan na pagkatawo asin an mga gibo kaini,” an sabi kan Biblia. Salidahan iyan kan “bagong pagkatawo, na binabago paagi sa tamang kaaraman oyon sa ladawan kan Saro na naglalang kaiyan.” An pagkatawo na midbid sa pagkamoot sa kalinigan, kahusayan, asin kagayonan mayo nin lugar para sa mga hilig na man-ati.​—Colosas 3:​9, 10; 2 Corinto 7:​1; Filipos 4:​8; Tito 2:14.

Hinahagad kan bagong pagkatawo na an mga Kristiano magin mapagmakolog sa polusyon, na bakong daing pakundangan na nan-aati o masumbikal na nagpapalimanliman sa mga ley kontra sa polusyon na ginibo nin mga gobyerno. Iyan nakatatabang sainda na malikayan an pag-arog sa rakwa, paslo, asin hugakon na ugale na nagbubunga nin pagramog. Paagi sa pagpaoswag sa paggalang sa rogaring nin iba, hinahale kaiyan an paggamit sa pagsuratsurat sa lanob bilang paagi nin pagpahayag kan nasa boot, bilang inosenteng aling-alingan, o bilang saro pang klase nin arte. Hinahagad kaiyan na papagdanayon na malinig an mga harong, kotse, gubing, asin hawak.​—Ikomparar an Santiago 1:21.

Kun dapit sa mga tawong habong magsolog kaining bagong pagkatawo, mababasol daw an Dios sa dai pagtao sainda nin buhay sa saiyang nagdadangadang na Paraiso? Dai man. An siisay man na igwa pa nin tinatagong tendensiang manramog sa saiyang puso o isip magigin peligro sa ibinalik na paraisong kagayonan kan planetang Daga, na nagtatao nin kamondoan sa mga nagmamawot na papagdanayon iyan. An desisyon nin Dios na “laglagon idtong mga naglalaglag kan daga” matanos asin mamomoton.​—Kapahayagan 11:​18; 21:8.

Maninigo daw Kitang Aktibong Mapalabot?

Alagad ini daw nangangahulogan na an mga Kristiano obligadong aktibong magsuportar sa mga pamamaaging pangontra sa polusyon o nin paglinig?

An polusyon malinaw na nakararaot sa salud asin sa kaligtasan kan publiko. May angay na pagmakolog si Jehova manongod sa siring na mga bagay, arog kan maheheling niato sa mga pagboot na itinao nia sa mga Israelita. (Exodo 21:​28-34; Deuteronomio 22:​8; 23:​12-14) Alagad dai nia sinda pinagbotan na kombensiron an ibang mga banwaan dapit sa kaligtasan kan publiko; ni sinabihan man an mga Kristiano kan enot na siglo na gumibo kaiyan.

Ngonyan, an mga bagay-bagay sa palibot madali sanang magin politikal na mga isyu. An totoo, may mga partido politika na inorganisar sa espisipikong katuyohan na resolberan an mga problema sa palibot. An Kristiano na pinababayaan an sadiri na maimpluwensiahan na kumampi kun dapit sa politika bako nang neutral sa politika. Ibinugtak ni Jesus an prinsipyong ini para sa saiyang mga disipulo: “Sinda bakong kabtang kan kinaban, kun paanong ako bakong kabtang kan kinaban.” An Kristiano na nagpapalimanliman sa kahagadan na iyan ibinubugtak an sadiri sa peligro na makikampi sa “mga poon kaining palakaw nin mga bagay, na mga mapapara.”​—Juan 17:​16; 1 Corinto 2:6.

Dai prinobaran ni Jesus na resolberan an gabos na sosyal na problema kan saiyang kaaldawan; ni sinabihan man nia an saiyang mga disipulo na gibohon iyan. An pagboot nia sa sainda iyo ini: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda . . . , na tokdoan nindo sinda na otobon an gabos na bagay na ipinagboot ko sa saindo.” Dai nia sinda pinagbotan manongod sa mga palakaw sa palibot.​—Mateo 28:​19, 20.

Sa pagpaliwanag kun ano an maninigong maenot sa buhay nin Kristiano, si Cristo nagsabi: “Kaya padagos na hanapon nguna an kahadean asin an saiyang katanosan.” (Mateo 6:33) Kun ipaotob na ni Jehova, paagi sa saiyang Mesiyanikong Kahadean, an saiyang matanos na mga prinsipyo sa bilog na kinaban, an mga problema sa palibot mariresolberan na nin permanente asin sa pagkakontento kan gabos.

Kaya, timbang an paninindogan kan mga Saksi ni Jehova. Huli sa Roma 13:​1-7, kaipuhan na maimbod nindang kuyogon an mga ley kan gobyerno sa pag-asikaso sa palibot. Dugang pa, an diosnon na pagkamoot sa kataed nagpapahiro sainda na igalang an rogaring nin iba​—pampubliko o pribado—​paagi sa dai pagraot kaiyan asin sa dai pag-apon nin ati na daing pakundangan. Pero malinaw na dai sinda pinagbotan na mangenot sa kinabanon na mga pamamaagi nin paglinig. Tama sanang inienot ninda an paghuhulit kan mensahe dapit sa Kahadean nin Dios, sa pakaaram na ini an paagi na makagibo kan pinakanagdadanay na karahayan.

Espirituwal na Paglinig

Paorootrong pinatanidan an suanoy na mga Israelita dapit sa mga resulta kun saindang aatian an daga paagi sa pagpabolos nin dugo, pag-arog sa inmoral na pamumuhay, o paglapastangan sa banal na mga bagay. (Bilang 35:​33; Jeremias 3:​1, 2; Malaquias 1:​7, 8) Makahulogan nanggad, sinda kinondenar huli sa espirituwal na polusyon na ini, bakong huli sa ano man na pisikal na polusyon na tibaad ipinagkasala man ninda.b

Kun siring, an pangenot na pinagmamaigotan na likayan nin Kristiano ngonyan espirituwal na polusyon o karigsokan. Ini ginigibo nia paagi sa pagsolog kan “bagong pagkatawo,” na minahale kan mga tendensiang man-ati sa puso asin isip. Labing apat na milyon na Saksi ni Jehova an nakikinabang sa espirituwal na paglinig na ini, na nagkakaigwa nin relihiyoso asin moral na kalinigan sa tahaw ninda, saka nin risang pisikal na kalinigan.​—Efeso 4:​22-24.

Ngonyan na an panahon para sa kampanya nin espirituwal na paglinig. An kampanya nin pisikal na paglinig sa bilog na daga masunod sa itinalaan na panahon asin ililigtas an satong erokan sa pagigin panglobong basurahan paagi sa pagtao dian kan daing polusyon na palibot na maninigo dian.​—Eclesiastes 3:1.

[Mga Nota sa Ibaba]