Paparongon daw Nindo an Nagbabagang Mitsa?

IBINALANGIBOG ni Jesu-Cristo an maogmang bareta kan Kahadean nin Dios sa gabos na klase nin tawo. An dakol sa sainda naaapi, nanluluya an boot. Alagad tinawan sinda ni Jesus nin nakaoogmang mensahe. May pagdamay sia sa nagsasakit na mga tawo.

Itinampok kan kagsurat nin Ebanghelyo na si Mateo an pagdamay ni Jesus paagi sa pag-apod nin atension sa sarong hula na isinurat ni Isaias. Kinokotar an mga tataramon na inotob ni Cristo, si Mateo nagsurat: “Mayong nalanog na gaho na saiyang roronoton, asin mayong nagbabagang linong mitsa na saiyang paparongon, sagkod na sia magpaluwas nin hustisya na may kapangganahan.” (Mateo 12:20; Isaias 42:3) Ano an kahulogan kan mga tataramon na ini, asin paano inotob ni Jesus an hulang ini?

Pagsiyasat sa Hula

An gaho sa parate nagtutubo sa tangyan asin bakong makosog asin pusog na tinanom. An “nalanog na gaho” talagang magigin maluya. Iyan kun siring minalataw na nagrerepresentar sa naaapi o nagsasakit na mga tawo na arog kan tawong alang an kamot na pinaomayan ni Jesus sa Sabbath. (Mateo 12:​10-14) Alagad kumusta an makahulang pagkasambit sa mitsa nin lampara?

An usong lampara sa harong kaidtong enot na siglo C.E. sarong sadit na garo pitsel na lalagan na dalipay na may kapotan na pakurba. An lampara sa parate linalagan nin lana nin olibo. Paagi sa pagsarumsom, an mitsa na gibo sa lino sinusupsup an lana paitaas tanganing susteniran an laad. Siempre, an ‘nagbabagang mitsa’ saro na mapaparong na.

Ibinalangibog ni Jesus an saiyang nakararangang mensahe sa dakol na sa piguratibong pagtaram arog sa nalanog na gaho, ruyong asin nakolgan. An mga tawong ini kaagid man nin nagbabagang linong mitsa huli ta an saindang ultimong laad nin buhay haros naparong na. Sinda talagang naaapi asin pinanluluyahan nin boot. Minsan siring, dai rinonot ni Jesus an piguratibong nalanog na gaho o pinarong an simbolikong nagbabagang mitsa. An saiyang mamomoton, maboot, madinamayon na mga tataramon dai orog na nagpaluya nin boot asin nagpamondo sa nagsasakit na mga tawo. Imbes, an saiyang mga komento asin an saiyang mga pagtratar sa sainda igwa nin nakapakokosog na epekto.​—Mateo 11:​28-30.

Ngonyan, dakol man an nangangaipo nin pagdamay asin pagpakosog huli ta napapaatubang sinda sa nakapanluluyang mga problema. Maski an mga lingkod ni Jehova bakong perming garo makosog na mga torre. Kun beses an iba nakaaagid sa nagbabagang mga mitsa. An mga Kristiano kun siring maninigo na magin nakapakokosog​—na kinakayaban an laad, sabi ngani—​sa siring nagpapakinorosogkosogan.​—Lucas 22:32; Gibo 11:23.

Bilang mga Kristiano boot niato na magin nakapakokosog. Dai niato tuyong hihingoahon na paluyahon an siisay man na naghahanap nin espirituwal na tabang. Tunay nanggad, minamawot niatong arogon an halimbawa ni Jesus sa pagpakosog sa iba. (Hebreo 12:​1-3; 1 Pedro 2:21) An katunayan na puede niatong maronot na dai man tinutuyo an siisay man na naglalaom na pakosogon niato sarong marahay na dahelan na seryosong horophoropon an satong paagi nin pagtratar sa iba. Tunay na habo niatong ‘parongon an nagbabagang mitsa.’ Anong Makakasuratan na mga giya an makatatabang sa sato sa bagay na ini?

Mga Epekto nin Pagkritika

Kun an sarong Kristiano ‘may nagibong kasalan, an mga igwang espirituwal na mga kualipikasyon maninigong magmaigot na pakarhayon giraray an tawong iyan sa espiritu nin kahoyoan.’ (Galacia 6:1) Minsan siring, angay daw na hanapan nin diperensia an iba asin aprobetsaran an lambang oportunidad na itanos sinda? O tama daw na itulod sinda na gumibo nin orog pa paagi sa pagpasentido na kulang pa an saindang presenteng mga paghihingoa, na tibaad pinapangyayari sinda na makamate nin sala? Mayo nin ebidensia na si Jesus may ano man na ginibong arog kaiyan. Minsan ngani intension niato na tabangan na umoswag an iba, an mga kinikritika sa bakong maboot na paagi tibaad manluya imbes na mapakosog. Minsan an nakararahay na pagkritika puedeng magin nakapanluluyang gayo kun masobrahan. Kun an pinakamarahay na mga paghihingoa nin sarong sadiosan na Kristiano dai man sana naooyonan, tibaad sia sumuko asin magsabi, ‘Taano ta magpaparahingoa pa?’ Iyo nanggad, tibaad sia biyo nang sumuko.

Minsan ngani mahalaga an pagtao nin Makakasuratan na hatol, bako iyan an maninigong magin lataw na espiritu nin nombradong kamagurangan o nin iba pa sa kongregasyon. An Kristianong mga pagtiripon dai ginigibo sa pangenot tanganing magtao asin mag-ako nin hatol. Imbes, kita regular na nagtitiripon tanganing magparigon asin magpakosog sa lambang saro tangani na an gabos maogma sa saindang pakiaasosyar asin sa saindang banal na paglilingkod sa Dios. (Roma 1:​11, 12; Hebreo 10:​24, 25) Kanigoan karahay kun namamansayan niato an kalaenan nin seryosong diperensia asin nin pagkabakong sangkap na madonong asin mamomoton na lingawan!​—Eclesiastes 3:​1, 7; Colosas 3:13.

An mga tawo mas madaling maghimate sa pampakosog kisa sa pagkritika. Sa katunayan, kun an pagmate nin mga indibiduwal kinikritika sinda sa bakong makatanosan na paagi, tibaad orog sindang magdanay sa kinikritikang ugale ninda! Alagad kun sinda makatanosan na tinatawan nin komendasyon, sinda napakokosog, asin sinda namomotibar na umoswag. (Talinhaga 12:18) Arog ki Jesus, kita kun siring magin nakapakokosog asin dai niato noarin man ‘pagparongon an nagbabagang mitsa.’

Kumusta Man an mga Pagkokomparar?

Puedeng magin nakamomotibar na marhay na madangog an marahay na mga eksperyensia nin ibang Kristiano. Si Jesus mismo naggayagaya kan mabaretaan nia an kapangganahan kan saiyang mga disipulo sa paghuhulit kan mensahe nin Kahadean. (Lucas 10:​17-21) Kaagid kaiyan, kun nababaretaan niato an kapangganahan, marahay na halimbawa, o integridad nin iba sa pagtubod, kita napakokosog asin orog na nagigin determinado na magdanay sa satong pagigin Kristiano.

Pero, kumusta kun an bareta iinatubang sa paagi na nagsasabing, ‘Bako kang arog karahay kan mga Kristianong ini, asin maninigo na naggigibo ka nin orog pa kisa kan ginigibo mo ngonyan’? Posible daw na ponan kan naghihinanyog an sarong aktibong programa nin pag-oswag? Seguro manluluya an saiyang boot asin tibaad sumuko sia, nangorogna kun parateng may ginigibo o ipinasesentidong mga pagkokomparar. Ini magigin arog nanggad sa sarong magurang na hinahapot an saiyang aki, ‘Taano ta dai ka magin arog kan saimong tugang?’ An siring na komento tibaad magin dahelan nin paghinanakit asin panluluya nin boot, alagad dai iyan makapatatalubo nin mas marahay na ugale. An mga pagkokomparar puedeng magkaigwa nin kaparehong mga epekto sa mga adulto, na nagpapangyari sa sainda na medyo maghinanakit pa ngani sa mga pinagkokompararan sa sainda.

Dai ta puedeng laoman an gabos na magin parareho an nagigibong paglilingkod sa Dios. Sa saro sa mga ilustrasyon ni Jesus, an sarong kagurangnan nagtao sa saiyang oripon nin magsalang saro, duwa, o limang pirak na talento. An mga ini itinao “sa lambang saro sono sa saiyang kakayanan.” An duwang oripon na may kadonongan na ipinagnegosyo asin pinadakol an saindang mga talento tinawan nin komendasyon huli ta sinda maimbod, minsan ngani magkalaen an mga resulta kan saindang gibo.​—Mateo 25:​14-30.

Si apostol Pablo angay na nagsurat: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo.” (Galacia 6:4) Tanganing magin tunay na nakapakokosog sa iba, kun siring, maninigo na hingoahon niato na likayan an negatibong mga pagkokomparar.

Nagkapirang Paagi na Makaparigon

Ano an magigibo niato tanganing maparigon an mga nanluluya an boot asin malikayan an ‘pagparong sa nagbabagang mitsa’? Bueno, an pagtao nin pampakosog bakong pagsunod sa sarong espesipikong pormula. Minsan siring, posible na an satong mga tataramon makaparirigon sa iba kun iinaaplikar niato an mga prinsipyo sa Biblia. Ano an nagkapira sa mga ini?

Magin mapakumbaba. Sa Filipos 2:​3, sinadol kita ni Pablo na ‘dai maggibo nin ano man huli sa iriwal o huli sa kapalangkawan.’ Imbes, kita maninigong magtaram asin humiro na may kapakumbabaan. ‘Sa kapakumbabaan nin pag-isip maninigo niatong ibilang an iba na mas halangkaw kisa sa sato.’ Dai sinabi ni Pablo na dai na niato isipon an satong sadiri. Pero, dapat niatong saboton na an lambang tawo mas halangkaw sa sato sa sarong paagi. An termino sa Griego na trinadusir digding “mas halangkaw” nagsusuherir na an saro “irinarayo an saiyang mga mata sa saiyang sadiring mga pribilehio, asin maigot na hinohorophorop an mga balaog nin saro pa na dian mas halangkaw an sarong iyan.” (New Testament Word Studies, ni John Albert Bengel, Tomo 2, pahina 432) Kun gigibohon niato ini asin ibibilang an iba na mas halangkaw, tatrataron niato sinda sa mapakumbabang paagi.

Magpaheling nin paggalang. Paagi sa satong sinserong pagtaram, malilinaw niato na igwa kita nin pagkompiar sa maimbod na mga kapagtubod, na minamansay sinda bilang mga indibiduwal na nagmamawot na paogmahon an Dios. Alagad ipamugtak na nangangaipo sinda nin espirituwal na tabang. Kun siring tumabang kita sa magalang, may dignidad na paagi. Siring kaini an pagkasabi kaiyan ni Pablo: “Sa pagpaheling nin onra sa lambang saro mangenot kamo.”​—Roma 12:10.

Magin marahay na parahinanyog. Iyo, tanganing mapakosog an mga tibaad napapaatubang sa nakapanluluya sa boot na mga problema, kaipuhan kitang magin marahay na mga parahinanyog, bakong parasermon. Imbes na tumao nin pabiglabigla, hababaw na mga suhestion, tumao kita kan panahon na kaipuhan sa pagtao nin Makakasuratan na giya na tunay na nakapaninigo sa presenteng mga pangangaipo. Kun dai ta aram an sasabihon, an pagsiyasat sa Biblia matabang sa sato na magtaram na may pagranga asin pakosogon an iba.

Magin mamomoton. Kaipuhan kitang makamate nin pagkamoot sa mga boot niatong pakosogon. Kun iinaaplikar sa mga kapwa lingkod ni Jehova, an satong pagkamoot maninigo na labi pa sa paghiro sana para sa saindang pinakamarahay na kapakanan. Maninigo na kalabot dian an makosog na pagmate. Kun yaon sa sato an siring na pagkamoot sa bilog na banwaan ni Jehova, an satong mga tataramon magigin tunay na nakapakokosog sa sainda. Dawa kun kaipuhan kitang tumao nin suhestion para sa pag-oswag, an satong sinasabi dai mamimis-interpretar o makadadanyar kun an satong motibo bako sanang magpahayag kan satong punto-de-vista kundi tumao nin mamomoton na tabang. Siring kan angay na marhay na sinabi ni Pablo, “an pagkamoot nagpaparigon.”​—1 Corinto 8:1; Filipos 2:4; 1 Pedro 1:22.

Perming Magin Nakaparirigon

Sa delikadong “huring mga aldaw” na ini, an banwaan ni Jehova napapaatubang sa dakol na pagbalo. (2 Timoteo 3:​1-5) Bakong makangangalas na kun beses sinda nagsasakit na garo baga mauubos na an saindang pakatagal. Bilang mga lingkod ni Jehova, siertong habo niato na magsabi o gumibo nin mga bagay na tibaad magin dahelan na an siisay man sa satong mga kapwa parasamba makamate na garo nagbabagang mga mitsa na mapaparong na.

Mahalaga nanggad, kun siring, na kita magpakinorosogkosogan! Gibohon niato an gabos na paghihingoa na magin nakaparirigon paagi sa pagigin mapakumbaba asin magalang sa pinanluluyahan nin boot na mga kapwa parasamba. Maghinanyog logod kita nin maingat kun sinda nagsasabi nin hilom sa sato asin perming maghingoa na tabangan sinda paagi sa pagdara kan atension sa Tataramon nin Dios, an Biblia. Orog sa gabos, magpaheling kita nin pagkamoot, huli ta an bungang ini kan banal na espiritu ni Jehova matabang sa sato na magpakinorosogkosogan. Dai noarin man logod kita magtaram o humiro sa ano man na paagi na tibaad ‘makaparong sa nagbabagang mitsa.’