Kaya Mong Malabanan an Saimong Negatibong mga Namamatian

1-2. Ano kun minsan an namamatian kaidto ni apostol Pablo, asin taano ta masasabutan niyato an isinurat niya manungod sa saiya? (Roma 7:​21-24)

ANO an inot mong naiisip pag nadadangog mo an pangaran na apostol Pablo? Makusog an buot na misyonero, mahusay na paratukdo, o matibayon na kagsurat kan Bibliya? Tamang nanggad an mga deskripsiyon na iyan. Alagad, nakamati man siya nin manlain-lain na emosyon. Arog kan dakul sa sato, nakipaglaban man siya kun minsan sa negatibong mga pagmati.

² Basahon an Roma 7:​21-24. Sa surat niya sa mga taga Roma, ipinahayag ni Pablo an manungod sa mga namamatian niya—mga pagmating masasabutan kan dakul sa sato. Dawa ngani maimbod siyang Kristiyano, nakamati siya nin duwang naglalabanan na pagmati sa laog niya—an udok na pagmawot na gibuhon an kabutan nin Diyos asin an tendensiyang gibuhon an salang mga pagmawot. Apuwera kaiyan, may mga pagkakataon man na nakipaglaban si Pablo sa negatibong mga pagmati na resulta kan mga ginibo niya kaidto bago nagin Kristiyano asin kan sarong dai mahali-haling problema.

3. Ano an pag-uulayan ta sa artikulong ini? (Hilingon man an “Paliwanag Dapit sa Tataramon.”)

³ Sa ibong kaiyan, dai tinugutan ni Pablo na magparapokus na sana siya sa negatibong mga namamatiana niya. Sa artikulong ini, pag-uulayan ta an minasunod na mga hapot: Ano an dahilan kaya may mga pagkakataon na namamatian ni Pablo na “miserable” siya? Paano niya linabanan an saiyang negatibong mga namamatian? Asin paano ta man mapangganang malalabanan an satong negatibong mga namamatian?

KUN ANO AN DAHILAN KAN NEGATIBONG MGA PAGMATI NI PABLO

4. Ano an dahilan kan negatibong mga pagmati ni Pablo?

⁴ An maraot na mga ginibo niya kaidto. Bago nagin Kristiyano si Pablo, na an apod kaidto Saulo, naggibo siya nin mga bagay na pinagbasulan niya sa huri. Halimbawa, uyon siya sa ginibong paggapo ki Esteban sagkod na ini magadan, asin yaon siya kaidto mantang ginigibo iyan. (Gibo 7:58; 8:1) Nanginot man kaidto si Saulo sa maringis na pagpersegir sa mga Kristiyano.​—Gibo 8:3; 26:​9-11.

5. Paano naapektaran si Pablo kan mga ginibo niya kaidto?

⁵ Kan magin Kristiyano na si apostol Pablo, may mga pagkakataon na nariribok an saiyang konsiyensiya huli sa mga ginibo niya kaidto. Sa paglihis nin mga taon, posibleng marhay na lalo pang nakaribok kan saiyang konsiyensiya an daing hirak na pagpersegir niya kaidto sa mga Kristiyano. Halimbawa, sa inot na surat niya sa mga taga Corinto kan mga 55 C.E., sinabi niya: “Dai ako angay na apudon na apostol, dahil pinersegir ko an kongregasyon nin Diyos.” (1 Cor. 15:9) Pakalihis nin mga limang taon, sa surat niya sa mga taga Efeso, ilinadawan niya an saiyang sadiri na “sarong tawong mas hamak pa kisa sa pinakahamak sa gabos na mga banal.” (Efe. 3:8) Sa surat niya ki Timoteo, inapod ni Pablo an saiyang sadiri na dating “paralanghad asin parapersegir saka aroganteng tawo.” (1 Tim. 1:13) Imahinara na sana an namamatian ni Pablo pag nagbibisita siya sa mga kongregasyon tapos yaon duman su mga pinersegir niya kaidto o an mga kapamilya ninda!

6. Ano pa an dahilan kaya nakamati si Pablo nin grabeng pagkapurisaw? (Hilingon man an footnote.)

⁶ Sarong tunok sa laman. May sarong bagay na nagigin dahilan na mapurisaw na marhay si Pablo, asin iinagid niya iyan sa “sarong tunok sa laman.” (2 Cor. 12:7) Dai sinambit kan apostol kun ano iyan, pero ipinaparisa kan ginamit niyang ilustrasyon na sarong bagay iyan na nagkakawsa nin grabeng pagkapurisaw sa saiya. Posibleng problema iyan sa pisikal, sa emosyon, o iba pa.b

7. Paano nakaapektar ki Pablo an saiyang mga kaluyahan? (Roma 7:​18, 19)

⁷ An saiyang mga kaluyahan. Nasakitan si Pablo sa saiyang mga kaluyahan. (Basahon an Roma 7:​18, 19.) Dawa ngani gusto niyang gibuhon an tama, napapaluya kan saiyang pagkabakong perpekto an determinasyon niyang gibuhon iyan. Inadmitir niya na padagos na naglalabanan an saiyang makalaman na mga tendensiya saka an saiyang pagmawot na gibuhon an tama. Alagad, nagmaigot na marhay si Pablo na labanan an saiyang mga kaluyahan. (1 Cor. 9:27) Kaya siguradong grabe an pagkadisganar niya pag naipapahiling niya giraray an saiyang bakong marahay na mga ugali!

KUN PAANO NI PABLO LINABANAN AN SAIYANG NEGATIBONG MGA PAGMATI

8. Arog kan ipinaparisa sa saiyang mga surat, ano an mga ginibo ni Pablo tanganing malabanan an saiyang mga kaluyahan?

⁸ Arog kan ipinaparisa sa saiyang mga surat, pinag-isipan na marhay ni Pablo kun paano niya asin kan saiyang mga kapagtubod malalabanan asin mapapangganahan an makasalan na mga tendensiya sa tabang kan espiritu nin Diyos. (Roma 8:13; Gal. 5:​16, 17) Parati niyang sinasambit diyan an bakong marahay na mga ugali asin pagmawot na dapat labanan kan mga Kristiyano. (Gal. 5:​19-21, 26) Kaya daing duda na hinurop-hurop ni Pablo an manungod sa saiyang mga kaluyahan saka naghanap nin sadol asin espesipikong mga lakdang sa Kasuratan kun paano mapapangganahan an saiyang mga kaluyahan. Makakasigurado kita na inaplikar niya an sadol na itinao niya sa iba.

9-10. Ano an nakatabang ki Pablo na malabanan an negatibong mga emosyon? (Efeso 1:7) (Hilingon man an ritrato.)

⁹ Dawa ngani kun minsan pinangluluyahan nin buot si Pablo, nagibo niyang magdanay na positibo. Halimbawa, nauugma siya pag nakakaresibi siya nin positibong mga bareta manungod sa hararayong kongregasyon. (2 Cor. 7:​6, 7) Nakakamati man siya nin kagaya-gayahan sa pagkaigwa nin dayupot na mga amigong kapagtubod. (2 Tim. 1:4) Asin aram niyang inuuyunan siya ni Jehova. Iyo, maugma si Pablo dahil nakakapaglingkod siya sa Diyos “na may malinig na konsiyensiya.” (2 Tim. 1:3) Dawa kan nakapreso si Pablo sa Roma, dinagka niya an mga kapagtubod niya na “mag-ugma nin dahil sa Kagurangnan.” (Fil. 4:4) Dai niya man sasabihon iyan kun nadaog siya kan saiyang negatibong kaisipan. Malinaw na pag nagkakaigwa nin negatibong kaisipan si Pablo, linalabanan niya iyan kaya nagigin positibo giraray siya.

¹⁰ Nalabanan man ni Pablo an negatibong mga emosyon huling nagtutubod siya na personal na regalo sa saiya an pantubos. (Gal. 2:20; basahon an Efeso 1:7.) Huli kaiyan, makakapagtiwala nanggad siya na pinatawad na ni Jehova, paagi ki Jesu-Cristo, an saiyang mga kasalan. (Roma 7:​24, 25) Sa ibong kan mga nagibo niyang sala kaidto saka mga kaluyahan, ‘nakapagtao [si Pablo] nin sagradong paglilingkod’ sa Diyos nin may kagaya-gayahan.​—Heb. 9:​12-14.

11. Taano ta napapakusog kita kan halimbawa ni Pablo?

¹¹ Arog ni Pablo, tibaad mamatian niyato na pirming may naglalabanan, o nagkokontrahan, na pagmati sa laog ta. Tibaad manungod iyan sa satong mga iniisip, ginigibo, o sinasabi. Asin tibaad masabi ta man, ‘Miserableng tawo ako!’ An sister na si Elizac na labi nang 20 anyos nag-istorya: “Napapakusog ako pag iniisip-isip ko an manungod ki Pablo. Nakakagian nin buot na bako lang palan ako an nakakamati nin arog kaini. Saro pang pagirumdom ini na aram ni Jehova an inaagihan kan mga lingkod niya.” Ano an puwede tang gibuhon tanganing, arog ni Pablo, magkaigwa kita nin malinig na konsiyensiya asin magin magaya-gaya sa ibong kan satong negatibong mga pagmati?

KUN PAANO TA MALALABANAN AN NEGATIBONG MGA PAGMATI

12. Paano an pagpadanay nin marahay na espirituwal na rutina nakakatabang na malabanan an negatibong mga pagmati?

¹² Pagdanayon an marahay na espirituwal na rutina. Pag igwa kita nin marahay na espirituwal na rutina, mas nakakapokus kita sa positibo. Puwede tang iagid iyan sa padagos na pagsagibo nin mga rutina na nakakakontribwir sa pagkaigwa nin marahay na salud. Halimbawa, pag nagkakakan kita nin masustansiyang mga kakanon, regular na nag-eehersisyo, asin nagkakaigwa nin supisyenteng turog, sa parati mas marahay an pagmati ta. Kaagid kaiyan, gabos kita nakaeksperyensiya na kun gurano karahay sa pagmati pag regular kitang nagbabasa kan Tataramon nin Diyos, nakikikabtang sa ministeryo, nagpepreparar para sa mga pagtiripon, nag-aatender diyan, asin nagkokomento. An siring na nakakapakusog na mga aktibidad nakakatabang sa sato na malabanan an negatibong mga kaisipan.​—Roma 12:​11, 12.

13-14. Paano nakinabang an nagkapirang maimbod na mga Kristiyano sa pagkaigwa nin marahay na espirituwal na rutina?

¹³ Pag-isipan an halimbawa ni John, na na-diagnose na may bihirang klase nin kanser kan 39 anyos siya. Kan primero, nakamati siya nin negatibong mga emosyon. Sa buot-buot niya, ‘Ano ta nagkaigwa ako kan hilang na ini, hoben pa baga ako?’ Kan panahon na iyan, tres anyos pa sana an aki niyang lalaki. Ano an nakatabang ki John na malabanan an saiyang negatibong mga emosyon? “Dawa maluyang-maluya ako, sinisigurado ko na regular an espirituwal na rutina kan sakong pamilya,” an sabi niya. “Inaatenderan mi gabos na pagtiripon, nagse-service surusemana, saka regular an samong pampamilyang pagsamba dawa kun minsan dipisil.” Manungod sa eksperyensiyang iyan, ini an sabi ni John: “Pag kuminalma ka na pagkatapos mong mabigla sa mga nangyayari, mariribayan na kan pagkamuot asin pampakusog ni Jehova an saimong paghadit. Papakusugon ka ni Jehova, arog kan ginibo niya sa sako.”

¹⁴ Si Eliza, na sinambit kasubago, nagsabi: “Sa kada nag-aatender ako sa mga pagtiripon saka nagpe-personal study, naipapagirumdom sako na dinadangog saka namumutan ako ni Jehova. Nakakapaugma iyan sa sako.” Si Nolan na sarong paraataman nin sirkito sa Aprika, kaiba an saiyang agom na si Diane, nagsabi: “Pirmi ming ginigibo an samong espirituwal na rutina dawa pag pinangluluyahan kami nin buot. Asin pirmi man na ipinapamati samo ni Jehova na tinatabangan niya kami na magkaigwa nin tamang sabuot. Hinihinguwa ming isaisip na tatabangan asin bebendisyunan kami ni Jehova; dai mi aram kun paano, pero aram ming gigibuhon niya iyan.”

15. Ano an tibaad kaipuhan niyatong gibuhon tanganing malabanan an negatibong mga kaisipan? Iilustrar.

¹⁵ Para malabanan an negatibong mga kaisipan, tibaad bako lang basta pagsunod sa espirituwal na rutina an kaipuhan tang gibuhon. Para iilustrar, nagkulog ngaya an likod mo. Para mahali an kulog, tibaad bako lang basta pagpamasahe sa saimong kapamilya an kaipuhan mong gibuhon. Tanganing maaraman an kawsa kan kulog, tibaad kaipuhan mong mag-research o magkonsulta pa ngani sa doktor. Sa kaagid na paagi, para maaraman kun paano mapapangganahan an satong dai mahali-haling negatibong mga pagmati, tibaad kaipuhan tang mag-research sa Bibliya asin sa satong mga publikasyon saka makipag-ulay pa ngani sa sarong maygurang na Kristiyano. Pag-isipan an iba pang makakatabang na mga suhestiyon.

16. Ano an makakatabang sa saimo na maaraman an kawsa kan saimong negatibong mga kaisipan? (Salmo 139:​1-4, 23, 24)

¹⁶ Mamibi na tabangan kang maaraman an kawsa kan saimong negatibong kaisipan. Aram ni David na midbid siyang marhay ni Jehova. Kaya hinagad niya ki Jehova na tabangan siyang maaraman an kawsa kan “mga ikinakahadit kan isip” niya. (Basahon an Salmo 139:​1-4, 23, 24.) Arog ni David, puwede mo man na hagadon ki Jehova na tabangan kang maaraman an kawsa kan saimong negatibong mga kaisipan asin masabutan kun paano malalabanan iyan. Puwede mo man na haputon an saimong sadiri: ‘Ano daw talaga an ikinakahadit ko? May sarong bagay daw na nagigin dahilan na mag-isip ako nin negatibo? May tendensiya daw akong magparapokus na sana sa negatibong mga iniisip ko imbes na halion iyan?’

17. Anong mga tema para sa personal na pag-adal an makakatabang sa saimo na magpokus sa nakakapakusog na mga kaisipan? (Hilingon man an ritrato.)

¹⁷ Ibagay an saimong personal na pag-adal sa Bibliya sigun sa saimong mga pangangaipo. Sa pana-panahon, tibaad mahiling mong kapaki-pakinabang na pag-adalan an partikular na mga aspekto kan personalidad ni Jehova. Halimbawa, nakinabang na marhay si apostol Pablo sa paghurop-hurop sa pantubos asin sa pagpapatawad ni Jehova. Puwede mo man na gibuhon iyan. Gamiton an Giya sa Pag-research Para sa Mga Saksi ni Jehova, Watch Tower Publications Index, o iba pang mga pantabang sa pag-adal kan Bibliya na igwa sa saindong lengguwahe tanganing urog pang makanuod manungod sa mga temang arog kan pagkahirak nin Diyos, pagpapatawad, asin maimbod na pagkamuot niya. Pag nakahanap ka na nin mga artikulong makakatabang sa saimo, ilista iyan. Ilaag an lista sa lugar na mahihiling mo iyan, asin pag-adalan an mga artikulo sa lista pag nakakamati ka nin pangluluya nin buot. Hinguwahon na iaplikar sa saimong kamugtakan an binabasa mo.​—Fil. 4:8.

18. Anong mga study project an nagin kapaki-pakinabang sa nagkapirang Kristiyano?

¹⁸ Si Eliza, na sinambit kasubago, nag-research manungod sa karakter sa Bibliya na si Job bilang saiyang study project. Sinabi niya: “Nahihiling ko talaga an sadiri ko ki Job. Nakaeksperyensiya siya nin sunod-sunod na pagbalo. Pero, dawa kan grabe an namamatian niyang pangluluya nin buot, nungka siyang nagpundo sa pagsarig ki Jehova—dawa ngani dai niya aram kun taano ta nagsasakit siya.” (Job 42:​1-6) Si Diane na sinambit kasubago nagsabi: “Igwa kaming study project ni agom asin an librong Rumani ki Jehova an ginagamit mi. Nagpapasalamat talaga kami na minomolde kami ni Jehova siring sa ginigibo kan paragibo nin kuron sa dalipay. Imbes na magpokus sa namamatian ming pagkadisganar sa samong sadiri, hinihinguwa ming imahinaron na minomolde kami ni Jehova tanganing magin mas marahay kaming tawo. Paagi kaiyan, nagigin mas dayupot kami sa saiya.”​—Isa. 64:8.

MAGHILING NIN MAY KUMPIYANSA SA PUTURO

19. Ano an puwede niyatong realistikong asahan?

¹⁹ Dawa kun igwa kita nin marahay na espirituwal na rutina asin marahay na programa sa pag-adal na angay sa satong mga pangangaipo, dai ta pag-asahan na dai na lamang kita magkakaigwa nin negatibong mga kaisipan asin pagmati. Tibaad may mga aldaw pa man giraray na mamatian tang miserable kita! Dawa arog kaiyan, sa tabang ni Jehova, dai kita gayong maaapektaran kan negatibong mga pagmati. Makakapagtiwala kita na sa kadaklan na aldaw kan satong buhay, makakamati kita nin kaugmahan huling igwa kita nin malinig na konsiyensiya asin aram niyato na napapaugma ta si Jehova sa satong paglilingkod sa saiya.

20. Ano an determinado mong gibuhon?

²⁰ Lugod na magin determinado kitang dai pagtugutan an satong negatibong mga namamatian manungod sa mga nagibo ta kaidto, mga ikinakahadit, o mga kaluyahan na magin dahilan na dai na kita magin maugma sa buhay. Sa tabang ni Jehova, makokontrol ta an satong negatibong mga pagmati. (Sal. 143:10) Hinahalat-halat na niyato an aldaw na diyan dai na nanggad kita masasakitan na magkaigwa nin positibong kaisipan. Imbes, mamata kita sa kada aga na mayo na nin ano man na nakakapurisaw na kaisipan, asin maugmang naglilingkod sa satong mamumuton na Diyos, si Jehova!