HAPOT KAN MGA HOBEN
Dapat Daw Akong Magpabawtismo?—Part 2: Pag-andam Para sa Bawtismo
Kun namumuhay ka na kauyon kan mga pamantayan kan Bibliya asin pinapatalubo mo an saimong pakikiamigo sa Diyos, natural sanang pinag-iisipan mo nang magpabawtismo. Paano mo maaaraman kun handa ka na para sa lakdang na iyan?a
Sa artikulong ini
Gurano kadakul an kaipuhan na aram ko?
An pag-andam para sa bawtismo dai man nangangahulugan na kaipuhan tang magtuom nin mga impormasyon, arog kan ginigibo para makapasar sa sarong eksam sa eskuwelahan. Pero, kaipuhan mong gamiton an saimong “kakayahan sa pangangatanusan” tanganing urog kang magin kumbinsido na an itinutukdo kan Bibliya iyo an katotoohan. (Roma 12:1) Halimbawa:
Kumbinsido ka daw na nag-eeksister an Diyos asin na maninigo siya sa saimong pagsamba?
An sinasabi kan Bibliya: “An siisay man na minadulok sa Diyos dapat na maniwala na siya nag-eeksister asin na siya an nagigin paratao nin balos sa mga udok na naghahanap sa saiya.”—Hebreo 11:6.
Haputon an sadiri: ‘Taano ta nagtutubod ako na igwa nin Diyos?’ (Hebreo 3:4) ‘Taano ta maninigo siya sa sakong pagsamba?’—Kapahayagan 4:11.
Gusto mo nin tabang? Hilingon an “Paglalang o Ebolusyon?—Bahagi 1: Bakit Dapat Maniwala sa Diyos?”
Kumbinsido ka daw na hali sa Diyos an mensahe kan Bibliya?
An sinasabi kan Bibliya: “An bilog na Kasuratan ipinasabong nin Diyos asin kapaki-pakinabang sa pagtukdo, sa pagsaway, sa pagtanos kan mga bagay-bagay, sa pagdisiplina uyon sa matanos na pamantayan.”—2 Timoteo 3:16.
Haputon an sadiri: ‘Taano ta nagtutubod ako na an Bibliya bakong sarong libro nin mga ideya nin tawo?’—Isaias 46:10; 1 Tesalonica 2:13.
Gusto mo nin tabang? Hilingon an “Paano Makakatabang sa Sako an Bibliya?—Part 1: Basahon an Saimong Bibliya.”
Kumbinsido ka daw na ginagamit ni Jehova an Kristiyanong kongregasyon para maisagibo an saiyang kabutan?
An sinasabi kan Bibliya: “[Mapasa Diyos] an kamurawayan paagi sa kongregasyon asin paagi ki Cristo Jesus sa gabos na henerasyon sagkod nuarin pa man.”—Efeso 3:21.
Haputon an sadiri: ‘Para sako, an mga nanunudan ko daw sa Bibliya sa Kristiyanong mga pagtiripon hali sa mga tawo o hali ki Jehova?’ (Mateo 24:45) ‘Nag-aatender daw ako sa mga pagtiripon dawa pag dai makakaatender an mga magurang ko (kun tinutugutan ka ninda)?’—Hebreo 10:24, 25.
Gusto mo nin tabang? Hilingon an “Taano ta Dapat Mag-atender sa mga Pagtiripon sa Kingdom Hall?”
Ano an dapat na ginigibo ko?
Dai mo kaipuhan na magin perpekto tanganing mabawtismuhan. Pero, dapat na ipinapahiling mo na gusto mo talagang “talikdan an maraot asin gumibo nin marahay.” (Salmo 34:14) Halimbawa:
Namumuhay ka daw kauyon kan mga pamantayan ni Jehova?
An sinasabi kan Bibliya: “Papagdanayon nindo an malinig na konsiyensiya.”—1 Pedro 3:16.
Haputon an sadiri: ‘Paano ko na naipahiling na an sakong “kakayahan na makasabot nasanay . . . na mamidbid an pagkakalain kan tama asin sala”?’ (Hebreo 5:14) ‘May naiisip daw akong partikular na mga pagkakataon na linabanan ko an panggigipit kan mga kairiba ko? Tinatabangan daw ako kan pinili kong magin mga amigo na gibuhon an tama?’—Talinhaga 13:20.
Gusto mo nin tabang? Hilingon an “Paano Ko Sasanayon an Sakong Konsiyensiya?”
Inaako mo daw na ika an maninimbag sa mga ginigibo mo?
An sinasabi kan Bibliya: “An lambang saro sa sato maninimbag sa Diyos para sa saiyang sadiri.”—Roma 14:12.
Haputon an sadiri: ‘Gurano daw ako kaonesto sa sadiri ko asin sa iba?’ (Hebreo 13:18) ‘Inaako ko daw an mga nagigibo kong sala, o itinatago ko iyan o ibinabasol sa iba?’—Talinhaga 28:13.
Gusto mo nin tabang? Hilingon an “Paano Ko Haharapin ang Aking mga Pagkakamali?”
Pinapagdanay mo daw an pakikiamigo mo ki Jehova?
An sinasabi kan Bibliya: “Rumani [ka] sa Diyos, asin marani siya sa [saimo].”—Santiago 4:8.
Haputon an sadiri: ‘Ano an mga ginigibo ko tanganing magin harani ako ki Jehova?’ Halimbawa, ‘Gurano ako kaparati nagbabasa nin Bibliya?’ (Salmo 1:1, 2) ‘Pirmi daw akong namimibi?’ (1 Tesalonica 5:17) ‘Gurano kaespesipiko an mga pamibi ko? Mga amigo man daw ni Jehova an mga amigo ko?’—Salmo 15:1, 4.
Gusto mo nin tabang? Hilingon an “Paano Makakatabang sa Sako an Bibliya?—Part 2: Kun Paano Gigibuhon na Nakakaugma an Pagbasa nin Bibliya” asin “Taano ta Dapat Akong Mamibi?”
TIP: Tanganing matabangan kang mag-andam para sa bawtismo, basahon an kapitulo 37 kan librong Ang mga Tanong ng mga Kabataan—Mga Sagot na Lumulutas, Tomo 2. Tawan nin atensiyon lalo na an worksheet sa pahina 308 asin 309.
a Basahon an artikulong “Dapat Daw Akong Magpabawtismo?—Part 1,” na nagpapaliwanag kan kahulugan asin kahalagahan kan pagdusay kan saimong sadiri sa Diyos saka pagpabawtismo.