Krisis sa mga Refugee—Minilyon an Naghaharali sa Ukraine

Kan Pebrero 24, 2022 pinunan na salakayon kan militar kan Russia an Ukraine. Nagresulta ini sa masakiton na sitwasyon; minilyon na tawo an namugtak sa peligro kaya naghaharali sinda sa nasyon.a

“May mga pagbomba saka mga pagsabog. Grabe an sitwasyon, dai ko maipaliwanag kun gurano iyan kanakakatakot. Kan maaraman mi na may mga tren na puwede ming sakayan, nagdesisyon kaming humali. Kaipuhan ming bayaan an mga pagsadiri mi ta saro sanang sadit na bag an puwedeng darahon kan kada tawo. An puwede mi lang madara mga dokumento, bulong, tubig, saka simpleng makakakan. Binayaan mi an gabos na iba pang bagay asin nagpasiring sa istasyon nin tren mantang may nagbabaragsakan na bomba sa palibot mi.”—Nataliia, taga Kharkiv, Ukraine.

“Dai mi talaga hunaon na magkakagiyera. Nakadangog ako nin mga pagsabog sa nagkapirang parte kan siyudad, asin nagyuyugo-yugo an mga bintana. Nagdesisyon akong maghali, na an dara su mga pinakakaipuhan ko sana. Naghali ako sa harong nin alas 8 nin aga, tapos nagsakay ako nin tren pasiring sa Lviv, dangan nin bus pasiring sa Poland.”—Nadija, taga Kharkiv, Ukraine.

Sa artikulong ini

• Ano an tunay na mga dahilan kan krisis na ini sa mga refugee?

• Sain puwedeng makakua nin paglaom an mga refugee?

• Makakatabang daw an Bibliya sa mga refugee ngunyan?

Ano an tunay na mga dahilan kan krisis na ini sa mga refugee?

An krisis sa mga refugee sa Ukraine nagpuon huli sa pagsalakay kan militar kan Russia. Pero ihinahayag kan Bibliya an mas hararom na dahilan kan gabos na arog kaiyan na krisis sa mga refugee:

• Dai naitao kan mga gobyerno nin tawo sa bilog na kinaban an mga pangangaipo kan mga tawo. Sa parati, ginagamit kan mga nasa katungdan an saindang awtoridad para kontrulon saka apihon an mga tawo.—Eclesiastes 4:1; 8:9.

• Si Satanas na Diyablo, “an tagapamahala kan kinaban,” igwa nanggad nin maraot na impluwensiya sa mga tawo, arog kan sinasabi sa Bibliya: “An bilog na kinaban nasa kapangyarihan kan saro na maraot.”—Juan 14:30; 1 Juan 5:19.

• Apuwera sa mga problema na nagpapasakit sa mga tawo sa laog nin ginatos na mga taon, nabubuhay na kita ngunyan sa peryodo nin panahon na ihinula kan Bibliya: “Sa huring mga aldaw maabot an delikado asin masakit na mga panahon.” (2 Timoteo 3:1) Urog pa diyan, sa huring mga aldaw na ini magkakaigwa nin mga giyera, kalamidad, kakulangan nin kakanon, saka epidemya—mga pangyayari na nagigin dahilan para bayaan kan mga tawo an saindang harong.—Lucas 21:10, 11.

Sain puwedeng makakua nin paglaom an mga refugee?

Ihinayag sa Bibliya na an satong Kaglalang, si Jehova,b sarong Diyos na may pagkamuot saka pagmalasakit sa mga refugee asin sa mga tawo na kinaipuhan na bayaan an saindang harong. (Deuteronomio 10:18) Nanunuga siya na reresolberan niya an mga problema kan mga refugee paagi sa saiyang gobyerno sa langit, an inaapod na Kahadian nin Diyos, na iyo an masalida sa mga gobyerno nin tawo. (Daniel 2:44; Mateo 6:10) Gagamiton ni Jehova an saiyang Kahadian para halion si Satanas na Diyablo. (Roma 16:20) Magigin sakop kan Kahadian na iyan an bilog na kinaban, kaya mawawara na an mga pagkabaranga na resulta kan iriwal kan mga nasyon sa teritoryo. An gabos na tawo sa kinaban magkakasararo bilang sarong pamilya. Mayo na nin siisay man na kaipuhan na bayaan an saiyang harong, huling nanunuga an Bibliya: “An lambang saro sa sainda matukaw sa sirong kan saiyang puon nin ubas asin kan saiyang puon nin higera, asin mayo nin siisay man na mantatakot sa sainda, huling si Jehova na pamayo nin mga hukbo an nagtaram kaiyan.”—Mikas 4:4.

An Kahadian nin Diyos sana an makakatao nin nagdadanay na solusyon sa inaagihan ta ngunyan na krisis sa mga refugee. Gagamiton ni Jehova an saiyang Kahadian para halion an mga problema na nagigin dahilan kaya napipiritan an mga tawo na magin refugee. Pag-isipan an nagkapirang halimbawa:

• Giyera. “Pinapapundo [ni Jehova] an mga giyera sa bilog na daga.” (Salmo 46:9) Tanganing maaraman kun paano tatapuson nin Diyos an mga iriwal, basahon an artikulo na “Kapayapaan sa Lupa—Paano?”

• Pang-aapi asin kadahasan. ‘Sa pang-aapi asin sa kadahasan ililigtas sinda [ni Jehova].’ (Salmo 72:14) Tanganing masabutan kun paano puwedeng mabago an negatibong pagmati na haluyon nang nakagamot sa puso nin mga tawo, basahon an serye nin mga artikulo na may temang “Pagpundo sa Dai Matapos-tapos na Pagkaungis.”

• Pagtios. “Ililigtas [ni Jehova] an dukha na naghahagad nin tabang.” (Salmo 72:12) Tanganing mahiling kun paano sosolusyunan kan Diyos an pinakakawsa nin pagtios, basahon an artikulong “Posible Ba ang Isang Patas na Sistema ng Ekonomiya?”

• Kakulangan nin kakanon. “Magkakaigwa nin abundang tipasi sa ibabaw kan daga.” (Salmo 72:16) Tanganing maaraman kun paano sisiyertuhon kan Diyos na mayo na nin magugutom, basahon an artikulong “Isang Daigdig na Wala Nang Gutom?”

Makakatabang daw an Bibliya sa mga refugee ngunyan?

Iyo. Apuwera sa pagtao nin siguradong paglaom sa maabot na panahon, matatabangan man kan Bibliya an mga refugee na makayanan an mga kadipisilan na napapaatubang sa sainda ngunyan.

Prinsipyo sa Bibliya: “Dai kamo mahadit sa ano man na bagay, kundi sa gabos na bagay paagi sa pamibi asin pagngayo-ngayo na may kaibang pasasalamat, ipaaram nindo sa Diyos an saindong mga kahagadan; asin an katuninungan nin Diyos na nakakalabi sa gabos na pakasabot iyo an magbabantay sa saindong puso asin kaisipan.”—Filipos 4:6, 7.

Buot sabihon: Hagadon sa Diyos na tawan ka nin panglaog na katuninungan ano man an mangyari. Hilingon an artikulong “Filipos 4:6, 7—‘Huwag Kayong Mabalisa Tungkol sa Anumang Bagay.’”