6 na Milyon an Nagadan Dahil sa COVID—Ano an Sinasabi kan Bibliya?

Sigun sa World Health Organization (WHO), sagkod kan Mayo 23, 2022, 6.27 milyon katawo an nagadan dahil sa COVID-19. Pero, sa sarong bareta na ilinuwas kan Mayo 5, 2022, pigtatantiya kan WHO na mas dakul pang marhay diyan an bilang kan mga nagadan. Sinabi kaiyan na kan 2020 asin 2021, “an kabilugan na bilang kan direkta o indirektang mga nagadan na resulta kan COVID-19 na pandemya . . . uminabot nin mga 14.9 milyon.” May sinasabi daw an Bibliya manungod sa arog kaiyan na makamumundong mga pangyayari?

Ihinula kan Bibliya na magkakaigwa nin nakakagadan na mga pandemya

•  Ihinula ni Jesus na magkakaigwa nin mga “epidemya” sa peryodo nin panahon na inaapod na “huring mga aldaw.”—Lucas 21:11; 2 Timoteo 3:1.

Nauutob na ngunyan an propesiya ni Jesus. Para sa dagdag na impormasyon, basahon an artikulong “Ano an Tanda kan ‘Huring mga Aldaw,’ o kan ‘Panahon kan Katapusan’?”

Nagtatao an Bibliya nin karangahan

•  “An Diyos nin gabos na karangahan . . . nagraranga sa sato sa gabos tang inaagihan na pagbalo.”—2 Corinto 1:3, 4.

Dakul na nagadanan nin mahal sa buhay an nararanga kan mensahe kan Bibliya. Para sa dagdag na impormasyon hilingon an artikulong “Pagharap sa Pagdadalamhati—Ang Puwede Mong Gawin” asin “Ang Pinakamabuting Tulong Para sa mga Nagdadalamhati.”

Ihinahayag kan Bibliya an permanenteng solusyon

•  “Dumatong lugod an Kahadian mo. Mangyari lugod an kabutan mo, kun paano sa langit, siring man sa daga.”—Mateo 6:10.

Sa dai na mahahaloy, sisiguraduhon kan “Kahadian nin Diyos” na “mayo nin residente an magsasabi: ‘May hilang ako.’” (Marcos 1:14, 15; Isaias 33:24) Hilingon an video na Ano an Kahadian nin Diyos? para maaraman an manungod sa gobyernong iyan sa langit asin kun ano an gigibuhon kaiyan.

Iniimbitaran mi kamo na makanuod nin urog pa manungod sa sinasabi kan Bibliya tanganing makinabang ka asin an saimong pamilya sa madunong na mga giya kaiyan saka nakakaugmang mga pangako.