Magkakasararo Daw an mga Nasyon Para Malikayan an Kapahamakan Huli sa Climate Change?—Ano an Sinasabi kan Bibliya?

Kan Domingo, Nobyembre 20, 2022, natapos an COP27 United Nations Climate Change Conference. Sa miting na iyan, dawa ngani nagkauruyon na tatabangan sa pinansiyal an tios na mga nasyon tanganing makayanan an mga kalamidad na resulta nin climate change, inaadmitir kan dakul na dai pa man giraray kaiyan masosolusyunan an climate change.

• “Gusto ko an desisyon na magtagama nin pondo para sa danyos,” an sabi ni António Guterres, secretary-general kan United Nations, kan Nobyembre 19, 2022. “Malinaw na dai pa iyan magigin igo . . . Nasa emergency room pa man giraray an satong planeta.”

• “An kinaban yaon pa man giraray sa sitwasyon na dikit na lang magkakaigwa na nin grabeng kapahamakan huli sa climate change.”—Mary Robinson, dating presidente kan Ireland asin dating UN High Commissioner for Human Rights, kan Nobyembre 20, 2022.

An mga hoben lalo nang nahahadit sa puturo kan satong planeta. Alagad, posible daw na magtinarabangan an mga nasyon tanganing maisagibo an pangako nindang solusyunan an climate change? Ano an sinasabi kan Bibliya?

Magkakasararo daw an mga nasyon asin magigin mapanggana?

Sinasabi kan Bibliya na sa ibong kan pagmamaigot saka sinserong mga paghihinguwa, an ano man na pag-uswag na naisasagibo kan mga nasyon sa pagresolber sa problema sa klima magigin limitado sana. Pag-isipan an duwang dahilan kun taano:

• “An tiko dai na kayang tanuson.”—Eclesiastes 1:15.

  An buot sabihon kaiyan: An mga gobyerno limitado sana an magigibo dahil an mga tawo dai talaga kayang pamahalaan an sadiri ninda. (Jeremias 10:23) Dawa pa kun magkasararo an mga nasyon, dai pa man giraray ninda kayang resolberan an mga problema sa kinaban, gurano man an pagmamaigot ninda.

• “Huli ta an mga tawo magigin interesado na sana sa sadiri nindang kapakanan, mamumuton sa kuwarta, . . . habo nin ano man na kasunduan.”—2 Timoteo 3:2, 3.

  An buot sabihon kaiyan: Nautob nin eksakto an hula kan Bibliya na sa panahon ta dakul na tawo an magigin makasadiri saka habong magtinarabangan para sa kapakanan kan iba.

Dahilan para maglaom

Dawa arog kaiyan, an puturo kan satong planeta dai nakadepende sa mga pangako kan mga gobyerno nin tawo. An Diyos nagtao nin may kakayahan na Tagapamahala kan kinaban, si Jesu-Cristo. Manungod saiya ini an sinasabi kan Bibliya:

• “An gobyerno mamumugtak sa saiyang abaga. An saiyang pangaran aapudon na Makangangalas na Parakonseho, Makapangyarihan na Diyos, Amang Daing Sagkod, Prinsipe nin Katuninungan.”—Isaias 9:6, nota sa ibaba.

Si Jesus an Hadi kan Kahadian nin Diyos, o gobyerno sa langit. (Mateo 6:10) Igwa siya kan kapangyarihan, kadunungan, asin kan pagmawot na pangatamanan an satong planeta saka an mga nakaistar diyan. (Salmo 72:12, 16) Sa irarom kan pamamahala niya, an gobyernong ini sa langit lalaglagon an mga “nagraraot kan daga” asin hihirahayon an satong planeta.—Kapahayagan 11:18; Isaias 35:1, 7.

Para makanuod pa manungod sa pinakasolusyon sa mapandestrosong climate change, basahon an artikulong “Climate Change at ang Kinabukasan Natin—Ano ang Sinasabi ng Bibliya?”