Magkakaigwa Daw nin Sunod na Giyera Mundiyal?—Ano an Sinasabi kan Bibliya?

Sa nag-aging 30 taon, iniisip kan dakul na tawo na estable na an relasyon kan mga nasyon asin mas nagrarahay pa ngani. Pero dahil sa dai pa sana nahahaloy na mga pangyayari, garo bako na iyan totoo.

• “Huli sa pagralaban kan Israel asin Hezbollah sa may linderos kan Lebanon, namemeligrong maapektaran kan giyera sa Gaza an kataraid na mga nasyon.”—Reuters, Enero 6, 2024.

• “Dahil sa pag-atake sa manlain-lain na lugar kan mga grupong kontrolado kaiyan asin sa biglang pag-aktibo giraray kan saindang programa nuklear, nagigin panibagong angat sa Sulnupan an Iran—na ngunyan kaalyado na an Russia asin China.”—The New York Times, Enero 7, 2024.

• “An mga pag-atake kan Russia padagos na nagkakawsa nin grabeng danyos sa Ukraine.”—UN News, Enero 11, 2024.

• “An dagos-dagos na pag-uswag kan ekonomiya asin pagkusog kan puwersa militar kan China, an nag-uurog na pagpapahalaga kan Taiwan sa saindang sadiring nasyonalidad, asin an tensiyon sa pag-ultanan kan Beijing asin Washington nagkekrear nin sitwasyon na madali sanang pagpunan nin iriwal.”—The Japan Times, Enero 9, 2024.

May sinasabi daw an Bibliya manungod sa nahihiling ta ngunyan na bakong estableng relasyon kan mga nasyon? Maresulta daw iyan sa giyera mundiyal?

Nakahula sa Bibliya an mga nangyayari ngunyan

An Bibliya mayo nin ihinulang ano man na espesipikong giyera na nahihiling ta ngunyan. Pero ihinula kaiyan an lakop na mga giyera na parating nangyayari sa panahon na kinabubuhayan niyato na nakakahali kan “katuninungan sa daga.”—Kapahayagan 6:4.

Ihinula sa libro nin Daniel na “sa panahon kan katapusan,” an makapangyarihan na mga nasyon sa kinaban ‘matinuruklangan,’ o madaraugan para magin an pinakamakapangyarihan. Sa pagdinaugan ninda, ipapahiling ninda an saindang makusog na puwersa militar asin gagamiton an saindang dakulang “kayamanan,” o kuwarta.—Daniel 11:40, 42, 43.

Sarong papaabot na giyera

Ipinaparisa kan Bibliya na an mga sitwasyon sa kinaban lalong magrabe. Ihinula ni Jesus na “magkakaigwa nin dakulang kasakitan na dai pang arog kaiyan na nangyari puon sa kapinunan kan kinaban.” (Mateo 24:21) An “dakulang kasakitan” na iyan masagkod sa sarong giyera na inaapod na Armagedon, na ilinadawan bilang an “giyera kan dakulang aldaw kan Diyos na Makakamhan sa Gabos.”—Kapahayagan 16:14, 16.

Pero, an Armagedon maligtas sa katawuhan, bakong malaglag kaiyan. Paagi kan giyerang iyan, tatapuson nin Diyos an pamamahala nin tawo, na nagkawsa nin dakul na mapandestrosong giyera. Tanganing maaraman kun paano an Armagedon maresulta sa nagdadanay na katuninungan, basahon an minasunod na mga artikulo:

• “Ano an Ralaban nin Armagedon?”

• “An Armagedon Sarong Maugmang Bareta!”